سينابون

العجينه
4 كوب دقيق + نصف كوب زيت او سمن + معلقة صغيره خميره فوريه +معلقتين كبار سكر بودره + كوب حليب +رشة ملح + نص معلقه بكنج بودر
..
بندوب الخميره في ربع كوب ماء دافيء ونص معلقه صغيره سكر .. ونسيبها لحد ما تعمل رغاوي على الوش عشان نتاكد انها سلميه ....بنفرك الدقيق بعد ما نضيف عليه الملح والسكر والبكنج بودر  بالزيت او السمن لحد ما يختفي فيه .. نضيف الخميره والحليب تدريجي لحد ما العجينه تتعجن معانا كويس .. ونسيب العجينه ترتاح نص ساعه
..
هنفرد العجينه زي الصوره

 نخليها سمك حوالي نص ملل ونفرد عليها معلقة زبده خليها طريه مش جامده ومش سايحه عشان تتفرد وماتسيلش معاكي بعد كده حطي سكر خشن حوالي معلقتين كبار ونوزعهم بالطول وعليهم معلقة قرفه صغيره ونفردها زي الصوره
..
هنبرمها بشكل طولي ونقطعها زي الصوره دي

..
نرصها في صنيه وندهنها بخليط من البيض واللبن والسكر مضروبين كويس ببعض ونسيبها تخمر نص ساعه
.. بتاخد في فرن حامي حوالي ربع ساعه وتابعيها ممكن اقل حسب الفرن 

لو مش بتحبي القرفه ممكن تحطي نسكويك او بشر شكولاته خام .. او عجوه حتى مفرود رقيق ..اي حشو ينفع بالنكهه الي تحبيها 

لكن في الاصل السينابون بيتعمل بالقرفه والسكر البني
...............
صوص الكريمه :
نص كوب كريمة خفق .. لو مافيش هاتي كريم شانتيه عادي واضربيه وطلعيه خفيف شويه عن العادي
3 قطع جبنه نستو او 3 معالق جبنه كريم اي نوع عادي +معلقة زبده مش سايحه ولا جامده
فانيليا+نصف ملعقه بكنج بودر
هتخلطي ده كله مع بعضه في الخلاط او كبه المهم يتخلط كويس
..
صوص الشيكولاته
بتحطي الشكيولاته في حمام مايه سخنه او في الميكرويف بس على تفكيك المجمدات عشان ما تتحرقش ... تسيحيها يادوب ما تسيبهاش لما درجة حرارتها تبقى مرتفع وتجيبي مايه سخنه مش بتغلي يعني بس سخنه وتحطي تدريجي على الشيكولاته وتقلبي بالشوكه او بالمضرب بس مش على الدرجه السريعه لحد ما تتخلط وتعطيك قوام مناسب
..
اول ما يطلع السينابون من الفرن وهو سخن تنقليه في طبق التقديم وتحطي على كل واحده معلقة من صوص الكريم ولما تسيح تزيني بقى بالشيكولاته وممكن ما تحطيش شيكولاته زي ما انتي عايزه
....
ملحوظه الي في الصوره وحدات صغيره لو عايزه تعملي وحدات كبيره تبقى تكبري العجينه تخليها اعرض من كده وتلفيه تديلك دايره اكبر من كده وتخلي كمان سمك العجينه اكبر

كنافه بالمانجو

تتتاتتااااااااااااااااا
المطبخ حبيبى وحشنى مووووت  بقالي كتير ما رغيتش معاكم فى الطبيخ و اديت كلمتين للحريم الشلت  ياااااااه

انا من اول رمضان عايزه انزل اي صنف بس كده  تفاريح الا المطبخ بتاعي صدى هنا  ان المطبخ الواقعي يعتقنى ابدااااا

لحد لما فتاه من الصعيد حبيبتى طلبت منى كنافه بالمانجو قلت لا ممكن ابدا لازم اعملها

وحياتك يا فتاه انا عملت كنافه بالمانجه مخصوص عشانك كانوا عايزين كنافه بالكاستر عاديه قمت عملت شويه بالمانجه عشانك انت بس جميل

هيا بنا الى المطبخ  يا حلوين

الكنافه زي ما عملناها سوا قبل كده هانجيب الكنافه ونفرمها لو ما كانتش مفرومه   او حتى تقطعيها كويس حتت صغيره وطبعا يفضل الكنافه الشعر او الرفيعه اوي  بتكون احلى

هانعمل مقدار نص كيلوا كنافه

هانحتاج لها 3/4 كوب سمن  ومعلقتين زيت

ليه معلقتين الزيت ؟  عشان احنا هانحمر الكنافه  والتحمير بالسمن البلدي لوحدها السمنه تتحروق وتبقى مش تمام معلقتين الزيت بيخلوا التحمير احسن وكمان بتكون الكنافه مقرمشه  زي ما انا باحبها :)

هانسخن السمن والزيت على النار  وبعدين نحطها على الكنافه بالمعقله عشان نوزعها كويس بعدين نفركها بادينا كويس عشان السمن يتغلغل فى الكنافه كويس  وبيبقى شكلها كده

بس ده مش نص كيلو ما تركزوش فى الكميات الى فى الصور عشان ما تهيسوش

المفروض اننا نحمر الكنافه  فاحنا ممكن نحمرها على البوتجاز من فوق ونفضل نقلبها زي ما بتحمري الشعريه كده مثلا 

لكن انا لما باكون عامله كميه بافردها فى صنيه كبيره واحطها فى الفرن  اسهل  بس لازم تتقلب مرتين كده او ثلاثه فى الفرن 

وطبعا بتحمريها على اد ما تحبي انا عن نفسي باحبها غامقه شويه ممكن تخليها افتح من كده 

اول لما بتطلع من الفرن بنسقيها شربات نكون محضرينه من قبلها وبارد ..الشربات او القطر او الشيره  يكون تقيل  عشان ما يخليش الكنافه تبقى طريه وبايشه وكمان تبقى متماسكه شويه مع بعضها

هانحط على النص كيلوا كنافه حوالي كوباية شربات  ونقلبها ونسيبها تبرد خاااااالص 

على ما تبرد نكون عملنا شوية كريم شانتيه هنحتاج حوالي كوبايه ونص كريم شانتيه  

ولما تكون الكنافه بردت هانقسمها نصين ناخد النص الاولاني نفرده فى صنيه او طبق كبير  زي كده  

النص كيلو يبقى مناسب له الصنيه المتوسطه او اي حاجه فى مقاسها  وممكن كمان نعمله وحدات صغيره  فى اطباق صغيره على اد فرد واحد  مافيش مشكله 

بعد كده هانحط طبقه من الكريم شانتيه وياريت نستخدم كريم شانتيه  سكرها خفيف او نجيب الاكياس والعلب العاديه فى السوبر ماركت مش هاتقول لا 

لو قالت لا ابعتوهالي وانا ااعنفها على هذه الفعله الشنعاء :)

بعد كده هانحط طبقه تانيه من الكنافه  ونتعامل مع الطبقه التانيه برفق كده ونرشها على وش الكريمه عشان مش هاينفع نضغط او نحركها عشان الكريم شانتيه سوفت اوي وهاتطلع من الجنب 

ونرجع تاني نحط بقى كريم شانتيه للوش ونفردها كويس زي كده 

بعد كده بقى هانرص فوقيها المانجو الى هانقطعه شرائح بالشكل الى يعجبنا  وننقي اي نوع مانجه طبعا بنحبه بس يكون مستوي وجامد فى نفس الوقت عشان نقدر نقطعه شرائح كده 

لو كنا هناكل الكنافه على طول هانرص المانجو عادي من غير اي حاجه عليها لكن لو كنا هانسيبها مثلا من الصبح لبليل ممكن المانجو تسرد مايه او تدبل ويبقى شكلها وحش فافضل اننا ندهنها جيلى  او نحظها فى الجيلى قبل ما نحطها على الكنافه 

طبعا هانستخدم جيلاتين ساده او بطعم المناجو ولو زنقت معاكي اعمليها باي جيلى لونه اصفر  وخلاص 

وادي اللوك النهائي للكنافه بالمانجو  وبالهنا والشفا  وجربوها بجد مش هاتندموا جميله جدااااااا


ملاحظه ... احنا ممكن نعمل الكنافه دي باكتر من طبقتين ونخليها اعلى من كده او طبقتين بس طبقات سميكه مافيش اي مشكله  بس الحقيقه انا باشوف انه مناسب تكون طبقتين او ثلاثه بالكتير وما تكونش سميكه اوي 

تورتة ايس كريم

ايس كريم فى رمضاااااااان يا مدام

كنت باحب الاعلان ده مش عارفه ليه ما عادش بيجى 

الحقيقه رمضان السنه دي عايزنا نقعد اساسا جوه التلاجه بتاعة الايس كريم

انا ولادي تقريبا ادمنوا الايس كريم من اول رمضان لازم كل يوم يبقى فى اي ايس كريم

طبعا هو الايس كريم عشان نعمله فى البيت هو سهل اوي  هاقولكم الطريقه بسرعه 

بصوا انا هاعملكم نكهة الفانيليا واي نكهه تانيه تقدروا تزودوها على المقادير عادي جدا

هانحتاج 2 كوب حليب  ومعلقتين كبار سكر  و معلقتين كبار نشا و وكوباتين كريم شانتيه  وطبعا فانيليا  عشان النكهه

هانحط الحليب على النار وندوب فيه السكر والفانيليا كمان   ولما يدفى ناخد منه شويه لبن صغيرين ندوب فيهم النشا ولما يغلي الحليب نزود اللبن بالنشا بسرعه ونقلب كويس اوي عشان ما يكلكعش لو كلكع منك اعمليه بمضرب الكهربا هايفك على كول

طبعا ده كأننا بنعمل مهلبيه بس سايبه شويه

هانسيبها بقى تبرد خااالص ونحطها فى التلاجه كمان  لما تسقع كويس

وهانكون مجهزين الكريم شانتيه  ونحطها عليها ونضرب بالمضرب لما يختلطوه تمام وبس على كده حطيها فى الفريزر

اي نكهه تانيه بقى زي المانجه مثلا طبعا هانستخدم مانجه طبيعى ودى احلى حاجه فى الايس كريم الى بتعملوا فى البيت  انه كل حاجه بتبقى طبيعى

الشيكولاته ممكن تستخدمى الكاكاو الخام بس تبقى تزودي السكر شويه فى الحليب وممكن تستخدمي شكيولاته خام بس هاتسيحيها فى حمام مايه وتخلطيها مع المهلبيه  قبل ما تبرد وتحطيها فى التلاجه لحد ما تبرد

الفراوله كده برضه

والنسكافيه ولا اسهل دوبي معلتين نسكافيه وضفيهم على الخليط

والليمون  والكراميل وكل نكهه تحبي تعمليها عادي

اما بالنسبه للحريم الشلت حبايبى فممكن تجيبى  الايس كريم البودر وتعمليه  او اشتري الايس كريم جاهز بقى ونقفل المدونه دي خالص

ههههههههههههه

بالنوسبه بقى لتورتة الايس كريم الى فوق دي عشان انا باحبها اوي

هى انا فى الغالب باعملها قوالب عشان تتقطع شرايح زي الصوره دي كده بتبقى اسهل للعيال

هاتكوني مجهزه صنية كيك حلوه كده تعمليها انتى بلاش الكسل ده

وتقسميها من اثنين من العرض يعنى زي التورته كده وطبعا تراعي النكهات يعنى لو الكيكه شيكولاته تحطي ايس كريم شيكولاته كده يعنى

وقبل ما تحطي ا لايس كريم فى الفريزر بقى

هاتجيبص صنيه وتبطنيها ببلاستيك وتحطي طبقه من الكيك وبعدين تصبي عليها الايس كريم الى عملتيه وهو لسه سايل وبعدين تغطيها بالطبقه التانيه من الكيكه وتتكي بالراااااحه اوي عشان يبقى متساوي وتدخليها الفريزر بقى اربع خمس ساعات كده حسب ما تجمد

وتطلعيها لما تكون جمدت تمام تسبيها بره خمس دقايق قبل ما تقطعيها  وبعدين تقطعيها انا هنا فى الصوره حاطه عليها صوص شيكولاته طبعا تقدري انتى تحطي اي صوص يعجبك

وطبعا ممكن تستخدميها تورتايه عاديه فى اي عيد ميلاد بس طبعا تعملي حسابك انك تعطيها الفنش التزيين النهائي يعنى وقت التقديم بالظبط عشان الايس كريم ما يسيحش

وبالهنا والشفا يا حلوين  ورمضان كريم

جلاش مثلثات بالكاستر

معلش ما لحقتش النهارده اعملكم طبخه جامده

فقلت الحق اكلكم  حلويات بقى

الحقيقه الجلاش ده انا باحبه اوي اوي وكان نفسي اعمله النهارده

والطبق الى فوق ده شكله جوعني

بس ما حدش عبرني ولا جابلي جلاش

يلا بسرعه نشتغل عشان مش فاضيالكم الاكل على النار

اولا هانحتاج قولوا نص كيلوا جلاش

كوباتين كاستر او كريم باتسيير

كوباية سمن   او زبده

وكوباية شربات لونها وسط مش تقيله اوي ومش خفيفه وبارده

هانجيب الجلاش يا حلوين هو بيبقى مربع هانقطعه شرايط بالطول قول على ثلاثه او اربعه حسب حجم الورقه بتاعتك

وبعدين هناخد شويه الى هانشتغل بيهم والباقي نغطيه كويس بفوطه نضيفه او جوه كيس بلاستيك عشان ما ينشفش احنا فى الحر

 وهناخد 3 طبقات من الشرياط دي وهانفردها على صنيه زي الصوره دي كده ونحط معلقة من الكاستر او الكرييم باتسيير كده فى اول الشريطه فوق كده

وبعدين نطويها للجنب

 زي كده

ونفضل بقى ونكون بفرشاه دهنا باقي الشريط ده سمنه

ونقعد بقى نطويها على بعضها زي طريقة السمبوسك كده لحد ما يبقى شكله مثلث

زي كده

بعد كده هانشيلها نحطه فى صنيه مدهونه سمنه برضه

ولما نخلص الكميه نحط برضه على وشها سمنه من فوق

يعنى معلقه على كل مثلث تقريبا

وبس وندخله الفرن وبيطلع شكله كده

هانسقيه وهو سخن بالشربات البارد ونسيبه حوالي عشر دقايق بس يبرد شويه ويشرب الشربات

وبعد كده نقدمه فى طبق زي الي فوق ده وبالهنا والشفا

وكل سنه وانتم طيبين يا حلوين

ام علي ...... يا عليييييي

السلااااااااام عليكم

ام علي يا واندااااااااا بتسلم عليكى والله

بصوا انا مصوره ام علي دي من السنه الى فاتت وفضلت اجلها لحد ما الصيف دخل قلت لا بقى دي عايزه البرد يا جدعان

وادي الشتا ده قرب يخلص وانا لسه باجل برضه عالم فاشله اخر حاجه

المهم بقى بناءا على طلب الجماهير

الى هما واندا السواحه

والبت شيما المخطوفه على راي فاتيما

والبت ام مريم نبر تو مش انا دي خليفتى فى الملاعب

فقلنا ننزلكم موضوع جديد

لايق على البرد والتجمد الى انا فيه حاليا فى الرسبشن بتاعي المتلج موت

لا لا مش زي التلج بتاعك يا وندا انتى غير يا ماما خليكى عايشه فى الفريزر حتى بعد الفريزر بشويه

اليكم يا حضرات ام علي

ام علي دي لها باكتس كده بتتباع فى السوق اشتريتها مره لقيتها حاجه تعبانه جدا مالهاش اي لازمه عباره عن شويه حاجات ناشفه كده ولو قديمه يبقى طعمها مش ولا بد ويادوب بالعافيه تعملي اربع اطباق

قوم انا قلت كلا الفته لا يمكن نشتغل فى الكلام الفارغ ده

وحاليا انا باعمل ام علي باي حاجه تقابلنى

اليكم الاتي وده بالترتيب من الاحسن

الفطير الفطير المشلتت العادي طبعا طبعا مش باعمله ما تحلموش انما انا عندي العيال بيحبوه فبنشتريه كتير والى بيبات منه ما بيتاكلش

انا باحوش البواقي دي ممكن فى الفريزر حتى لو الحكايه هاتطول وبعدين اول ما افتح الفرن لاي سبب اقوم مطلعه البواعي دي ومقطعها ومفرفراها كده وبعدين ادخلها الفرن عشر دقايق وبما ان الفطير بيبقى فيه سمن اصلا بتطلع بقى الدنيا محمصه وحمرا وزي الفل

لو مش هاستعملها فى والتو واللحظه باسيبها تبرد واعبيها فى كيس واسيبها فى التلاجه لحد ما احتاجها تبقى جاهزه على طول ما تاخدش عشر دقايق

وممكن كمان نعملها بالجلاش او بالرقاق وانا لما بيفيض اي حاجه من دول او حتى كسر منهم مش بارميه ولكن بالحقه على الفطير اياه برضه

لكن الجلاش والرقاق بقى مش بيبقى عليهم سمن فلازم نحط عليها معلتين ثلاثه سمن حسب الكميه كده ونقلبها عليهم او لو ورق الجلاش كامل احنا ندهن ورقه ورقه بفرشاه كده بالسمن وندخلها الفرن هما ثلاث دقايق وهاتلاقيها احمرت نطلعها على طول

ايا يكن

فان ام علي تعتمد على عجينه بنرقها جدا ونحمصها مع سمن فى الفرن قشطه كده ؟؟؟

يعنى حاجه زي الفته كده وادي شكلها بعد التحميص

بعد كده هانجيب اللبن طبعا هحاول جاهده انى احددلكم كميات عشان انا باعملها بالنظر

لو قلنا عندنا كوبايتين مثلا من الفطير المحمص او الجلاش المحمص فاحنا هنحتاج حوالي لتر حليب

هانسخن اللبن الحليب على النار ونحط عليه سكر مناسب حسب ما بتحبوا وفانيليا ولما يغلي على طول هسقط الفطير او الجلاش المحمص

ونقلب ونسيبه يغلي حوالي عشر دقايق مع التقليب عشان ما يلزقش ونكون مهديين النار عليه زي كده

لحد كده هى ممكن تبقى تمام

لكن انا فى حاجه باعملها لانى ما باحبش ام علي تكون سايبه اوي كده ويبقى فيها لبن لو لقتيها سايبه معاكي اوي تدوبي معلقة نشا فى معلقتين مايه وتزوديهم وهى بتغلي كده فى الاخر هاتلاقيها مسكت شويه وبقت تمام

انا الحقيقه مش باحبها تبقى مكتومه اوي يعنى كلها فطير او جلاش فبحب اسيبها حبه واحطلها معلقة النشا دي بتظبط الدنيا كويس

بعد كده بقى نجيب الطواجن الصغيره او ممكن نستخدم سلاطين بايركس او بورسلين اي حاجه بتستحمل الحراره يعنى ونوزع عليها الخليط الى عملناه فوق ده ونحط على الوش بقى مكسرات او فول سوداني او مش مهم خالص زي ما بتحبوها

ومعلقة قشطه كبيره

او بشر زبده زي الصوره دي كده حسب ما تلاقي عندك بس القشطه الصراحه بتبقى اجمل

اهو صوره دي بالقشطه عشان ما تزعلوش نفسكم

طبعا بما انى مش عامله طبق واحد هانرص كل الاطباق على صنيه واحده وندخلها الفرن بس الشعله الى فوق الشوايه يعنى لمده عشر دقايق فقط

ونحط الصنيه فى الرف الوسطاني حتى بانزله ساعات تحت شويه

فى ناس بتحمرها بالنار كده سريعا من فوق مش فاكره اسم البتاع ده يا اخويا الزهايمر اشتغل مش مهم

لكن انا باحبها اكتر تدخل الفرن شويه بتمسك نفسها وتاخد لون حلو

وبس على كده تطلع بقى حمرا وبتزغرت كده يا اخواتي وتتاكل فووووووووووورا عشان تدفي

وباقدم اعتذاراتي على الصور والله انها مش حلوه لا الموبايل بتاعي بيصور كويس ولا البرنامج الى كنت باشتغل عليه يظبط الصور راضي يشتغل

والف هنا يا جودعان وطبعا بعد ما الواحد يضرب طبق ام علي الي فوق ده هايلاقي وشه ضرب احمر فى زرتقاني وينام بقى للصبح فى التمام

والى يجرب يقولي بلاش ندااااااااله

تورتة بالشيكولاته .... كل سنه وانتى طيبه يا ستيته (تحديييييث)

تحدثيييييييييث

اكتشفت ان امبارح كان عيد ميلاد نواره كمان والنبى ما كنت واخده بالي مع ان ستيته قالت بس السن بقى انتم عارفين

وعيد ميلاد مدونة عاشقة الرومانسيه كمان

حتى امبارح اخر الليل اكتشفت انه عيد ميلاد عمي

الله هى الدنيا كلها هاتتلم على التورته ولا ايه يا ستيته

مش معقول كده بقى

ههههههههههههههههههههههههههه

كل سنه وانتم طيبين جميعا ويارب سنه سعيده عليكم

***********************************************************************

كل سنه وانتى طيبه يا ستيته يا حياتي

انا عملتلك تورتايه مخصوص من الى انا باحبها واموووووووت فيها ووالشمع اهو كماااااان

ويارب عقبال ميت سنه وانتى بصحه وعافيه وهنا يارب

طبعا عشان ما حدش يقولي بتخمي ومش قلتي الطريقه

هى سهله جدا جدا

اولا هانحتاج 2 مقدار من الكيكه بالشيكولاته الى عملناها سوا المره الي فاتت

او اي مقدار كيك تحبيه او كيك اسفنجي

بس انا باحب الكيكه بتاعتي دي

هانعمل المقدارين فى صنيتين مدورين متوسطين الحجم او كبار بس يكونوا اد بعض

بعد كده هاعمل كريم شانتيه كتير شويه يعنى يجى اربع كوبايات كده كريمه شوفي بقى دول يبقوا بودره ادي ايه قولي اربع اكياس خمسه كده

ولو بالمعلقه قولي عشر معالق كبار مليانين

وتعملي الكريم شانتيه وتسبيه فى التلاجه

وطبعا الكيكه احنا عملناها وسبناها تبرد وطلعناها من الصنيه بتاعتها ونشق كل صنيه بالعرض عشان نحشيها يبقى كده عندنا اربع طبقات من الكيك

ولو مش عايزين نعمل كده ممكن نخليهم طبقتين بس ولا نقسم ولا حاجه وهاتبقى حلوه برضه بس نزود الكريم شويه فى النص

طبعا بين كل طابق والتاني من الاربع هانحط كريمه بكفايه وما نضغطش اوي عشان الكريمه ما تدخلش فى المسام وتبقى شكلها مش لطيف

بعد كده نكون مظبطين التورته وبعدين نخطيها كلها بالكريمه من كل النواحي ونساوي الجناب كويس ما تنسوش وهاتبقى شكلها كده

اه نسيت اقولكم ان هانغطي الجوانب ببشر الشيكولاته زي الصوره الى فوقيا دي

بش الشيكولاته فى التورتايه دي هانحتاج منها نوعين

نوع نعمله بالمبشره العاديه وبيكون ده شويه ناعم ينفع نغطي به التورتايه كلها عموما وهانبدا الاول بالجوانب نغطيها كويس وده بيدى ثبات اكتر لشكل التورته

بعد كده نرش كمان على وض التورتايه بشر شيكولاته من الى عملنا بالمبشره ده بس مش كتير زي الجوانب عشان لسه هانشتغل عليه

بعد كده هنعمل وردات ونزينها بالكريز المعلب او فراوله طازه حتى تمشي برضه (بس لو فراوله لازم نحطها فى شربات شويه او نلمعها بالجيلى عشان ما تطفاش وتسرد مايه )

ركزوا بقى فى الشيكولاته الى على الوش دي انا عملتها ازاي





دي ما تنفعش بالمبشره العاديه





اولا الشيكولاته لازم تكون مش جامده اوي ما تكونش فى التلاجه وباعمل ده بالمقشره عارفين المقشره بتاعة البطاطس ؟



ايوه بالمقشره دي وباعملها تطلع شكلها زي لحاء الشجر كده





اهو يا ستيته شايفه التشبيهات ؟؟ لحاء شجر عشان تعرفي ان التورته دي تبعك





ونرشها بالراحه عشان ما تتكسرش وتكون شكلها كده وده فى الاخر خالص





وتطلع التورته زي الى فى الصوره دي





بالزمه مش سهله اوي ؟؟





كل سنه وانتى طيبه يا ستيته يا جميله باحبك والله اوي





ودي الهديه بقى يا جميل



جبتلك شويه تنقي منهم الى انتى عايزاه



بس مش تاخديهم كلهم بقى عشان باقي المدونين كل عيد ميلاد واحد ياخد واحده

ولا اقولك خديهم كلهم وبعدين تفرج يا موناستيته يا جميله انتى

الكيك بالشيكولاته

السلام عليكم

ازيكم يا بشر وحشتوني والله

واندا انا كنت قلتلك هاعمل ام علي بس افتكرت انى كنت وعدت البنات الى كانوا معايا فى اللقاء انى اعملهم كيك ولقيت الصور بتاعته جاهزه قلت نشوف الكيك الاول بقى

وادي يا بنوتاتي الحلوين الكيك بالشيكولاته زي الى كان فى اللقاء بالظبط اهو مش حارمااااااكوا من حاجه والى مش هاتعمله ويطلع حلو هاتضرب

يلا على المطبخ

المقادير :

• 
  
  طبعا المقادير دي عشان نعمل قالب كيك واحد او صنيه متوسطه

• 
  
  كوب ونصف دقيق (طحين ) حلويات

• 
  
  كوب قشطه (وممكن نص كوباية سمن بلدي بس نبقى نزود معيار اللبن الحليب شويه)

• 
  
  3/4 كوب زيت ذره (وممكن سمن أو زبده ) بس الزيت ميزته انه لو الكيكه اتحطت فى التلاجه او كان الجو برد تفضل الكيكه بتلمع ومش جامده اوي

والطعم بقى القشطه بتظبط العمليه كلها

وعموما موضوع الماده الدهنيه ده تقدري تحطي اي حاجه تحبيها زبده او زيت او قشطه او سمن بلدي او خليط من كل ده

المهم تظبطيها ان المقدار ده بياخد حوالي كوبايه سمن

بس القشطه بتدي للكيكه طراوه خطيره

• 
  
  حوالي كوب لبن حليب


• 
  
  كيس بكنج بودر (او حوالي 3 معالق صغيره )


• 
  
  3 بيضات


• 
  
  فانليا


• 
  
  3/4 كوب كاكاو خام ( ده تجبيه من عند بتوع لوازم الحلوانيه او العطارين وخدي بالك بيكون طعمه مر جدا ) بس هو ده الى بيدى اللون الغامق ده انا جربت كل الانواع الي فى السوبر ماركت مافيش فايده الكاكاو الخام هو احسن حاجه بس تجبيه من مكان نضيف عشان فى ناس بتغشه برضه

• 
  
  ونصف سكر بودره او ناعم على الاقل

الطريقه

• 
  
  اول حاجه احنا دايما فى الكيكه هانخلط الخامات السائله لواحدها والجافه لواحدها وبعدين نحطهم على بعض

اولا الخامات السائل او الطريه

الى هى القشطه والزيت او السمن نحط عليهم السكر ونضربهم بالمضرب الكهربائي لحد ما تبقى عامله زي الكريمه زي دي كده

طبعا ما تركزوش فى الكميات الى فى الصور عشان مش هى نفس كميات المقدار

بعد كده هانجيب البيض ونحط عليه الفانيليا ونخفقه بره الاول وبعد كده نضيفه للخليط السابق ونخلط تاني بالمضرب لحد ما يبقى الخليط متجانس وبعدين نزود اللبن الحليب ونخفق برضه

وهايبقى شكلها كده

بعد كده نروح على المواد الجافه

الى هى الدقيق والكاكاو والبكنج بودر ونلخبطهم على بعض كويس وبعدين ننخلهم عشان ما يبقاش فيهم تجمعات (كلاكيع يعنى) زي الى فى الصوره دي

بعد ما ننخلهم نبدأ نرجع للخليط السابق ونزد عليه شويه شويه ونقلب يستحسن نقلب بالمعلقه على طريقة دائره ونصف قطر وبالرااااااحه عشان الهوا ما يخرجش منها

بس لو عامله كميه زيي انا كده ممكن تستخدمي المضرب بس على الهادي جدا

وبعد الخلط هايكون ان شاء الله شكلها كده

لاحظي شكل العجينه وسمكها عشان تطلع معاكي كده

بعد كده هانولع الفرن ونعمله على درجة حراره من 170 الى 200 ونسيبه يسخن ونروح بقى نجيب الصنيه

ونبطنها (ندهنا سمن خفيف اوي ونرش عليها دقيق خفيف وبعدين نقلب الدقيق الباقي ونصب الخليط فى الصنيه الوسط دي ونفرد فيها العجين بالراااااااااحه يعنى نميلها يمين وشمال لحد ما تتفرد (عشان ما نطلعش منها الهوا)

وممكن نعملها فى قالب كب كيك زي ده كده

بس ما حدش يشتري النوع الى زي القالب بتاعي عشان انا اتخميت فيه وطلع مش حلو

بعد ما نسيبها فى الصنيه حوالي عشر دقايق يكون الفرن سخن وبقى تمام

نحطها فى الفرن واوعى واياك وهاتضربي لو فتحتي الفرن عليها فى اول عشر دقايق ويا حبذا ربع ساعه

بعد عشر دقايق بتهدي الفرن ل 150 درجه وتسبيها كمان حوالي ربع ساعه وبعدين تطلعيها

يا اما بسكينه نضيفه وتحطيها فى قلبها لو طلعت من غير عجين تبقى كده استوت

يا اما بايدك وفى وسط الكيك واتكي عليها لو ردت لفوق تاني تبقى استوت كويس لوما ردتش وصوابعك علمت لتحت يبقى لسه شويه

ولما تستوي تطلعيها وتسبيها فى القالب او الصنيه ربع ساعه تستهدى وبعدين تقلبيها وتقطعيها او تزوقيها لو هاتعملي تورته او اي حاجه تحبيها

ويطلع بقى زي الى في الصوره الى فووووووق دي

والف هنا والى هاتالف من عندها اي حاااااااجه هاتضرب اعملوها زي ما انا قلت بالظبط من غير اي فزاليك وهاتطلع حلوه

والى يجرب يقولي يا بنات

والى تعرف فيكم موقع تمبت حلو تقولي عليه عشان عايزه اعمل نيو لوك للمطبخ

اصابع الجلاش

السلااااااااام عليكم

معلش يا جماعه والله المطبخ الواقعي كان مستولي عليا شويه اليومين الى فاتوا على الدراسه والمذاكره بقى

لا مش انا الى باذاكر ياريت كانت بقى اسهل

ده ولادي

انا قلت بقى من زمان ما عملناش حاجه حلوه فاخترتلكم حاجه سهله وخفيفه وجميله

وهى اصابع الجلاش بالمكسرات او الفول السوداني

اولا طبعا هانجيب جلاش يكون طازه او مجمد مش مشكله المهم يكون طري

لو مجمد فككيه فى معزل عن الهواء يعنى ما تطلعيهوش من الكيس الا لما يفك فعلا ووقت الشغل

وهانجيب فوطه نضيفه ونغطي بيها ورق الجلاش واحنا بنشتغل عشان ما نيشفش من الطروف ويبوظ

هانجيب نص كيلو جلاش

وهياخد حوالي نص كوباية سمنه او زبده (ياريت بلدي )

و للحشو بقى زي ما تحبي ممكن مكسرات مجروشه وممكن خلطه زي الى انا باحبها دي

فول سوداني وزبيب وجوز هند وعليهم شويه قرفه او فانيليا زي ما تحبي

وهنحتاج شربات (قطر او شيره ) بس خفيف شويه ما نعقدوش اوي هنحتاج حوالي كوبايه شربات واحده او كوبايه ونص لو بنحب الحاجه سكر زياده

الى العمل بقى

هانجيب ورقتين جلاش ونفردهم كده قدامنا زي الصور دي ونحط معلقة كبيره من الحشو او نزود شويه ونفردها بعرض الورقه زي الصوره دي تمام

وبعدينناخد الطرف بتاع الورقه الى قدامنا ونطويه على الحشو بادينا الاثنين كده نساويه ونبرمه ونحاول بقدر الامكان ان تكون اللفه محبوكه كويس عشان تبقى ماسكه نفسها ونبرمها بادينا الاثنين فى نفس الوقت لحد ما تتلف لاخر الورقه

ممكن بالفرشاه كده ندهن الورقه قبل ما نلفها بالسمن السايح لكن يعنى لو كنتى اول مره تلفي جلاش كده بلاش لحد ما تتمكني من اللف ونبقى نرش السمن فى الاخر زي ما هانشوف

بعد ما نلف ورقتين الجلاش ننقلها بالراحه على الصنيه ونفضل نكرر ده لحد ما تخلص الكميه وتكون شكلها زي كده

بعد كده هانقطعها تقريبا طول كل حته خمسه سم وطبعا رصهم جمب بعض كده بيخليى تقطيعهم سهل جدا مع بعض

وبعد كده هانرش عليها السمنه بالمعلقه ونحاول نرش فى مكان القطع عشان السمنه تدخل بين الطبقات

زي الصوره دي كده

بعد كده هاندخلها الفرن بتقعد حوالي ربع ساعه بالكتير حسب سخونة الفرن عندك

وخلي بالك الفرن ما يكونش عالي عن 200 عشان ما يتحرش من فوق

وبنطلعه لونه اصفر دهبي جميل

وبنسقيه وهو سخن والشربات بارد ونسيبه فى الصنيه لحد ما يبرد وبعد كده نطلعه ونقدمه زي كده

وبالهنا يارب

يا لا بقى على المطبخ سريعا و وروني الشغل الجامد موت

الغريبه

احلامك اومر يا ريم

الى المطبخ بقى بدون رغي عشان انا بانضف الشقه مش فاضيالكم

وفاضل ستاره واحده فيكم تكون طويله تيجى تعلقها عشان انا ايدى واجعتنى بقى

المهم

المقادير

كوبايتين سمنه بلدي جاموسي (لونها ابيض يعنى) = نصف كيلو سمن

كوباية واحده سكر بودره ابيض برضه

والدقيق بقى حسب ما تاخد هو المقدار ده ياخد حوالي 3 كوبايات دقيق

وبياض بيضتين

طبعا ممكن نستعمل اي سمن بس الغريبه بالذااااات لو ما اتعملتش بسمنه بلدي بتبقى طعمها مش حلو

وكمان السمنه الى لونها اصفر بتخليها تطلع صفرا فمش بتكون زي الغريبه الى فى المحلات بس عادي هايطلع طعمها حلو

الطريقه

السمنه البلدي بقى تكون جامده شويه بس مش اوي اوي يعنى ممكن نحطها فى التلاجه ربع ساعه قبل ما نشتغل لو بقت جامده اوي نسيبها تسيح شويه

هانحط عليها السكر البودره ونضربها بالمضرب لحد ما تبقى شكلها زي الكريمه

ونكون مجهزين بياض بيضتين نضربهم بالمضرب كويس وبعدين نضيفهم على السمنه والسكر الى فاتوا دول

ونضربهم برضه هاتبقى زي الكريمه برضه بس خفيفه اكتر

زي الصوره دي كده وتدينا برضه علامة المنقار

بعد كده نبدا بقى نزود الدقيق شويه شويه ونقلب باطراف صوابعنا كده

يااااادوب العجينه تمسك نفسها وتسيب جدار الطبق الى بنعجن فيه عشان تبقى دايبه ونغنيلها ونقولها يا حلوه يا ناعمه يا غريبه

وتبقى عجينه لونها فاتح وطريه ز الى فى الصوره دي

بعد كده نعملها كور

ما نبططهاش هى هاتفرد لواحدها احنا نعملها كوره كاملة الاستداره ونرصها فى الصنيه وبعدين نزينها من فوق بقى يا اما باي نوع مكسرات (لوز مقشر بندق مقشر )

ونحط اللوزه مثلا نضغط ضغطه خفيفه علشان تمسك فى الغريبايه وكمان الغريبايه تتبطط سنه كده

وممكن من غير مكسرات مش هاتقول لا يعنى

معلش نسيت اصورها قبل ما تتخبز

هانحطها بقى فى الفرن الى حرارته حوالي 170 درجه

ومش بتقعد كتير يادوب عشر دقايق ويادوووب نلاقي حروفها بدأت تلون خفيف اوي نكون شلناها عشان احنا عايزنها تفضل بيضاء زي ما هى

ونسيبها فى الصنيه بس تبرد خمس دقايق

وبعد كده نشيلها فى علبه ونقفل عليها لحد ما نيجى نقدمها زي الطبق الى فووووووق ده

بس خلاص

قوموا بقى اشتغلوا ما تفرسونيش

والستاره اهي مش عاملاها الا لما حد فيكم يجى يعملها