الأربعاء، 25 نوفمبر، 2009

الفتــة.. الفتـــة .. الفتـــــــــــــة .. كل سنه وانتم طيبين


السلاااااااااااام عليكم يا بشر

كل سنه وانتم طيبين

وعيد اضحى سعيد يارب عليكم وعلى كل حبايكم ويعوده عليكم وانتم بخير وصحه وسلامه ياااااااااااارب


طبعا طبعا ملاحظين تطنيشى العظيم لهذه المدونه الغاليه

كنت تعبانه يا وحشين وما حدش فيكم طبخلي حلة شوربة خضار وجه يزورني مع انى طابخالكم ومهنيااااااااااكم

يلا مش مهم طبيخكم وحش اصلا


النهارده بقى طبعا الشيء لزوم الشيء


العيد الكبير واللحمه بقى هاتبقى ماشيه فى عروقكم انا عارفه

وعليه قررنا نعمل فتتتتتتته بالخل والتوم استعدادا لليوم العظيم بتاع اللحمه

وقلت اعملهالكم من دلوقتي عشان تعملوا حسابكم عليها وعشان جايز ما افضاش بعد كده

المهم بلااااااش رغي


الى المطبخ


اولا الفته بتاعتنا المصري يا رجاله

بتتعمل المفروض بعيش رقيق زي العيش الفلاحي كده لكن يعنى الى ما عندوش عيش فلاحي يعمل ايه ينتحر


لا لا طبعا لسه عايزينه

يجيب رقاق ويشتغل معانا
هانعمل ايه بقى يا حلوين

اول حاجه هانجهز التقليه بتاعة الفته هى دي اهم حاجه فى المونطقه

هانقشر اربع خمس فصوص توم كده حلوين حسب الكميه بتاعتك بقى الى هاتعمليها

وبعدين نفرمهم او نهرسهم المهم نفتري عليهم يعنى

ونكون مجهزين عصير طماطم


ونروح على الحله نحطها على النار وفيها نص معلقة سمنه ولما تسخن نحط التوم ونحمره لما يااااااااادوب يصفر

ما تحمريهوش اوي عشان بيمرر بسرعه

وبعدين اول لما يصفر تحطي عليه حوالي اربع معالق كبيره خل ووراهم على طوووووووول عصير الطماطم قولي 3 كوبايات

بسرررررعه كل ده عشان ما يتحرقش التوم وابقى هدي النار وانتى بتحمري التوم


ونسيبها بقى تغلي كويس لحد ما تتسبك صح وتتقل كده وتبقى ميت فل واربعتاشر


ونسيبها بقى تتسبك ونروح نعمل الفته


هانجيب الرقاق او العيش سيان ويفضل ان العيش (الخبز ) يكون ناشف


هانكسر العيش ده او الرقاق لقطع صغيره يعنى زي الصوره دي كده

وبعدين نحمره فى سمنه لحد ما يبقى لونهم احمر زي الصوره الى فوق دي كده احمر وردي كده


وممكن نحمرها على البوتجاز من فوق بس نستمر فى التقليب ونحط سمنه كفايه عشان ما تبقاش واحده وواحده

اووووو وده الاسهل والاحلى والاخف
نقلب السمنه على الرقاق او العيش ونكون اصلا مولعين الفرن ونحطها فى الفرن تتحمص مع السمنه وطبعا كل خمس دقايقه كده نبص عليها ونقلبها برضه عشان ما تتلدعش


وبعدين لما تتحمر وتبقى تمام التمام


نكون مجهزين شوربة بقى متينه متينه اخر حاجه متينه اي سمينه


(وخلوا بالكم اموت انا واتجنن من الى بيملوا الاوضه مايه تبقى شوربه دي )


اللحوم لازم الاول تتحمر قبل ما تزوديها مايه وكمان توطي عليها لما تسرد مايتها كلها وبعدين تحطي مستكه وحبهان ولوري وبصله صغيره وتفضل تقلبي لحد ما تتحمر كويس ومايتها تنشف وبعدين تحطي مايه مغليه عليها


سيان فى ذلك الفراخ واللحمه مش تعملوا شويه ماية على اللحمه تبقى شوربه وبعدين تقولوا الفته بتاعة صبرني طلعت وحشه

المهم بقى نجيب الشوربه المتينه ونزود بها العيش الى حمرناه وهو على النار


هحاول احط مقدار عشان ما تبوشوش الدنيا ممكن لو محمره حوالي كوبايتيين عيش مكسر يعملوا طبق زي الى فى الصوره ده

تحطي عليهم كوبايتين شوربه ولو لقتيها لسه ناشفه شويه زودي حبه صغيرين المهم تبقى شكلها زي الى ف الصوره دي كده


طبعا يادوب هانزود الشربه وفى خلال 3 دقايق هاتكون اتشربها العيش تمام ونغرفها بقى فى طبق كده زي الصوره الى فوق

وبعدين نحط على وشها من فوق رز ابيض او بشعريه لو حبيتوا نو بروبليم


وتفردي عليها طبقة الرز

وبعدين نرش عليها من فوق التقليه بتاعتها الى عملناها فوق دي وتبقى شكلها كده زي الى فى الصوره دي



سامعه اصوات مغرضه بتقول اماااااال فين اللحمه ؟؟

اللحمه اختفت فى ظروف غامضه

نيهاهاهاها

لا مش فاكره بصراحه انا يومها ما صورتهاش باللحمه ليه اصل الصوره دي من زمان

بس اللحمه بقى يا اما تحطيها على وش الفته وتسقيها تقليه كمان زي الفته


او تحمريها وتحطيها على الوش بس


او تحمريها برضه وتقدميها معاها بره


اي حاجه بس هى تيجى اللحمه


بس خلااااااااااص والف هنا يا كتاكيت واي خدمه




وعلى الله اشوف واحده فيكم استسهلت وما عملتش الشوربه زي ما انا قولت

والله الله الله بقى

لو الشوربه دي تحطي معاها عضمه بنخاعها

وتطلعي النخاع وتحطيه على وش الفته
وتتاكل سخنننننه مووووووت



اؤكد لكم ان الى هياكل طبق الفته ده قدامه 3 ايام على ما يقدر يستوعب ايه الى حصله


ههههههههههههههههههههههههه

كل سنه وانتم طيبين يا حلوين ويارب عيد سعيد عليكم

والى هايعمل الفته بتاعتي وما يجيش يقولي طلعت ايه مش هسامحه طوووووول عمري قلبي ووش رجي غضبانين عليه




هناك 36 تعليقًا:

حفيدة عرابى يقول...

كل سنة وانت بصحة وخير وسعادة
تسلم ايديك
انا من المنصورة
فتقريبا فاهمة موضوع الفتة دى
لا تسلم ايديك كمان مرة
انا كده مش هقدر اصبر لغاية اول يوم العيد

Zianour يقول...

كل سنة وانت بالف خير وصحة انتي واسرتك الكريمة

والفتة الفتة الفتة ميام ميام شكلها حلو وشكلي كده هاعمل فتة يوم العيد

ماتخافيش فيه لحمة والحمد لله


بس انتي دمك عسل وده طبيعي مش من المنصورة
:))))

Wanda يقول...

علم يا فندم و ينفذ باذن الله بس الاقى الضانى الاول :-)

هو ليا فى الفتة بس نجرب طريقة الشوربة الصبرنية يا رب و نرجع بعد العيد نقولك عل التأثير

مي يقول...

سلم ايديك
ياللى معرفش ايه اللى مخلينى صابرة علييييييكى ماشى ياوحشة طب انا كنت زعلانة بس خلاص عشان العيد والخروف والفتة هصالحك بقى اصلك نقطة ضعفى ههههههههههههههههه
كل سنة وانتى واسرتك كلها بالف خير وسعادة
وتسلم ايديكى ياقمر

ahmed3ezzo يقول...

لا انا عايز اعيش عايز اعييييش عايز اعييييييييييييييييييييش
انا ميت من اكلك مرتين قبل كده والتالته تابته
وكل سنه وانا طيب .. انا بس :D
.
.
.
.
.
.
.
.
ولا حرام وانتي والعيال وابوهم كمان
اي خدمه

ahmed3ezzo يقول...

الحقي يا صبرني فيه أخت بتقوللك هتجرب شربتك وترجعلك تاني
عندها امل يا حرام في الرجوع .. ندعيلها كلنا ان ربنا يديها طولة العمر طبعا
اكيد حد يعرفها هيرجع يقوللك ع التأثير
وربنا يرحمنا ويرحم ضحاياكي من اكلك يا صبرني
وعندي ليكي كلمه واحده بس
حسسسسسبي الله ونعم الوكيل
:-p
:-p

واحدة مفروسة يقول...

كل سنة و انتى طيبة يا صبرني يا قمرة
صاحية لغاية الساعة 12 علشان تعمليلنا الفتة؟؟؟؟
ربنا يديكي الصحة و يبارك فيكي تسلم الايادى
حلوة من قبل ما اجربها
مووووووه

صبرني يارب يقول...

زيانور

يلا عملي فتتتتتتته وورينى

وانتى الى عسل والله تسلمى يا جميل

صبرني يارب يقول...

لقد خلقنا الله احرارا

اهلا وسهلا يا بلدياتي يا جميله

يا باشا احنا نعملك الفته ونجيبها لحد عندك

نورتي يا قمر

صبرني يارب يقول...

ميييييييييي
ميويتى حبيبتى زعلانه ليه بس

فى ايه
وكنتى فين كل ده ما انا مش عارفلك طريق يا جميل

تسلمى يارب

تعالى قوليلى كنت زعلانه من ايه وانا اصالحك يا جميل

صبرني يارب يقول...

واندا

مووووووش لازم ضاني كله يمشي

بس تكون شوربه سمينه شويه

وجربي الشوربه بتاعتي بس من غير ما تحرقي اللحمه

وما حدش يقول لجوزي عشان انا دايما باحرق اللحمه
ههههههههههههههههههههه
بس والنبى شوربتها بتبقى حلوه وهى محمره يا اختي

يلا جربي وقوليلي

صبرني يارب يقول...

مفروسه حياااااااااتي

ايوه شوفتي باتعب عشانكم اد ايه

هههههههههههههه
افتكروا الجمايل بقى

كل سنه وانتى في هنا يا قمره

صبرني يارب يقول...

عزو

ايه الى جابك هنا يا ابنى

يادي تعب القلب

يا ابنى يا حبيبى انت ما ينفعش تاكل من الفته دي

دى عايزه ناس متاسسه
ههههههههههههههههه


مالكش دعوه يا اخويا هما واخدين على اكلي ما بايثرش معاهم

اطلع انت منها يا عزوووووووووووووووووووووو

ahmed3ezzo يقول...

بقوللك ايه
انا رديت عليكي مره مش هرد عليكي التانيه ....... لا كومنت
اللي هيه نو تعليق يعني
هسيبك لربنا بسسسس ...
ثم سم الفران يتصرفو معاكي
وربنا ع الظالم وكيد المعتدى
وربنا يقويك يا ابو مريم والله تاخد نوبل
ده ياخد نوابل مش نوبل واحده
وحسسسسسسسبي الله ونعم الوكيل

ستيته حسب الله الحمش يقول...

حبيبة هارتي
والله لسه امبارح بقول نفسي في شوربة خضار يا اوغاد
فيه ستيتة تعيا وتقوم من غير طبق شوربة
والفتة تحفة
بمووووووووووووووووووت في الفتة
بس مش بخمس فصوص يا ماما
اقل من خمس روس توم ملعبش :)

بســـمة انور يقول...

بحب الفتـــــــــــــــة

وبععرق اعملها هههههههههههههههه

بكرة عندنا فته مين جاى؟؟؟؟

فاتيما يقول...

تسلم إيك يا صبصب
أمى بتعملها كدا برضو
بس دون صلصة ..مبنحبهاش بالدمعة خالص ...
أنا؟؟!!!
ما قولنا بخاف على اللى ف البيت من التسمم مبتصدقونيش ليه؟؟
و الله انا مأساة حياتى يا صبرنى
إن أمى ست شاطرة قوى
قوى
قوى
انا بصحى من النوم الأيام دى بدرى عشان اتعودت بسبب الشغل
و انتظام المواعيد
قوم فى الاجازة ادلع شوية
وبقوم من النوم تمانية تسعة الصيح
اخش المطبخ يا ختشى عشان اعمل الفيسكافيه بتاعى
و اصبح على الحاجة
الاقى البوتجاز عليه
اربع خمس حلل غير الصينية اللى ف الفرن
- يا دى النيلة ..إيه دا يا ماما؟!؟
- مفيش ...أصلى قمت بدرى بعد الفجر فقولت أتسلى !!
كل يومين مثلا المنظر دا
ربنا يديها الصحة يا رب
عيد سعيد عليكى يا حبيبتى
و على العيال و رضا إن شاء الله

صبرني يارب يقول...

احمد عزو

ماشي يا عزو ماااااااااشي

ايه ده انت بايت هنا ياعم

ههههههههههههههههه

صبرني يارب يقول...

بسمه

انا مش جايه يا اختي انا مش باحبها اصلا
انا باطبخها بس
ههههههههههههههههههههههه

كل سنه وانتى طيبه يا جميل

صبرني يارب يقول...

ستيته

يا حياتي اجيبلك انا شوربة الخضار عونيه ليكى

بس انا كمان ما حدش عبرني برضه

طب فين البت مانوسه هاتيها اعلمها تعملها

والفته حطي توم زي ما انتى عايزه بس انا التوم لوكترته كده ممكن اطلق يا ستيته
هههههههههههههههه

مع انه ما بياكلهاش
بس على الريحه بس


كل سنه وانتى طيبه يا جميل

صبرني يارب يقول...

فاتيما

على فكره انا ماما كده برضه

بس انا حتى وانا بنت كنت باحب المطبخ على فكره

سبحان هى طباع بقى

بس لا تنازل ولا استسلام لازم ندخلك المطبخ

امال الواد يوسف لما يرجع هاتنشفي بطنه ولا ايه

هههههههههههههه

باحبك اوي

كل سنه وانتى طيبه يا جميل

عاشقه الرومانسيه يقول...

كل سنه وانتى طيبه ياصبصب
انا بمووووت فى الفته
خلاص لما اجيلك اعملى لى فته
اتفقنا؟

عابرة السبيل يقول...

كل سنة وانتى طيبة

انا قلت برضه لايونكن تفوتى العيد من غير فتة

هو العيد ينفع ولا يبقى ليه طعم من غير الفتة ؟؟؟؟؟؟؟؟؟؟

ياختشى روحت على حماتى ماعملتش فتة
رجعت على مامتى ماعملتش فتة

شكلى هروح بيتى اعمل الفتة واشمشم براحتى

جوعتييييييييييييييييينى

وقف لله تعالى يقول...

كل سنة و حضرتك طيبة

بس الأكل ده يودي في داهية كفاية كمية الدهوووووووون المهولة اللي فيه

ربنا يسترها علينا

Wanda يقول...

عملتها و طلعت حلوة الشوربة شكرا صبرنى
فين الباقى هو انت بطلت تطبيخى :-)) و لا ايه؟
بس بلاش قطايف بالشكولاتة ده خلينا فى وجبات مغذية عن كده شوية و بعيد عن الشكولاتة

متجرى يقول...

يشرفنى زيارتك لمتجرى المتواضع

شكرا

Mom يقول...

تسلم ايديك و كل سنه و انت طيبه

صبرني يارب يقول...

عابرة سبيل

وانتى طيبه يا جميل ومنوره

صبرني يارب يقول...

وانتى طيبه يا دودو ربنايكرمك

صبرني يارب يقول...

وقف لله تعالى

يعنى الدهون الى فى الفته مش هاتيجى زي الدهون الى فى الدليفري ؟

بس دي حاجه نضيفه ومش مضره لكن طبعا الناس مش المفروض تاكل دهون كده كل يوم

المدونه نورت

صبرني يارب يقول...

سمر

تسلمى وتعيشي يارب

صبرني يارب يقول...

متجري

زورنا يا فندم

صبرني يارب يقول...

واندا

القطايف والحلويات الى على الجنب دي كانت شغل رمضان

عايزه افوق كده للمدونه اوضبها ان شاء الله

وعنيه حاضر

ام علي تمشي معاكي ؟

Wanda يقول...

كله يمشى مدام من ايديكى :-)
مع انى معاكسة مع ام على اصلها مملوكية قاسية بتموت بالقبقاب بس ميمنعش على برضة حليوة و يتاكل اكل :-))

ايوه فوقى يا صبرنى و اتحفينا
:-)

صبرني يارب يقول...

واندا

عنيه يا جميل

منوره يا بطه

sandy يقول...

ههههههههههه
حلوة قوي قلبي ووش رجلي دي
تسلم ايديكي يا قمره