الفراخ بالزبادي

الفراخ بالزبادي

احبائي المطبخيات والمطبخيين برضه عادي

النهارده هانعمل اكله سهله جدا جدا وبتتجهز فى خمس دقايق وتستوي فى نص ساعه

وبتخلص كل البواقي الى في التلاجه احيانا

ههههههههههههههه

المقادير

اولا طبعا فرخه مغسوله كويس ومنقوعه فى ملح ولمون وما الى ذلك ومقطعه زي ما تحبوا وانا عن نفسي باقطعها ل8 قطع عشان تستوي بسرعه

وكمان انا باشيل الجلد عشان تبقى مش سمينه اوي واقدر استعمل الصوص بتاعها من غير قلق

ثانيا : كل الى عندك فى التلاجه ودولاب المطبخ بقى حطيه عليها

هههههههههههههههه

لا شوفي يا ستى

كوباية زبادي ــ بصله صغيره ــ 6 فصوص ثوم كبار ــ توابل زي ما تقولي قولي (حبهان ‘ فلفل اسمر ، قرفه، جنزبيل، خردل ، ورق لوري )

واي توابل لحوم تمشي برضه

ــ وممكن واحده فلفل اخضر ــ ومعلقه مايونيزــ ونص كوب خل ــ وعصير لمونه ــ ومعلقة سكر او عسل ابيض (عشان تحمر فى الفرن ) .

الطريقه

تجيبى الخلاط وتحطي فيه كل الكلام الى فات ده

لاااااااااا الفراخ لا حطي كله ما عادا الفراخ طبعا

وتضربي كل المكونات مع بعضها فى الخلاط

ولو حبيتى لون قوي حطي معلقة صلصة علب وحبذا لو معلقة فابركا او سماق يدي لون احمر

او معلقة كركم يدي لون اصفر

لا اخضر مافيش بقى ما تطمعيش بقى

المهم تصبي الخليط ده كله على الفراخ وهى فى الصنيه وتغطيها بسيلفر وتحطيها فى الفرن

وبعد نص ساعه تقريبا تشيلى الفويل وتسيبها كمان نص ساعه وتابعيها لو نشفت اوي زوديها نص كوباية ميه ولما تستوي وتحمر طلعيها

لو مش عايزه تحطيها فى الفرن ممكن تعمليها على البوتجاز من فوق ولما تغلي توطي عليها لحد ما تستوي وتنشيفها شويه وتقلبيها مرتين ولا حاجه اثناء السوي

بس وترصيها فى طبق التقديم وتصبيها عليها الصوص الى طالع منها

وممكن كمان تصبيها فوق مكرونه وتصبي برضه عليها الصوص بتبقى حلوه اوي

وممكن تشيلى الفراخ وتحطي مكانها خضار مشكله وتشويحه فيه شويه لحد ما يستوي ويتقدم مع الفراخ بيبقى راااائع.

ملحوظه هااااااامه جدا

كل المكونات الى فوق دي ممكن الاستغناء عنها فى الوصفه عااااادي وهاطلع حلوه

لا ما عادا الفراخ طبعا مش هانهرج بقى

هههههههههههههههههههه

وكفايه رغي بقى على فكره

قوموا اطبخوها وقولولي رايكم

الزبـــــادي

بصراحه يا جماعه انا فى الاونه الاخيره مع الغلى وقلة الضمير الى عند الناس منتجات الالبان الى فى السوق بقت وحشه جدا جدا . وغاليه كمان . تلاقي علبة الزبادي فاضيه اصلا وبجنيه . وتلاقي الجبنه طعمها لبن بودره صاااارخ والكيلو بعشرين جنيه والواحد يجى ياكلها يلاقي فى دهن كده غريب شكلهم بيعملوها بزيت عربيات .

عشان كده بقيت الى اقدر اعمله فى البيت اعمله وان شاء الله اقولكم خلاصة ا لتجارب بتاعتي يمكن تنفعكم

ونبدأ النهارده بالزبادي

اولا: نغلي اللبن الحليب كويس اوي طبعا باي كميه ونسيبه لما يبرد يبقى زي ايدك تقريبا

ثانيا: تيجبي علبة زبادي من النوع الى بتفضليه بس تتأكدي انه زبادي معمول بخماير طبيعيه لان فى زبادي فى السوق دلوقتي معمول بمواد جيلاتين وكده .ماتسألنيش تتأكدي ازاي . أنا عن نفسي عرفت الانواع الى فى السوق بالتجربه والخطأ

نجيب علبة الزبادي الجاهز ونضيف عليها نص كوباية حليب دافي ونقلبها كويس عشان تتجانس بسهوله مع باقي اللبن

وبعدين نضيفها بقى للكميه كلها

وعلبة الزبادي مثلا زي اكتفيا دي ممكن تعمل لحد 6 كيلوا

ما جربتش اكتر من كده بس بتهيئلي تجيب عادي

ثالثا: تصبي بقى الخليط الى فات ده فى كوبايات او طواجن زي ما تحبي وتغطي عليه وتسبيه فى مكان دافي لحد ما يربط تمام ويعمل وش ويبقى شكله زبادي يعنى

بعد كده حطيه فى التلاجه شويه قبل الاكل

هاقولكم شوية ملاحظات بقى مهمه :

ممكن تضيفى نكهات للزبادي _ مربات او فاكهه كمبود او عسل ابيض_ لكن ما تقليبهاش فىالحليب جربت اعملها لقيته مش بيربط كويس حطيها فى اخر الكوبايه وصبي عليها الحليب

لو كان الجو برد ابقى ولعي الفرن عشر دقايق كده وبعدين اطفيه وحطي الزبادي بعدها وسبيه يربط

لو لقتيه بعد خمس ساعات لسه ما ربطش وكان الجو برد برضه دفي الفرن تاني

اذا لقيتى الزبادي طالع فيه كتل من تحت يعنى مخرز او مجبن ده لان الحليب كان سخن شويه أو الفرن كان سخن اوي

خلي بالك لو حطيتى الزبادي الجاهز على الحليب وهو سخن اوي الخميره الى فى الزبادي هاتموت والزبادي بتاعك مش هايربط ابدا .

خليى بالك اللبن الى هانستخدمه لازم يكون سليم يعنى لا مضاف له مواد حافظه ولا مبستر لان المواد الحافظه بتمنعه من التخمر

والمبستر ممكن يربط حسب طريقة بسترته لكن فى الغالب مش بيربط وحتى على فكره لو حطتيى الحليب فى الفريزر بيكون مش حلو فى الزبادي .

طبعا ممكن لو بتعملي رجيم أو حتى عندك بيبي صغير اوي يكون الحليب سمين عليه خصوصا فى الشتا

اغلي الحليب ولما يبرد حطيه فى التلاجه لتاني يوم وتطلعيه هاتلاقيه عامل وش تشيلى القشطه من عليها ما ترمهااااااش

لو ماكالتوهاش حطيها فى الفريزر عايزنها بعد كده هابقى اقولك .

المهم تاني يوم طلعي الحليب حطيه على النار يدفى شويه وبعدين اعمليه زبادي عادي

بس كده الف هنا والى تجرب تقولي

اه والبوست ده مهدي خصيصا لمدام خالد همس الاحباب عشان هي هاطبق فكرتي ومشروعي الى جاي وهاتعمل زبادي وتبيعه لجوزها هههههههههههه

وانا من موقعي ده باقولكم كلكم يا ستات اقل علبة زبادي فى السوق دلوقتي بجنيه وكيلوا الحليب بقى باربعه جنيه عندنا مش عارفه فى البلاد

التانيه ايه والكيلوا يعملك بتاع 8 كوبايات من ام جنيه يلاااااااا عيشي بقى وابقى اعمليلهم تخفيض مالكيش بركه الا هما

شوربة سي فود

سلام عليكم يا جماعه

نحدثكم من مطبخنا التدوينى الجديد

وانا بصراحه فكرت كتير كتير هانعمل ايه فى اول بوست بعدين قلت بقى انا لازم ابدأ باكتر حاجه باحب اعملها وباحبها جدا جدا

وهى شوربة السي فود او فواكه البحر

يلا قدامي على المطبخ

المقادير :

بصله كبيره مقطعه جوانح -- 3 فصوص ثوم كبير -- فلفل رومي الوان مقطع مكعبات -- 2 طماطم متوسطه مقطعه مكعبات برضه .

نص كيلوا جمبري مقشر ــ نص كيلوا كاليماري (حبار) مقشر ــ كيلوا كابوريا ــ كيلو بكلويز

نص كوب لبن ــ 2 ملعقه دقيق ــ ملح وبهارات سمك

====================

تجهيز المكونات

طبعا البصل والتوم والفلفل والطماطم قطعناهم فوق اهو

السي فود بقى

الجمبري ممكن تشتريه اصلا متقشر أو تجبيه فريش وتقشريه وتغسليه كويس ولو كان كبير شويه افتحي ضهره

الكلماري برضه نفس الموضوع فى منه مقشر جاهز فلبينى وصينى وفيتنامي مالي السوق ب 13 جنيه كيلوا صافي

الكابوريا نقشرها برضه نشيل الادين كلها ونفتحها ونقسم قلبها اثنين ونغسلها كويس وده الى هانستعمله

وممكن ناخد كمان شوية ادين كده تكون كبيره وسليمه وشكلها حلو بتعمل طعم للشوربه وشكل حلو للطبق

البكلويز بقى ده نجيبه ننقعه حوالي ساعتين لحد لما يفتح وتمسكيه تغسليه واحده واحده تحت الميه عشان تتأكدي انه مافيش فيه رمل من جوه والى ما تعرفيش تفتحيها ارميها عشان ممكن تكون وحشه او مليانه رمل

الطريقه :

شوفوا هى اهم حاجه فى الطريقه بقى بعد كده الترتيب

الاول هانضيف البصل والخضار بالترتيب ده وبين كل واحد والتاني دقيقتين تقريبا

البصل ـــ الفلفل ــــ الثوم ــــ الطماطم

باحب اسيب شوية فلفل وطماطم ابقى اضيفهم فى الاخر بيدوا شكل وطعم حلو اوي

بعد كده بقى نبدأ نضيف المكونات الاساسيه للشوربه الى هى السي فود :

برضه بالترتيب ده وبين كل واحد والتاني 3 دقائق وكل ما نضيف مكون نقلبه مع الى قبله بس مش بالمعلقه عشان ما تتهريش الحاجه نسمك الحله كده ونطقها

الكلماري ـــ الكابوريا ـــ البكلويز ـــ الجمبري

ونضيف الملح والتوابل

بعد كده نحط ميه نغطي بها المكونات كلها ونسيبها تغلي

وعلى ماتغلي نجيب نص كوباية اللبن الى فوق دي وندوب فيها معلقتين دقيق وممكن نخليها معلقه دقيق ومعلقه نشا

وبعدين لما يغلي الخليط نصب اللبن مع الدقيق عليها من خلال مصفاه صغيره عشان ما ناخدش كلاكيع دقيق ونقلب كويس واحنا بنصبها عشان ما تكلعكعش برضه .

وبعدين نضيف شوية الفلفل والطمطام الى كنا سايبنهم فوق ونقلب كويس ونظبط الملح ونسيبها تغلي 3 دقايق كده لحد ما الشوربه تتخن شوي

ونطفي عليها ونغرفها فى سلطنيات ونزين وشها بشوية كسبره او بقدونس وزي ما تحبي

ونقدم معاها نص لمونه

وممكن نقدم معاها أرز ابيض وتبقى وجبه كامله

وكلوا وادعولي بقى

ملحوظات :

ـــ ممكن بدل الدقيق والنشا نستخدم اكياس شوربه جاهزه فى مخصوص للسي فود لكن المنتشر اكتر اكياس شوربة الدجاج والمشروم وكله ماشي يعنى مافيش مشكله

ـــ ممكن نضيف مكعبات سمك بس دي بتكون اخر حاجه خالص قبل ما نحط اللبن بالدقيق على طول عشان ما بياخدش سوا خالص

ـــ ممكن نعمل الشوربه بمكونات عددها اهل من كده طبعا الى متوفر فى السوق ساعتها لانها اغلبها لها مواسم معينه

لكن المجمد بيحل المشاكل كلها دلوقتي

ـــ يفضل انها تتاكل على طول بمجرد الانتهاء من طبخها بتكون احلى بكتير

ـــ ما تسويهاش كتير كل السي فود لو استوى كتير بيبقى مش حلو خالص

ـــ الكميه الى انا عاملاها دي كتير على فكره تكفي مثلا 6 اشخاص

وبس كده وابقوا قوليلى رايكم

وعلى فكره الصوره الى فوق دي انا جايباها من النت على ما ربنا يسهل والكاميرا بتاعتي تشتغل

تحياتي لكم

افتتاحيه

السلام عليكم ورحمة الله وبركاته

النهارده يا جماعه يوم عظيم فى تاريخ البشريه

ايوه عشان انا بقالي كام شهر عايزه اعمل المدونه دي ومش فاضيه اعملها واخيرااااااا خدت اول خطوه فى الموضوع انى انشيء المدونه اصلا

والمدونه زي ما انت شايفين اسمها ايه ؟؟

اه اسمها طابخين ايه النهارده ؟؟

اه ليه بقى انا سمتها كده

لان كل ما حد يشوفني سواء على النت او فى الواقع يسألنى السؤال ده .

طابخه ايه النهارده يا صبرني ؟

حقيقي مش عارفه ليه

قلت اجاوب بقى على السؤال ده برابط المدونه دي

ده غير ان انا على فكره من هواة المطابخ جدا

باحب اطبخ واعمل حلويات وافنن واتعلم الجديد

ياما لبخت عادي بالذات وانا بنت

بس الحمد لله حصل خير بابا استحملنا ياماااااااا

صحيح اول ما بدأ اخواتي يدخلوا فى الدور ويطبخوا هما كمان

الراجل جاله انهيار عصبي وكانت حياته الزوجيه هاتنتهي

بس الحمد لله ربنا ستر

اما الآن فهو جوزني لرضا عشان اجرب فيه

ههههههههههههههههههههههههههه

فى الحقيقه عشان الواحد يتعلم لازم يغلط

بس يعنى غلط عن غلط يفرق

المهم بقى انا هابدأ اكتب ان شاء الله من النهارده فى المدونه دي

واي خدمه حضراتكم

الى نفسه فى اكله معينه يقولي بس وانا تحت امركم

لو اعرفها هاكتبها ولو ماا عرفهاش هادور

عليها ونتعلمها سوا

لكن ان شاء الله انا ليا منهج فى الموضوع ده

اولا انا باحب الاكل البيتى والحاجات القديمه الى الستات بطلوا يعملوها

وكمان ان شاء ا لله مش هانزل اكله الا لماا كون جربتها بنفسي

وكان نفسي بصراحه انزل الموضوعات بالصور

بس الكاميرا بتاعتي بايظه ادعولي تتصلح وانا اهيصكم صور

تحياتي لكم جميعا