الأربعاء، 17 أغسطس 2011

كنافه بالمانجو



تتتاتتااااااااااااااااا
المطبخ حبيبى وحشنى مووووت  بقالي كتير ما رغيتش معاكم فى الطبيخ و اديت كلمتين للحريم الشلت  ياااااااه

انا من اول رمضان عايزه انزل اي صنف بس كده  تفاريح الا المطبخ بتاعي صدى هنا  ان المطبخ الواقعي يعتقنى ابدااااا

لحد لما فتاه من الصعيد حبيبتى طلبت منى كنافه بالمانجو قلت لا ممكن ابدا لازم اعملها

وحياتك يا فتاه انا عملت كنافه بالمانجه مخصوص عشانك كانوا عايزين كنافه بالكاستر عاديه قمت عملت شويه بالمانجه عشانك انت بس جميل

هيا بنا الى المطبخ  يا حلوين

الكنافه زي ما عملناها سوا قبل كده هانجيب الكنافه ونفرمها لو ما كانتش مفرومه   او حتى تقطعيها كويس حتت صغيره وطبعا يفضل الكنافه الشعر او الرفيعه اوي  بتكون احلى

هانعمل مقدار نص كيلوا كنافه

هانحتاج لها 3/4 كوب سمن  ومعلقتين زيت

ليه معلقتين الزيت ؟  عشان احنا هانحمر الكنافه  والتحمير بالسمن البلدي لوحدها السمنه تتحروق وتبقى مش تمام معلقتين الزيت بيخلوا التحمير احسن وكمان بتكون الكنافه مقرمشه  زي ما انا باحبها :)

هانسخن السمن والزيت على النار  وبعدين نحطها على الكنافه بالمعقله عشان نوزعها كويس بعدين نفركها بادينا كويس عشان السمن يتغلغل فى الكنافه كويس  وبيبقى شكلها كده



بس ده مش نص كيلو ما تركزوش فى الكميات الى فى الصور عشان ما تهيسوش


المفروض اننا نحمر الكنافه  فاحنا ممكن نحمرها على البوتجاز من فوق ونفضل نقلبها زي ما بتحمري الشعريه كده مثلا 
لكن انا لما باكون عامله كميه بافردها فى صنيه كبيره واحطها فى الفرن  اسهل  بس لازم تتقلب مرتين كده او ثلاثه فى الفرن 
وطبعا بتحمريها على اد ما تحبي انا عن نفسي باحبها غامقه شويه ممكن تخليها افتح من كده 


اول لما بتطلع من الفرن بنسقيها شربات نكون محضرينه من قبلها وبارد ..الشربات او القطر او الشيره  يكون تقيل  عشان ما يخليش الكنافه تبقى طريه وبايشه وكمان تبقى متماسكه شويه مع بعضها

هانحط على النص كيلوا كنافه حوالي كوباية شربات  ونقلبها ونسيبها تبرد خاااااالص 

على ما تبرد نكون عملنا شوية كريم شانتيه هنحتاج حوالي كوبايه ونص كريم شانتيه  

ولما تكون الكنافه بردت هانقسمها نصين ناخد النص الاولاني نفرده فى صنيه او طبق كبير  زي كده  


النص كيلو يبقى مناسب له الصنيه المتوسطه او اي حاجه فى مقاسها  وممكن كمان نعمله وحدات صغيره  فى اطباق صغيره على اد فرد واحد  مافيش مشكله 

بعد كده هانحط طبقه من الكريم شانتيه وياريت نستخدم كريم شانتيه  سكرها خفيف او نجيب الاكياس والعلب العاديه فى السوبر ماركت مش هاتقول لا 
لو قالت لا ابعتوهالي وانا ااعنفها على هذه الفعله الشنعاء :)

بعد كده هانحط طبقه تانيه من الكنافه  ونتعامل مع الطبقه التانيه برفق كده ونرشها على وش الكريمه عشان مش هاينفع نضغط او نحركها عشان الكريم شانتيه سوفت اوي وهاتطلع من الجنب 

ونرجع تاني نحط بقى كريم شانتيه للوش ونفردها كويس زي كده 


بعد كده بقى هانرص فوقيها المانجو الى هانقطعه شرائح بالشكل الى يعجبنا  وننقي اي نوع مانجه طبعا بنحبه بس يكون مستوي وجامد فى نفس الوقت عشان نقدر نقطعه شرائح كده 

لو كنا هناكل الكنافه على طول هانرص المانجو عادي من غير اي حاجه عليها لكن لو كنا هانسيبها مثلا من الصبح لبليل ممكن المانجو تسرد مايه او تدبل ويبقى شكلها وحش فافضل اننا ندهنها جيلى  او نحظها فى الجيلى قبل ما نحطها على الكنافه 
طبعا هانستخدم جيلاتين ساده او بطعم المناجو ولو زنقت معاكي اعمليها باي جيلى لونه اصفر  وخلاص 


وادي اللوك النهائي للكنافه بالمانجو  وبالهنا والشفا  وجربوها بجد مش هاتندموا جميله جدااااااا


ملاحظه ... احنا ممكن نعمل الكنافه دي باكتر من طبقتين ونخليها اعلى من كده او طبقتين بس طبقات سميكه مافيش اي مشكله  بس الحقيقه انا باشوف انه مناسب تكون طبقتين او ثلاثه بالكتير وما تكونش سميكه اوي 







هناك 6 تعليقات:

غير معرف يقول...

يخليكي للغلابه يا رب :))

هجربها ولو طلعت حلوه هبعتلك حته ..

انا مش قصدي اعدل عليكي يعني .... بس مش ممكن نعمل الكنافه ديسك كده .... ونعمل صنيتين قد بعض ونحطهم فوق بعض؟؟

ميرسي كتير :))

shimaa elkholy يقول...

حبيبى

لا عدلي براحتك تماما

بصي يا ستى الطريقه الى انتى بتقوليها جميله وممكن تعمليها عادي

بس اولا وجع دماغ عشان ممكن تتكسر منك وكده كمبتدئين يعنى هههههههه

وثانيا رخمه جدا فى التقطيع لانك بتيجى تقطعيها الكريم شانتيه طبعا سوفت اوي بتطلع من الجوانب وتبقى حوسه

عموما جربي جايز تكتشفى حاجه جديده وتقوليلى

انا جربت كل الطرق ودي المفضله عندي

طبعا ممكن حد غيري يفضل طريقه تانيه

لما بيكون بقى البال رايق باعمل بقى ديكوريشن اكتر بس انا كنت مستعجله شويتين

منوره يا قمر

فاتيما يقول...

وحشتنا وصفاتك يا صبصب

يااااااااه
رمضان كريم بجد
طب ادلى بدلوى
عشان انا لسه واكلة منها امبارح
نصيحة اخوية
المانجه تتقطع مكعبات احسن
عشان تبقى سهلة ف الاكل
وتثبت على الكريمة اكتر


وممكن تبقى طبقة واحدة فوق
والطبقة التانية متفرغة من النص ويتحط فيهاالحشو عادى
والجناب كنافة
ساعتها هتمنع الكريمة تطلع بره
يعنى تبقى شبه التارت كدا ...

بس


وحشتينايا صبصب
ووحشنا تبيخك
يا ست الصبصوبات


كل سنة وانتى طيبة
ومنتحرمش منك ...

shimaa elkholy يقول...

فاتيما

والله انتى الى وحشاااااااني فعلاااااا

ازيك يا جميل ورمضان كريم عليكم يارب

وطبعا دلوك مهم جدا وجميل جدا وممكن تنفيذه جدا يا قمر

ستيتة يقول...

تسلم ايدك يا مسكينة
ومش ها اركز في كمية الكنافة وبالهنا والشفا على قلبكم وقلب الناس اللي جنبكم والناس اللي بيتسحروا ويفطروا عندكم:)
معملتش كنافة بيتي السنة دي خالص
ولا قطايف بيتي
باين عليا عجزت ولا ايه يا صبصب
ياطول عذابك يا ستيتة

shimaa elkholy يقول...

ستيته حياااتي

فشرررررر يا جميل ده انتى زينة شباب المنطقه هههههههههه

وبالنوسبه للناس صدقا حاسه ان انا الوحيده على عندي مطبخ فى شقتى ... لا ومش كفايه مش بيعملوا كمان يطلبوا اظاهر المشكله فيا انا :)))

نورتي يا قمر