القلقاس

واخيرااااااااااااااا وبعد طوووووووووول انتظار القلقاااااااااااااااس يا واندا

يا سلام الواحد حاسس ان القلقاس حمض فى اديه

القلقاس ده يا جماعه من الطبخات الى بتتعمل بمليون طريقه وكل بلد لها طريقه شكل بل وكل عيله لها طريقه شكل لكن الحقيقه انا ما باحبش اي طريقه منهم الا الطريقه بتاعتنا والى علمتهالي كانت تيته الله يرحمها كانت استاذه الحقيقه فيها

المهم طبعا احنا المره الى فاتت قلنا ازاي نقشر القلقاس ونقطعه ونخزنه فى الفريزر وهكذا يبقى جاهز للطبخ فورااااااا

وممكن طبعا يبقى فريش عادي زي الى فى الصوره ده

الموضوع بقى المهم فى طبخ القلقاس هو تقلية القلقاس

مكونات التقليه دي يا اعزائي المطبخين الكرام

عباره عن كسبره خضراء وتوم

فى ناس بتحط ورق سلق وفي ناس بتحط بصل

لكن الحقيقه انا باحبها بكسبره خضراء وتوم

بنغسل الكسبره الخضراء ونقطعها صغير وتكون متصفيه كويسه من المايه

والتوم كذلك بنقطعه او نهرسه بالسكينه المهم نعمل اختراق للقشره الخارجيه

ونيجى فى طاسه كبيره ونحط كميه من السمنه مناسبه عشان نحمر فيها الكلام ده ولما السمنه تسخن نحط الكسبره والتوم زي الصوره دي كده بالظبط

وهانفضل بقى نقلب فيها على النار وبالتدريج كده هاتفضل تدبل الكسبره وتسرد مايتها واحنا بنقللللللللب برضه


وبعد كده المايه هاتنشف ونبدأ نحمر بقى الكسبره زي الصوره دي كده ولاحظوا معايا تدرج الالوان كده

لما نوصل بقى ان شاء الله للون البنى ده وساعتها واحنا بنقلب هاتلاقي الكسبره لها صوت خرفشه كده وده معناه انها نشفت وبقت تمام

معلش هى الصوره طبعا مش واضحه اوي لكن المهم اننا بنطلعها لونها بني غامق زي بصلة الكشري كده

وبعد كده بنسيبها تبرد شويه وبعدين بنحطها فى الكبه او المفرمه او وات ايفر ونفرمها فطلع عامله زي المعجون زي الصور دي كده

الحقيقه موال رخم جدا وبيبهدلي المطبخ عشان كده انا باجي فى الشتا وبتكون الكسبره كتيييييييره فى السوق اجيب عشره خماشر ربطه كده

واعمل بقى كميه كبيره من التقليه وبعدين اقسمها فى ورق سلفر كده الحته على اد الطبخه واطبقها واحفظها فى الفريزر بحيث ساعة الاستعمال اخدها كده جاهزه من الفريزر بتبقى حاجه جميله جدا

كده تقليتها جاهزه والحمد لله

ندخل على الطبيخ بقى

القلقاس يستحسن ويفضل انك تخزنيه فى شهر يناير او بالاحرى شهر طوبه لانه بعد كده بيبقى بينشى ورخم وقبل كده بيبقى سواه وحش اوي

طيب لو كان القلقاس من النوع الى بينشى او حتى مش بينشى اوي لكن انتى هاتطبخيه مثلا وهاتتغدوا بعد ساعتين ثلاثه

فى هاذوها الحاله لازم تاخدي القلقاس غلوه الاول فى شوية مايه وبعدين ترمي المايه ويا حبذا لو تحطي فى المايه معلقة طماطم او نقطتين لمون

الاول بنغلي المايه وبعدين نسقط فيها القلقاس ويادوب يغلي اربع خمس دقايق وبعدين نصبه فى مصفاه ونغسله بمايه بارده لحد ما المايه اللازجه دي تروح منه

بعد كده بقى نرجعه الحله تاني ونحط عليه شوربه ونص كوباية عصير طماطم او معلقة صلصه ونسيبه يغلي

ولحد ما يستوى بقى مش هياخد سوى كتير ان شاء الله يادوب ربع ساعه كده هايكون استوى تماما وطبعا نطلع قطعه نجربها مش عايزينه يتهري من فضلكم

بعد كده هناخد معلقه كبيره من التقليه الى احنا عملناها فوق دي ونحطها على القلقاس زي الصوره دي كده

ونقلب ويادوب يغلي ونظبط ملحه ونطفي عليه خلاص

ما نحطش التقليه من بدري عشان تفضل على لونها ما تبهتش

وبعد كده يكون القلقاس بهذا الشكل العظيم المريع وبالف هنا يا قوم

أي خدمه يا وندا مش عارفه من غيرى كنتم هاتكلوا قلقاس ازاي

طاجن المسقعه

السلاااااااام عليكم

اهلا بكم فى مطبخنا السعيد

اه سعيد فى مانع ؟؟

المهم زي ما انتم شايفين وعنيكم مزغللين على طاجن المسقعه الى فوق ده

عزيزتى نوره الى ما نقدرش ناخرلها امنيه مصراويه ابدا

قالتلها انها سمعت عن المسقعه وعايزه تجربها وها هي المسقعه بشحمها ولحمها وبتنجانها

يلا الى العمل

البتنجان الايام دي فى السوق عادي مش عارفه المفروض يبدأ يختفي بس هو فى السوق وحلو كمان

يلا هو احنا نقدر نستغنى عن البتنجان

طبعا لو قولنا هانعمل كيلو بتنجان مثلا

هايكون حوالي الكميه الى قدامكم دي هانقشره (وفى ناس مش بتقشره مش مشكله ) ونقطعه

انا باقطعه بالطول زي ال في الصوره ده عشان بيقولوا كده بيشرب زيت اقل

بعد كده هانقلي الباذنجان فى زيت طبعا يكون سخن بس اول ما نحط الباذنجان نهدي النار عليه شويه عشان يستوي وفى نفس الوقت ما يتحرقش

ويطلع لونه اصفر وحلو كده بعد ما نخلص الباذنجان وقليته هانحطه على ورق كلينكس عشان يشرب الزيت

والحقيقه انا باعذبه شويه زياده واحطه فى مصفاه ومافيش مانع اكب عليه كوبايتين مايه سخنه بتغلي فينزل اكبر كميه ممكنه من الزيت

ونسيبه يصفى ونروح نعمل شغل تاني

هانجيب بصله ونقطها جوانح (نص دائره او ربع دائره) او حتى نفرمها فى المفرمه زي ما نحب

وندعك البصله بملح وفلفل

وبعدين هانقطع حبة فلفل رومي مكعبات اخضر أو الوان او الاثنين عادي زي الى فى الصوره ده

وكمان حبايتين طماطم ونقطعهم مكعبات

و3 قصوص ثوم مهروس

خلا ص كده جاهزه كل حاجه

نروح على الطاسه الجميله دي ونحط معلقة زيت واول حاجه نحطها البصل ونقلب لحد ما يدبل شويه بس

وبعدين نحط التوم

ويادوب ثواني تقليب عشان التومه ما تتحرقش ونزود بقى الفلفل وبعدها دقيقتين ونحط الطماطم ونقلب برضه

بعد كده بقى عندنا اختيارات كتيره

فى ناس تحب للمسقعه صلصه تقيله شويه فى الحاله دي هانحط حوالي كوبايتين عصير طماطم على الخليط الى فات ده

وممكن كمان نعمل المسقعه باللحمه المفرومه فنحط لحمه مفرومه برضه قبل ما نحط عصير الطماطم ونقلبها 3 دقايق ونسيبها شويه وبعدين نزود عصير الطماطم

المهم بعد ما نزود عصير الطماطم او الشوربه (مرقه ) او حتى مايه مش مشكله هانسيب الخليط ده يغلي شويه لحد ما يتسبك شويه

وبعد كده بقى نروح على الطاجن الجميل بتاعنا ده ( وممكن نعمله فى صنيه او قالب بايركس مافيش مشكله)

بس الطاجن ده بيبقى له طعم خاص مع الاكل

ونحط بقى شويه من الخلطه بتاعة الطماطم وطبقة بتنجان وبعدين خلطه الطماطم وبعدين باذنجااااان وهكذا لحد ما نخلص الليله كلها ويبقى شكلها كده

بعد كده بقى ندخلها الفرن و نسيبها بس حوالي نص ساعه وهاتطلع زي الطاجن الى فوق الى وشه احمر وشكله يجوع ده

وانا صايمه عيب كده والله

المهم ممكن بقى لو انتى عامله لحمه قطع مستويه جاهزه تحطيها على وش الطاجن قبل ما يدخل الفرن وبتطلع شكلها وطعمها جميل جدا

وممكن كمان يكون عندك عصاج جاهز فتحطيه على وش الطاجن قبل ما يدخل الفرن برضه بيعمل شغل ميه ميه

بس كده عايزين شغل بقى

والبنات المبتدئين عايزه تجارب بقى فى البشر

ههههههههههههههههه

المسقعه بالبشاميل

السلااام عليكم

المسقعه حياتي المسقعه باموت فيها امال احنا ا يه جايبنا ورا

الباذنجان الايام دي يا جماعه روعه باحب اكله جدا فى شهر خمسه وسته اول ما يدخل شهر سبعه انسوا مش بادوقه بيبقى مريع وبيعملى حموضه

فقلت الحق بقى اعملكم مسقعه بالبشاميل وفى طمان جاي قريب طاجن المسقعه كله جاهز والنبى

يلا ندخل على الشغل عشان مش فاضيالكم

هانحتاج حوالي كيلو باذنجان

و3 كوبيات صلصة البشاميل

ولحمه مفرومه عصاج يعنى للصنيه المتوسطه نحتاج حوالي نص كيلو او حسب ما نحب

وواحده فلفل اخضر رومي مقعه حلقات او قطع صغيره وينفع فلفل الوان وينفع فلفل بلدي مش هايقول لا يا جودعان

كله كده تمام

الى العمل

اول حاجه البتنجان هانقطعه انا عن نفسي باحب اقطعه بالطول لان والله اعلم بيقولوا كده بيشرب زيت اقل

الى فى الصوره ده متقطع بالعرض مش انا الى مقطعاه دي ماما

هانقطع البتنجان وغسله ونرش عليها ملح خفيف مش كتير اوي ونسيبه نص ساعه كده وبعدين نقليه

ونطلعه لونه فاتح على اد ما نقدر افتح من الى فى الصوره برضه مش انا الى قالياه دي ماما

المهم نجيب الصنيه

ونحط كوباية بشاميل تحت ونفردها وبعدين نرص البتنجان فوق البشاميل زي الصوره دي كده

وبعدين نفرد عليها العصاج زي الصوره دي

بس انا باحب فى العصاج بتاع البتنجان احط فص توم مع البصله وكمان ازود عليه 3 معالق كبار صلصه طماطم مركزه

بعد كده هانرص الفلفل الاخضر بس نسيت اصورها دي والمشروم ان وجد وزتون ما يقولش لا وبعدين نرص فوق الكل طبقة بتنجان تانيه زي الصوره دي كده

بعد كده نغطي الصنيه بالبشاميل الباقي تتغطى كويس زي كده

وندخلها فرن حامي 200 درجه وبتقعد فى الفرن حوالي ساعه الا ربع الو ما تتحمر بس لان هى كل حاجه مستويه اصلا

وممكن فى نهاية السوى نبقى نرش عليها من فوق جبنه رومي او موتزريلا

وبتطلع بالحلاوه دي يا جودعان وناكل ونتخن ونربرب وما حدش واخد منها حاجه

اه بالنوسبه لبتوع الرجيم ممكن تعملوا بشاميل من غير سمن الى هو بتدوبي الدقيق فى اللبن وبس على كده وتحطيه على نار هاديه وتقلبي لحد ما يربط

والبتنجان بعد ما تقليه تفرديه فى مصفاه وتصبي عليها مايه سخنه وتسبيه شويه هاينزل كل الزيت الى فيه

ولما تاكل من المسقعه دي ما تحفيش يعنى قطعه واحده بلاش طفاسه وفى الغدا مش فى العشا

ههههههههههههههههههه

يلا عايزه شغل يا حلوين

الى يجرب قوووووووولي والف هنا

طاجن الباميا باللحمه الضاني

السلام عليكم يا مطبخيينا الاعزاء

بعون الله تعالى وفضله هانفتتح النهارده سلسلة مطبخ المبتدئين الى هانطبخ فيها طبخات عاديه وسهله ان شاء الله ونراعي فيها ان الناس الى بتقرا يادوب بيعرفوا يعملوا شاي

سواء بنات صغنين او كبار بس شلت او رجاله يا عينى عذاب وغلابه وقاعدين من غير جواز زي الشبابيك الى من غير ازاز

وعموما انا كل البوستات بعد كده هراعي فيها الناس الغلابه دول وافصل شويه فى الكلام

هانبدأ النهارده نعمل اكله عتيقه من المطبخ المصري العظيم الشأن الى ماكلنا ومبوظلنا الدايت

هانعمل طاجن باميا باللحمه الضاني

سامعه حد بيقول يعععع ضاني مش باحبها

احب اقولك ياعمنا ما تبقاش تاكل انت اللحمه الا ان انا اكتشفت ان اللحمه الضاني دي موجوده عشان نعمل بها الباميا

والباميا برضه موجوده عشان تنطبخ مع اللحمه الضاني فقد خلقوا لبعضهم الاثنين الحلوين دول .

بجد الباميا باللحمه الضاني شكل تاني يا جودعان

ندخل على المطبخ وكفايه رغي

هانعمل نص كيلو باميا وده هايكون كافي لحوالي 3 اشخاص

وهانحتاج معاه واحد بصله متوسطه

اثنين فص توم

واحد قرن فلفل اخضر (يفضل يكون حامي او قرن شطيطه يعنى ) مش عايزين حامي عادي تمشي

نص كيلو طماطم

او يعنى اربعه أو خمس حبات

وطبعا لحمه ضاني برضه نقول نص كيلو

ابو زيد بلاش انت لحمه روح للجزار هات منه حته ليه كفايه عليك

ههههههههههههههه

الطريقه

هانفرم البصل والتوم

ونجهز الحله الى هانشتغل فيها تكون ناشفه

ولما تسخن نحط فيها نص معلقة سمنه

او ممكن لو عندنا ليَه بتاعة اللحمه الضاني نقطعها حتت صغيره ونحطها على طول فى الحله السخنه وهى بتسيح لو قلبناها دقيقتين

ونحط البصل اولا ونقلبه لمدة 3 دقايق يادوب يدبل وبعدين نضيف التوم المفروم برضه ونقلب دقيقتين

وبعدين الفلفل ونقلب كمان 3 دقايق لحد ما البصل يصفر

ونكون عملنا الطماطم فى الخلاط (هانقطعها اربعه ونحط معاها ربع كباية مايه فى الخلاط ونضربها )

ونطشها بقى مع البصله ونشهق واحنا بنطشها

هههههههههههههههههه

ونغطي عليها ونسيبها تغلي ولما تغلي نوطي عليها النار ونحط لها الملح زي ما نحب ونسيبها بتاع نص ساعه

الباميا بقى فى النص ساعه دي نجهزها

هانحط مايه تغلي على النار

وعلى ما تغلي نكون قمعنا الباميه

الى هو نشيل الحته فوق فى الباميه ونشك واحده الباميه شكه واحده بالسكينه من الجنب عشان تستوي من جوه

وطبعا ما نشيلش نص قرن الباميا واحنا بنشيل راسه من فوق

ونغسلها وبعدين نسقطها فى المايه الى غليت خلاص

ونسيبها على النار بالكتير ربع ساعه اول ما تبدأ تلين كده فى ايدينا

وبعدين نقلبها فى مصفاه فى الحوض ونصفيها من المايه اللزجه دي وانا باحب كمان اغسلها باسيب عليها شويه مايه خفيف كده

وبعدين كده تكون الطماطم اتسبكت نقوم مزودينها شوربه اللحمه الضاني

ابو زيد انت حطيت ليَه خلاص حط مايه انت بلاش شوربه (زعلان انت من اللحمه )

وبعدين نسقط الباميا بقى فى التقليه نسيبها لحد ما تغلي وبعدين نصبها بقى فى الطاجن ونرص اللحمه على وش الطاجن وندخلها الفرن لمدة ثلث ساعه تقريبا لحد ما تتشرب الصلصه ووش الطاجن يحمر

ممكن نسيبها تغلي على البوتجاز فوق ربع ساعه بس نوطي عليها عشان ما تلزقش

وبعدين نصبها فى الطاجن ونحط على وشها اللحمه ونولع لها الشوايه بقى خمس دقايق بس عشان وشها يحمر

وبتطلع من الفرن تزغرد وتقول كولوووووووووني بقى

طبعا هاتقولولي فين الطاجن يا نصابه انتى عاملاها فى قالب بايركس

هاقولكم والله يا جودعان الطواجن بتاعتي كانت طالعه دليفري لبن رايب يومها فقلت القالب بقى ما يقولش لا

دي الطريقه التقليديه لطاجن الباميا باللحمه الضاني

نيجى بقى للغلابه بتوع الدايت مش هانحرمهم من حاجه بتيتا

اي خدمه

انا كنت على فكره مش باكل الباميا فى الدايت على اساس انها لازم نعملها تقليه وفيها سمنه وكده يعنى

انما مره من ذات المرارير رضا فقعنى بمبه زين الزين وقالي هاجيبلك سمك وانا جاي وبعدين كلمته الساعه 3 فين يا بوي السمك قال اخخخخخخخخخخخخ نسييييت

جريت على التلاجه عشان كان بابا هايتغدى معانا مش طالبه تهزيء

كان عندي لحمه ضاني مشوحاها وقلت اسيبها لبكره طبعا جري كملت طبيخها

وطلعت الباميا من الفريزر (انا باجيبها واقمعها واسلقها واعينها فى اكياس فى التلاجه تبقى جاهزه على الطبيخ على طول )

وكذلك الطماطم دايما عندي صلصة طماطم مركزه جاهزه فى الفريزر برضه على طبيخ على طول (هانعمل بوست ان شاء الله عن حفظ الخضار فى التلاجه )

قووووووووم طلعت كيس الباميا وكيس الطماطم

وفى الكبه حطيت البصله والتومه والفلفل واخبط فى الكبه

وحطيت كله على بعضه وعليه الشوربه بتاعة اللحمه الضاني

وخلاص نصف ساعه كان الاكل جاهز

كانت تحفففففففه واتمسحت وطبعا انا كلت منها لان مافيهاش سمنه ولا ليه واللحمه الضاني كانت يومها موزه مافيش فيها دهن

بث كده

الى عنده سؤال يجوووووووووووولي يا بوي

والى يجرب يقولي كالعاده

كفتة البطاطس والخضروات

حبايبى الحلوين المطبخيين اصدقائي

الايام دي البطاطس فى السوق حلوه وكتيره ما شاء الله وعشان كده قلت نستغل الفرصه دي ونعمل منها حاجات كتير

وانا احب لما تكون الحاجه فى موسمها انى استعملها كتير لانها اكيد خلقت فى هذا الوقت لحكمه منه عز وجل

عشان كده انا باغرقهم بطاطس فى موسم البطاطس

ندخل على الشغل بقى

هانحتاج حوالي خمس بطاطسات مسلوقين ومقشرين ومهروسين طبعا(أو 3 بطاطس متوسطه و2 جزر ه)

وبصله متوسطه مفرومه

بيضه

وحوالي نص كوبايه فول صويا مطحون ولو ما عندناش ممكن نحط بداله بقسماط نو بروبلم

ملح وفلفل وبهارات

(ولو حد بيحب طعم الخضره ممكن نزود كمان 3 معالق كسبره على شبت على بقدونس مفرومين )

وبقسماط على دقيق + بيضه للتحمير

الطريقه

هانحط كل المكونات دي على بعضها كده فى الفود بروسيسر او الكبه او وات ايفر مش مشكلتي هههههههههههههههههههههههههه

ونخلطهم كويس لحد ما يطلعوا شكلهم عامل كده

وبعد كده نشكلها صوابع زي الصوره الى فوق دي وبعدين ننزلها فى الدقيق وبعدين البيض وبعدين البقسماط ولو هى ماسكه نفسها يعنى ممكن نخلط البقسماط على الدقيق ونحط فى البيض ونطلع عليهم وبعدين نسقطها فى الزيت وهو سخن وبتاخد تحمير مافيش 4 دقايق وطبعا ما نعليش عليها اوي عشان ما تتحرقش .

وممكن نعملها مدوره زي الصوره دي كده ودى بتنفعني لو العيش بتاع السندوتشات مدور بيبقى ده انسب

وطبعا دي بجد لذيذه اوي ومفيده اوي لو هانحط عليها جزر وصويا بترفع قيمتها الغذائيه

والعيال عندي حبوها جدا

مريم جت من المدرسه قالتلى ماما حلو البانيه الى كنتى عاملاه فى السندوتشات ده

ههههههههههههههههههههههههه

باقول لرضا بنتك بتقولي على البطاطس بتاعة الصبح حلو البانيه ده

قالي بطاطس ؟؟؟

بطاطس ايه ؟؟؟ هو كان فى بطاطس ؟؟ دى كانت طعميه باين ؟؟؟!!!

ناس فله الصراحه هههههههههههههههه

بس بجد بطلع حلوه اوي جربوها وعلى ضمانتي

ولو طلعت منكم فاكه شويه زودوها شويه فول صويا مطحون او شوية بقسماط لحد ما تمسك نفسها

وبالراحه وانتم بتقلوها لانها بتكون طريه اوي عن كوفتة اللحمه طبعا

والف هنا

والى يجرب يقولي

الكوسه بالبشاميل

الكوسه يا حلوين اهو ما تقولوش حرماكم من حاجه عشان انا فى حد استعجلني فيها مش فاكره مين معلش السن بقى يا اخوانا احمدوا ربنا

المهم

المقادير بقى

حوالي كيلو كوسه او خضار مشكل كوسه وبسله وجزر وطبعا مقشرين ومقطعين زي الكوسه الى فى الصوره دي كده قطع طوليه

و3 كوبايت صلصة بشاميل

وحوالي نص كيلو لحمه عصاج

الطريقه بقى يا حلوين

مافيش اسهل من كده صور على فكره واااااااضحه جدا سقفولي عليها من فضلكم

الاول بنجيب صنيه ونحط فيها نص معلقة سمنه بلدي ولما تسخن نحط الكوسه ونشوحها لحد لماااااااا تنشف من الميه خالص مهم اوي حكايه تنشف دي بس ما تتحرقش من فضلكم

زي الصوره دي كده بالظبط

ولو عايزين نعملها خضار مشكل نزود عليها خضار مشكل برضه ونشوحها لحد ما تنشف زي الصوره دي كده برضه

بعد كده نروح على الصنيه او القالب الى هانعمل فيه ونحط بقى اول حاجه اربع معالق كبار تقريبا بشاميل زي كده


بعد كده نرص الكوسه تماااام زي كده واحده جنب اختها زي الصور دي كده وبعدين نحط عليها حوالي نص كوباية بشاميل او يعنى لحد لما نغطي الكوسه

وبعد ما نرص الكوسه ممكن بعد كده نحطط الخضار الباقي بس نخلي الكوسه تحت عشان تمسك الخرطه لما نيجى نقطع يعنى

وبعد كده نفرد اللحمه العصاج على الخضار زي كده بالظبط

وبعدين نرجع نرص الكوسه برضه بس المره دي لو حاطين خضار نحطه قبل الكوسه يعنى الكوسه تبقى على الوش زي الصوره كده تمام وبرضه واحده جنب اختها وبعدين ننحط بقى باقي البشاميل كله عليها من فوق زي الصوره دي كده بس نساويه وما نخليش الكوسه باينه خالص

وده قطاع طولي للصنيه ههههههههههههههههه صوره بالجنب يعنى عشان تشوفوا الطبقات وترتيبها قبل ما تدخل الفرن

وده شكلها بعد ما طلعت من الفرن وانا جوعت لا سيما انا شامه ريحه العصاج الى انا باعمله على النار اصلا

وده قطاع طولي برضه للصنيه بعد ما طلعت ملاحظين اللون والطبقات وكده يعنى ولا ايه

مصوره كبيره انا والله

وبعد ما تبرد بقى يا قطاقيط شويه نقطعها ونطلعها بالراحه كده تتقدم زي ما انتم شايفنها كده

اكله جميله جدا جدا وانا بامووووووت فيها وبتبقى حلوه فى العزايم كصنف خضار غير تقليدى يعنى وممكن تقدموها عادي مع عيش وسلطه خضرا او كول سلو تبقى برضه ما لهاش حل

والف هنا والي يجرب يقولي والى مش فاااااااااااهم ......... لا يقولي برضه زي بعضه

الخرشوف بالخضروات والجبنه

الخرشوف بعد ما جوعناكم بقالنا فتره غايبين عليكم

وخضار اهو يا داليا بنت الغربه لاجل عيونك

الخرشوف للي ما يعرفوش بيبقى شكله وهو اخضر زي الصوره الى فوق دي وده مش صباعي انا معلقه الصور دي من على النت هههههههههههههههههههههههههه

المهم طبعا احنا بنجيب الخرشوف وننضفه نشيل الورق الاخضر الى بره ده وبنشيل كمان قلبه

وعشان نجهزه كمان لازم نشوحه الاول فى معلقة سمن او زيت كده وننطقه بالحله لحد لما يستوي شويه وفى النهايه بيكون شكله زي الى فى الصوره ده والى برضه معلقنها زي ما انتم شايفين

ونرصه فى الصنيه كده زي ما هو قدامنا وبعدين نبدأ نحشيه

الحشو بقى بيكون زي ما تحبوا

انا باحب الحشو الى بيكون لحمه مفرومه معصجه + مشروم برضه مشوح قبل كده ومقطع صغير + زتون مفروم او مقطع صغير + جبنه رومي او متزريلا او شيدر مبشوره .

كل ده بنخلطه على بعضه ونحط تقريبا معلقه كبيره فى كل واحده خرشوف

وعلى الوش نحط معلقتين بشاميل او شريحه جبنه من اي نوع

وندخلها الفرن بقى على كده وطبعا كل المكونات مستويه اصلا يعنى يادوب تسخن والجبنه تسيح

قولي حوالي ربع ساعه وتطلعيها

ويكون جاهز للاكل على كده وممكن تقدمي معاه بطاطس محمره وكول سلو ويبقى اكل خفيف ولذيذ جدا

والحشوات بقى ممكن تغيري فيها على كيفك

فى ناس بتحشيه من غير لحوم وفى ناس بتحشيه سبانخ كمان وعلى وشه جبنه برضه

زي ما تحبي يعنى

وعلى فكره فى خرشوف مجمد نص سوى لما باتزنق باجيبه وبيبقى حلو برضه وسهل طبعا

وما لقيتش صوره بقى يا جماعه معلش

ايوه قولوا يارب رضا يصلح لها الكاميرا

الى يجرب يقولي