الثلاثاء، 21 يونيو، 2016

كوردون بلو

 

بتجيبي الصدور وتدقيها بين شريحتين بلاستيك وتساويها كده وتظبطيها وتتبليها

بملح وفلفل ومسطرده مثلا تتبليل خفيف يعني
وبعدين تفرديها وتحطي في قلبها شريحة رومي مدخن .. الوصفه الاساسيه رومي

مدخن بس انا في الصور حطيت لانشون لأن عندي ناس مش بتحب نكهة المدخن

وبنحط فوقيها جبنه شيدر صباع على بعضه او مبشور وممكن نستخدم موتزريلا



ممكن ناخد رشة زعتر او ريحان او روزماري فوق الجبنه .. وممكن نضيف الخضار اصابع الجزر او الفلفل الالوان مثلا  ونبدأ نلفها كويس نبرمها كويس من قاعدة المثلث كده ونتك كويس عشان نقفلها صح .. لو خايفين نعملها واول مره ممكن نقفلها بخله 





هنجهز الخلطه الجافه 
من افضل الخلطات الجافه الي استخدمها دقيق ونشا وبقسماط خشن بكميات متساويه .. وشطه وتوابل ايطالي او ملح وفلفل وزعتر وريحان وبنقلبها وتكون جاهزه 

هناخد الصدور الي لفيناها ونحطها في بيض مخلوط مع شوية حليب صغيرين وفيه ملح وفلفل ونطلع من البيض على الخلطه الجافه ونخطيها كويس من كل ناحيه مع الضغط بالراحه عشان يثبت عليها 

وبيبقى شكله كده 
 هنروح نسخن زيت في طاسه عميقه قوي بحيث الزيت يغطي القطع زي الصوره كده  وتكون النار حاميه اول 3 دقايق بعد كده نخليها متوسطه كمان خمس ست دقايق لحد ما تاخد اللون المطلوب وتستوي .. او نبخها زيت بالبخاخ ونحطها في القلايه الي من غير زيت 

وده شكلها بعد القليه ولازم نسيبها تبرد قبل ما نتعامل معاها بالتقطيع 
وبعد كده بنقدمها زي الصوره الي فوق كده وانا هنا مقدمه معاها شعريه مفلفله بالخضار 
وبالهنا 

المعمر



المعمر 😍😍
كوبايه ونص رز ..اغسليه وانقعيه ساعه في مايه .. سخني 

اللبن حوالي 3 كوبايات لبن وحطي ملح وصفي المايه من على
 الرز وحطيه في قالب بايركس او اي صنيه عميقه شويه عشان
 ما يفورش ..خطي عليه اللبن ..ومعلقتين قشطه على الوش وعلى الفرن لحد ما يحمر ويشرب كل اللبن ..باحب قوي احط على وشه معلقتين عصاج لحمه او عصاج فراخ ..او كبد وقوانص ..بياخد في الفرن نص ساعه او ساعه الاربع حسب فرنك والكميه ...والكميه تكفي اربع اشخاص
وممكن تدفسي فيه حمام يا سلام على كده و سمان او فراخ مستويه نص سوى .. او لحمه مستويه .. كله بيطلع تحفه والله 

صدور الدجاج على بطريقه ايطاليه




صدور الدجاج بالجبنه على الطريقه الايطاليه..... الطريقه :
طبعا بنجيب صدور دجاج مخليه ونغسلها كويس وننقعها في مايه وخل شويه ونشطفها ونتبلها بالملح والفلفل والخل والزعتر او حبق ولمون ونعمل فيها فاتحه بالسكينه كده من فوق من عند الحته السميكه الي فيها تبقى زي خرم كده جوه الصدر زي الجيب ونسيبها في التتبيله نص ساعه ونجهز الحشو
تشكيلة جبنه بقى اي حاجه تحبيها موتزاريلا ورومي وشيدر اي حاجه عندك بتسيح تمشي وماعها ريحان اخضر مفروم او نعناع .. وفلفل اخضر او الوان مقطع وقطع لانشون او سوسيس صغيره وبعدين نحشي بيها الفراخ كويس اوي وفي طاسه تيفال او مش بتلزق ونحط زيت زيتون مش كتير 4 معالق مثلا ونسيبه يسخن اوووي بعدين نحط الفراخ جنب بعض وما نكترش في الطاسه لو عاملين كميه نعملها على اكتر من مره ونديلها الصدمه من الناحيتين ونقلبها لحد ما تاخد حوالي عشر دقايق في الطاسه وتكون استوت نطلعها على جنب ومكانها في الطاسه نحط معلقة دقيق ونحمرها وبعدين ننزل عليها بشوية مايه او حليب او شوربه نسيبها تغلي لحد ما تتقل ونقلبها كويس اوووي ونزود شوية كريمه لباني ونظبط الملح ونقفل وهو ده يبقى الصوص الي هايتقدم مع الفراخ وبالهنا


وممكن التقديم بطريقه تانيه ان يكون الصوص تحت الصدور زي كده 

فراخ بالتوم والجنزبيل



فراخ بالتوم والجنزبيل ...اسهل واطعم فراخ باعملها الحقيقه
الطريقه اغسلي الفراخ وقطعيها 8 او كتر
في الخلاط اربع فصوص توم معلقة صلصة علب كوباية زبادي اربع معالق خل لمونتين معلقه صغيره جنزبيل مطحون او شطه ملح فلفل معلقه دبس رمان او عسل اسود ..ولو مافيش مش مشكله....تبلي الفراخ بالخلطه دي نص ساع وحطيها في الفرن زي ما هي كده لمدة ساعه ...ممكن تقلبيها مره في النص عشان تتشرب التتبيله واطفي عليها وفيها شوية سوائل صغيرين بيبقى احلى صوص ..وممكن تفرشي تحتها بطاطس بتبقى حكااااايه


شعريه مفلفله





الشعريه المفلفله .. ده كيس لسان عصفور ...حمرت الشعريه كويس بتهدي عليها وتحمريها بمعلقة سمنه وشوية زيت على البوتجاز من فوق وتقلبي لحد ما تاخد لون دهبي..او تقلبي فيهامعلقتين زيت وتحطيها في الفرن عشر دقايق قلبيها فيهم مرتين ...ممكن تحمري كميه وتسيبيها عندك جاهزه تستخدمها على طول للشوربات او اي وصفه تانيه ..هنحط لسان العصفور في صنيه ونصب عليها حوالي ست كوبايات شوربه .. وندخلها الفرن او نسويها على البوتجاز من فوق ..وممكن لو عندك عصاج لحمه او كبد وقنصات معصجه او قطع فراخ مستويه او بايته او مكعبات مشوحه ..تحطيها على الوش بتدي طعم تحفه ..هنحطها في الفرن ربع ساعه بس يادوب تتشرب شوربتها وما نقلبهاش عشان تبقى خاتمه اتاكدي انها استوت ولو نشفت وناقصه سوا زودي شوية شوربه ... وبتطلع زي الصوره واوقات احط معلقة بشاميل على الوش او معلقتين قشطه