الاثنين، 22 ديسمبر، 2008

الكول سلو(سلطة الكرنب بالمايونيز)



عملتوا المايونيز ؟؟؟
شكلكم كسلانين ولا هاتعملوا حاجه
الحريم الايام دي بقول شلت على راي خالتي فرنسا
المهم
نعمل الكول سلو بقى بسرعه عشان عايزه انام
المقادير :
كوب مايونيز (من الى عاملينه امبارح )
نص كوب حليب
ملعقه كبيره سكر
ملعقه كبيره خل
كوبايتين كرنب ابيض مفروم او مبشور او اي حاجه المهم يكون مقطع رفيع اوي
نص كوب جزر مبشور او مفروم
الطريقه
بنحط المايونيز على الحليب والسكر والخل فى الخلاط ونخلطهم دقيقه واحده بس على ما يتجانسوا وبيبقى شكلها زي المايونيز كده بس خفيفه شويه لكن ما تخفيهاش اوي لو حطيتى نص كوباية لبن ولقيتها لسه تقيله حطي شوية لبن صغيرين كمان واخلطي وهاتبقى ميه ميه ان شاء الله
وبعدين فى وعاء عميق (ولا ابله نظيره يا ولاد) تخلطي الكرنب مع الجزر وتصبي عليه الكلام الى حطيناه فوق فى الخلاط وتقلبيه
وتسيبه الخطه على الاقل 2 ساعتين قبل فى التلاجه قبل الاكل وتغطيها كويس
بس كده وتاكلوها بقى ولا نيجى ناكلها لكم كمان
طبعاااااا ممكن تزودي الجزر وتقللي الكرنب
ولو حسيتى ان السلطه طالعه ناشفه اعملي شوية مايونيز على حليب وسكر تااااني وحطيهم
وفى ناس بتحط فيها بسله بتبقى حلوه اوي
وممكن تحطي خس على فكره كمان بيبقى جميل
بس كده وشكلها طبعا فووووووق لقيتها مش محتاجه لصور فى الخطوات
وبس كده تاكلوها بقى بمعلقه ههههههههههههه
ولا تحبوا نيجى ناكلها احنا
الى يجرب يقولي
ومقدما عشان ما حدش يبوظ الوصفه ويجى يتكلم هنا
زوجة جربتها وقالتلى انها طلعت معاها تحفه
من الاخر الى هاتبوظها انا مش مسؤله يا هوانم

الأحد، 21 ديسمبر، 2008

المايونيز

النهارده يا بنات هانعمل حاجه مهمه اوي وحلوه اوي
وهي المايونيز
المايونيز داخل في سلطات كتيره ا وي واغلب الناس بتحبها زي الكولسلو مثلا
وكمان عمايله فى البيت أمن بكتير لان بيدخل فى صناعته البيض وطبعا ده كان مشكله فى ايام الانفلوزا والكلام ده
وكمان اوفر برضه كتير لان البرطمان دلوقتي بقى ب 11 جنيه ويادوب لحستين ويخلص يعنى هههههههههههههههه
المهم يلا نبدأ شغل ورايا على  المطبخ
المقادير
بيضيتين
ثلاثة ملاعق خل ابيض او عصير لمونتين
معلقة صغيره مسطرده او خردل مطحون
بشر لمونه  أو فلفل ابيض ولو اسود ما يقولش لا بس هايبقى باين
ملعقتين  صغيرين سكر
نص ملعقه صغيره ملح
كوب ونصف زيت (ذره او زتون او عباد شمس اوخليط منهم )
أنا عن نفسي بافضل زيت الذره
الطريقه 
الاول هانجيب الخلاط ونحط فيه كل المكونات  الى فاتت ما عادا الزيت
بصوا هو فى ناس بتعمله بالصفار بس بس انا جربته بالبياض اشتغل ما قالش لا 
تحطوا البيض والخل والملح والسكر وبشر اللمون والخردل على بعض فى الخلاط
وتضربوه كويس لحد ما يتخلط يبقى تمام
وبعدين نجيب الزيت ونحطه فى حاجه ينفع نصب منها خيط رفيع للخلاط 
زي الشكل الى فى الصوره دي كده
على فكره طلع عينى على ما عرفت اصور الصوره دي عشان كنت لوحدي وباعمل وماسكه الموبايل فى نفس ذات الوقت احمدوا ربنا بقى ومش عايزه حد يقولي مش واضحه
المهم نفضل نحط الزيت تدريجيا جدااااااا خيط رفيع اوي اوي وعلى مهلنا اووووووي
لحد ما يبدأ الخليط كله يبقى سميك شويه ولونه فاتح زي  الى فى الصوره دي بالظبط 
الصوره دي من جوه الخلاط يعنى عشان تبقوا فاهمين الصوره ولو مش واضحه اعملوا مش واخدين بالكم
وبعد ما نخلص مقدار الزيت كله يبقى كده المايونيز جاهز 
هايبقى دافي علشان الخفق بيرفع درجة الحراره 
بنشيله بقى ونحطه فى علبه  مقفوله فى التلاجه لمده ساعه على ما يبرد يعنى قبل التقديم 
وبيكون شكله زي الصوره الى فوق دي بالظبط ان شاء الله
وداليا بنت الغربه تعملي المايونيز وتحطيه فى التلاجه وتجيبى كرنب وجزر وتستنينى
بكره ان شاء الله نقول الكول سلو

الثلاثاء، 16 ديسمبر، 2008

السمكه الحاره

السمكه الحاره
زي ما بيقولوا عليها فى الخليج
وعلى ما افتكر ان الهنود هما اصل الطبخه دي
وكمان على فكره عندنا البورسعديه بيعملوا حاجه شكلها وهى السمك السنجاري
سهله اوي على فكره واحلى حاجه فيها انها بتتعمل من غير زيت عشان الزيت ده متعب اوي فى كل حاجه
هاهريكم بقى اكل دايت
هههههههههههههههههههههههههههه
احنا هانستخدم اي سمك متوفر انا النهارده كنت عامله سمك بلطي عادي
جربته قبل كده بالبوري كان مالوش حل بصراحه
وقبل كده جربت البياض برضه كان مجرم
يعنى اختاروا السمك الى تحبوه
بس ياريت يكون سمك سمين شويه وكبير شويه
وممكن تعملوا مقطع او السمكه بحالها
المهم
لحوالي كيلو سمك هانعمل الآتي
فى الكبه او المفرمه اوي اي حاجه تعجبك
و2 فلفل اخضر كبير واحمر لو حبيتى ويا حبذا لو قرن شطه معاهم يووووووووه
وبقدونس وكسبره وشبت او المتوفر منهم
انا عن نفسي باحب الكسبره مع الاكله دي بس لو حطيتى كله بيبقى حلو برررررررضه
خمس او ست فصوص توم كبير
حبة طماطم(كنت ناسياها وفضفضه فكرتني هههههههه)
وملح وكمون وبهار
وبعدين بنفرمهم كلهم مع بعض كده جماعه
وبعدين طبعا السمك متنظف ولو كانت سمكه كبيه بتشرطيها بالسكينه (نعمل فتحات يعنى بالعرض فى السمكه )
ونجيب الخلطه ونحشي السمكه من جوه ونحط داخل الفتحات الى عملناها بالسكينه وبعدين نجيب ورقة سلفر ده بنعمل السمكه بحالها يعنى
وندهن الورقه زيت وبعدين نحط معلقه كبيره من الخلطه الى فاتت ونفردها ونخط فوقيها السمكه
وبنحط معلقه كمان فوق السمكه ونفردها
زي الصوره دي كده
معلش بقى المصوراتي سكه
بعد كده نجيب نعصر لمون عليها ونرش خل ومعلقة زيت ونقفل عليها الورقه ونحطها فى صنيه وندخلها الفرن وبعد حوالي ربع ساعه كده نفتح الورق عليها ونسيبها كمان ربع ساعه لحد لما تنشف شويه وتكون استوت على كده
لو عاملين سمك مقطع بقى او حتى فليه ممكن نعمل كده بالظبط بس نرصه فى صنيه ونرش عليه نص كوباية لمون ونص كوباية خل وربع كوباية زيت ونقفل عليهم بالسيلفر بررررضه بتاع ربع ساعه وبعدين نكشفه ونسبها تنشف
وطبعا ممكن نخليها حاره (حاميه يعنى) وممكن لا براحتكم يا قوم
بس خلي بالكم الشطه الكتير مش حلوه على معدتكم
ونطلعها من الفرن ونقدمها زي ما هى فوق كده
الف هنا
وياريت الى يجرب يقولي
والى عايز يسأل يسأل يا جودعان ما تتكسفوش
ملحوظه مسبكه
الحاجات الى على الشمال دي يا حلوين جاهزه بالصور ان شاء الله شوفوا عايزين ايه الاول والاولويه لمن سبق هههههههههههه

الأحد، 7 ديسمبر، 2008

الرقاق


كل سنه وانتم طيبين يا جماعه العيد الكبير عيد الفته واللحمه
بس بصراحه انا ورضا مش بنحب الفته في العيد باعمل بقى رقاق مكرونه جلاش كده يعنى
عشان كده قلت نأكلكم رقاق معانا النهارده يلا بسرعه على المطبخ


المقادير

نص كيلو رقاق + نص كيلو لحم مفرومه عصاج + حوالي لتر شوربه او خمس كوبايات كبار
نصف كوب شوربه + نصف كوب لبن حليب+ بيضه + ملح وفلفل (ودول عشان نسقي الرقاق فى الفرن )
وعلى فكره الرقاق بيحب الشوربه تكون متينه يعنى سمينه شويه عشان ما يبقاش معجن يعنى يا ريت تبقى شوربة بط او لحمه سمينه شويه

الطريقه :

اولا بنجيب الرقاق وبيكون موجود على فكره نوعين مدور ومربع عشان حسب الصنيه الى هاتعملي فيها بصراحه انا باعمل فى صواني كبيره اصلا فمش بتفرق معايا المهم نرتبه كويس فى الصنيه
الرقاق بنقسمه نصين وبنبدأ نحط ورقه ورقه وكل ورقه نحطها عليها شويه شوربه نص كوبايه مثلا ولما نخلص نص الرقاق كله فى الصنيه وبيكون شكله كده






بعد كده بنجيب العصاج الى جهزناه قبل كده ونفرده على الصنيه كده
ودي طبعا ايد خالد كان واقف جنبي وعمال ينقي العصاج ياكله ويقولي اييييييييه يا ماما انا بادووووق
هههههههههههههههههههههه



وبعدين نبدأ تاني نكرر موضوع ورقة من الرقاق وعليها كوباية شوربه وطبعا الشوربه عليها ملح وتوابل اصلا

ونعمل كده لحد ما الرقاق يخلص وبعدين يبقى شكله كده





وما تقلقوش انه هايبقى هايش فى الاول وهاتفكروا ان الصنيه مش هاتكفي لكن بعد شويه بيهبط على بعضه وبيبقى زي الى فوق ده بالتمام


وبعد كده نكون مسخنين الفرن طبعا ونحط الصنيه فى الفرن وبعد حوالي ربع ساعه فى الفرن السخن اوي نطلعها ونحط عليها (الشوربه والحليب والبيض والملح والفلفل الى احنا خلطينهم مع بعض فوق دول )

نسقي بيهم الصنيه كويس نوزعهم عليها يعنى وممكن لو وش الصنيه ناشف اوي نعمل فتحات بالشوكه كده عشان يتوزع السائل كويس

وبعد كده بتقعد فى الفرن حوالي ثلث او نص ساعه تقريبا لحد ما وشها يحمر وتبقى شكلها كده





بنطلعها ونصيبها تبرد شويه وبعدين نقطعها ونقدمها زي الطبق الى فوق خالط بالظبط والف هنا يا جماعه وكل سنه وانتم طيبين


اها هايبقى في بعض ورق مكسر من الرقاق ما ترميهوش ممكن تحمريه فى معلقة سمنه او تقلبي فيه السمنه وتحطيه فى صنيه وتدخليه الفرن يتحمص وممكن تعملي منه فته او ام علي

وكل سنه وانتم طيبين وبالف هنا وخير

ما تنسوش تبقوا تقدموا معاه شوربه ولحمه عشان ده عيد يعنى


العصاج

شوفوا يا جماعه طبعا فى حاجات كتير اوي من اساسيات الاكل الى بتستخدم فى حاجات كتير اوي

زي مثلا البشاميل العصاج شربات الحلويات الكريمات كده يعنى

كل ده طبعا مش معقول انزله مع كل وصفه عشان كده انا قلت انزله لوحده وابقى احطه بوصلته فى الموضوع بتاعه

وده اولها العصاج

نعمله مع بعض بسرعه بقى


المقادير


نص كيلوا لحمه مفرومه

بصله كبيره مفرومه

ملح وفلفل وتوابل لحوم مطحونه

الطريقه
اولا نسخن نص معلقة سمن وبعدين نحط عليها البصله ونقلب لحد ما تبقى البصله لونها شفاف 
وبعدين نحط اللحمه المفرومه وعليها التوابل والملح ونقلب كويس اوي زي الصوره دي كده 

ونفضل نقلب على طول لحد لما لون اللحمه يتغير من الاحمر للبنى كلها وتبقى مفروله مش كتل يعنى لحد لما تبقى شكل الصوره دي كده



وبعد كده نوطي عليها النار ونزودها نص كوباية مايه ونغطي علياه ونسيبها لحد لما الميه الى فيهاتنشف وبس كده تبقى جاهزه لاي استخدام بقى
ورايا على الرقاق بقى

السبت، 6 ديسمبر، 2008

البيتى فور

طبعا انا عارفه انى اتأخرت عليكم اوي بس والله غصب عني اولا كنت مستنيه عشان انزله بالصور وكمان طبعا انا مشغوله حبتين عشان العيد وكده



المهم





المقادير





واحد كيلو دقيق ابيض ( سبع أكواب )





3/4كيلو زبدة بقري (3 كوب) طبعا ممكن جموسي وطبعا ممكن سمن لكن احلى نتيجه بتيجى من الزبده البقري الصفراء.





ربع كيلو سكر (كوب سكر) او كوب ونصف حسب الرغبه فى طعم الحلو





4 بيضات + فانيليا





كيس بكنج بودر أو 2 ملعقه كبيره بكنج بودر





********************************************************************************************************************





خلاص كده كل حاجه جاهزه





نبدا اولا نجهز الدقيق ننخله ونحط عليها البكنج بودر ونقلبه كويس ونحطه على جنب





بعد كده نحط السمن فى حاجه غويطه وكبيره تكفي العجين كله فى الاخر وبعدين نحط عليها السكر ويفضل يكون سكر مطحون او على الاقل ناعم





ونخفقها كويس بالمضرب الكهربائي أو باي مضرب سلك يدويا بس هاتطول شويه في البدايه بيكون شكله كده



ونستمر فى الخفق لحد لما تبقى لونها افتح وتبقى عاملة زي الكريمه



وبعد كده نحط البيض فى وعاء تاني وعليه الفانيليا ونخفقه الاول كويس وبعدين نضيفه للسمن على السكر ونخفق تاني لحد ما يختلط ببعضه تماما ويبقى برضه زي الكريمه برضه .





وبتكون تقريبا شكلها كده زي الى في الصوره دي ملاحظين فرق اللون عن الصوره الى فوق ؟؟
وبعد كده نضيف الدقيق المنخول والمضاف عليه البكنج بودر ونضيفه للعجين شويه شويه ونقلب دايره ونص قطر زي ما اتفقنا




حاولت اصورها ما عرفتش بقى المهم نفضل نقلب على اد ما نقدر بالمعلقه لحد ما العجينه تتقل هانضطر اننا نقلب بادينا بس نقلب برفق عشان الهوا الى دخلناه ما يخرجش تاني





ولحد ما ننتهي من الدقيق كله والعجينه تبقى طريقه لكن فى نفس الوقت ما تكونش لازقه فى ادينا ولا فى الوعاء الى بنعجن فيه وبتكون فى النهايه شكلها زي كده بالظبط



بعد كده نبدأ نشكلها بالقمع او بالماكينه المخصصه للبيتى فور





أنا عن نفسي بحب القمع وباستريح فيه وبالنسبالي اسرع من اي ماكينه واستعماله سهل جدا



ونخلي ايدنا عموديه لو كنا عايزين البيتي فور يطلع على شكل ورده مدوره زي الصوره الى فاتت دي بالظبط
ويطلع كده
ولو حابين نعملها طويله شويه نميل ادينا ونسحبها بالطول شويه يطلع طويل زي الصوره دي



ما صورتش عمايله عشان كان رضا مشي ههههههههههههههههههههه
المهم بعد كده نكون مجهزين الفرن شغال وسخن حوالي 200 درجه





وما ننساش الصنيه فى الفرن ونحرقها زي ما انا عملت عشان كنت باقرا البوست بتاع عمرو فى حبشتكنات فلسفيه هههههههههههههههههههه





لا على طول نطلعها اول ما تصفر





بتاخد لو كان الفرن حامي اقل من ربع ساعه ولما يسخن اوي عشر دقايق بالظبط وبتطلع





وبيكون شكلها كده






بعد كده ولما نخلص الموضوع كله نقدر نزينه بقى زي ما نحب ممكن نزقه بمربى او عسل ابيض او شيكولاته وبعدين نغمس طرفه فيها ويكون كده











وممكن كمان نطلعه من الشيكولاته ننزله فى جوز هند او فستق مطحون او لوز او بندق او فول سوداني





المهم يعنى يبقى باي شكل تحبوه





وتاكلوه بس مش كله تسيبوا حبه للناس الى هاتزوركم فى العيد





وألف هنا يارب وكل سنه وانتم طيبين

السبت، 29 نوفمبر، 2008

الخرشوف بالخضروات والجبنه

الخرشوف بعد ما جوعناكم بقالنا فتره غايبين عليكم
وخضار اهو يا داليا بنت الغربه لاجل عيونك
الخرشوف للي ما يعرفوش بيبقى شكله وهو اخضر زي الصوره الى فوق دي وده مش صباعي انا معلقه الصور دي من على النت هههههههههههههههههههههههههه
المهم طبعا احنا بنجيب الخرشوف وننضفه نشيل الورق الاخضر الى بره ده وبنشيل كمان قلبه
وعشان نجهزه كمان لازم نشوحه الاول فى معلقة سمن او زيت كده وننطقه بالحله لحد لما يستوي شويه وفى النهايه بيكون شكله زي الى فى الصوره ده والى برضه معلقنها زي ما انتم شايفين

ونرصه فى الصنيه كده زي ما هو قدامنا وبعدين نبدأ نحشيه
الحشو بقى بيكون زي ما تحبوا

انا باحب الحشو الى بيكون لحمه مفرومه معصجه + مشروم برضه مشوح قبل كده ومقطع صغير + زتون مفروم او مقطع صغير + جبنه رومي او متزريلا او شيدر مبشوره .
كل ده بنخلطه على بعضه ونحط تقريبا معلقه كبيره فى كل واحده خرشوف
وعلى الوش نحط معلقتين بشاميل او شريحه جبنه من اي نوع
وندخلها الفرن بقى على كده وطبعا كل المكونات مستويه اصلا يعنى يادوب تسخن والجبنه تسيح
قولي حوالي ربع ساعه وتطلعيها
ويكون جاهز للاكل على كده وممكن تقدمي معاه بطاطس محمره وكول سلو ويبقى اكل خفيف ولذيذ جدا

والحشوات بقى ممكن تغيري فيها على كيفك
فى ناس بتحشيه من غير لحوم وفى ناس بتحشيه سبانخ كمان وعلى وشه جبنه برضه
زي ما تحبي يعنى
وعلى فكره فى خرشوف مجمد نص سوى لما باتزنق باجيبه وبيبقى حلو برضه وسهل طبعا
وما لقيتش صوره بقى يا جماعه معلش
ايوه قولوا يارب رضا يصلح لها الكاميرا
الى يجرب يقولي





الأربعاء، 12 نوفمبر، 2008

يا طريه يا جبنه قريش



الجبنه القريش

زي ما انا قلتلكم قبل كده انا باحب اعمل دايما منتجات الالبان فى البيت

الجبنه القريش من الحاجات الى انا باحبها لكن المعلبه منها او الى فى السوبر ماركت بتبقى مش نفس الطعم الفلاحي الى انا باحبه

والى من الفلاحين بتبقى ساعات شكلها يغم النفس والواحد بيقرف منها

كمان هى مفيده اوي عموما دول حوض البحر المتوسط مشهورين بالجبنه خصوصا الجبنه القائمه على طريقة التخثر البكتيري .وهى فعلا من افيد الانواع وكمان الجبنه القريش بالذات تعتبر اقل انواع الجبنه سعرات حراريه مع احتفاظها برضه بالفايده العامه للجبنه .

الطريقه سهله جدا بس نركزززززززز

أولا :الحليب لازم يكون طبيعى ميه الميه مش عليه اي مواد حافظه . لكن مش لازم يكون طازه لاننا اصلا هانسيبه لما يروب

بس يكون احسن كتير لو كان ما اتحطتش فى التلاجه خالص

بناخد الحليب ونحطه فى حله او طاجن كبير ونغطيه ونسيبه فى مكان دافي نسبيا لو فى البرد اوي ممكن نعمل زي ما عملنا فى الزبادي ندفي الفرن ونسيبه فيه لحد ما يربط ويعمل وش .

فى البرد ممكن لو دفيتى الفرن يقعد حوالي 48 ساعه

فى الحر الجامد ساعات يربط بعد 12 ساعه مثلا .

اول لما يربط تشيلى القشطه من عليه وممكن تحطيه فى التلاجه نص ساعه مكشوف عشان القشطه تجمد شويه تعرفي تشيلها بسهوله .

والقشطه الى طالعه دي بتبقى قشطه فلاحي زي الى بتتباع فى السوق وممكن تسبيها للاكل لو بتحبوها اوتحوشيها زي ما عملنا فى القشطه بتاعة الزبادي .

بعد كده لازم نسخن اللبن الرايب ده لحد ما يبقى تقريبا درجة حرارته 90 درجه مئويه او يعنى قبل ما يغلي على طول

ممكن بقى ب3 طرق

اولا تحطيه فى فرن البوتجاز

بس تكون شقتيه بالسكينه الى اربع اجزاء مثلا عشان الميه السخنه تتخلله وده فى جميع الحالات يكون احسن

ثانيا تغليه ميه وتصبيها عليها

ثالثا انك تحطيه على البوتجاز من فوق بس تحتيه صاجه (شياطة الرز ) ونار هاديه اوي وتخدي بالك منه عشان ما يغليش

لو غلي بتبقى الجبنه فيها حتت جامده كتير تخليها مش متجانسه .

بعد كده بتسبيه من غير نار لحد ما يبرد

وبعدين تصبيه فى مصفه جوها شاشه او اي قماشه تكون رقيقه اوي

وتسبيه بقى بتاع نص ساعه كده لما ينزل اغلب ميته

وبعدين تشيلى الميه الى تحته ما ترميهاش بتبقى من غير ملح وهى فكره مفيده اوي هانخليها على جنب هانعمل بها حاجات تانيه كتير بعدين

وبعدين تحطي الملح على حسب ما تحبيه

وتقفلي الشاشه ويا اما تحطي فوقيها حاجه تقيله شويه وهى في المصفاه او تعليفها فى اي حاجه لفوق

وتسبيها لحد ما تصفي ميتا وتجمد كويس

طبعا الفلاحين والمحلات عندهم حاجه اسمها حصيرة الجبن القريش وده الى بيخليها تطلع زي ما هى فى الصوره كده لكن انا ما عنديش بقى باعملها ومش مهم تطلع خرط يعنى

الجبنه الى هاتطلع ممكن تقعد فى التلاجه كويسه 3 ايام

لو هاتحطيها اكتر من كده فى التلاجه حاولي تحافظي على شكلها كوره او قالب مربع وحطيها فى ميه وملح او حتى شويه ميه من الى طلعوا من تصفية الجبنه تحطي فيها ملح خفيف وتحطيها في التلاجه

وبس كده تبقى أحلى جبنه قريش

وال 3 كيلوا حليب يعملوا حوالي كيلو جبنه قريش او اقل شويه حسب نوع الحليب

وجربي الاول فى كيلو وما تيأسيش والى تجرب تقولي والى تغلط تقولي عملت ايه بالظبط

أه وعلى فكره لو اشتريتى حليب وجيتى تغليه راب منك ممكن تلحقيه قبل ما يغلي او وتسبيه يكمل روب يوم كمان وتعمليه زي ما عملنا كده فى الى فات

او حتى لو عندك زبادي كتير باقي وطعمه غير وما حدش هايكله برضه ينفع تعمليه كده تسخنيه وتعمليه جبنه قريش

وعندي برد حد يعملى ينسون

الاثنين، 3 نوفمبر، 2008

بسبوسه على طريقتى




النهارده هاعملكم بسبوسه بطريقه حلوه اوي هما بيقولوا عليها اردنيه بس انا اكتشفت ان الاردنين مش بيعملوها كده برضه بس قريبه من كده بس ان شاء الله ها تعجبكم وهى سهله جدا جداوهى على فكره بتطلع فى النص كده بين الكيك والبسبوسه
يعنى تقدروا تقولوا انها بسبوسه مكيكه
ههههههههههههههه




المقادير:




كوبايتين دقيق سميد دقيق بسبوسه يعنى + كوبايه دقيق ابيض للحلويات + 2 ملعقه كبيره بكنج بودر + كوب واحد جوز هند

ثلاث بيضات + فانيليا
واحد كوب زيت+ ملعقة سمن بلدي
واحد كوب زبادي او لبن حلين مش مشكله
كوبايتين شربات حلويات مش تقيل اوي


******************************




الطريقه:

يخفق البيض مع الفانيليا اولا ثم يضاف الزبادي او الحليب والزيت


ويخفق الخليط جيدا



ينخل الدقيق الابيض ويضاف اليه السميد والبكنج بودر وجوز الهند (كل المكونات الجافه ) ويخلط جيدا
يضاف خليط الدقيق للخليط الاول على دفعات حتى يختفي الدقيق ويعطى عجينه لينه مثل الكيك



مع التقليب بطريقة دايره ونصف قطر
يعنى نعمل بالمعلقه دايره فى العجين ونقطعها بنص قطر
ونكرر ده بس بنفس الاتجاهات
وده عشان نحافظ على الهوا الى دخل العجين انه مايطلعش تاني


وان كان الخليط غليظ


يمكن اضافه بعض الحليب .



ثم نضع الخليط فى صنيه فرن مقاس متوسط بعد تبطين الصنيه بالسمن والدقيق وتوضع فى فرن درجه حراره متوسطه170




وتترك لمده حوالي 20 دقيقه وحين تنضج وتأخذ اللون الذهبي




نتأكد من انها تامة النضج بغرس سكين نظيفه فى منتصفها فان خرجت بلا عجين تكون البسبوسه ناضجه.




وتسقى بالشربات ويمكن اضافة شربات اكثر حسب الرغبه




ملحوظات :

السميد الى هو دقيق البسبوسه اهم حاجه فى الموضوع لو كان وحش هايبوظ الدنيا كلها
لان فى منه مغشوش كتير الايام دي فى السوق بيزودوه عيش مطحون وبلاوي كده
لان دقيق البسبوسه الى هو فى الاصل جنين القمح من اغلى انواع الدقيق
الغش فيه شغال جدا جدا لو ما بتعرفيش فيه بقى يبقى اشتري عبوات مقفوله من السوبر ماركت وتكون ياريت بعلامه مشهوره او على الاقل ما تجبيش ارخص


المقدار ده يعمل صنيه كبيره
بس بتكون طخينه شويه زي الكيك كده
انما لو حبيتيها تطلع رقيقه شويه اعمليها على صنيتين صغيرين احسن
تطلع زي الى في الصوره كده




والى فيكم هايجرب وياكلها من سكات هاعررررررفه

الى يجرب يجى يقولي عمل ايييييييييه


طبعا الصوره الى فوق دي انا لطشاها من على النت لكن هى بتبقى شكلها كده
يااااااارب رضا يصلحلي الكاميرا بقى




الخميس، 30 أكتوبر، 2008

الفراخ بالزبادي


الفراخ بالزبادي


احبائي المطبخيات والمطبخيين برضه عادي

النهارده هانعمل اكله سهله جدا جدا وبتتجهز فى خمس دقايق وتستوي فى نص ساعه

وبتخلص كل البواقي الى في التلاجه احيانا

ههههههههههههههه


المقادير

اولا طبعا فرخه مغسوله كويس ومنقوعه فى ملح ولمون وما الى ذلك ومقطعه زي ما تحبوا وانا عن نفسي باقطعها ل8 قطع عشان تستوي بسرعه

وكمان انا باشيل الجلد عشان تبقى مش سمينه اوي واقدر استعمل الصوص بتاعها من غير قلق


ثانيا : كل الى عندك فى التلاجه ودولاب المطبخ بقى حطيه عليها

هههههههههههههههه

لا شوفي يا ستى


كوباية زبادي ــ بصله صغيره ــ 6 فصوص ثوم كبار ــ توابل زي ما تقولي قولي (حبهان ‘ فلفل اسمر ، قرفه، جنزبيل، خردل ، ورق لوري )

واي توابل لحوم تمشي برضه

ــ وممكن واحده فلفل اخضر ــ ومعلقه مايونيزــ ونص كوب خل ــ وعصير لمونه ــ ومعلقة سكر او عسل ابيض (عشان تحمر فى الفرن ) .



الطريقه

تجيبى الخلاط وتحطي فيه كل الكلام الى فات ده

لاااااااااا الفراخ لا حطي كله ما عادا الفراخ طبعا


وتضربي كل المكونات مع بعضها فى الخلاط

ولو حبيتى لون قوي حطي معلقة صلصة علب وحبذا لو معلقة فابركا او سماق يدي لون احمر

او معلقة كركم يدي لون اصفر


لا اخضر مافيش بقى ما تطمعيش بقى


المهم تصبي الخليط ده كله على الفراخ وهى فى الصنيه وتغطيها بسيلفر وتحطيها فى الفرن

وبعد نص ساعه تقريبا تشيلى الفويل وتسيبها كمان نص ساعه وتابعيها لو نشفت اوي زوديها نص كوباية ميه ولما تستوي وتحمر طلعيها


لو مش عايزه تحطيها فى الفرن ممكن تعمليها على البوتجاز من فوق ولما تغلي توطي عليها لحد ما تستوي وتنشيفها شويه وتقلبيها مرتين ولا حاجه اثناء السوي


بس وترصيها فى طبق التقديم وتصبيها عليها الصوص الى طالع منها

وممكن كمان تصبيها فوق مكرونه وتصبي برضه عليها الصوص بتبقى حلوه اوي

وممكن تشيلى الفراخ وتحطي مكانها خضار مشكله وتشويحه فيه شويه لحد ما يستوي ويتقدم مع الفراخ بيبقى راااائع.

ملحوظه هااااااامه جدا
كل المكونات الى فوق دي ممكن الاستغناء عنها فى الوصفه عااااادي وهاطلع حلوه
لا ما عادا الفراخ طبعا مش هانهرج بقى
هههههههههههههههههههه



وكفايه رغي بقى على فكره
قوموا اطبخوها وقولولي رايكم

الجمعة، 24 أكتوبر، 2008

الزبـــــادي


بصراحه يا جماعه انا فى الاونه الاخيره مع الغلى وقلة الضمير الى عند الناس منتجات الالبان الى فى السوق بقت وحشه جدا جدا . وغاليه كمان . تلاقي علبة الزبادي فاضيه اصلا وبجنيه . وتلاقي الجبنه طعمها لبن بودره صاااارخ والكيلو بعشرين جنيه والواحد يجى ياكلها يلاقي فى دهن كده غريب شكلهم بيعملوها بزيت عربيات .

عشان كده بقيت الى اقدر اعمله فى البيت اعمله وان شاء الله اقولكم خلاصة ا لتجارب بتاعتي يمكن تنفعكم


ونبدأ النهارده بالزبادي


اولا: نغلي اللبن الحليب كويس اوي طبعا باي كميه ونسيبه لما يبرد يبقى زي ايدك تقريبا


ثانيا: تيجبي علبة زبادي من النوع الى بتفضليه بس تتأكدي انه زبادي معمول بخماير طبيعيه لان فى زبادي فى السوق دلوقتي معمول بمواد جيلاتين وكده .ماتسألنيش تتأكدي ازاي . أنا عن نفسي عرفت الانواع الى فى السوق بالتجربه والخطأ

نجيب علبة الزبادي الجاهز ونضيف عليها نص كوباية حليب دافي ونقلبها كويس عشان تتجانس بسهوله مع باقي اللبن

وبعدين نضيفها بقى للكميه كلها

وعلبة الزبادي مثلا زي اكتفيا دي ممكن تعمل لحد 6 كيلوا

ما جربتش اكتر من كده بس بتهيئلي تجيب عادي


ثالثا: تصبي بقى الخليط الى فات ده فى كوبايات او طواجن زي ما تحبي وتغطي عليه وتسبيه فى مكان دافي لحد ما يربط تمام ويعمل وش ويبقى شكله زبادي يعنى

بعد كده حطيه فى التلاجه شويه قبل الاكل




هاقولكم شوية ملاحظات بقى مهمه :


ممكن تضيفى نكهات للزبادي _ مربات او فاكهه كمبود او عسل ابيض_ لكن ما تقليبهاش فىالحليب جربت اعملها لقيته مش بيربط كويس حطيها فى اخر الكوبايه وصبي عليها الحليب


لو كان الجو برد ابقى ولعي الفرن عشر دقايق كده وبعدين اطفيه وحطي الزبادي بعدها وسبيه يربط

لو لقتيه بعد خمس ساعات لسه ما ربطش وكان الجو برد برضه دفي الفرن تاني


اذا لقيتى الزبادي طالع فيه كتل من تحت يعنى مخرز او مجبن ده لان الحليب كان سخن شويه أو الفرن كان سخن اوي

خلي بالك لو حطيتى الزبادي الجاهز على الحليب وهو سخن اوي الخميره الى فى الزبادي هاتموت والزبادي بتاعك مش هايربط ابدا .



خليى بالك اللبن الى هانستخدمه لازم يكون سليم يعنى لا مضاف له مواد حافظه ولا مبستر لان المواد الحافظه بتمنعه من التخمر

والمبستر ممكن يربط حسب طريقة بسترته لكن فى الغالب مش بيربط وحتى على فكره لو حطتيى الحليب فى الفريزر بيكون مش حلو فى الزبادي .


طبعا ممكن لو بتعملي رجيم أو حتى عندك بيبي صغير اوي يكون الحليب سمين عليه خصوصا فى الشتا

اغلي الحليب ولما يبرد حطيه فى التلاجه لتاني يوم وتطلعيه هاتلاقيه عامل وش تشيلى القشطه من عليها ما ترمهااااااش

لو ماكالتوهاش حطيها فى الفريزر عايزنها بعد كده هابقى اقولك .

المهم تاني يوم طلعي الحليب حطيه على النار يدفى شويه وبعدين اعمليه زبادي عادي

بس كده الف هنا والى تجرب تقولي
اه والبوست ده مهدي خصيصا لمدام خالد همس الاحباب عشان هي هاطبق فكرتي ومشروعي الى جاي وهاتعمل زبادي وتبيعه لجوزها هههههههههههه
وانا من موقعي ده باقولكم كلكم يا ستات اقل علبة زبادي فى السوق دلوقتي بجنيه وكيلوا الحليب بقى باربعه جنيه عندنا مش عارفه فى البلاد
التانيه ايه والكيلوا يعملك بتاع 8 كوبايات من ام جنيه يلاااااااا عيشي بقى وابقى اعمليلهم تخفيض مالكيش بركه الا هما