الأحد، 24 مايو، 2009

البغاشه



السلام عليكممممممم


بعد ما عملنا المره الى فاتت بقى عجينة البف باستري هاهريكم منها اصناف ان انا باموووت فيها بشكل بشع


البغاشه النهارده بقى اسهل حاجه


طبعا زي ما قلتلكم فى الردود لما شملوله سألت عن حفظ العجينه فى الفريزر اه طبعا انا باعملها واخليها جاهزه شوفوا كده بوست التلاجه هاتلاقوا فى عجينه فى صوره من الصور بافردها واقطعها وطبقات بلاستك ما بين كل واحده والتانيه وعلى الفريزر


لما اجي استعملها بقى فى اي حاجه باطلعها وافردها على ضنيه هما عشر دقايق بتكون فاكه وانا باخليها تخمر كمان قبل ما احفظها فى الفريزر عشان تبقى على الشغل على طول


المهم هانعمل بقى البغاشه


هانعمل العجينه او تكون جاهزه عندنا او نشتريها جاهزه ده بالنسبه للحريم الشلت عادي

ههههههههههههههههه


البغاشه بقى انا جربتها بالعجينه الى من غير خميره الى هى زي الجاهزه

وجربتها بالعجينه الى فيها خميره


طلعت احلى الى بالخميره ومش شاربه زيت كتير


المهم شايفين العجينه اهو مقطعها مسطيلات ومثلاثات بس لو هانعمل البغاشه نقطع اصغر من كده شويه




خلاص هى كده جاهزه نقليها بقى فى زيت غميق وسخن نسقطها فى الزيت وهما بالظبط 3 دقايق وناخد بالنا عشان بتتحرق بسرعه بالكتير اوي خمس دقايق وتلاقيها استوت وطبعا بيتضاعف حجمها اول ما تنزل الزيت السخن




وبعد كده نشيلها من الزيت ولونها وردي زي الى فى الصوره دي


ونحطها على كلينكس دقيقتين بس يعنى على ما نحط غيرها فى الزيت تقريبا


وبعدين نسقطها فى الشربات او الشيره


شربات ما يكونش خفيف اوي ولا تقيل اوي وسط كده


ونسيبها فى الشربات دقيقتين بس عشان ما تشربش شربات كتير

ونطلعها نحطها فى مصفاه ونحط حاجه تحت المصفاه ينزل فيها الشربات الزياده


ونكرر بقى لحد ما نخلص الكميه الى احنا عايزنها


وبعدين نرصها فى السرفيس زي الى فوق ده كده


ونرش عليها قرفه ناعمه وجوز هند


ووناكل بالف هنا ونتخن وكده يعنى


فاتيما مالهاش حل ا لاكله دي فى الاوبن وعليكى خير



سهله بقى اظن


اتفضلوا اعملوها وقولولي رايكم


والبت اختي الى عملتها مره ودوقتهالي بس هى من الحريم الشلت بتشري العجينه


اه اه يا بت عجبك ولا مش عاجبك


بس انا جربتها بالعجينه الى بخميره اه طلعت مختلفه عن العجينه الجاهزه لكن انا شايفه انها احلى وبتشرب زيت اقل


وعملت برضه الي زي الجاهزه فى البيت بس الى بخميره احلى


جربوا بقى وقولولي

هناك 14 تعليقًا:

نكهة مغربية يقول...

يا جامد انت ايه الحلاوة دي
أنا عمري مجربت الطريقة دي
انشاء الله أعملها في رمضان علاشان في الوقت ده احنا بنستهلك الحلويات أكتر

جميلة يا صبرني
مووووووح
أنا روحت النهارده للسوق و جبت ملفوفة للمحشيييييييييي

شفتي الادمان يا عيني

mony يقول...

تصدقي انا سمعت كتيييير اسم البغاشة ده بس عمري ما شفتها و لا دقتها ابدا


طيب بيني و بينك كده انا ماليش في العجين اللي بيقعد باليومين ده خاااالص
مع ان عندي كل المكونات
بس مابحبش الوقفة الكتير في المطبخ
بالكتير اوي ساعة و اقلب



اجيب نتيجة الي بالخميرة بالجاهزة ازااااي؟؟

ردي علي بأه قبل ما اتهور و اعمل العجينة

خمسة فضفضة يقول...

السلام عليكم ورحمة الله وبركاته

باموت في البغاشه

طبعا باعملها في رمضان كتيييييييييييييير
بس بعجينه شبه الباف باستري بس مش هي طبعا ماانا قلتلك في الرد بتاع البوست اللي فات

شوفي يا تسي باعملها ازاي :
2 كوب دقيق + 2 بيضه + ملعقة سمنه + ماء للعجن علي اد ما تاخد
بعد العجن اقطعها كور افرد كل كوره مستطيل وبعدين احطهم علي بعض وبين كل طبقة شوية زيت او سمنة سايحه وارجع افردهم تاني لمستكيل كبير وبعدين اقطعها بالقطاعه المشرشره واقليها في الزيت واطلعها علي الشربات وارش عليها جوز هند او مكسرات مفرومه
بس كده زلا باف بستري ولا حاجه ههههههههه


سبتلك رد في بوست المحشي ابقي شوفيه


سلام يا قمر

صبرني يارب يقول...

نكهه مغربيه


قطشه كده احنا هانشغل دكاترة الرجيم عندكم

الشعب المغربي كله هايتخن بسبب المحشي بتاعنا
هههههههههههههههه

الف هنا يا جميل

صبرني يارب يقول...

موني

لا لا ما بتجيش بالجاهزه

اعمليها كده وخلاص برضه بتبقى حلوه اوي على فكره ما لهاش حل

والكيس الواحد يطلعلك سرفيس اد الى فى الصوره ده

بصي يا موني

جربي تعمليها من غير فرد وتني

يعنى زودي لها الزبده شويه فى العجن

ولكن سبيها بقى تخمر على اد ما تقدري

واقليها برضه هاتطلع حلوه دونت وري

صبرني يارب يقول...

خمسه فضفشه

ايووووووووه ماهو ده الي انا باقوله لموني على فكره

تنفع من غير تني وفرد

بس جربي بقى يا فضفضه طريقتى هاتطلع بجد ما لهاش حل


حتى انتى بتطويها مره وتفرديها بس انا باعملها كلها كوره واحده وافرد وارش زبده واطبق وافرد تاني

ما هي هي

والله وانا جربتها لعلمك بعجينه عاديه جدا طلعت حلوه برضه ماتقولش لا

بس البف باستري احلى

هاشوف الردود فى الي فات يا جميل

دعاء يقول...

أنا فعلا هاستنى رمضان عشان ببرر لنفسى كل الحلويات المتشبعة بالدهون والسكر.
مينفعش بغاشة لايت ؟
هههههههههههههه
تسلم ايديكى

مى يقول...

تسلم ايدك يا بغاشة انتى يا عسسسسسسسل
انا بحبببببببببك جدا والله
انا جرررررى هعملها واجرب فى بابا
ههههههههههههههههه
شكرا ليكى ومتتاخريش علينا
وعايزة اقول لفاتيما حبيبة قلبى كلى ياستى بلا ريجيم بلا بتاع
هعملها واقولك يا عسسسل

صبرني يارب يقول...

دعاء


لااااا لايت مين

لايت دي هناك عند امه يا ادهم

ده انتى مش هاتستحملي منها اربع خمس حتت بالكتيييييييير وتقفلي نفسك لتاني يوم

صبرني يارب يقول...

مي

ماااااشي

عادي جربي فى بابا امال هما بيخلفونا ليه يا بنتى

انتى الى عسل وعليه قشطه يا جميل انت

ELMASRYA - SHAMLOOLA HANEM يقول...

ههههههههه

كده برضه يا صوصو ؟

طلعتي عميلة مزدوجة وبتحطيلنا أكل يتخن

ولعلمك بقى أنا من بتوع الشلت

بس هشيل الشلته مؤقتا وأجرب طريقتك علشان موضوع الخميرة

يسلموا إيديكي يا أحلى صبرني

بقولك إيه

مابدل حكاية صبرني دي أنا هقولك صابرين أسهل يعني في الكلام

لو عجبك الإسم إعتمديه

بحبك قوي

صبرني يارب يقول...

شملوله

اااااااه يا اختي باعمل كده فى نفسي

بيدى لا بيد عمرو


وانا هاجي استلف منك الشلته شويه يااختي على ما تخلصي البغاشه

اصل رجليا بتوجعني

وقوليلى النتيجه بقى

وبالنسبه للاسم قولي الى يعجبك يا جميل

عموما انا اسمي الحقيقى شيماء

بس ده الى يندهني به الحريم بس

لو راجل ندهني باسمي حدانا فى البلد هايقطعوه
ههههههههههههههههههه

الرجاله تقول صبرني او ام خالد

ELMASRYA - SHAMLOOLA HANEM يقول...

سلامة رجليكي يا حبيبتي

إنتبهي لنفسك وصحتك

شكلك ست بيت ممتازة ومش بتدي لروحك فرصة للراحة

العطاء والتفاني كويس بس إعطي لروحك وقت برضه

ولو قدرتي تجهزي الأكل وانتي قاعده وبعدين تقفي يادوب على تركيبه على النار أحسن برضه

وفري صحتك يا حبيبتي ماحدش بينفع حد

دمتي سالمة بحفظ الرحمن

بحبك قوي يا صبصب

صبرني يارب يقول...

شملوله

اه والله يا اختي ما حدش بينفع حد

بس انا عزائي ان كل حاجه باعملها باوهبها لله ورسوله

حتى لو كنت باعمل لولادي

واقول ربنا يعوض عليا عوض الصابرين بقى


بس موضوع رجليا ده ان شاء الله حاله طارئه شوية التهابات فى العضم ويروحوا ان شاء الله

والخيبه انى ما باعرفش اعمل اي حاجه وانا قاعده
لما باحب استريح باجي اقعد على الكمبيوتر
ههههههههههههههههه

دي الحاله الوحيده الى ممكن اقدر اقعد فيها

تسلمى يا جميل يارب وانا والله باحبك

يحبك ربنا وعبيده يارب