كوردون بلو

 

بتجيبي الصدور وتدقيها بين شريحتين بلاستيك وتساويها كده وتظبطيها وتتبليها

بملح وفلفل ومسطرده مثلا تتبليل خفيف يعني

وبعدين تفرديها وتحطي في قلبها شريحة رومي مدخن .. الوصفه الاساسيه رومي

مدخن بس انا في الصور حطيت لانشون لأن عندي ناس مش بتحب نكهة المدخن

وبنحط فوقيها جبنه شيدر صباع على بعضه او مبشور وممكن نستخدم موتزريلا

ممكن ناخد رشة زعتر او ريحان او روزماري فوق الجبنه .. وممكن نضيف الخضار اصابع الجزر او الفلفل الالوان مثلا  ونبدأ نلفها كويس نبرمها كويس من قاعدة المثلث كده ونتك كويس عشان نقفلها صح .. لو خايفين نعملها واول مره ممكن نقفلها بخله 

هنجهز الخلطه الجافه 
من افضل الخلطات الجافه الي استخدمها دقيق ونشا وبقسماط خشن بكميات متساويه .. وشطه وتوابل ايطالي او ملح وفلفل وزعتر وريحان وبنقلبها وتكون جاهزه 

هناخد الصدور الي لفيناها ونحطها في بيض مخلوط مع شوية حليب صغيرين وفيه ملح وفلفل ونطلع من البيض على الخلطه الجافه ونخطيها كويس من كل ناحيه مع الضغط بالراحه عشان يثبت عليها 

وبيبقى شكله كده 

 هنروح نسخن زيت في طاسه عميقه قوي بحيث الزيت يغطي القطع زي الصوره كده  وتكون النار حاميه اول 3 دقايق بعد كده نخليها متوسطه كمان خمس ست دقايق لحد ما تاخد اللون المطلوب وتستوي .. او نبخها زيت بالبخاخ ونحطها في القلايه الي من غير زيت 

وده شكلها بعد القليه ولازم نسيبها تبرد قبل ما نتعامل معاها بالتقطيع 

وبعد كده بنقدمها زي الصوره الي فوق كده وانا هنا مقدمه معاها شعريه مفلفله بالخضار 
وبالهنا 

صدور الدجاج على بطريقه ايطاليه

صدور الدجاج بالجبنه على الطريقه الايطاليه..... الطريقه :
طبعا بنجيب صدور دجاج مخليه ونغسلها كويس وننقعها في مايه وخل شويه ونشطفها ونتبلها بالملح والفلفل والخل والزعتر او حبق ولمون ونعمل فيها فاتحه بالسكينه كده من فوق من عند الحته السميكه الي فيها تبقى زي خرم كده جوه الصدر زي الجيب ونسيبها في التتبيله نص ساعه ونجهز الحشو
تشكيلة جبنه بقى اي حاجه تحبيها موتزاريلا ورومي وشيدر اي حاجه عندك بتسيح تمشي وماعها ريحان اخضر مفروم او نعناع .. وفلفل اخضر او الوان مقطع وقطع لانشون او سوسيس صغيره وبعدين نحشي بيها الفراخ كويس اوي وفي طاسه تيفال او مش بتلزق ونحط زيت زيتون مش كتير 4 معالق مثلا ونسيبه يسخن اوووي بعدين نحط الفراخ جنب بعض وما نكترش في الطاسه لو عاملين كميه نعملها على اكتر من مره ونديلها الصدمه من الناحيتين ونقلبها لحد ما تاخد حوالي عشر دقايق في الطاسه وتكون استوت نطلعها على جنب ومكانها في الطاسه نحط معلقة دقيق ونحمرها وبعدين ننزل عليها بشوية مايه او حليب او شوربه نسيبها تغلي لحد ما تتقل ونقلبها كويس اوووي ونزود شوية كريمه لباني ونظبط الملح ونقفل وهو ده يبقى الصوص الي هايتقدم مع الفراخ وبالهنا

وممكن التقديم بطريقه تانيه ان يكون الصوص تحت الصدور زي كده 

فراخ بالتوم والجنزبيل

فراخ بالتوم والجنزبيل ...اسهل واطعم فراخ باعملها الحقيقه
الطريقه اغسلي الفراخ وقطعيها 8 او كتر
في الخلاط اربع فصوص توم معلقة صلصة علب كوباية زبادي اربع معالق خل لمونتين معلقه صغيره جنزبيل مطحون او شطه ملح فلفل معلقه دبس رمان او عسل اسود ..ولو مافيش مش مشكله....تبلي الفراخ بالخلطه دي نص ساع وحطيها في الفرن زي ما هي كده لمدة ساعه ...ممكن تقلبيها مره في النص عشان تتشرب التتبيله واطفي عليها وفيها شوية سوائل صغيرين بيبقى احلى صوص ..وممكن تفرشي تحتها بطاطس بتبقى حكااااايه

رول الديك الرومي

ده صدر ديك رومي كامل متنضف والجلد بتاعه عليه فردته ودقيته وخط العرق الفلتو الي جواه وتبلته ملح وفلفل ولمون وخل وزعتر وحبة البركه او اي نكهه توابل تحبيها وزيت زيتون وسبته نص ساعه

معلش الصوره مش واضحه عشان بخار الرز كان سخن 

ده رز بالخلطه بقطع الرومي الي خدتها "العرق الفلتو " والكبده والقنصه مقطعين وشوحتهم مع بصله مفرومه وملح وفلفل وتوابل لحد ما دبلوا وسقط عليهم كوباية رز منقوعين ساعه وعليهم نص كوباية مايه وسبتهم على النار يادوب المايه نشفت بيبقى لسه الرز ما استواش كويس وده المطلوب ..هنحط الرومي على ورقة فويل تخينه او كيس حراري ونحط الرز فوقيه في الطرف بالطول ونبرمه بقى بالفويل لما يبقى زي عمود اللانشون كده في الصوره الجايه

نقفل عليه كويس اوي وممكن نخده لفة فويل كمان ونقفلها وفي صنيه ونحطه في الفرن... ممكن ياخد حوالي ساعه ونص عشان يستوي كويس

ده شكله بعد ما طلع من الفرن لو لقيتي الصينيه نازل فيها صوص وهاتتحرق منك ابقي حطي نص كوباية مايه
لو حبيتي تحطيه مكشوف شويه يتحمر من بره ماشي لكن انا لقيت الجلد بتاعه اتقطع ما رضيتش احمره عشان ما ينشفش من غير جلد

ده شكله في التقديم والي حواليه ده كرسب كده بيتقلي في زيت بينفش يبقى كده

وده شكله بعد ما اتقطع ترنشات بالهنا والشفا

بطه محشية

 كان نفسي انزل كل يوم صنف بس مش قادره يا جماعه والله رمضان السنه دي مرهق جدااااا

حاسه ان انا فى صراع مع الزمن بالاضافه لان الواحد حاسس انه هايجيله جفاف من العطش والحر والميه الى بتنزل من الواحد فى المطبخ الى بافكر الغيه من الشقه على ما رمضان يخلص

ربنا يجعله فى ميزان حسناتنا جميعا يارب

المهم انا قررت النهارده ادلعكم بقى اخر دلع واعملكم بطه ايوه والله هى بشحمها ولحمها

بس بما انكم فقريين البطه دي صغيره وكمان مش بلدي  دى بطه بيضا   اه هى جت كده بقى ما تتامروش

يلا قدامي على المطبخ

الحقيقه البط الابيض ده بالذات ما ينفعش يتعمل عادي مسلوق فى الشوربه حيث انه سمين وريحة شوربته تطفش بلد معلش اصل انا يا اخواتي مش واخده عليه

هانجيب البطه وطبعا نغسلها بالملح والدقيق وننضفها تمام التمام  وبعدين هانتبلها طبعا ليكم تعملوا اي تتبيله تحبوها

انا هنا فى الصوره دي عملت التتبيله عباره عن ربع كوباية خل وبصله وكوباية زبادي أو لبن رايب  وعصير لمونتين ومعلقتين كاري   وملح وفلفل طبعا وانا باحب اضرب كله مع بعضه فى الخلاط وممكن ازود شويه مايه عشان تبقى سايله اكتر

وليكى طبعا تعمليها باي شكل واي تتبيله تحبيها هاتجيبى التتبيله بقى وتدلكى بيها البطها من بره ومن جوه وتسبيها في التتبيله  اربع خمس ساعات حبذا لو من على بيات  

بعد كده نعمل الحشو بقى  انا هنا حاشياها رز  وممكن طبعا تحشيها فريك او لسان العصفور او اي حاجه ايا يكن انا باحب اسوي الحشو الاول عشان ما يبقاش ني جواها لانى مش هاغمرها فى المايه هاتشوفوا دلوقتي

انا باحمر بصله واحط لحمه مفرومه او كبد وقوانص  او مش مهم خالص وبعدين احط التوابل برضه انا هنا حاطه كاري  عشان تبقى نفس الطعم
ولما تستوى الكبد والقوانص والبصله معاهم وتبدأ ميتها تنشف بازوزها مايه خفيفه

وباحط مايه للرز قليله شويه عن العادي عشان ما يبقاش معجن  باسقط الرز فوق الخلطه زي الصوره كده  وطبعا لما يستوي باطفي عليه واسيبه يبرد وبعدين احشي البطه

زي كده

بعدين نقفلها زي الصوره كده بخلة  او ممكن تخيطيها كمان مافيش مشكله  بس الخله اسهل اكتر من خله ممكن لحد ما تقفلي على الرز كويس

وحظكم الفقري برضه البطه دي لقيت رجليها الاثنين مكسورين حاجه مش ممكن انتم على فكره

المهم بعد كده  بقى نروح نسخن معلقة سمنه فى طاسه كبيره او صنيه  ولما تسخن كويس نحط البطه بعد ما نكون شيلنااي رز او بصل عليها من بره( بس ما ترميش التتبيله عايزاها انا )

نحمر البطه من كل اتجاه على اد ما نقدر عشان ده بيخلي جلدها يشد وما يتقطعش فى السوى  زي الصوره دي ..

بس ناخد بالنا لو بتعملوا بطه بيضا جلدها بيبقى ضعيف جدا وفعلا بيتقطع بسرعه واحنا محتاجين الجلد عشان شكل البطه يبقى حلو وكمان عشان تحمي اللحم ما ينشفش فى الفرن

اه هانحطها فى الفرن طبعا

المهم بعد التحمير  هايبقى شكلها كده

 هايبقى قدامنا حلين

يا اما هانحط عليها التتبيله تاني ونحطها فى صنيه ونغطي الصنيه بالفويل وندخلها الفرن ولو كانت بطه بيضا هتاخد ساعتين فى الفرن  تقريبا ساعه وهى متغطيه وساعها وهى مش متغطيه

ولو بطه بلدي اقل حاجه 3 ساعات حسب عمرها بقى ايوه ابقوا سننونها قبل الطبيخ هههههههههههههههههه

والحل التاني يا بهوات  تعملوا زيي كده

البطه والتتبيله فى الحله البرستو وتقفلوا عليها نص ساعه لو بطه بيضا وساعه لو بطه بلدي  ... وطبعا لو مافيش حله برستوا عادي بتحطيها فى حله عاديه على النار بس تزودي التتبيله كوبايتين مايه كل شويه بس ما تغمريهاش مايه عشان الرز الى جواها ما يعجنش  وطبعا هتاخد البطه البيضا حوالي ساعه  وشويه ونكمل سويها فى الفرن بقى

وبعدين تطلعوها بقى على الفرن مش هتاخد كتير ساعه بالكتير اوي 

 عشان بس تاخد لون نعمل ايييييييييه بقى

التتبيله الى كانت معانا دي ناخدها وعليها  معلقة صلصة و معلقة سكر .. ايوه ايوه

وده الى بيخليها لونها احمر ومقرمشه من بره زي الصوره الى فوق دي الى مش بتاعتي اصلا
ايووووه

 الصوره الى فوق دي  مش من عندي انا جايباها من على النت

عشان البطه الى انا سويتها عندي ما لحقتش اصورها والله اتاكلت بسرعه

ههههههههههههههههه

كنا اول  يوم رمضان وانا كنت خلاص على المغرب فى النزع الاخير وعلى استعدت وعيي بعد العصير كانوا الشعب قام بالواجب بقى

بس انا والله اخترت الصوره الاقرب للحقيقه يعنى

بتبقى طالعه كده فعلا والله

المهم نرجع للشغل يا رغايين مش معقول كده

وبعدين ناخد التتبيله دي او حتى لو شوية شوربه ونفضل كل عشر دقايق نطلع البطه نرش عليها من الخلطه دي شويه وندخلها الفرن تاني

لحد لما تحمر وتاخد اللون المطلوب

وطبعا البطه هاتكون استوت وبقت تمام  التمام

وبالهنا والشفا  محتاجه حلة محشي الصراحه وتبقى فى التمام 

اه نسيت اقولكم ينفع تتبعوا نفس الطريقه مع الديك الرومي

او حتى فرخه عاديه

والى يجرب يقولي وبلاش نداله
كل سنه وانتم طيبين يا حلوين

فراخ محشيه بالفريك

السلااااااااااااام عليكم

واخيرا وبعد طول انتظار يجى يومين يا نكهه

الفراخ المحشيه بالفريك

شايفين شكلها امووووووووور ازاي

الى العمل

اول حاجه هانعملها طبعا الفراخ مغسوله كويس وانا بادعكها بملح طبعا قبل ما اعينها فى الفريزر اصلا وانقعها كمان فى لمون وخل وملح باموتها يعنى من الاخر

هاتكون كده نضيفه وجاهزه وتمام اه الفراخ المحشيه يفضل تكون صغيره شويه يعنى قولي وزن كيلو ونص كده ما تزيدش عن كده

كيلو ونص بريشها ااااه مش صافي

صافي تعملها 750 جرام

نتبلها بقى عصير بصل ليمون خل توابل زي ما نحب انا يومها تبلتها بالبرتقال كمان انتم عارفين باحب استخدم البرتقال فى التتبيله لما نكون فى موسم البرتقال البلدي بيبقى تحفه وطبعا ملح وفلفل تتبيله عاديه جدا وممكن نضيف لها معلقة عسل ابيض او اسود حتى سكر

وندخل التبيله جوه الفراخ ويستحسن نتبلها من على بيات وممكن مثلا قبلها بساعتين ولا ثلاثه

بس ونروح بقى نعمل الحشوه

الفريك

ماهو الفريك اولا ده صورته

وهو عباره عن حبوب قمح خضرا ناشفه ومكسره شويه اسمه فريك اخضر

طبعا هانكون ناقعينه لمده نص ساعه على الاقل ولازم يتنقى كويس اوي وبعدين تغسليه فى المصفاه ساعات بيبقى فيه رمل

وبعد ما تصفيه كويس

المفروض انك تحطي معلقة سمنه بلدي كده محترمه وتحمري فيها الفريك تحطي الفريك وتفضلي تقلبي

وفى طاسه تانيه تكوني برضه شوحتي البصل وضفتي عليه التوابل والملح الازم لحد ما يبقى لونه اصفر كده وعليه لحمه مفرومه بالكميه الى تفضليها

يعنى مثلا الفرخه الواحده هاتحتاج كوباية فريك ناشف ومعاها بقى بتاع 100 جرام بس لحمه

وبعدين لما الفريك يتحمر كده وينشف وريحته تفحفح تضيفى البصل والتوابل واللحمه وتقلبي تاني لمدة دقيقتين

وبعدين تحطي عليها نص كوباية مايه وتوطي عليه النار خالص وتسبيه ربع ساعه بس انا ساعات احب اقطع فلفل الوان كده صغير على الخلطه زي الى فى الصوره دي

وده شكلها بعد ما خلصت الحشوه

وبعد كده نمسك الفراخ ونصفيها من التتبيله ونحشيها بقى على اد ما نقدر فريك ونقفل عليها من بره بخلة اسنان وبعدين نحطها فى صنيه مع التتبيله بتاعتها ونغطي الصنيه بورق فويل وندخلها الفرن

ها بتغيب شويه فى الفرن يعنى بعد ساعه الا ربع تقريبا كده نفتح بقى عليها عشان تتحمل وعشان تطلع محمره اوي ومش ناشفه

نعمل ايه بقى

لما نفتح عليها هانلاقيها سردت ميه مع التتبيله صح يب ناخد المايه دي ونزودها شوربه ونحطها على جنب

ونفضل كل عشر دقايق نطلع الفراخ وبالمعلقه كده نسقي الفرخه ونحاول التتبيله دي تتوزع على سطح الفرخه كووووووويس

يعنى 3 اربع مرات كده هاتكون اتحمرت بقى وبقت فله اوي ولو لقينا الصنيه هاتتحرق من تحت نبقى نحط فيها نص كوباية مايه حتى البخار الى طالع بيطري الفرخه

شغلانه صح اه ان كان عاجبكم ههههههههههههه

يعنى فى الاجمالي بتحتاج بتاع ساعتين فى الفرن علشان تستوي كويس اصل انا باحب الحاجه مستويه اوي .

طبعا حشوة الفريك دي ممكن اوي نعملها مع الحمام او السمان

وممكن كمان بدل الفريك نستخدم الرز العادي او الرز البسمتي او لسان العصفور كله بيمشي

يلا يا نكهه ورينا الشطاره يا جميل

الى يجرب يقووووووووولي

والف هنا يا حلوين

فراخ من واحده مفروسه

فى يوم من ذات ا لايام

كنت قاعده كده محتاره اطبخ ايه وكنت بارغي مع واحده مفروسه على النت قلتلها انا مطلعه فراخ بس مش عارفه اعملها ايه

قالتلى على طريقة فراخ طلعت حلوه اوي وطبعا صورتها عشان ما اقدرش اكل حاجه من غيركم تسلم اديها مفروسه

يلا بسرعه قدامي على المطبخ كفايه تأخير كده

المقادير

فرخه مقطع الى 8 اجزاء (ومفروسه قالتلى انها بتعملها بصدور مخليه وبتبقى حلوه اوي )

ومعلقتين خل

4 فصوص توم مقشرين ومقطعين حلقات رفيعه

ملح وفلفل وتوابل زي ما تحبي

الطريقه

الاول هانجيب طاسه كبيره تنفع صنيه ما تقولش لا ونسخنها على النار ومعلقتين زيت زتون او سمن او اي حاجه

ولما يسخنوا تحطي الثوم وبعديه على طول الفراخ جنب بعضها وتقلبي الفراخ من جنب للتاني فى الزيت والتوم وترشي عليها كمان الملح والتوابل وكل تقريبا 3 دقايق تقلبيها على الوش التاني لحد لما يبقى لونها دهبي زي كده

وبعد كده نحط معلقتين الخل عليها ونقلب برضه على الجنبين خمس دقايق كده وبعد كده نزودها كوباية ميه وبغطيها ونهدي عليها النهار ونسيبها بقى مع نفسها نص ساعه كده تقريبا لحد ما تستوي

بس ناخد بالنا لو نشفت الميه قبل ما تستوي الفراخ نبقى نزود الميه ونقلب الفراخ على الجنب التاني لحد لما تستوي وتتحمر تبقى شكلها زي الصوره الي فوق دي بالظببببببط

والف هنا والى يعملها يقولي ويدعي لمفروسه

الفراخ بالزبادي

الفراخ بالزبادي

احبائي المطبخيات والمطبخيين برضه عادي

النهارده هانعمل اكله سهله جدا جدا وبتتجهز فى خمس دقايق وتستوي فى نص ساعه

وبتخلص كل البواقي الى في التلاجه احيانا

ههههههههههههههه

المقادير

اولا طبعا فرخه مغسوله كويس ومنقوعه فى ملح ولمون وما الى ذلك ومقطعه زي ما تحبوا وانا عن نفسي باقطعها ل8 قطع عشان تستوي بسرعه

وكمان انا باشيل الجلد عشان تبقى مش سمينه اوي واقدر استعمل الصوص بتاعها من غير قلق

ثانيا : كل الى عندك فى التلاجه ودولاب المطبخ بقى حطيه عليها

هههههههههههههههه

لا شوفي يا ستى

كوباية زبادي ــ بصله صغيره ــ 6 فصوص ثوم كبار ــ توابل زي ما تقولي قولي (حبهان ‘ فلفل اسمر ، قرفه، جنزبيل، خردل ، ورق لوري )

واي توابل لحوم تمشي برضه

ــ وممكن واحده فلفل اخضر ــ ومعلقه مايونيزــ ونص كوب خل ــ وعصير لمونه ــ ومعلقة سكر او عسل ابيض (عشان تحمر فى الفرن ) .

الطريقه

تجيبى الخلاط وتحطي فيه كل الكلام الى فات ده

لاااااااااا الفراخ لا حطي كله ما عادا الفراخ طبعا

وتضربي كل المكونات مع بعضها فى الخلاط

ولو حبيتى لون قوي حطي معلقة صلصة علب وحبذا لو معلقة فابركا او سماق يدي لون احمر

او معلقة كركم يدي لون اصفر

لا اخضر مافيش بقى ما تطمعيش بقى

المهم تصبي الخليط ده كله على الفراخ وهى فى الصنيه وتغطيها بسيلفر وتحطيها فى الفرن

وبعد نص ساعه تقريبا تشيلى الفويل وتسيبها كمان نص ساعه وتابعيها لو نشفت اوي زوديها نص كوباية ميه ولما تستوي وتحمر طلعيها

لو مش عايزه تحطيها فى الفرن ممكن تعمليها على البوتجاز من فوق ولما تغلي توطي عليها لحد ما تستوي وتنشيفها شويه وتقلبيها مرتين ولا حاجه اثناء السوي

بس وترصيها فى طبق التقديم وتصبيها عليها الصوص الى طالع منها

وممكن كمان تصبيها فوق مكرونه وتصبي برضه عليها الصوص بتبقى حلوه اوي

وممكن تشيلى الفراخ وتحطي مكانها خضار مشكله وتشويحه فيه شويه لحد ما يستوي ويتقدم مع الفراخ بيبقى راااائع.

ملحوظه هااااااامه جدا

كل المكونات الى فوق دي ممكن الاستغناء عنها فى الوصفه عااااادي وهاطلع حلوه

لا ما عادا الفراخ طبعا مش هانهرج بقى

هههههههههههههههههههه

وكفايه رغي بقى على فكره

قوموا اطبخوها وقولولي رايكم