الأحد، 28 فبراير، 2010

ام علي ...... يا عليييييي


السلااااااااام عليكم


ام علي يا واندااااااااا بتسلم عليكى والله

بصوا انا مصوره ام علي دي من السنه الى فاتت وفضلت اجلها لحد ما الصيف دخل قلت لا بقى دي عايزه البرد يا جدعان

وادي الشتا ده قرب يخلص وانا لسه باجل برضه عالم فاشله اخر حاجه

المهم بقى بناءا على طلب الجماهير

الى هما واندا السواحه

والبت شيما المخطوفه على راي فاتيما

والبت ام مريم نبر تو مش انا دي خليفتى فى الملاعب

فقلنا ننزلكم موضوع جديد

لايق على البرد والتجمد الى انا فيه حاليا فى الرسبشن بتاعي المتلج موت

لا لا مش زي التلج بتاعك يا وندا انتى غير يا ماما خليكى عايشه فى الفريزر حتى بعد الفريزر بشويه


اليكم يا حضرات ام علي

ام علي دي لها باكتس كده بتتباع فى السوق اشتريتها مره لقيتها حاجه تعبانه جدا مالهاش اي لازمه عباره عن شويه حاجات ناشفه كده ولو قديمه يبقى طعمها مش ولا بد ويادوب بالعافيه تعملي اربع اطباق

قوم انا قلت كلا الفته لا يمكن نشتغل فى الكلام الفارغ ده

وحاليا انا باعمل ام علي باي حاجه تقابلنى

اليكم الاتي وده بالترتيب من الاحسن

الفطير الفطير المشلتت العادي طبعا طبعا مش باعمله ما تحلموش انما انا عندي العيال بيحبوه فبنشتريه كتير والى بيبات منه ما بيتاكلش

انا باحوش البواقي دي ممكن فى الفريزر حتى لو الحكايه هاتطول وبعدين اول ما افتح الفرن لاي سبب اقوم مطلعه البواعي دي ومقطعها ومفرفراها كده وبعدين ادخلها الفرن عشر دقايق وبما ان الفطير بيبقى فيه سمن اصلا بتطلع بقى الدنيا محمصه وحمرا وزي الفل

لو مش هاستعملها فى والتو واللحظه باسيبها تبرد واعبيها فى كيس واسيبها فى التلاجه لحد ما احتاجها تبقى جاهزه على طول ما تاخدش عشر دقايق


وممكن كمان نعملها بالجلاش او بالرقاق وانا لما بيفيض اي حاجه من دول او حتى كسر منهم مش بارميه ولكن بالحقه على الفطير اياه برضه

لكن الجلاش والرقاق بقى مش بيبقى عليهم سمن فلازم نحط عليها معلتين ثلاثه سمن حسب الكميه كده ونقلبها عليهم او لو ورق الجلاش كامل احنا ندهن ورقه ورقه بفرشاه كده بالسمن وندخلها الفرن هما ثلاث دقايق وهاتلاقيها احمرت نطلعها على طول

ايا يكن

فان ام علي تعتمد على عجينه بنرقها جدا ونحمصها مع سمن فى الفرن قشطه كده ؟؟؟

يعنى حاجه زي الفته كده وادي شكلها بعد التحميص

بعد كده هانجيب اللبن طبعا هحاول جاهده انى احددلكم كميات عشان انا باعملها بالنظر

لو قلنا عندنا كوبايتين مثلا من الفطير المحمص او الجلاش المحمص فاحنا هنحتاج حوالي لتر حليب

هانسخن اللبن الحليب على النار ونحط عليه سكر مناسب حسب ما بتحبوا وفانيليا ولما يغلي على طول هسقط الفطير او الجلاش المحمص

ونقلب ونسيبه يغلي حوالي عشر دقايق مع التقليب عشان ما يلزقش ونكون مهديين النار عليه زي كده

لحد كده هى ممكن تبقى تمام

لكن انا فى حاجه باعملها لانى ما باحبش ام علي تكون سايبه اوي كده ويبقى فيها لبن لو لقتيها سايبه معاكي اوي تدوبي معلقة نشا فى معلقتين مايه وتزوديهم وهى بتغلي كده فى الاخر هاتلاقيها مسكت شويه وبقت تمام

انا الحقيقه مش باحبها تبقى مكتومه اوي يعنى كلها فطير او جلاش فبحب اسيبها حبه واحطلها معلقة النشا دي بتظبط الدنيا كويس



بعد كده بقى نجيب الطواجن الصغيره او ممكن نستخدم سلاطين بايركس او بورسلين اي حاجه بتستحمل الحراره يعنى ونوزع عليها الخليط الى عملناه فوق ده ونحط على الوش بقى مكسرات او فول سوداني او مش مهم خالص زي ما بتحبوها

ومعلقة قشطه كبيره

او بشر زبده زي الصوره دي كده حسب ما تلاقي عندك بس القشطه الصراحه بتبقى اجمل

اهو صوره دي بالقشطه عشان ما تزعلوش نفسكم


طبعا بما انى مش عامله طبق واحد هانرص كل الاطباق على صنيه واحده وندخلها الفرن بس الشعله الى فوق الشوايه يعنى لمده عشر دقايق فقط


ونحط الصنيه فى الرف الوسطاني حتى بانزله ساعات تحت شويه


فى ناس بتحمرها بالنار كده سريعا من فوق مش فاكره اسم البتاع ده يا اخويا الزهايمر اشتغل مش مهم

لكن انا باحبها اكتر تدخل الفرن شويه بتمسك نفسها وتاخد لون حلو

وبس على كده تطلع بقى حمرا وبتزغرت كده يا اخواتي وتتاكل فووووووووووورا عشان تدفي



وباقدم اعتذاراتي على الصور والله انها مش حلوه لا الموبايل بتاعي بيصور كويس ولا البرنامج الى كنت باشتغل عليه يظبط الصور راضي يشتغل


والف هنا يا جودعان وطبعا بعد ما الواحد يضرب طبق ام علي الي فوق ده هايلاقي وشه ضرب احمر فى زرتقاني وينام بقى للصبح فى التمام

والى يجرب يقولي بلاش ندااااااااله




هناك 17 تعليقًا:

Wanda يقول...

يام يام يام
تعيش شجرة الدر الى طبخت و اكلت ام على :-)))))))))))))))
ايوه كده مايكسرش الام على الا ام مريم :-))))

جميل
تعرفى طريقتها جديدة عليا ، كنت فاكرة بتتعمل بطريقة ثانية
بس و ماله نجرب
بما ان الفطير عندى مش سهل توفره كده يبقى طريقتين يانعملها بالعجينة الفرنسية بعد ما تتحمر فى الفرن
يا بالعيش التاكو بتاع الاكل المكسيكى :-))))
بس حنبلغ القياده العاليا اول ما تتعمل فورا :-)))لسنا بهذه الندالة

الا صحيح متعرفيش الثلج ساح :-)))) و بدانا ندخل فى الربيع :-))) بقينا فوق او تحت :-))(على حسب نوع ثلاجتك ) فى ادراج الثلاجة

صبرني يارب يقول...

وندتى

لا العجينه الفرنسيه احسن اعتقد

هو انا ما جربتهاش

بس التاكو بيتهيئلي ما ينفعش

انتى عارفه انا مره كمان حطيت فيها بواقي سمبوسك
كله شغال يعنى

هو طبعا ممكن تعملي عجينه فى البيت من دقيق وسمن ولبن وسكر وتررقيقيها اوي وتخبزيها وبعدين تكسريها وتشتغلي بها

بس طبعا بالنوسبه لي مش محتاجه اعمل كده لان الجلاش والرقاق والفطير حواليا فى كل مكان بالغيظه فيكى
ههههههههههههههههه

بس حلوه حسب النوع التلاقه دي هههههههههههههههههههه
عندي رف كده للاحتفاظ باللحوم دون تجميد ليوم واحد
انما ايييييه معتبر هاحجزهولك بقى
هههههههههههه

منوره يا جميل

أحــوال الهـوي يقول...

انتي مستحيلة مش ممكن
مش لاقي كلام اوصف الشطارة و المهارة بتاعتك

طول عمري اعرف ان ام علي بالجلاش او كسر الرقاق
بس الجديد و الفكرة الجهنميه من فايض الفطير المشلتت

تسلم ايديكي و الله انتي رائعه
و مستني كتاب الطبخ البيتي اللي هينطبع لك
لانك عندك افكار اقتصاديه رائعه و مش ناسي شرش الجبنه

ربنا يكرمك

تحياتي

صبرني يارب يقول...

احوال الهوى

متشكره اوي يا فندم ربنا يخليك

والكتاب بقى نفكر
هههههههههههههههههه

نورت يا فندم

الشعب لابد له من حكومه تشكمه يقول...

صبصب الحقيييييييييييييينى اختك بتنهاااااااااااار:(
ما انا قلتلك انى بايته هنا فى المدونه دى,واللى عملته بط بط هيطلع عليا وز وز اختك وقعت فى ايد من لايرحم:(
حد اكيييييييييييييييييل يا اوختى عاااااااااااااااا...

الحقينى باه بالاكلات اللى هى صعبه اصل الفضيحه هتباه بجلاجل يا اوختى:(

شكلى هنقل البلوج ده من ضمن جهازى:) فى البيت هعتبره كتاب ابله نظيره:)

بس اول مره اعرف ان ام على بتتعمل بالفطير المشلتت جديده دى..

احساس طفلة محبة للرومانسية بس واقعية يقول...

يا مجوعانى يا صبصب
الفطير المشلتت دى جديدة جدا عليا وحياتك حتى الرقاق والجلاش عادة على ما افتكر يعنى عشان انا مأكلتهاش بقالى كتير انى كنت بعملها بالعلب اللى فى السوق دى وكنت بقول عليها جميلة امال بطريقة صبصب بقى هتبقى اية اكيد لا يعلى عليها
اى حد نفسة فى حاجة يقول يا صبصب
اية العظمة دى
ما شاء الله عليكى بجد
تسلم ايدك يا قمر

تقبلى مرورى

Wanda يقول...

حبيت اغلس كالعادة فى المدونة بتاعت الصالون :-)) قفلت الباب فى وشى
نوتى شوفيلك صرفة منخيرى بتوجعنى لما التعليقات بتغلس :-))

اخبار السمك ايه ؟؟

Wanda يقول...

??? السمك البورى الى انا جايبة راح فين ؟؟؟:-))

ندى الياسمين يقول...

مشمشمه

وادي جزاء الى ما يسمعش كلمه ماما تقولها


عونيه ليكى شوفي عايزه ايه وانا اكلمك نرغي فيه

اون فون بقى عشان نلحق نفسنا

ندى الياسمين يقول...

احساس طفله

يا جميل ربنا يخليكى تسلمى يا رب

جربيها بقى بالفطير هاتدعيلى والله

لما تيجى ان شاء الله بالسلامه

ندى الياسمين يقول...

وندا

مش عارفه والله التعليقات مالها هناك باحاول اشوف ايه الموضوع كده

وسمك ايه ؟؟؟

انتى هاتتبلي علينا

تصدقي انا كنت بجد بافكر اجيب بوري واعمل سنجاري واشهيصكم

يا مسهل سيحدث

الازهرى يقول...

أيييييييييييييييييييييييييييييوه
أنا هنا فى مكانى الصح
الطعااااااااااااااااااااااااام

بس ممكن أطلب مكرونة بشاميل

وكمان زعلت قوى بسبب موضوع الفطير المشلتت
دا أول شرط لى فى العروسة
أنا بأعشقه

ندى الياسمين يقول...

ازهرييييي
يا مرحبتين

ممكن تطلب طبعا بس المكرونه معموله بالفعل

وزعلت ليه من موضوع الفطير مش عارف

انت عروسه بتعرف تعمل فطير

طب لما تلاقي والنبى قولي

لا مش هاتجوزها انا

هاجي اكل فطير طبعا
ههههههههههههههههههههه

غير معرف يقول...

تسلم ايدك
انا باعملها بطريقة اسهل
عارفة الميل فيي
وده بيبقى سهل الاحتفاظ به بره التلاجة
باشتريه واكسره فى البايركس او الطواجن طابق واحد فقط
وعلى النار باغلى اللبن والسكر و اللوز المبشور ولو حد بيحب جوز الهند والزبيب باضيفه كمان ولو صحتك تستحمل الدسم حطى قشطة زى ما تحبى او معلقة سمن بلدى
وبعدين صبى كل ده فى الطاجن وحطيه فى الفرن
ولو عاوزة تحمرى الوش بسرعة رشى شوية سكر على السطح
الموضوع كله ربع ساعة

وبالهنا والشفا

ندى الياسمين يقول...

الغير معرف الاخير

اخيرااااااا

قعدت احاول انقل تعليقك معايا من المدونه التانيه ما عرفتش

وكبرت فى دماغ بلوجر ما راضي ينقله

انت منذر الى معلق هناك صح ؟؟؟؟

معلش بقى على ما ظبط المدونات فى حاجات كتير وقعت مرسي اوي على اهتمامك وتكرار التعليق

بس انت عرفت طريقى ازااااي

اعترف بسرعه
هههههههههههههه

المهم انا عارفه الميل في طبعا والله عليه طبعا بيبقى حلو فى ام علي برضه

بس الحقيقه الجاهز الى هنا ما عجبنيش خالص اصلا مش طعم ميل في

وكمان انا تحتي مخبز بيعمل فطير فطبعا ده اقرب واسهل حاجه ليا فى ام علي

وفكرة السكر برضه جميله على فكره هاجربها حالا لانى اصلا باعمل ام علي والله
ههههههههههه

نورت

sony2000 يقول...

لاااااااااااااااااا
هو انا اول مره اجي هنا الاقي اللي بحبه ادامي
ام علي
يالهوتيز
انا بقي عوذه طبق حلو كدا علي ذوقك
علشان اجي واروح علي هنا كتيييييييييييير
هههههه
تقبلي مروري وتحياتي

ندى الياسمين يقول...

سوني

عنيه يا قمر اجيبلك المدونه كلها واجي

تنوري يا جميل