اكلير بالجبنه

ازيكم يا حلوين

النهارده ان شاء الله هانعمل حاجه تحفه باموت فيها برضه

الى هى اكلير بالجبنه

ايوه الى احنا عملناه قبل كده بالشيكولاته

النهارده هانعمله حادق ان شاء الله

وده تلبية لطلب اليس فى بلاد العجائب الى قالت عايزين مخبوزات حادقه بس مش بعجينة بف باستري

مش عارفه مالها البف باستري يا اختي والنبى ههههههههههههههههه

المهم

يلا على المطبخ

المقادير :

اول حاجه هانعمل مقدار من عجية الشو الى احنا عاملينها قبل كده مع بعض عاااادي جدا

ونسويها ونعملها طويله او مدوره زي ما نحب يعنى بنفس الطريقه الى عملناها فى اكلير الشيكولاته

وبعدين الحشوه بقى

نصف كوب زبده

نص كوب جبنه مثلثات اوجبنه تانيه نحبها تكون كريميه شويه

نص كوب مايونيز

وشوية زعتر او نعناع او حبة البركه

او اي نكهه تانيه تحبوها تمشي

وللتزيين والطعم برضه

هنحتاج نص كوباية مايونيز

وكمان معاها ممكن بقى نستخدم :

ترنشات سوسيس زي الى فى الصوره ده

او جبنه رومي مبشوره ومخلوط معاها مثلا مبقدونس مفروم

او بسطرمه مقطعه صغير اوي

او اي لحوم مدخنه بنحبها

أو زيتون اسود او اخضر

هانعمل الحشو الاول :

اول حاجه لازم تكون الزبده مش جامده اوي ولا سايله طبعا عشان نعرف نضربها بالمضرب هانضيف عليها المايونيز

ونضربها كويس لحد ما تبقى عامله زي الكريمه

وبعد كده نضيف الجنبه ونضرب تاااااني لحد ما تتخلط كلها وبعدين نضيف بقى الزعتر او النعناع او وات ايفر

وممكن نحطها فى التلاجه شويه على ماتجمد شويه عشان نعرف نستعملها

وبتكون عامله زي الكريمه كده بس طعمها مش مسكر ولا حادق اوي برضه حسب نوع الجبنه الى حطيتها وممكن نزود الخليط ده ملح لو نحب الحشوه تكون حادقه او نزودها اي نوع جبنه حادق انشاله جبنة مش

ههههههههههههههههههه للي بيحب المش يعنى

المهم كده جهزنا الحشو خلاص

وعندنا الاكلير برضه جاهز ومستوي

نحط بقى الحشو فى كيس الكريمه ونحشي كل اكليره من خلطة الجبنه دي

او لو نحب ممكن نقسم الاكليره نصين بالعرض يعنى زي السندوتش كده ونعمل ورده على النص الى تحت ونحط فوقه النص التاني بيبقى شكلها حلو اوي

معلش ما عنديش صور كتير للصنف ده لو عملته قريب هانزلكم صوره ان شاء الله

المهم بعد ما نحشيه كله

احنا كنا فى الاكلير بالشيكولاته بنغطس الاكليره فى شكيولاته من فوق

احنا هنا بقى هانغطسها فى المايونيز وبعدين بقى نحط السوسيس او البسطرمه او نحطها فى جبنه رومي مبشوره مع بدونس

او اي حاجه احنا نحبها

انا يومها ما كانش عندي الا السوسيس ده وكنت حاطه كمان جوا كل اكليره ورده كريمه ومعاها شريحه من السوسيس وفوق مايونيز وعليه شريحه سوسيس برضه

يعنى ممكن تعملي طبق واحد مشكل من كل الحاجات دي وبيبقى شكله تحفففففه لو عندك ضيوف وعايزه تقدمي صنف حادق جنب جاتوهات مثلا

او حتى فى فطار او عشاء خفيف برضه يمشي

وبيطلع شكله زي الى فى الصوره فوق كده

الى يجرب يقولي

ولازم ترجعوا للوصلات الى انا حاطاها فى الموضوع عشان العجينه وتسوية الاكلير نفسه

والى يجرب يقووووووووووولي

السمن البلدي الفلاحي .... وتحدي

احباااااااائي اعزاااااااائي حبايبي وحبايب مطبخي الى هو برضه حبيبى

هانعمل النهارده يا حلوين السمن البلدي

الي هو بلدي بلدي يعنى مش اوانطه من الى فى العلب الى مالهاش اي علاقه بالبلدي من وجهة نظري المطبخيه الفلاحيه خالص بتاتاا لبته وعمري عمري ما دخلته بيتى هاهنا بتاتا البته

المهم عارفه يا اليس يا بتاعة بلاد العجائب انتى طالبه باتيهات وحوادق عييييييييييييني المره الجايه ان شاء الله

هاعملك حاجه تحفه اوي والله

بس سالي حاجات جوايا حوشت القشطه وزمانها عاملالها ازمه فى الفريزر

رغي رغي رغي وبلاش نشتغل النهارده قداااااااااامي

يا صفايح الزبده السايحه يا براميل القشطه النايحه (وش بيلعب حواجبه )

نيهااااااهاهاهاها

شوفوا يا بنات احنا طبعا عندنا قشطه فلاحي نشتريها نقشطها من على اللبن ماليش دعوه

الجاموسي ينفع والبقري ينفع الاثنين حلوين والاثنين طعمين

بس البقري بيكون لونها اصفرررر فاقع لونها تسر الناظرين

والجاموسي بيبقى لونها ابيض عاجي كده

وممكن نعمل خليط منهم برضه هايمشي

بس الجاموسي الصافي سعرها اعلى جدا فى السوق

والى انا مستعملاه هنا الجاموسي

احنا طبعا بالنسبه لكى يا سالي وليا انا كمان بنبقى محوشين القشطه فى الفريزر فلازم نطلعها تفك خاااااالص

وكمان ما تبقاش بارده اوي تكون درجة حرارة الغرفه كده

لان لو بدأنا شغل فيها وهى بارده اوي مش هاتتحول لزبده بتاتا وايدينا هاتتكسر ضرب ولا حياة لمن تنادي

هانحط القشطه فى حاجه واسعه ونزودها شويه ملح صغيرين قولي مثلاااا لو انتى محوشه حوالي 3 كيلو قشطه حطلهم كبدايه كده معلقه كبيره ملح

رشيها عليهم وبعد كده تنزلي ضرب فى القشطه لما تموتيها( دي اسمها مرحلة خض القشطه لتحويلها الى زبده )

ماما العزيزه رايها انه ما ينفعش بالمضرب لازم ايدك لكن انا ساعات بتتحوش معايا كتير وماا قدرش اعملها بايدى خالص مالص باعملها بالمضرب

طبعا كلكم حريم شلت زيي كده يبقى على طول نعمرها بمضرب الكهربا ونفضل نضرب فيها ونبقى نريح المضرب فى النص عشان ما يتحرقش

والمهم هانفضل نضرب لحد لما نلاقيها عملت تكتلات وفصلت الزبده عن المايه زي الصوره دي بالظبط

معلش الصوره مش واضحه كان عندي برنامج باظبط به الصور مش راضي يشتغل شكله كان ترايل اعذروني يا حلوين على ما نظبط نفسنا

المهم بعد كده نضربها برضه شويه كده بادينها بقى ونحاول نجمع بادينا التكتلات بتاعتها على بعضها وبعدين نعمل منها كور ونعجنها كده بادينا لحد ما تتخلص من الميه الى فيها

والكور الى هاتتطلع دي هى الزببببببببببده

ايوه صفايح الزبده بس لسه ما ساحتش

وبيكون شكلها كده

(الميه الى هاتطع ما ترميهاش خساره دي بتبقى كلها لبن وفرافيت زبده . ممكن تعملي منها بشاميل او تزوديها لبن وتعمليها منها طاجن معمر زي الفل )

بعد ما نخلص الخطوه الرخمه المتعبه دي نرفعها بقى على النار انا بافضل تعمليها فى تيفال لانها احيانا بتلزق وتبقى رخمه اوي

المهم هاتحطي الكميه الى هى نقول 3 كيلو ونزودها ملح بقى عشان المرته تطلع نحط قولي معلقتين ملح كبيره ونرفعه على النار ولما تسيح نهدي عليها النار اوووووي ونقلبها كل ربع ساعه كده عشان نشوف المرته ما تتحرقش والسمنه كمان

بتاخد على النار من ساعه لساعتين حسب الكميه وجوودة الزبده وحاجات كتير

(ملحوظه مهمه لو هاتعملي كميه كبيره من السمنه وناويه تخزنيها مثلا يبقى الزبده الى تطلع دي اعمليه كور ورشي عليها ملح وسبيها في مصفى لحد تاني يوم هاتلاقيها نزلت مايه كتير وبعد كده تحطيها على النار بقى )

ولما تبدا المرته ترسى فى الحله كده ويبقى شكلها سمنه يعنى السمنه تفصل عن المرته وطبعا كان فى مايه فى الزبده اتبخرت

وبيبقى شكلها كده

بناءا على تذكير ستيته ستوته شايفين الريم الابيض الى على الوش ده ده بقى تشلوه كده بالراحه بالمعقله وتسبوه فى طبق كده وده انا باسميه المورته البيضاء وطعمها رااائع وانا بموت فيها على فكره

اساسا هى ما بتلحقش توصل للطبق من الحله على اللقمه على بؤي على طول هههههههههههههههههههههه

هانسيبها على النار لحد لما المورته بتاعتها تبقى لونها بني فاتح خااااالص زي كده

وبعدين نطفي عليها ونسيبها تستهدى شويه وبعدين نصفيها بمصفى سلك وتطلع فى المصفى المورته الي فوق دي باحبها اوي اوي ههههههههههههههه

وبعدين نعبي السمنه فى برطمانات وتفضل البرطمانات الازاز خصوصا لو هاتخزنيها فتره كبيره

ولو هاتخزنيها كتير اوي زودي الملح الى بتحطيه ساعة ما تيجى تسيحيها على النار وحطي فيها حبوب فلفل اسود مش مطحونه وانتى بتعبيها ويا حبذا لو كنا فى الصيف اوي حطيها فى التلاجه

وده شكلها بالظبط اول ما اتعبت


ولما بتبرد بيبقى شكلها زي الى فى الطبق الى فوق ده بالظببببببببط



ملحوظه مهمه جدا خصوصا للحريم الشلت جدا برضه :

بالنسبه لخطوة ضرب القشطه لتحويلها لسمنه . ممكن تستغني عن هذه الخطوه

اه والله زغرتي بقى لوووووووووووووولي

ممكن تحطي ملح على القشطه زي ما هى كده وتحطيها على النار تحطي مثلا معلقه كبيره لكل كيلو وتحطيها على النار

بس بقى الطريقه دي لها مشكلتين قابلوني

اولا : انا بتغيب جدا على النار ممكن تقعد بتاع 3 او اربع ساعات وكمان لازم تقلبيها كتير اوي عشان القشطه بتلزق وتاخدي بالك كمان تهدي النار عليها جدا وتحطيلها شياطه عشان ما تفورش

ثانيا : انك ما تعرفيش تطلعي زبده وانا باحب اطلع حته زبده كده من غير ما احولها لسمنه عشان باستخدمها فى الحلويات

وطبعا لها برضه ميزتين :

انك هانتفضي لمرحلة خض القشطه ده لانه رخم شويه

وان كمية المورته الى بتتطلع بتكون اكتر كتير من الطريقه الاولى



اه ملحوظه بالسمنه البلدي : المورته الناتجه عن القشطه الى انتى محوشاها من على اللبن الحليب المغلي بتكون مخرزه شويه وما بتكونش شبه المورته الى طالعه من السمنه المعموله بالقشطه الي طالعه بالفراز او من على اللبن الرايب
بس بيبقى طعمها حلو انا باحبها


بس خلاص انا مش فاكره حاجه تانيه
ياريت الى عنده استفسار يقولي

مش عارفه حاسه انكم مش فاهمين سالي فهمتي ؟؟؟

فضفضه تعالى قوليلي بقى زي ما بتعمليها ولا ايه

يلا منتظراكم

تورتة الفراوله

انا عارفه ان احنا عاملين المره الى فاتت حلو برضه بس بقى نعمل ايه عيد ميلاد المدونه وعيد ميلادي والحركات دي والشعب كله ينادي بطريقة توتره فقلت لازما بقى ولا بد نعمل تورته النهارده

طبعا عشان الاستعجال مش هانزل طريقة الكيك هانبقى نعمله مره تانيه مع بعض

طبعا احنا هانعمل كيكه مربعه زي الى في الصوره دي او مدوره زي ما تحبو

وهانقسمها نصين بالعرض عشان نحشيها

انا هنا حشيتها كريمه بصوص الفراوله

طبعا صوص الفراوله سهل اوي بنجيب فراوله ونقطعها ونكون مسخنين على النار شوية شربات معقود كويس اوي نسخنه ويا حبذا نضيف عليه معلقتين من محلول جيلاتين (جيلاتين مدوب فى مايه ) ونحط الفراوله ونسيبها على النار لحد ما تغلي كويس والصوص بتاعها يتقل وبعد كده نطفي ونسيبها تبرد

بنجيب مقدار من الكريم شانتيه حسب حجم الكيكه وحسب رغبتكم وممكن كمان نحشيها كريم باتسيير مش هاتقول لا

ونحط عليه صوص فراوله برضه حسب الرغبه وبعدين نفرده على نص الكيكه الى احنا عاملينها زي كده

وبعد كده نحط نص الكيكه التاني ونظبطها علىا لتانيه كويس وبعدين نغطيها كلها بالكريم شانتيه زي كده بالظبط


بعد كده نجيب قمع الكريمه و نعمل خطوط بالطول وخطوط بالعرض وبعين ناخد حافة الكيكه كلها بوردات او اي شكل يعمل لها حدود زي الصوره كده بالظبط

وبعد كده نكون مجهزين انصاف فراوله ازاااااي ؟؟ اننا ندهنها او نقلبها بشويش فى شويه من صوص الفراوله ولو خلص نعمل شويه شربات مع شويه جلي على النار ونسيبهم يبردوا وبعدين ندهن بهم الفراوله وده بيخلي شكلها لامع وما تدبلش لو سبناها شويه فى التلاجه وما تسردش ميه على التورته

وبعد كده تبقى جاهزه نزين بها زي ما نحب مثلا زي كده

وطبعا طبعا ينفع نعمل مع فواكهه تانيه كتير زي الموز والمشمش والتفاح والمانجه والاناناس ..........

وطبعا هما شمعتين لان انا خميتكم لان ده ما كانتش بتاعة النهارده دى كان يوم عيد ميلات البت نور بنت اختي

وكان عندها سنتين زي ما نتم شايفين الشمع كده

بعد شويه بقى تكون التورته بتاعتي خلصت لانى اخدت مقلب عجب فيها هاقولكم عليه هناك بقى

اكلير بالشيكولاته

الاكلير بالشيكولاته

طبعا انا باموت فيه يا جماعه الاكلير ده واكيد اكيد انتم كمان بتحبوه

وفى ميت حد طالبه مني عشان كده تلاقوني عماله اعمل بوستات ورا بعض

هو مشكلته انه موال شويه من حيث انك بتعملي ميت حاجه معاه عشان يكتمل

هانحتاج هنا عشان نعمله الآآآآتي

مقدار من عجينة الشو

مقدار من الكريم باتسيير

مقدار من صوص الشيكولاته

من النوع الاولاني الجامد

نبدأ الشغل بقى

احنا بعد ما جهزنا العجينه زي كده بالظبط

هانجيب العجينه دي او جزء منها ونحطه فى قمع الكريمه او حتى كيس بلاستيك عادي جدا ونعمل فاتحه فى الكورنر بتاعه من تحت

المهم اننا نشكل الاكليز زي الصوره دي مثلا

وده اكتر شكل انا باحبه وافضله مش عارفه ليه

وممكن كمان نعمله على شكل صوابع طويله او وردات او اي شكل تاني

المهم هانبطن الصنيه الاول زي ما انتم شايفين عشان ما يلزقش وبعد كده نشكله زي ماهو فوق كده

ونحطه فى فرن حامي حوالي 200 درجه وبتقعد حوالي 20 دقيقه المهم نبص عليها بعد ربع ساعه كده ونستنى لما يبقى لونها دهبي زي كده

وطبعا لاااازما ولا بد تنتفخ زي الصوره دي بالظبط كده والا تبقى العجينه بتاعتكم مش مظبوطه

بعد كده هانجيب مقدار من الكريم الباتسيير وطبعا انا عملته بالشيكولاته هنا اهو عشان يبقى لايق على القاعده المشكلته دي .

وعلى فكره يفنع كاستر برضه بالشيكولاته مش هايقول لا

وينفع كريم شانتيه والله مش هايقول لا برضه زي ما تحبوا

هانحط الكريم باتسيير بقى فى قمع الكريمه برضه او قرطاس الكريمه ونحط القمع الى مافيش فيه نقشه وله بوز رفيع نسيت اصوره معلش

وبعدين نمسك الاكليره ونعمل فيها فتحه من تحت زي الصوره دي بالظبط وممكن نعمل الفاتحه من الجنب برضه عادي

وبالقمع ونحشيها بالكريم باتسيير نملاها به

وبعد ما نخلص الكميه دي

نجيب صوص الشيكولاته الى احنا عاملينه قبل كده ومجهزينه ودافي عشان يبقى سايح ونمسك الاكليره ونحط وشها فى الصوص ونطلعها ونرص على صنيه كده

ولما تبرد الشيكولاته عليه وتجمد نبدأ نشيله واحده واحده بمقصوصه او حاجه عشان الشيكولاته هاتكون لازقه فى الصنيه وبعدين نرصها فى طبق زي كده

اه وطبعا ممكن نعمله بالشيكولاته البيضا او نعمله شويه كده وشويه كده يبقى زي الصوره الى فوق خالص دي بيبقى مالوش حل بشكله فى الطبق

وبالهنا والشفا

اه بالنسبه لمقدار عجية الاكلير الى عملناه تحت ده يعمل حوالي 3 اطباق من الى في الصوره ده وجايز اكتر كمان

وممنوع اي افتكاسات وحد يقولي احط بكنج بورد عشان ترتفع اكتر لا البكنج بودر هايخليه يفرش البيض هايعمل كل حاجه ما تقلقوش

وطبعا طبعا الى يجرب يقولي

ومافيش مانع يدوقني يا بت يا هبه يا مصوره خايبه ومساعده عبيطه

عجينة الشو

عجينه الشو طبعا مهمه اوي فى عالم الحلويات وبيتعمل منها اصناف كتير جدا جدا

غربي زي الاكلير مثلا وغربي زي بلح الشام

فانا قلت اعملها فى بوست لواحدها عشان هانستخدمها كتير لسه

قدامي على المطبخ

المقادير :

كوب ونصف دقيق

كوب ماء

نصف كوب زيت على سمن

من 8 الى 10 بيضات + فانيليا

الطريقه :

اول حاجه بنعملها بنحط كوباية المايه على النار ومعاها الزيت والسمن وعلى فكره انا جربت اعملها زيت بس طلعت ناشفه جدا وبتلزق فى الصنيه وجربتها سمن بس او زبده بس وبتطلع طريه اوي زياده عن اللزوم لكن لما جربتها الاثنين على بعض طلعت ناجحه جدا

المهم حطيناهم على النار ا هو

ولما يغلوا بس ما نسبهومش على النار يغلوا لحد ما ينشفوا هههههههههههههههه

لما يغلوا على طول نضيف الدقيق المنخول مره واحده ونقلب بسرعه جدا هانلاقي على طول طلعت عجينه زي الى فى الصوره دي واتكورت حوالين المعلقه

بعد كده هانسبها تبرد شويه وما نسيبهاش كتير عشان ما تنشفش وتعذبنا لما نيجى نضيف البيض

ولما تبرد شويه نبدأ نضيف البيض واحده واحده وبعد كل بيضه نقلب بالمعلقه لحد ما البيضه تختفي مع العجينه

والمقدار ده بياخد حوالي من 8 الى 10 بيضات حسب الدقيق بقى والحركات دي

وطبعا مع البيض نحط الفانليا

المهم يطلع العجين فى الاخر زي الصوره دي كده تمام
عجينه طريقه جدا وناعمه .

اقولكم خليكم فى النص وحطوا 9 بيضات ههههههههههههههههههه عارفه انا الامخاخ بتاعة وانا اعرف منين

المهم كده عجينة الشو جاهزه بقى نقدر نعمل بها شغل جامد جدا

وان شاء الله اول حاجه هانعملها النهارده اكلير الشيكوللااااااته عشان فى ناس مصدعينى عليه وكتبته فى ورق يجى عشر مرات وبيضيعوا الورق وما شوفتش منهم ولا اكليرايه واحده ستاااااات شلت .

اه ومعلش التصوير مش اد كده عشان المساعد بتاعي كان سكه جدا واي كلام
سامعه يا بت يا هبه ؟؟؟ ساااااااااااااااكه انتى مساعد ساكه

صوص الشيكولاتة

طبعا صوص الشيكولاته ده مهم اوي اوي فى الحلويات الغربي
هانستعمله كتير

انا عن نفسي باعمله بطريقتين

الاول : وبيكون جامد وباستعمله مع البيتى فور او الاكلير وبيكون نص كيليوا شيكولاته عليه حوالي 200 جرام زبده حوالي كوبايه الا ربع زبده مش سمنه ونحطه فى حمام ميه سخنه ولما تسيح نقلبها كويس معلقه بس مش كتير اوي عشان ما تبوظش

وبتكون شكلها كده تقريبا




والتاني: وهو بيكون طري وعامل زي الكريمه شويه لكن لما بيتحط فى التلاجه بيجمد لكن مش بيبقى جامد اوي وده في رايي بيبقى احلى فى تغطية التورتات خصوصا لو الجو برد عشان بتكون الجامده دي صعبه فى التقطيع ولو اتحطت فى التلاجه بتبقى مش حلوه مع الكيك والكريمه وكده

ومقاديرها بتكون نص كيلو شيكولاته و200 جرام زبده برضه وعليها كمان حوالي نصف كوب حليب وبنحطها فى حمام ميه سخنه زي كده

ولما تسيح نخفقها كويس بالمضرب هنلاقيها لفت وبقت زي الكريمه كده شويه وكده تبقى جاهزه خلاص للشغل وطبعا ممكن نعمل بالظبط كده مع الشيكولاته البيضا زي كده

وطبعا احنا عملانها النهارده بالذات عشان نعمل مع بعض اكلير بالشيكولاته عشان الجماهير طالباه

الكوسه بالبشاميل

الكوسه يا حلوين اهو ما تقولوش حرماكم من حاجه عشان انا فى حد استعجلني فيها مش فاكره مين معلش السن بقى يا اخوانا احمدوا ربنا

المهم

المقادير بقى

حوالي كيلو كوسه او خضار مشكل كوسه وبسله وجزر وطبعا مقشرين ومقطعين زي الكوسه الى فى الصوره دي كده قطع طوليه

و3 كوبايت صلصة بشاميل

وحوالي نص كيلو لحمه عصاج

الطريقه بقى يا حلوين

مافيش اسهل من كده صور على فكره واااااااضحه جدا سقفولي عليها من فضلكم

الاول بنجيب صنيه ونحط فيها نص معلقة سمنه بلدي ولما تسخن نحط الكوسه ونشوحها لحد لماااااااا تنشف من الميه خالص مهم اوي حكايه تنشف دي بس ما تتحرقش من فضلكم

زي الصوره دي كده بالظبط

ولو عايزين نعملها خضار مشكل نزود عليها خضار مشكل برضه ونشوحها لحد ما تنشف زي الصوره دي كده برضه

بعد كده نروح على الصنيه او القالب الى هانعمل فيه ونحط بقى اول حاجه اربع معالق كبار تقريبا بشاميل زي كده


بعد كده نرص الكوسه تماااام زي كده واحده جنب اختها زي الصور دي كده وبعدين نحط عليها حوالي نص كوباية بشاميل او يعنى لحد لما نغطي الكوسه

وبعد ما نرص الكوسه ممكن بعد كده نحطط الخضار الباقي بس نخلي الكوسه تحت عشان تمسك الخرطه لما نيجى نقطع يعنى

وبعد كده نفرد اللحمه العصاج على الخضار زي كده بالظبط

وبعدين نرجع نرص الكوسه برضه بس المره دي لو حاطين خضار نحطه قبل الكوسه يعنى الكوسه تبقى على الوش زي الصوره كده تمام وبرضه واحده جنب اختها وبعدين ننحط بقى باقي البشاميل كله عليها من فوق زي الصوره دي كده بس نساويه وما نخليش الكوسه باينه خالص

وده قطاع طولي للصنيه ههههههههههههههههه صوره بالجنب يعنى عشان تشوفوا الطبقات وترتيبها قبل ما تدخل الفرن

وده شكلها بعد ما طلعت من الفرن وانا جوعت لا سيما انا شامه ريحه العصاج الى انا باعمله على النار اصلا

وده قطاع طولي برضه للصنيه بعد ما طلعت ملاحظين اللون والطبقات وكده يعنى ولا ايه

مصوره كبيره انا والله

وبعد ما تبرد بقى يا قطاقيط شويه نقطعها ونطلعها بالراحه كده تتقدم زي ما انتم شايفنها كده

اكله جميله جدا جدا وانا بامووووووت فيها وبتبقى حلوه فى العزايم كصنف خضار غير تقليدى يعنى وممكن تقدموها عادي مع عيش وسلطه خضرا او كول سلو تبقى برضه ما لهاش حل

والف هنا والي يجرب يقولي والى مش فاااااااااااهم ......... لا يقولي برضه زي بعضه