الجمعة، 29 مايو 2009

فراخ محشيه بالفريك


السلااااااااااااام عليكم


واخيرا وبعد طول انتظار يجى يومين يا نكهه


الفراخ المحشيه بالفريك

شايفين شكلها امووووووووور ازاي


الى العمل



اول حاجه هانعملها طبعا الفراخ مغسوله كويس وانا بادعكها بملح طبعا قبل ما اعينها فى الفريزر اصلا وانقعها كمان فى لمون وخل وملح باموتها يعنى من الاخر


هاتكون كده نضيفه وجاهزه وتمام اه الفراخ المحشيه يفضل تكون صغيره شويه يعنى قولي وزن كيلو ونص كده ما تزيدش عن كده

كيلو ونص بريشها ااااه مش صافي

صافي تعملها 750 جرام


نتبلها بقى عصير بصل ليمون خل توابل زي ما نحب انا يومها تبلتها بالبرتقال كمان انتم عارفين باحب استخدم البرتقال فى التتبيله لما نكون فى موسم البرتقال البلدي بيبقى تحفه وطبعا ملح وفلفل تتبيله عاديه جدا وممكن نضيف لها معلقة عسل ابيض او اسود حتى سكر


وندخل التبيله جوه الفراخ ويستحسن نتبلها من على بيات وممكن مثلا قبلها بساعتين ولا ثلاثه


بس ونروح بقى نعمل الحشوه

الفريك


ماهو الفريك اولا ده صورته



وهو عباره عن حبوب قمح خضرا ناشفه ومكسره شويه اسمه فريك اخضر

طبعا هانكون ناقعينه لمده نص ساعه على الاقل ولازم يتنقى كويس اوي وبعدين تغسليه فى المصفاه ساعات بيبقى فيه رمل


وبعد ما تصفيه كويس


المفروض انك تحطي معلقة سمنه بلدي كده محترمه وتحمري فيها الفريك تحطي الفريك وتفضلي تقلبي


وفى طاسه تانيه تكوني برضه شوحتي البصل وضفتي عليه التوابل والملح الازم لحد ما يبقى لونه اصفر كده وعليه لحمه مفرومه بالكميه الى تفضليها

يعنى مثلا الفرخه الواحده هاتحتاج كوباية فريك ناشف ومعاها بقى بتاع 100 جرام بس لحمه


وبعدين لما الفريك يتحمر كده وينشف وريحته تفحفح تضيفى البصل والتوابل واللحمه وتقلبي تاني لمدة دقيقتين


وبعدين تحطي عليها نص كوباية مايه وتوطي عليه النار خالص وتسبيه ربع ساعه بس انا ساعات احب اقطع فلفل الوان كده صغير على الخلطه زي الى فى الصوره دي

وده شكلها بعد ما خلصت الحشوه





وبعد كده نمسك الفراخ ونصفيها من التتبيله ونحشيها بقى على اد ما نقدر فريك ونقفل عليها من بره بخلة اسنان وبعدين نحطها فى صنيه مع التتبيله بتاعتها ونغطي الصنيه بورق فويل وندخلها الفرن


ها بتغيب شويه فى الفرن يعنى بعد ساعه الا ربع تقريبا كده نفتح بقى عليها عشان تتحمل وعشان تطلع محمره اوي ومش ناشفه


نعمل ايه بقى

لما نفتح عليها هانلاقيها سردت ميه مع التتبيله صح يب ناخد المايه دي ونزودها شوربه ونحطها على جنب


ونفضل كل عشر دقايق نطلع الفراخ وبالمعلقه كده نسقي الفرخه ونحاول التتبيله دي تتوزع على سطح الفرخه كووووووويس


يعنى 3 اربع مرات كده هاتكون اتحمرت بقى وبقت فله اوي ولو لقينا الصنيه هاتتحرق من تحت نبقى نحط فيها نص كوباية مايه حتى البخار الى طالع بيطري الفرخه


شغلانه صح اه ان كان عاجبكم ههههههههههههه


يعنى فى الاجمالي بتحتاج بتاع ساعتين فى الفرن علشان تستوي كويس اصل انا باحب الحاجه مستويه اوي .



طبعا حشوة الفريك دي ممكن اوي نعملها مع الحمام او السمان


وممكن كمان بدل الفريك نستخدم الرز العادي او الرز البسمتي او لسان العصفور كله بيمشي





يلا يا نكهه ورينا الشطاره يا جميل
الى يجرب يقووووووووولي


والف هنا يا حلوين

الأربعاء، 27 مايو 2009

الطعميه المصري






النهارده بقى عاملاكم مفجأه عجب


طعميه اه والله هى الطعميه بعينها



طبعا انا باموت فى الطعميه





بس الطعميه الجاهزه دي بالنسبه ليا عذااااب وحموضه وعسر هضم وحاجه جاز اوي ما تعرفش تقريبا بيقلوها فى زيت عربيات





المهم قررت نحن صبرني يارب انى ما اشتريش الطعميه الجاهزه ولا سيما ان العيال بيحبوها فى السندوتشات وطبعا الصبح بدري كده اجيب منين طعميه ولا مين يجبهالي






اليكم الطريقه بقى


المقادير





نصف كيلوا فول مدشوش الى هو فول تدميس عادي بس متقشر زي ده كده


و2 ربطه كسبره و2 ربطه كرات اخضر بلدي (زي البصل الاخضر كده بس رفيع ومن غير راس )


وممكن مش كرات نحط كسبره واي خضره تانيه عااااااااادي ما بتفرقش اوي


3 بصله كبيره مفرومه


خمس فصوص توم كبيره مفرومه


ملح وفلفل وكمون كتير وشطه ( انا عن نفسي باروح لعمو العطار اقوله ادينى توابل للطعميه وبيعملى خلطه كده على بعضها )



وبث على كده



نشتغل بقى يا حلوين


اول حاجه لازم تنقعي الفول خمس ست ساعات ويستحسن من على بيات


والخضره كمان تقطعيها حتت صغيره الكسبره والكرات يعنى


الطعميه محتاجه بقى مفرمه محترمه يعنى شديده


واحسن مفرمه لها الى هى مفرمة اللحمه دى مثاليه لها


لكن تنفع في كبه شديده او فود بروسرر قويه


المهم انا عادة باحب افرم كل حاجه لواحدها الاول وبعدين الخبطهم بقى واعيد فرمهم على بعض فى مفرمة اللحمه


شغلانه جاز لان المفرمه بتاعتي صغيره شويه بتعلنى لو حطيت الحاجات مصححه


المهم بعد ما بتتفرم بيبقى شكلها كده





ماما كانت زمان بتعمل الخلطه كلها على بعضها من غير فرم


الفول والخضره مقطعه والبصل مقطع والتوم والتوابل وكله على كله وتبعته لواحد بتاع طعميه وعنده ماكينه بقى بتاعة فرم قويه وفى خمس دقايق كان بيهف الاثنين كيلوا ولا نقعد نناحي من قلبنا


ممكن تعملوا كده برضه



الطعميه بقى بعد ما تبقى عجينه كده وحطيتى الملح والفلفل وكله تمام حطي على الكميه دي حوالي ربع معلقه بي كربونات الصوديوم


ولو مافيش لما تيجى تقليها ابقى قلبي فى الحته الى هاتقليها بيضه هاتبقى ميه ميه



كمان انا باحب ازود عليها حمص بتبقى حلوه اوي طبعا بيتنقع مع الفول وتكملي الخطوات عادي


لو طلعت الطعميه طريه زياده يعنى سايبه لو كانت الخضره كتير وكده


ممكن بقى تزوديها شويه بقسماط او شوية فول صويا ناعم الى زي البودره مش التاني ده نص كوبايه منه تخليها تمام


او حتى شوية دقيق


عارفين بتوع المطاعم بيزودوها دقيق كتير حتى ان بابا قالي ان فى ناس منهم بيطبخوا رز ويفروموه معاها عشان تزيد الكميه وتبقى سهله فى التشكيل


المهم الطعميه ممكن تحفظيها فى الفريزر عادي شهور بتقسميها فى اكياس على اد استعمالك للمره وزي ما اتفقنا تملي نص الكيس او ثلثه حتى وتخليها مبططه فيه عشان تفك معاكي بسرعه


تحمير الطعميه بقى


طبعا زيت عميق وبتعملي الطعميه كوره وبعدين تحطي طرف صوابعك فى السمسم وبالراحه هى لمسه واحده على الكوره تبططيها وتنزليه فى الزيت


طبعا النار تكون حاميه ولما تملي الطاس بسرررررعه تهدي النار شويه وتبدأ تقلبي



طبعا ممكن تعمليها اقراص زي الي فى الصوره الى فوق دي


وممكن تعمليها صوابع زي ما تحبي


وممكن تعملي بقى منها اصناف كتير هانبقى نبدع سوا ان شاء الله



وبالنسبه للرجيم بقى


انا مره جربت اعمل الطعميه من غير زيت خالص


فى طاسه تيفال اه والله


حطيتها كده لقيتها اتحروقت شويه فبقيت يادوووب ادهن الطاسه زيت خفيف اوي


وبعدين احط الطعميه وبمقصوصه بلاستك باشيلها بالراحه واقلبها واوطي عليها بقى


هى يعنى ما بتبقاش زي المقليه


بس حيث ان الواحد بيبقى عامل دايت وهايموت على طعميايه بتكون كده رضا اوي


اي خدمه يا فاتيما


فى حد عنده اي سؤال يتفضل يقووولي



واي حد يجرب يقولي برضه

الأحد، 24 مايو 2009

البغاشه



السلام عليكممممممم


بعد ما عملنا المره الى فاتت بقى عجينة البف باستري هاهريكم منها اصناف ان انا باموووت فيها بشكل بشع


البغاشه النهارده بقى اسهل حاجه


طبعا زي ما قلتلكم فى الردود لما شملوله سألت عن حفظ العجينه فى الفريزر اه طبعا انا باعملها واخليها جاهزه شوفوا كده بوست التلاجه هاتلاقوا فى عجينه فى صوره من الصور بافردها واقطعها وطبقات بلاستك ما بين كل واحده والتانيه وعلى الفريزر


لما اجي استعملها بقى فى اي حاجه باطلعها وافردها على ضنيه هما عشر دقايق بتكون فاكه وانا باخليها تخمر كمان قبل ما احفظها فى الفريزر عشان تبقى على الشغل على طول


المهم هانعمل بقى البغاشه


هانعمل العجينه او تكون جاهزه عندنا او نشتريها جاهزه ده بالنسبه للحريم الشلت عادي

ههههههههههههههههه


البغاشه بقى انا جربتها بالعجينه الى من غير خميره الى هى زي الجاهزه

وجربتها بالعجينه الى فيها خميره


طلعت احلى الى بالخميره ومش شاربه زيت كتير


المهم شايفين العجينه اهو مقطعها مسطيلات ومثلاثات بس لو هانعمل البغاشه نقطع اصغر من كده شويه




خلاص هى كده جاهزه نقليها بقى فى زيت غميق وسخن نسقطها فى الزيت وهما بالظبط 3 دقايق وناخد بالنا عشان بتتحرق بسرعه بالكتير اوي خمس دقايق وتلاقيها استوت وطبعا بيتضاعف حجمها اول ما تنزل الزيت السخن




وبعد كده نشيلها من الزيت ولونها وردي زي الى فى الصوره دي


ونحطها على كلينكس دقيقتين بس يعنى على ما نحط غيرها فى الزيت تقريبا


وبعدين نسقطها فى الشربات او الشيره


شربات ما يكونش خفيف اوي ولا تقيل اوي وسط كده


ونسيبها فى الشربات دقيقتين بس عشان ما تشربش شربات كتير

ونطلعها نحطها فى مصفاه ونحط حاجه تحت المصفاه ينزل فيها الشربات الزياده


ونكرر بقى لحد ما نخلص الكميه الى احنا عايزنها


وبعدين نرصها فى السرفيس زي الى فوق ده كده


ونرش عليها قرفه ناعمه وجوز هند


ووناكل بالف هنا ونتخن وكده يعنى


فاتيما مالهاش حل ا لاكله دي فى الاوبن وعليكى خير



سهله بقى اظن


اتفضلوا اعملوها وقولولي رايكم


والبت اختي الى عملتها مره ودوقتهالي بس هى من الحريم الشلت بتشري العجينه


اه اه يا بت عجبك ولا مش عاجبك


بس انا جربتها بالعجينه الى بخميره اه طلعت مختلفه عن العجينه الجاهزه لكن انا شايفه انها احلى وبتشرب زيت اقل


وعملت برضه الي زي الجاهزه فى البيت بس الى بخميره احلى


جربوا بقى وقولولي

الجمعة، 22 مايو 2009

عجينة الباف باستري (المورقه)

عجينة البف باستري
دى يا جودعان مهمه جدا فى عالم المخبوزات
بنعمل منها مليون حاجه
هى يمكن تكون متعبه شويه بس والله لو بتعملي كميه مش كبيره مش هاتبقى مشكله اوي يعنى
انا عن نفسي جربتها بتاع خماشر مره على ما وصلت للنتيجه دي
هههههههههههههههههههههههه
يلا بقى نشتغل عشان مش فاضيالكم
الحقيقه انا قريت مره انه بيتعمل من غير خميره بس انا جربته من غير خميره كانت ناشفه اوي لما خبزتها مش عارفه بقى دا رجع لان الفرن كان بارد شويه ولا لا بس خلينا نقول ان الى من غير خميره تحت الدراسه لسه
الى انا عملتها وطلعت ميه ميه الى هى بخميره
اولا هانتحتاج مقدار من عجينة ا لمخبوزات
احنا عملناها مع بعض قبل كده روحوا شوفوها
ادي العجينه اهي جاهزه
هانرش تحتها دقيف خفيف وفوقها
وبندأ فرد بالمنشبه
بعد ما فردناها خلاص زي ما انتم شايفين ودايما نتاكد ان تحتها دقيق خفيف عشان ما تلزقش مننا ولا تتقطع وطبعا كل ما تلزق فى المنشبه كمان نبل ايدنا دقيق ونحط على العجين برضه عشان ما تلزقش فى النشابه ما تقلقوش من الدقيق خالص
بعد كده هانجيب الزبده حوالي 200 جرام زبده
وهانكون مجمدنهم فى التلاجه مش فى الفريزر
ونبشرهم على وش العجين المفرود زي الصوره دي بالظبط
طبعا مش بنعمل الزبده كلها لا حاجه بسيطه كده على اد ما نقدر
وبعدين نطبقها على بعضها كده من الجانبين
وبعدين نرجع تاني نطبق الطرفين فوق وتحت زي الصوره دي كده


ونسيبها ترتاح عشر دقايق فى التلاجه خصوصا لو كنا فى الصيف .

وبعدين نرجع نرش دقيق تااااااااااان ونفردها تاااااااااااااااني ونبشر زبده تاااااااااني




ونطبقها تااااااااااااااااااااني




ونكرر الحكايه دي بتاع 3 اربع مرات كده على اد ما نقدر يعنى ومابين كل مره والتانيه نسيب العجينه ترتاح 10 دقايق فى التلاجه

وبعدين لما نخلص خالص نفردها بقى زي كده ونقطعها ونشكلها زي ما نحب ونعمل بها الى هانعمله و بعد ما نقطعها ونرصها فى الصواني نسيبها تخمر شويه وبعدين نخبزها



انا جربت العجينه دي فى الباتيه والكرواسون والبغاشه
لو جربتها فى حاجه تانيه هاقولكم
وان شاء الله المره الجايه هانعمل منها البغاشه
وشملوله فكرتني بحكاية حفظها
ايوه احنا ممكن طبعا نعملها ونقسمها مثلا مربعات او مستطيلات ونحطها فوق بعضها ومابينهم شرائح بلاستيك وطبعا ده ياريت يكون على طبع مسطح بلاستيك عشان ما تطلعش معوجه وينفع يتحط فى الفريزر معاها لحد ما تجمد ممكن نشيل الطبق من تحتها
لو بصيتوا فى الصوره الى فى بوست التلاجه عندي البوست الى قبل الى فات
هاتلاقوا فى صوره فيهم فيها عجينة بف باستري معموله كده فعلا فى الجنب على الشمال
شكرا يا شملوله كنت ناسيه اقول الحته دي
يلا نشووووووووفكم على خير
قلولي رايكم






الاثنين، 18 مايو 2009

محشي كرنب (ملفوف)

تحديييييييييث هام جدا


الجميله الشاطره نكهه مغربيه عملت المحشي واهووووووو طالع زي الفل من ايديها
تسقيفه كبيره بقى















بناءا على طلب الجماهير المغربيه الى هي نكهه مغربيه حبيبتى


هاعملها النهارده محشي كرنب وفى اقوال اخرى ملفوف




صحيح هو مش موسم ا لكرنب فى مصر دلوقتي


لكن فى كرنب فى السوق كتير




والى مش عاجبه يعمل ورق عنب بقى




المهم


اول حاجه هانعملها نجهز الخلطه


الاول هاقولكم الطريقه التقليديه المسبكه




هانعمل كميات تعمل حلة محشي وسط كده مش زي الحله الى في الصوره خالص


نقول هانحتاج كيلو طماطم حمرا


ولو مش حمرا اخلطوا عليها صلصلة علب




و3 بصلات كبار كده وحلوين




وحوالي كوبايتين خضره مفرومه او مقطعه صغير اوي




الخضره بقى حماتي بتحط شبت وكسبره وتقول لا بقدونس يع


امي بتحط شب وبقدونس وبتقولك كسبره يع




انا بقى باحط الا الاقيه وان كان عاجبهم




فطبعا حطوا الى يعجبكوا بقى بس لازم لازم شبت




هانعمل ايه بقى




الاول هانفرم البصل


وفى معلقتين سمنه كده حلوين ومربربين هانحمره لحد لما يبقى لونه اصفر مش احمر اوي


وبعدين نحط عليه عصير الطماطم ونسيبه يغلي لما يعيط من كتر الغليه يتسبك يعنى




يبقى تقيل جدا على اد ما نقدر




وبعدين فى الاخر بقى نزود عليه الخضره والملح والفلفل وبهارات زي ما نحب


انا باجيب خلطه من عند العطار بهارات محشي (لكن فى العادي للكرنب باحط فلفل وكمون )


ونسيبها بقى تغلي مع الخضره 3 دقايق بس مش كتير عشان التقليه ما تبهتش


امي بتقول كده ماليش دعوه


وهايكون ده شكل التقليه






ندخل على الورق


الكرنب طبعا كلنا عارفين بنسلقه ازاي


بتخلعي الورق ورقه ورقه بالرااحه وتنزليها فى مايه بتغلي يعنى من دقيقتين الى ثلاثه بالكتير


وتطلعيه وتحطيه فى مصفاه وتحطيه تحت الحنفيه بسرعه عشان ما يتهارش من الحراره العاليه


ولما نخلص ويبرد


نقطع الورق بقى بالسكينه بحيث يبقى مستطيلات زي الصوره دي كده










وطبعا نكون جهزنا الرز هانحتاج حوالي كيلو رز


نغسله ونصفيه كويس ونسيبه على جنب


وبعدين لما نخلص التقليه والورق وكله تمام


نحط الرز فى التقليه ونقلبه كويس اوي


ونبدأ نحشي بقى




اه وانتى بتقطعي الورق هايبقى فى حتت صغيره وكده ما ترميهاش دي بقى تجيبى الحله الى هاتحشي فيها وتحطي فيها معلقتين زيت وبعدين تفرشي الورق المقطع ده تحت كده عشان المحشي الى تحت ما يتلسعش ويتحروق من النار




وبعدين انا باحب بقى الارضيه دي واكلها


ههههههههههههههههههههههههههههههههههههه






شوفوا انا مصوره المراحل بتاعة لف المحشي بس طبعا انا كنت باصور نفسي يعنى الصور طالعه مش اد كده


بس يعنى جايز تفهموا حاجه




احنا الاول هانفرد الورقه على ايدنا ونحط رز قليل عشان ما تطلعش طخينه يادوب نص معلقه رز


نحط الرز على اول الورقه من فوق


زي كده








بعد كده نطويها بقى بايدنا التانيه زي كده





ونلفها كمان على بعضها كده
بس ونكمل لف لحد ما تبقى شكلها كده










ونرص المحشي جنب بعضه فى الحله بنظااااااام يا دواير يا خطوط زي الحله دي كده






وده شكل الحله الى الواحد بعد ما يخلصها يتشاهد على روحه ويكون جاله شبه كساح فى العمود الفقري


ويقول فى عقل باله بالذمه مش انا عقلي تعبان عشان باعمل محشي اصلا









بعد كده بقى نسويها


ممكن نسويها بشوربه (مرقه) والى ما عندوش شوربه يسويه بمايه مش هايقول لا


هحنتاج حوالي 3 كوبايات شوربه وطبعا عليهم معلقة ملح


لان الرز فى المحشي هايكون متشرب من التقليه وكده يعنى




هانحط كمان معلقة سمنه على وش الحله خصوصا لو مش عاملينه بشوربه




ونغطي عليه بطبق استانلس كده صغنون الاول يكون لازق في وش الحله عشان الفقاعات بتاعة الغليه ما تفتحش المحشي




وبعدين نغطي الحله بقى بالغطى بتاعها العادي


ونرفعها على نار عاليه نسبيا




ونسيبها لحد ما تغلي نوطي النار




وبعدين لما المايه تبدأ الرز يتشربها وتنشف نوطي النار اوي او نحط شياطه




ونسيبه بقى حوالي نص ساعه بعد كده




وقت السوى كله بيبقى حوالي ساعه




وده شكله بعد ما استوى










ما لحقتش اصور فى اطباق بقى عشان بمجرد غرفه كان فى ناس بتاكل وكده يعنى


هههههههههههههههههههه




يارب يكون الوصف سهل وفهمتوا حاجه مني








بالنسبه للدايت بقى


تعالى يا فاتيما




انا يا اختي ما باحرمش نفسي باكل محشي برضه




بس مش باعمله تقليه زي كده




لا ابسولتلي




انا باعمل عصير الطمام وافرم البصل وادعك البصل بالملح والفلفل كويس وبعدين احطه على الطماطم واسيبهم يتسبكوا من غير سمن خالص


وبعدين اكمل بقى الى فات ده كله عااااادي




وكمان باكتر اوي البصر ويا حبذا لو جبت شويه ورق كرنب لسه ما اتسلقش (قلب الكرنبه ) وافرمها واحطها كمان فى التقليه




كل دي محاولات لتقليل كمية الرز فى المحشي




بعد كده ممكن استخدم رز بسمتي


صحيح بيغير طعم المحشي شويه


بس طبعاااااااااااااااا حيث اننا جعانين وغلبانين


بنرضى باي حاجه يعنى احسن من مافيش




وممكن كمان تسلقي الرز المصري عادي وترمي مايته وبعدين تحطيه فى التقليه وعادي بس بقى تسعين فى الميه بيطلع معجن الموضوع ده لان الرز المسلوق عايز عنايه خاص فى السوا




وكمان فارسه ماله البسمتى يعنى




المهم وتسويه عادي خالص




تقدري تاكلي من المحشي ده خماشر محشيايه ما حدش يقولك حاجه يا فاتيما




واي خدمه والله مش عارفه من غيرى كنتم هاتعملوا ايه




اي استفسار انا جاهزه


وفضفضه راجعي عليا بقى لو انا ناسيه حاجه




الى يفهم حاجه يقولي


ههههههههههههههههههههههههههههه








الجمعة، 15 مايو 2009

تنظيم الفريزر والثلاجه




النهارده يا حلوين


هانتكلم عن تنظيم فريزر ا لتلاجه


والتنظيم ده موضوع سهل اوي وله فوايد كتير جدا


اولا : تقدري توصلي للحاجه بسهوله


ثانيا : الفريزر بياخد اكتر بكتيييييييير جدا


ثالثا : ما فيش حاجه تتركن لما تبوظ او تبقى منتهية الصلاحيه او تقدم اوي وتبقى مش صحيه


الترتيب بقى ازاي


شايفيين الصوره دي ؟؟




شوفي الاكياس معموله ازاي ؟؟


بتحطي الحاجه فى الكيس تكون لحد نص الكيس بس وبعدين تطبقي الكيس تطويه للجنب كده على مرتين وترصي الحاجه فوق بعضها كده


شايفين الصوره شكلها ازاي


دي اكياس خضار انا الى مجهزاهم فى البيت بسله وجزر وقلقاس


والصف التاني طعميه والىجنبها سبانخ


ان شاء الله هانعمل بوست عن تجهيز الخضار للحفظ فى الفريزر


شوفوا كمان الصوره دي

طبعا الفريزر بيبقى رفين فانا باعمل رف للحاجات الى بتبقى مفركشه شويه او اكياسها كبيره

زي مثلا الفراخ البط ايام ما كان فى بط يا ابو زيد دلوقتي خلاص راح

زي الصوره كده فى اكياس عيش والاصفر ده كيس كنافه بس برضه الواحد يفضل يعمل تباديل وتوافيق كده على اد ما يقدر الحاجه تترص تاخد اقل مكان ممكن

واكياس اللحمه برضه باعملها بنفس الطريقه الاكياس المبططه دي

وده كمان بيخليها لما تيجى تفككيها اسهل بكتير

كمان فى حاجه مهم

شايفين التلاجه فى الرف الى فوق فى فتحتات التبريد حاولي بقدر الامكان ما تقفليهاش باكياس طريه علشان التجميد فى الفريزر يفضل كويس

يعني من الاخر نبطل نربط الكيس ونزقله فى اي ركن فى التلاجه

انا مش باربط الا الاكياس الى بتكون سايله اوي

لبن مثلا صلصه طماطم كده يعنى

وبرضه باملا نص الكيس واقل وافرغ الكيس من الهوا واربطه من فوق خالص واحطه على مكان مسطح فى الفريزر عشان برضه يبقى مبطط ومفرود ما يعمليش ازمه

لوفى حاجات بقى رفيعه او ازايز او برطمانات بلاستك صغيره

باحطها فى باب الفريزر

ده بالنسبه للفريزر

بالنسبه للثلاجه نفسها بقى

دايما دايما ما تحطيش حاجه مكشوفه لانها اولا هاتنشف وتبوظ وثانيا لو لها ريحه هاتخليلك ريحة التلاجه مش تمام

وممكن تغير ريحة الاكل الى في التلاجه

على طول علب لها غطا او حطي الطب نفسه داخل كيس

والفاكهه الى لها ريحه برضه حطيها فى كيس زي الجوافه والموز

وفى حاجه كمان حلوه اوي ممكن تعمليها انك تجيبى قطعة فحم

فحم ايوه من الى بنولع فيه ده وتلفيها فى منديل ورق خفيف عشان بس ما تنزلش اسود فى التلاجه وتحطيها كده فى ركن في التلاجه دي بتمتص الروايح وممتازه فعلا

بس كده يا جودعان

اي خدمه يا بنات المتبدئين

الى عنده اي ملاحظات يقول كده ويفكرني لو نسيت حاجه

الأربعاء، 13 مايو 2009

كفتة داوود باشا





السلاام عليكم يا حلوين

كيفكم ؟؟ انشاله طيبييييييين ؟؟

النهارده عاملاكم اكله انا باحبها اوي وهى كفتة داوود باشا


حد بقى يسألني ويقولي مين هو داوود باشا


اقولكم والله ما اعرفه ولا عمري شوفته

بس ممكن لو حبيتوا تسموها كفتة صبرني باشا مافيش مشكله


شوفوا بقى انا اول مره كلتها مش فاكره فين عجبتنى ولما جيت اعملها بقى طورتها وغيرتها تماما وعملت بالطريقه الى انا هاقولكم عليها

والى انا باحبها اوي


وطبعا تقدروا انتم كمان تغيريوا وتبدلوا فيها عادي جدا


يلا ندخل على الشغل


الاول لخلطة الكوفته نفسها زي ما انا باعملها برضه تقدروا تغيروا عادي المهم تطلع كوفته
نص كيلو لحمه مفرومه ناعم


بصله مفرومه ناعم


نص كوب فول صويا مطحون ناعم


بيضه



ملح وفلفل وتوابل


بيضه ليه ؟ عشان الفول الصويا بيخليها تطلع طريه شويه مش ماسكه نفسها

طيب بنحطه ليه الفول الصويا ؟؟ كده بقى هههههههههههههه

عشان انا ما باحبش الكوفته تكون لحمه بس كده بتبقى مكتومه شويه مش باعملها لحمه بس الا لو كانت هاتتشوي على فحم

مافيش فول صويا؟؟


نص كوباية برغل وننقعها الاول ربع ساعه



او نص كوباية فريك اخضر (باموت فيه انا فى كل حاجه )



او حتى نص كوباية رز ننقعها ونسيبها تنشف ونطحنها دى بتمسك الكوفته وتخليها جامده ومساميه فى نفس ذات الوقت


فى ناس بتحط بطاطس مسلوقه مش باحبها انا



فى ناس بتحط عيش فينو تنقعيه فى مايه او شوربه اربع دقايق وتعصريه وتخلطيه مع اللحمه



ده بيخليها مش مكتومه وماسكه نفسها فى نفس ذات الوقت


عايزه تعمليها لحمه ساده برضه مش هاتقول لا يعنى انا باقولكم الى انا باعمله

اكتر حاجه باحب احطها على الكوفته الفريك الاخضر عشان اناباموت فى طعمه

واسرع حاجه الفول الصويا المطحون ناعم بيبقى زي الدقيق كده عشان باكبه دوغري ولا نقع ولا حاجه بس لازم احط معاه بيضه عشان بيبقى يخليها طريه زياده لما تستوي البيضه بتخليه يمسك نفسه

طبعا انا باحط البصل فى الكبه يتفرد ووراه الفوق الصويا يتخلط مع البصل ويشرب ميته وبعدين البيضه والملح والفلفل


وبعد كده احط اللحمه بقى تتخلط مع الكل كويس دقايق وبتكون جاهزه خلطة الكوفته



بعد كده نشكلها تبقى كورات زي الصوره دي كده

طبعا هانحط فى الصنيه الاول زيت حوالي معلقتين او ثلاثه ونرص الكوفته زي ما شوفتم كده

بعد كده هانحطها على البوتجاز من فوق او لو كان الفرن عندك شغال حطيها يكون احسن من غير ما تغطيها ولا حاجه

احنا عايزنها تتحمر بس لاننا لسه هانسويها
وبعد ما تتحمر وتنشف هاتطلع كده


انا كنت الاول باقليها فى زيت بعد ما اغطسها فى دقيق لكن كانت بتبقى تقيله اوي وبتاخد دوشه كمان


المهم على ما الكوفته تتحمر نكون عملنا الاتي


نقطع فلفل الوان مكعبات وطماطم زي كده

نقطع بصله جوانح وفص توم صغيره كده ونهرسه
ولما الكوفته تتحمر نحط البصي الاول وبعد دقيقتين نحط التومه

وبعد كده بقى نحط الخضار الى قطعناه الفلف والطماكم على وش الصنيه زي كده


ممكن بقى نعمل طمطمايه فى الخلاط مع شويه مايه ونصبها على الكوفته وممكن نكتفي بنص كوباية مايه

وممكن ندوب معلقة صلصة علب فىنص كوبايه مايه ونصبها عليها

يعنى على حسب ذوقك انا ساعات اعملها من غير عصير طماطم اوصلصه تبقى هاديه كده ولطيفه


المهم هانسيبها على النار فوق لحد ما تغلي وممكن ندخلها الفرن


اون نسيبها على النار فوق لحد ما الخضار يبدا يدبل والمايه الى فى الصنيه تتقل شويه وبعدين ندخلها حتى للشوايه بس وشها يتحمر

مش بتاخد كتير على النار يعنى بالكتير 20 دقيقه بعد ما نضيف الخضار عليها

وبتطلع من الفرن شكلها كده





وطبعا ممكن نقدمها مع مكرونه زي الصوره دي بتبقى اشيك مع الاسباجيتى بس ما كانش عندي مش عايزين اماره بقى



وممكن مع ارز ابيض وممكه مع خبز
زي ما تحبوا

بالنسبه للاكل الدايت الطبخه دي حلوه اوي اربع خمس كوفتات مع نص رغيف سن او 3 معالق رز او اربع معالق مكرونه

وطبق سلطه تبقى فله جدا

بالنسبه للمبتدئين مافيش اكتر من كده تفاصيل يا بنات عايزين شغل

وبالنوسبه للعاملات الغلابه والمغتربين العزاب مافيش اسهل ولا اسرع من كده خصوصا لو جهزتوها من على بيات وبس على التسويه

واخيرا بقى لو ولادك رخمه زي ولادي ويقعدوا ينقوا الخضار الى حوالين الكوفته يرموه

ممكن تعملي الخضار مع البصل وكل كله فى الكبه وتحطيه مفروم هايبقى يعمل صوص بقى مش قطع خضار

بيبقى حلو اووووووي برضه


والف هنا والى يجرب يقووووووولي




الجمعة، 8 مايو 2009

بسبوسه بالقشطه




بسبوسه بسبوسه بت يا نوسه يا نوسه شايله البسبوووووسه




فاكرين يا ولاد البت الصينيه الى كانت بتغني الاغنيه دي بتاعة شاديه وبتقولها بلغه مكسره




كنت وانا صغيره باحب اتفرج عليها اوي


هههههههههههههههههههه




الصينين من يومهم ناوينلنا باين




مخنوقه او بنت الغرب يعنى قالتلى مره انها بتعمل البسبوسه بتعجنها بالقشطه بس وقالتلى على طريقه كده وقلت هابقى اجربها وقد كان يا حلوين




عملتها وصورتها وماليش بركه الا انتم


طلعت تحفه يا بنت الغربه والله


انا ما كنتش باعمل البسبوسه العاديه كتير اساسا عشان بتبقى مسكره اوي وعندي بيبحبوا البسبوسه الى انا عملتها قبل كده معاكم ولما كنت باعملها كنت باعملها بطريقه تانيه




المهم


ندخل على الشغل بقى


الاول خدوا المعلومه دي :


السميد هو نوع من الدقيق او بالاصح هو اعلى درجه من درجاته وهو بيكون جنين القمح ودي اعلى درجه من درجات الدقيق


لان حباية القمح بيطلع منها كذا درجه




وعشان كده السميد ده بيتخش كتير اوي


خدي بالك وانتى بتشتريه عشان بيخلطوه بدقيق عادي وبيخلطوه بعيش مطحون


اه والله


حتى الباكتس المقفوله جبتها مره لقيتها مغشوشه


شوفي حد كويس اشتري منه وبصي كويس فى شكل السميد وهاتعرفي انتى بعد كده الدقيق الكويس من الوحش


وخدي بالك احفظيه فى التلاجه لانه بيبوظ بسرعه جداااااااا




الشغل بقى بطلوا رغي




المقادير




2 كوب سميد( دقيق بسبوسه)


نصف كوب جوز الهند مبشور ناعم
ملعقه كبيره بكنج بودر


1 كوب قشطه (طبعا انا باستعمل الفلاحي ما انتم عارفين شعاري فى العوده للطبيعه )


1 كوب حليب


1 ملعقه كبيره سمن بلدي


2 كوب شربات حلويات (قطر سيرب شيره )




الطريقه:


يعنى اسهل حاجه ممكن تعمليها فى حياتك




اول حاجه نعملها هانحط الشربات على النار (كوبايه مايه وكوبايه ونص سكر ولمونه)


ولما يغلي نوطي عليه خالص ونسيبه حوالي ربع ساعه بالنسبه للبسبوسه




هانحط السميد فى طبق كبير وغويط وبعدين نخلط عليه جوز الهند ونقلبه


وبعد كده بقى نحط بقيت القشطه والسمنه ونص الحليب تقريبا وبعدين نقلب كويس




انا باحب العجاين تبقى طريه زياده




فانا باحط نص اللبن بس والباقي اضيفه بالتدريج حسب حاجة العجين بس هى غالبا تاخد الكوبايه كلها


ونقلب لحد ما تنخلط كويس




وبعدين نجيب صنيه متوسطه ونبطنها


( ندهنا سمنه خفيف ونرش عليها رشة دقيق ونوزع الدقيق بهز الصنيه شمال ويمين عشان المبتدئين الغلابه )




وبعدين نصب فيها عجينة البسبوسه وتبقى شكلها زي الصوره دي بالظبط




وطبعا الى عايز يحط بندق او لوز او اي مكسرات على الوش يحط




لكن انا نظرا لانى ولادي هبل وبيقعدوا ينقوا المكسرات يرموها




ونظرا لان كيلو البندق ب 65 جنيه فقلت طب وعلى ايه عيال فقريه كلوها ساده










وبعد كده ندخلها الفرن حرارته حوالي 170 درجه

وبتقعد حوالي 20 دقيقه او 30 حسب فرنك
وتطلع شكلها كده

هانكون احنا خلصنا الشربات طبعا ولسه سخن ايوه لازم يبقى سخن مع البسبوسه دي

شايفين الصوره دي فى الوان الشربات ودرجاته
بالنسبه للبسبوسه هانختار احنا اول لون من الشمال الى هو افتح حاجه


ولما تطلع البسبوسه من الفرن نصب عليها كوبايتين الشربات الى هما كمان سخنين


ونسيبها على سطح مستوي عشان الشربات يتوزع كويس

ولما تبرد نقطعها وهاتبقى زي الصوره الى فوق دي بالتمام

وناكلها ونتخن بالصلاة على النبي

بالنسبه لبتوع الرجيم مطرودين من هذا البوست ا لا لو كانوا فى الفري داي

ههههههههههههههههههههههههههه

الى يجرب يقولي يا حلوين