لقمة القاضي

السلااااااام عليكم يا حلوين

النهارده حلووووو يا حلو انت يا حلو

طبعا لقمة القاضي بتهيئلي مافيش حد ما بيحبهاش

لها اسامي كتير

ساعات الاقي ناس بتقول عليها زلابيا

وناس بتقول بقلاوه

مش هانختلف يعنى المهم ناكل

ههههههههههههههههههههههه

ومن الجدير بالذكر

حلوه الجدير بالذكر دي

المهم لقمة القاضي دي دايما لما اعملها افتكر شخصيه عدت عليا فى الذاكره السحيقه

كان واحد بيمشي جنب بيتنا زمان ينده ويقول

لقمه يا سيدى لقمه

بنغمه كده عجيبه وفريده

طبعا انا ما كنتش فاهمه اساسا هو بيقول ايه الاول

المهم الراجل ده كان نضيف نضافه يا جودعان

اه والله مش عشان كان ماشي فى الشارع كان حد مش نضيف يعنى

لا كان بيلبس يوني فورم ابيض ايوه والله العظيم

ومكوي ومزهر وبيشيل لقمة القاضي فى صنيه كده كبيره على راسه والصنيه المونيا وبتلمع اخر حاجه ومتغطيه بقماشه بيضه نضيفه كذلك

ومعاه مسند خشب كده شايله على كتفه وكل ما حد يجيش يتشري منه يقف وينزل المسند الخشب الكبير ده ويحط عليه الصنيه وبعدين يدي الى طلب ويرجع يشيل تاني

سنين سنين وهو على هذا الحال اوعى عليه الاقيه راجل عجوز وفى نهاية عهدي به فى شارعنا القديم كان بيمشي ومعاه بنت صغيره لانه ما كانش بيشوف كويس

دؤؤؤؤؤب نشيط نضيف متقن لعمله عنده اصرار على العمل والانتاج رغم تقدمه فى السن

ايه الرغي ده

قدامي على المطبخ

المقادير بسرعه بقى بلاش رغي

كوباية دقيق ابيض

كوباية نشا

( النشا الى بيخليها تطلع ناشفه زي الجاهزه اكتشفت كده مؤخرا )

كوبايه ونص مايه

ملعقه كبيره خميره عاديه او فوريه (بس انا باحب العاديه )

بث كده

اه والله

الطريقه

بنخلط الدقيق على النشا الاول

وبعدين نكون جهزنا الخميره دوبناها فى شوية مايه دافيه وربع معلقة سكر

وبعدين بقى بالمعلقه او المضرب ونحط المايه على الدقيق والنشا وطبعا قبل المايه نحط الخميره

ونزود المايه شويه شويه عشان جايز ما نحتجهاش كلها(لكن هى عموما بتبقى عجينه سايبه )

وبعد نغطي عليها وسيبها ساعه تقريبا وهاتبقى شكلها كده

وده بيكون سمكها كمان والخميره بتخليها تشد شويه وتبقى فيها فقاقيع زي دي كده

اهم حاجه بقى بعد كده تكوني سريعه شويه قدام النار طبعا فى الاول مش هاتبقى سريعه ولا حاجه ده انتى هاتبقى هبله

فانصح اي واحده هبله قصدي اول مره تقف فى المطبخ انها تعمل نص الكميه بس فى الاول

وكمان تستخدم طاسه صغيره على ادها كده نونو

هانبدا نقلي بقى

نجيب طاسه زي الى فى الصوره دي عميقه شويه ونحط فيها زيت كتير ونحطها على النار تسخن

والعجينه قبل ما نبدا شغل نقلبها عشان الفقاقيع الكبيره دي تروح شويه وما يبقاش شكلها وحش وكمان ما تفرقعش فى وش حضرتك

وهانشكلها ازاي

معلش دي ما عرفتش اصورها عايزه فيدو وانا كنت لوحدي

بس هاوصفها( طبعا بنهدي النار بقى )

هانجيب معلقه صغيره وناخد بها عجينه ونبل صباعنا السبابه مايه وبعدين بطرف صباعه وبسرعه وخفه كده يا خفه وتنزل العجين مره واحده وفى مكان واحد فى الطاسه عشان يطلع مدور زي الى فى الصوره ده

ها اقريها تاني عشان تفهميها والى ما فهمهاش يقولي وانا ابقى اصورها فيديو المره الجايه ونستعين بصديق

وطبعا بسرعه نحاول نملا الطاسه عشان تاخد سوا واحد

وطبعا ممكن تطلع منك منبعه مش مدوره اوي مش مشكله كله هايتاكل ما تعذبيش نفسك

وهايكون شكلها كده يا حلوين

ونفضل نقلبها كل شويه عشان تاخد لون دهبي حلو كده

وبعدين نطلعها على كلينكس لما تحمر طبعا

ودقيقه واحده ونسقطها فى شربات (سيرب - قطر ) بارد طبعا ونقلبها ونسبها 3 دقايق لو بنحبها تشيل سكر شويه

ونطلها فى مصفاه

وبعد لما تبرد نقدر نضرب طبق زي الى فى الصوره فوق ده وبكده نكون قضينا على ام الدايت الى بنعمله

هههههههههههههههههههههههههههههههههه

فاتيما ما تعديش من جنب البوست ده خالص ماشي

ابقى تعالى فى ا لاوبن داي يا اختي

كالعاده يا قطاقيط الى يجرب يقوووووولي

ومن المره الجايه ان شاء الله نبدا مجموعة بوستات جديده تحت تبويب مطبخ المبتدئين

لان كتير طلبوها مني سواء بنات لسه هايتجوزوا او كمان ياعينى رجاله مغتربين ويقعدوا يقطعوا فى قلبي ويقلولي بتجوعينا وكده يعنى

المهم هايكون الكلام فيها على طبخات عاديه مش اصناف صعبه ولا جديده

وكمان هاعمل بوستات تانيه ازاي تبقى ست بيت شاطره مش عبيطه

ولا ايه رايكم يا قوم