واخيرااااااااااا
اول بوست فى المقر الجديد
ومعلش يا واندا مش السمك يا اختي على ما طلبية البياض توصل بس
وعارفه ان الناس الى فى مصر هايصوتوا فى وشي ويقلولي الجو بقى حررررررررر
شوربة عدس ايه فى الحر ده
اقولكم الدنيا هاتبرد تاني يوم الاربع لعلمكم
ههههههههههههههههههههه
والبت واندا يا حبة عين مامتها هاتتجمد هناك يا عينى
فقلت ادفيها بشوية شوربة عدس
المهم يكون فى علمكم ان مريم هى الى عامله يومها شوربة العدس وكانت طالعه جميييييله بس مشطشطه موت
ولما لقتنى باصورها قالتلى يا ماما لما تنزليها على المدونه ابقى قولي ان انا الى عملتها
بنعمل ازاي شوربة العدس بقى
هحاول احط مقادير
نقول كوباية عدس اصفر زي الى فى الحله ده
ونغسلها طبعا
ونحط عليها كوسايه جزره بصله طمطمايه وفصين توم وطبعا كل ده متقشر ومتقطع
هتاخد حوالي 20 دقيقه وطبعا ممكن اكتر وممكن اقل حسب الظروف المهم تكون المكونات استوت وبقت بالشكل ده
بعد كده هانسبه بس تهدى شويه ونضربها فى الخلاط كويس لحد ما تبقى شوربه زي كده
وبعدين بنرجعها تاني على النار ونحط عليها بقى الملح زي ما تحبوا ملحه
ولو لقيناه تقيل شويه نزوده مايه او شوربه لحد لما يبقى سمك الشوربه معقول
طبعا بنحط بهار
انا باحط فلفل وكمون وشطه خفيف
لو بتحبوا اي حاجه تانيه معاه اوك
ونسيبه على النار يادوب يغلي ما نغطيهوش نخلي بالنا لانه بيفور
وبعدين نسيبه بس خمس دقايق عشان الرغاوي على الوش تروح
وفى ناس بتعمله كمان طاشة تقليه وتزودها عليها بدع ما يخلص خالص كده
يعنى بتحطي معلقة سمنه كبيره فى طاسه وتحمري بصله صغيره وفص توم وبعدين تحطيهم على العدس وتقلبي وتهدي النار وتسبيه خمس دقايق بس على النار
بيبقى حلو برضه مش وحش
بس التقليه الحقيقه بتبقى تقيله جداااااا ونار بقى يا معلم على صدرنا واحنا مش ناقصين
انا الحقيقه باعمله نى فى ني كده وباحبه كده
وبعدين نقلبه كويس قبل ما نغرفه لانه بيرسى لتحت
وعلى السلطانيه دوغري ويا سلام لونص لمونه وبالهنا والشفا زي الصوره الى هناك فوق دي
فى ناس كمان تحب تعمله بالشعريه او بلسان العصفور
بيتحمري الشعريه او لسان العصفور فى معلقة سمن لحد ما تاخد لون اصفر
وبعدين تقلبيها على حلة العدس وطبعا تزوديه مايه لان الشعريه هاتشرب مايه وتخليه تخين
على فكره ماما بتعمل اوقات مع ال عدس فتة عدس بتبقى جميله اوي برضه
نفس طريقة الفته العاديه
لكن بدل ما نزود العيش شوربه هانزوده عدس
ونسيبها تغلي خمسه بس والرز على وشها
بس مش بنعملها تقليه زي الفته الى بالخل والتوم
والف هنا يا قوم والى يجرب يقولي
هناك 15 تعليقًا:
فى أيام الشتاء الباردة ليس هناك أفضل من شوربة العدس الا المحشى:)
لا بجد جميلة جدا
انا بعملها كده برضه وبالشعرية
وساعات تطلب معايا فتة زى مامتك ربنا يخليهالك
بتبقى مشكلة
بجد بتدى طاقة عالية جدا ودفا
لكن زمايلى فى الشغل استنكروا وبشدة موضوع الفتة
هما الخسرانين:)
تسلم ايديك ياجميل
الأستاذة أم مريم صاحبة الكلام الندي و روح الياسمين ألهمك الله الصبر
ممكن أقترح ثلاث أضافات:
1- حبة بطاطس و حبة كراث تسلق مع المكونات
2- نصف كوب لبن يضاف بعد طحن الشوربة
3- قطعة زبد لاستكمال القيمة الغذائية
و ممكن حضرتك تستغني عن طحن العدس أو تطحنيه نص/نص و سيكون ألذ بإذن الله
و طبعا لا تنسي البصل الأخضر و في هذه الحالة بعض من أوراق المقدونس لتزيين العدس (من أجل الرائحة)
هنيئا مريئا
تحياتي
أبو شوشو
و الله فكرتينى بالعدس
تشكرى يادردر
هو ده وقته
:-))
تعرفى شوربة العدس اول حاجة اتعلمت اطبخها
تقريبا كان عندى 7 سنين
والى علمنى اخويا :-))) علشان اعملهاله :-)) لان ماما كانت بتسبنا فى البيت وتروح الشغل
حفيدة عرابي
حلوه اوي حكاية ليس هناك افضل من شوربة العدس الا المحشي دي
هههههههههههههه
وتحيا الفته
نورتي يا جميل
ابو شوشو
ربنا يخليك
متشكره اوي على الكلام الجميل
اه كل الاضافات الى حضرتك قولتها في التمام والله
بس البطاطس هاتخليه تقيل اوي وهانضطر نزوده مايه
وموضوع الخلاط هو فى ناس بتعمله كده فعلا بتطلعه خشن شويه
بس انا باحبه ناعم كده عشان العيال بقى يقعدوا ينقولي الى جواه وده وحش وده حلو وكده يعنى
والبصل الاخضر ده ايه بيتحط عليه ولا بيتاكل معاه
لا انا ماليش فى البصل الاخضر اطلاقا مطلقا
بس بابا اه فعلا بياكل بصل مع العدس
نوووووووورت واضافاتك جميله والله
وندتي
سبع سنين ؟
ايوه يا اختي الامهات الى كانوا بيروحوا الشغل دول كنا بنعك عك ميه ميه الحقيقه
هههههههههههههههههه
منوره يا قمرررر
لاااااااااااا
انتي كدا هتخليها تشخشخ فدماغي وتخليني اروح اعملها
بس مكسله شويه
ههههههههههههه
ولو عملتها موش هتطلع ذي اللي فالصوره نوهائي
ربنا يوستور
سوني
مكسله ومش هايطلع وكل ده على العدس
هاتضربي شكلك
هههههههههههههههههه
قومي فزي يلا اعمليه
نورتي يا جميل
سعداء بالمرور هنا فى واحده من الذ المدونات ولذلك نوجه لك ولزوارك هذه الدعوه
نحن اول برنامج أذاعى عن النت والمدونات ويذاع يوميا عدا الجمعه التاسعه وعشر دقائق صباحا على موجات الأذاعه الرئيسيه لمصر
نحن نطرح موضوعات الحلقات قبل اذاعتها فى مدونتنا لبعلق عليها اصحاب المدونات او غيرهم من الزائرين
ونذيع هذه الموضوعات مع التعليقات ومقتطفات من مدونات اصحابها اذا رغبوا
وبذلك نجمع لأول مره بين الأعلام التقليدى والنت
مدونتنا
http://netonradio.blogspot.com
تكسيرك للمثل والمبادىء والقيم الايجابية و المثالية/
يحولك فى النهاية وباليقين من جانى الى مجنى عليه/
فالمجرم الصغير ينتهى بين انياب مجرم كبير وتتوالى العملية/
لتصفية الحسابات وتسديد الديون لاصحابها مهما كانت مختفية/
وهذه حقيقة كونية ونتيجة منطقية معروفة للجميع وبديهيةو منتهية/
واصلاحنا لما تعوج من تصرفات يصب فى مصلحة الانسانية/
وبما اننا بشر الكل هيستفيد ويعيد البسمة والفرحة للحرية/
وكل منا ياخد مكانه بكل يسر وتنتظم من جديد الابجدية
السلام عليكم
ازيك يا ندوده يا جميله
شو اخبارك
وحشتوووووووووونى وحشتوووووووووووونى وحشتووووووووووووونى
مبروووك يا جميل عالعتبة الجديدة ربنا يجعلها قدم الخير ان شا الله
شوفى بقى يا ستى
انا جاية افرحك وابشرك انى خرجت من حالة التشلتت الحريمى وعملت السمن البلدى اخيراااااااااااااا
فاكرة انا سألاكى عليها من امتى
بقالى ييجى سنة يا اختشى .. قعدت اجمع فى القشطة وبعدين نسيت الموضوع ولما لاقيت الفريزر بقى مكدس افتكرت ههههههه
الحمد لله تمت العملية بنجاح
وطلعت منها زبدة ومورتة هييييييه ههههههه
بس قعدت معايا عالنار 3 ساعات مع انى خضيت القشطة وزبدتها مش عارفة ليه يمكن لانى كنت مهدية النار عالاخر ولا ايه .. مش عارفة
اذا عرفت الحل اتصل ههههههه
نيجى بقى للجبنة
انا اصلى غاوية منتجات البان هههههه
انتى قلتى فى الجبنة البيضا ندفى اللبن بس منغليهوش ونصبه فى وعاء وهيتجبن
طيب امتى اضيف المنفحة
قبل ما ارفعه عالنار ولا بعد ما يدفى ؟؟
انا خمنت انى هضيف المنفحة والملح قبل مارفعهم عالنار بس حبيت اتاكد منك
اذا عرفت الحل برضه اتصل هههههههه
بالنسبة لشوربة العدس انا مش بضيف فيها كوسة بس كنت ناوية اجرب المرة الجاية وسبحان الله لقيتك بتضيفيها ههههههه
تسلم ايديكى يا قمر ويخليكى لينا يارب :)
الحمد لله والنبى بركه يا اختي
ههههههههههههههههههههههههه
لسه فاكره
ده انا عملت يجى برملين من يومها
مش اوي كده طبعا بس عملت كذا مره
المهم
خدت وقت ممكن الكميه كانت كتير
وممكن كمان تكوني فعلا موطيه اوي
وممكن تكوني وانتى بتعمليها زبده برضه
سبتي فيها مايه شويه عادي بتحصل فى احسن العائلات
مش مشكله المهم ان السمنه تطلع حلوه
وكمان احنا ما بنعملش كميات مش هاتلحق تبوظ مثلا او كده
اما بالنسبه للجبنه الحقيقه انتم حريم تجيب العار
ههههههههههههههههه
يعنى المنفحه دي حضرتك نوع من انواع الخمائر
ازاي يعنى تحطيها على النار
لا طبعا المنفحه تتحط بعد ما ترفعي اللبن من على النار
ويكون اللبن يادوب دافي زي ايدك
لو سخن اوي مش هاتربط اصلا
انتى كمان لازم تحطي الملح الاول
بيساعد فى عملية التخثر وكده
فانتى الاول هاتدفي اللبن وبعدين تضيفى الملح وتقلبيه كويس
وبعدين المنفحه وتقلبيها وتغطيها وتسبيها
اي خدمه يا جميل
انا معاكي اهوووووو
وعملت جبنه كمان دمياطي قديمه بس مستنيه لما ابدأ استعملها عشان ابقى اكيدي يعنى قدامها شهرين ولا حاجه
هى فعلا غلبتنى فى التزبيد
لدرجة انى نقلتها كذا مرة من حاجة لحاجة عما وصلتها فى الاخر للحلة اللى هتتحط على النار وكل ما انقل اقعد اعصر فيها جامد ويدوب تنزل نقط
عشان كده قررت اعملها المرة الجاية ان شا الله فى مصفاة فتحاتها رفيعة عشان الميه متفضلش منها واليها كده وربنا يسهل
:):)
بتتريقى عليا يعنى
انا ايش عرفنى بالمنفحة دى يا اختى
وبعدين انتى مش كاتبة .. اعرف انا منين .. اوشوش الودع ولا افتح المندل ههههههههه
حطى التوضيح ده بقى فى البوست بتاع الجبنة عشان اللى يحب يعملها ميبوظش الدنيا
عندى مفاجأة تانية مش هتصدقى نفسك
عملت كيكة الشيكولاتة هههههههههه
تحفة بجد وطعمها رائع جدا
بس انا عايزة اسالك على حاجة
لما بنعمل الكيك بنضرب جامد عشان ندخل هو للعجينة عشان تعلى فى الفرن .. انتى ليه بتقولى نقلب بالراحة ؟؟؟
انا عملت بالضبط بالضبط زى ما قلتى
بنفس المقادير والطريقة
بس قابلتنى كذا مشكلة
الاولى انى حطيتها فى الفرن على 200 عالرف .. يعنى فى النص .. وقعدت ييجى 20 دقيقة مش شامة ليها ريحة خالص ولا كان
لما فتحت اشوف ايه الاخبار لقيتها عالية من الجناب ومن النص ساقطة وطبعا لسه عجين
رحت معلية الفرن على 260
عشان تستوى وسيبتها ييجى 20 دقيقة كمان
فحسيت ان ريحتها بدأت تدى على شياط
فتحت عليها
ودخلت السكينة طلعت فاضية
طفيت وسيبتها جوه الفرن شوية بس فتحت الفرن نص فتحة
بعد ييجى ربع ساعة قلت اخرجها بقى
لقيتها هابطة
نزلت خالص
لما بدات اقطعها مكنتش كلها مستوية كان فيه اجزاء بشكل صوص الشيكولاتة
فانا قررت بقى المرة الجاية ان شا الله اضربها جامد زى ما بعمل .. وادخلها الفرن على 260 وبعدين ابقى اهدى بقى اول ربع ساعة
بس طعمها بجد خطير جدااااا وعجبت دودو اوى
......
عايزة اسالك على حاجة تانية
لو حبيبت اشكل واعمل نص فانيليا ونص شيكولاتة فى صنية كبيرة بنفس المقادير
يعنى 3 كوب دقيق
احط على الدقيق قبل التقسيم كيس بيكنج بودر ولا اكتر ؟؟؟؟
تعباكى معايا انا خالص
اعمل ايه بقى انتى اللى قولتى جربوا وقولولى ههههههههه
سلام يا قمر
سالي
لا والله يا بطه مش باتريق ولا حاجه
والجبنه حاضر هاروح اشوفها مش فاكره طبعا انا كنت كاتبه ايه
بس اكيد ترتيب الكلام هو ترتيب الاضافه
بالنسبه للزبده على فكره مش مشكله انا ساعات والله باحط القشطه بحالها بس ازودها شوية ملح بتغيب شويه على النار بس عشان لما يكون الجو حر بتغلبني اوي فى الخض والتكوير وكده
بالنسبه للكيك
لا ده الموضوع كبير خالص
اولا الخفق بقوه ده عشان تدخلي هوا بيبقى فى مرحلة ما قبل اضافة الدقيق
اما لما تيجى تحطي الدقيق ومعاه البكنج بودر بتبقى عايزه تحافظي على الهوا الى دخل ما يطلعش
اما بالنسبه لانها طلعت معجنه مش عارفه مقاس صنيتك ايه لكن خدي بالك ما تكونش الصنيه صغيره وتطلع الكيكه تخينه اوي ما تستويش كويس
وممكن تكون النار عندك عاليه اوي بالتالي بتلهف الصنيه وتشمي ريحة الشياط
انا عندي باخبز الكيك على 200 مثلا لمده عشر دقايق بعد كده اهدي الفرن لحد 160 كده
وطبعا ممكن تعملي الاثنين فى صنيه واحده عادي بس تاخدي بالك وانتى بتصبي
لكن المقاس بقى بتاع الصنيه عندي صنيه قطرها يعمل حوالي 50 سم
دي ممكن تنفع انما المقاسات العاديه ما تنفعش طبعا واعملي نفس المقدار بتاع البكنج
ايوه انا باحط كيسين على المقادر ده وباعمله فى صنيه واحده على الاغلب بس الكبيره الى قلتلك عليها
طبعا طلعت قلبها معجن عندك ده عيب تسويه مش قادره طبعا احددلك ايه بالظبط
لكن هى ما تقبش وتهبط مره واحده كده الا لو كان الفرن كان هادي عليها اول ما دخلتيها الفرن
هاقولك ممكن تكوني ما صبرتيش على الفرن يسخن مثلا
او حتى تدريج الفرن عندك فى مشكله
او انتى متخناها زياده عن اللزوم
انا باحب اوي اعمل سمك عجينة الكيك وهى نيه فى الصنيه لا تتعدى عقلة صباعك كده
يعنى حولي سم
عشان اكتر من كده بتطلع طخينه وخصوصا مع كيك الشيكولاته بتطلع قلبها طري
خلي بالك انا حركة قلبها طري بتحصل معايا كتير فى الشيكولاته بالذات
واضح الكاكاو له تاثير كميائي
ههههههههههههه
بجد والله ممكن يعنى
المهم يا باشا انت بس اعمل واسألي للصبح انا معاكي يا جميل
لا والله يا قمر الصنية مش صغيرةدى قطرها حوالى 26 او 27
وعاملة نفس المقدار بتاعك يعنى كان فى الصنية تقريبا بحجم عقلة الاصبع
والفرن كان سخن ومتظبط
بس تقريبا المشكلة عندى فى الفرن
قبل كده الكيكة العادية غلبتنى عشان كنت بعملها عالهادى لغاية ما بقيت اعملها عالية اتظبطت
دى تقريبا هتاخد نفس النهج
بس بما انها بتطرى معاكى كتير برضه يبقى المفروض نكتر الدقيق شوية او نقلل اللبن او نقلل الكاكاو طالما ان الكاكاو مش بيستجيب بسهولة للتسوية يعنى كفاية نص كوباية كاكاو على كوباية ونص دقيق
وراها وراها لغاية ما تتظبط ان شاء الله وتندم عاليوم اللى هبطت فيه اول مرة ههههههههههههههههههههههه دى وقعت فى ايد من لا يرحم ههههههههههههههه
إرسال تعليق