الثلاثاء، 15 ديسمبر، 2009

الكيك بالشيكولاته



السلام عليكم


ازيكم يا بشر وحشتوني والله


واندا انا كنت قلتلك هاعمل ام علي بس افتكرت انى كنت وعدت البنات الى كانوا معايا فى اللقاء انى اعملهم كيك ولقيت الصور بتاعته جاهزه قلت نشوف الكيك الاول بقى


وادي يا بنوتاتي الحلوين الكيك بالشيكولاته زي الى كان فى اللقاء بالظبط اهو مش حارمااااااكوا من حاجه والى مش هاتعمله ويطلع حلو هاتضرب



يلا على المطبخ


المقادير :




  • طبعا المقادير دي عشان نعمل قالب كيك واحد او صنيه متوسطه



  • كوب ونصف دقيق (طحين ) حلويات



  • كوب قشطه (وممكن نص كوباية سمن بلدي بس نبقى نزود معيار اللبن الحليب شويه)



  • 3/4 كوب زيت ذره (وممكن سمن أو زبده ) بس الزيت ميزته انه لو الكيكه اتحطت فى التلاجه او كان الجو برد تفضل الكيكه بتلمع ومش جامده اوي

والطعم بقى القشطه بتظبط العمليه كلها


وعموما موضوع الماده الدهنيه ده تقدري تحطي اي حاجه تحبيها زبده او زيت او قشطه او سمن بلدي او خليط من كل ده

المهم تظبطيها ان المقدار ده بياخد حوالي كوبايه سمن

بس القشطه بتدي للكيكه طراوه خطيره




  • حوالي كوب لبن حليب


  • كيس بكنج بودر (او حوالي 3 معالق صغيره )


  • 3 بيضات


  • فانليا


  • 3/4 كوب كاكاو خام ( ده تجبيه من عند بتوع لوازم الحلوانيه او العطارين وخدي بالك بيكون طعمه مر جدا ) بس هو ده الى بيدى اللون الغامق ده انا جربت كل الانواع الي فى السوبر ماركت مافيش فايده الكاكاو الخام هو احسن حاجه بس تجبيه من مكان نضيف عشان فى ناس بتغشه برضه



  • ونصف سكر بودره او ناعم على الاقل


الطريقه




  • اول حاجه احنا دايما فى الكيكه هانخلط الخامات السائله لواحدها والجافه لواحدها وبعدين نحطهم على بعض


اولا الخامات السائل او الطريه


الى هى القشطه والزيت او السمن نحط عليهم السكر ونضربهم بالمضرب الكهربائي لحد ما تبقى عامله زي الكريمه زي دي كده



طبعا ما تركزوش فى الكميات الى فى الصور عشان مش هى نفس كميات المقدار


بعد كده هانجيب البيض ونحط عليه الفانيليا ونخفقه بره الاول وبعد كده نضيفه للخليط السابق ونخلط تاني بالمضرب لحد ما يبقى الخليط متجانس وبعدين نزود اللبن الحليب ونخفق برضه


وهايبقى شكلها كده


بعد كده نروح على المواد الجافه



الى هى الدقيق والكاكاو والبكنج بودر ونلخبطهم على بعض كويس وبعدين ننخلهم عشان ما يبقاش فيهم تجمعات (كلاكيع يعنى) زي الى فى الصوره دي


بعد ما ننخلهم نبدأ نرجع للخليط السابق ونزد عليه شويه شويه ونقلب يستحسن نقلب بالمعلقه على طريقة دائره ونصف قطر وبالرااااااحه عشان الهوا ما يخرجش منها


بس لو عامله كميه زيي انا كده ممكن تستخدمي المضرب بس على الهادي جدا

وبعد الخلط هايكون ان شاء الله شكلها كده


لاحظي شكل العجينه وسمكها عشان تطلع معاكي كده




بعد كده هانولع الفرن ونعمله على درجة حراره من 170 الى 200 ونسيبه يسخن ونروح بقى نجيب الصنيه


ونبطنها (ندهنا سمن خفيف اوي ونرش عليها دقيق خفيف وبعدين نقلب الدقيق الباقي ونصب الخليط فى الصنيه الوسط دي ونفرد فيها العجين بالراااااااااحه يعنى نميلها يمين وشمال لحد ما تتفرد (عشان ما نطلعش منها الهوا)




وممكن نعملها فى قالب كب كيك زي ده كده




بس ما حدش يشتري النوع الى زي القالب بتاعي عشان انا اتخميت فيه وطلع مش حلو



بعد ما نسيبها فى الصنيه حوالي عشر دقايق يكون الفرن سخن وبقى تمام


نحطها فى الفرن واوعى واياك وهاتضربي لو فتحتي الفرن عليها فى اول عشر دقايق ويا حبذا ربع ساعه


بعد عشر دقايق بتهدي الفرن ل 150 درجه وتسبيها كمان حوالي ربع ساعه وبعدين تطلعيها


يا اما بسكينه نضيفه وتحطيها فى قلبها لو طلعت من غير عجين تبقى كده استوت


يا اما بايدك وفى وسط الكيك واتكي عليها لو ردت لفوق تاني تبقى استوت كويس لوما ردتش وصوابعك علمت لتحت يبقى لسه شويه



ولما تستوي تطلعيها وتسبيها فى القالب او الصنيه ربع ساعه تستهدى وبعدين تقلبيها وتقطعيها او تزوقيها لو هاتعملي تورته او اي حاجه تحبيها


ويطلع بقى زي الى في الصوره الى فووووووق دي


والف هنا والى هاتالف من عندها اي حاااااااجه هاتضرب اعملوها زي ما انا قلت بالظبط من غير اي فزاليك وهاتطلع حلوه


والى يجرب يقولي يا بنات


والى تعرف فيكم موقع تمبت حلو تقولي عليه عشان عايزه اعمل نيو لوك للمطبخ
















الأربعاء، 25 نوفمبر، 2009

الفتــة.. الفتـــة .. الفتـــــــــــــة .. كل سنه وانتم طيبين


السلاااااااااااام عليكم يا بشر

كل سنه وانتم طيبين

وعيد اضحى سعيد يارب عليكم وعلى كل حبايكم ويعوده عليكم وانتم بخير وصحه وسلامه ياااااااااااارب


طبعا طبعا ملاحظين تطنيشى العظيم لهذه المدونه الغاليه

كنت تعبانه يا وحشين وما حدش فيكم طبخلي حلة شوربة خضار وجه يزورني مع انى طابخالكم ومهنيااااااااااكم

يلا مش مهم طبيخكم وحش اصلا


النهارده بقى طبعا الشيء لزوم الشيء


العيد الكبير واللحمه بقى هاتبقى ماشيه فى عروقكم انا عارفه

وعليه قررنا نعمل فتتتتتتته بالخل والتوم استعدادا لليوم العظيم بتاع اللحمه

وقلت اعملهالكم من دلوقتي عشان تعملوا حسابكم عليها وعشان جايز ما افضاش بعد كده

المهم بلااااااش رغي


الى المطبخ


اولا الفته بتاعتنا المصري يا رجاله

بتتعمل المفروض بعيش رقيق زي العيش الفلاحي كده لكن يعنى الى ما عندوش عيش فلاحي يعمل ايه ينتحر


لا لا طبعا لسه عايزينه

يجيب رقاق ويشتغل معانا
هانعمل ايه بقى يا حلوين

اول حاجه هانجهز التقليه بتاعة الفته هى دي اهم حاجه فى المونطقه

هانقشر اربع خمس فصوص توم كده حلوين حسب الكميه بتاعتك بقى الى هاتعمليها

وبعدين نفرمهم او نهرسهم المهم نفتري عليهم يعنى

ونكون مجهزين عصير طماطم


ونروح على الحله نحطها على النار وفيها نص معلقة سمنه ولما تسخن نحط التوم ونحمره لما يااااااااادوب يصفر

ما تحمريهوش اوي عشان بيمرر بسرعه

وبعدين اول لما يصفر تحطي عليه حوالي اربع معالق كبيره خل ووراهم على طوووووووول عصير الطماطم قولي 3 كوبايات

بسرررررعه كل ده عشان ما يتحرقش التوم وابقى هدي النار وانتى بتحمري التوم


ونسيبها بقى تغلي كويس لحد ما تتسبك صح وتتقل كده وتبقى ميت فل واربعتاشر


ونسيبها بقى تتسبك ونروح نعمل الفته


هانجيب الرقاق او العيش سيان ويفضل ان العيش (الخبز ) يكون ناشف


هانكسر العيش ده او الرقاق لقطع صغيره يعنى زي الصوره دي كده

وبعدين نحمره فى سمنه لحد ما يبقى لونهم احمر زي الصوره الى فوق دي كده احمر وردي كده


وممكن نحمرها على البوتجاز من فوق بس نستمر فى التقليب ونحط سمنه كفايه عشان ما تبقاش واحده وواحده

اووووو وده الاسهل والاحلى والاخف
نقلب السمنه على الرقاق او العيش ونكون اصلا مولعين الفرن ونحطها فى الفرن تتحمص مع السمنه وطبعا كل خمس دقايقه كده نبص عليها ونقلبها برضه عشان ما تتلدعش


وبعدين لما تتحمر وتبقى تمام التمام


نكون مجهزين شوربة بقى متينه متينه اخر حاجه متينه اي سمينه


(وخلوا بالكم اموت انا واتجنن من الى بيملوا الاوضه مايه تبقى شوربه دي )


اللحوم لازم الاول تتحمر قبل ما تزوديها مايه وكمان توطي عليها لما تسرد مايتها كلها وبعدين تحطي مستكه وحبهان ولوري وبصله صغيره وتفضل تقلبي لحد ما تتحمر كويس ومايتها تنشف وبعدين تحطي مايه مغليه عليها


سيان فى ذلك الفراخ واللحمه مش تعملوا شويه ماية على اللحمه تبقى شوربه وبعدين تقولوا الفته بتاعة صبرني طلعت وحشه

المهم بقى نجيب الشوربه المتينه ونزود بها العيش الى حمرناه وهو على النار


هحاول احط مقدار عشان ما تبوشوش الدنيا ممكن لو محمره حوالي كوبايتيين عيش مكسر يعملوا طبق زي الى فى الصوره ده

تحطي عليهم كوبايتين شوربه ولو لقتيها لسه ناشفه شويه زودي حبه صغيرين المهم تبقى شكلها زي الى ف الصوره دي كده


طبعا يادوب هانزود الشربه وفى خلال 3 دقايق هاتكون اتشربها العيش تمام ونغرفها بقى فى طبق كده زي الصوره الى فوق

وبعدين نحط على وشها من فوق رز ابيض او بشعريه لو حبيتوا نو بروبليم


وتفردي عليها طبقة الرز

وبعدين نرش عليها من فوق التقليه بتاعتها الى عملناها فوق دي وتبقى شكلها كده زي الى فى الصوره دي



سامعه اصوات مغرضه بتقول اماااااال فين اللحمه ؟؟

اللحمه اختفت فى ظروف غامضه

نيهاهاهاها

لا مش فاكره بصراحه انا يومها ما صورتهاش باللحمه ليه اصل الصوره دي من زمان

بس اللحمه بقى يا اما تحطيها على وش الفته وتسقيها تقليه كمان زي الفته


او تحمريها وتحطيها على الوش بس


او تحمريها برضه وتقدميها معاها بره


اي حاجه بس هى تيجى اللحمه


بس خلااااااااااص والف هنا يا كتاكيت واي خدمه




وعلى الله اشوف واحده فيكم استسهلت وما عملتش الشوربه زي ما انا قولت

والله الله الله بقى

لو الشوربه دي تحطي معاها عضمه بنخاعها

وتطلعي النخاع وتحطيه على وش الفته
وتتاكل سخنننننه مووووووت



اؤكد لكم ان الى هياكل طبق الفته ده قدامه 3 ايام على ما يقدر يستوعب ايه الى حصله


ههههههههههههههههههههههههه

كل سنه وانتم طيبين يا حلوين ويارب عيد سعيد عليكم

والى هايعمل الفته بتاعتي وما يجيش يقولي طلعت ايه مش هسامحه طوووووول عمري قلبي ووش رجي غضبانين عليه




الأحد، 1 نوفمبر، 2009

كشري اصفر



السلام عليكم


النهارده يا جماعه هاعملكم اكله بقى حرشه عشان انا دلعتكم كتير بصراحه


وهى الكشري

ولكن مش الكشري المصري المعروف الى بيتعمل بالعدس البنى


كلا البت ده كشري اصفر بعدس اصفر


وعمايله سهله سووووو ماتش


هانحتاج كوباية ونص ارز مصري وكبايه ونص عدس اصفر او برتقالي يعنى


انا باحب انقع الرز نص ساعه قبل ما اخلطه على العدس عشان الرز لو مش منقوع بياخد سوى اكتر من العدس بالتالي العدس بيستوى اوي ويبقى الكشري معجن


الاول هاننقع الرز نص ساعه وبعدين نخلص عليه العدس ونغسلهم كويس وبعدين نحط 2 كوب ماء عليهم ومعلقة ملح كبيره و3 معالق زيت

ونحطهم على النار


بعد عشر دقايق تقريبا هايكونوا غلوا وبدأت المايه فيهم تنشف يتشربها الرز والعدس


نهدي النار عليهم اوي وياريت نحط صاجه تحت الحله ونسيبها لمدة ربع ساعه تقريبا وبعدين بظهر المعلقه ونقلب الكشري بحرص عشان الحله كلها تبقى سوى واحد


وبعدين نغطي عليها ونسيبها حوالي ربع ساعه كمان يعنى المهم لحد ما نلاقي الرز استوى


وده بيكون شكله بس معلش الصوره طلعت اي كلام




بسسسسسسس كده


الكشري ده بقى عندنا مش بيتعمل لواحده كده


لاااااااااا كلا البت

لازم تفضي واقفه قدام البوتجاز ساعتين كده تقلي حاجات


بتنجان مقلي وففل مقلي وبطاطس مقليه وبيض مسلوق ومتحمر


زي الطبق الى فوووووووق ده كده


وكمان سلطه خضرا ومخلل


طبعا مش لازم تعملوا كده ممكن صنف واحد او صنفين بس


لكن احنا بنعمله كده


والف هنا يا رب


والى يجرب يقووووووووولي


نوره معيشاكي اهو مصري مصري



الأربعاء، 21 أكتوبر، 2009

اصابع الجلاش


السلااااااااام عليكم


معلش يا جماعه والله المطبخ الواقعي كان مستولي عليا شويه اليومين الى فاتوا على الدراسه والمذاكره بقى

لا مش انا الى باذاكر ياريت كانت بقى اسهل

ده ولادي


انا قلت بقى من زمان ما عملناش حاجه حلوه فاخترتلكم حاجه سهله وخفيفه وجميله


وهى اصابع الجلاش بالمكسرات او الفول السوداني


اولا طبعا هانجيب جلاش يكون طازه او مجمد مش مشكله المهم يكون طري


لو مجمد فككيه فى معزل عن الهواء يعنى ما تطلعيهوش من الكيس الا لما يفك فعلا ووقت الشغل


وهانجيب فوطه نضيفه ونغطي بيها ورق الجلاش واحنا بنشتغل عشان ما نيشفش من الطروف ويبوظ


هانجيب نص كيلو جلاش

وهياخد حوالي نص كوباية سمنه او زبده (ياريت بلدي )

و للحشو بقى زي ما تحبي ممكن مكسرات مجروشه وممكن خلطه زي الى انا باحبها دي

فول سوداني وزبيب وجوز هند وعليهم شويه قرفه او فانيليا زي ما تحبي


وهنحتاج شربات (قطر او شيره ) بس خفيف شويه ما نعقدوش اوي هنحتاج حوالي كوبايه شربات واحده او كوبايه ونص لو بنحب الحاجه سكر زياده


الى العمل بقى


هانجيب ورقتين جلاش ونفردهم كده قدامنا زي الصور دي ونحط معلقة كبيره من الحشو او نزود شويه ونفردها بعرض الورقه زي الصوره دي تمام



وبعدينناخد الطرف بتاع الورقه الى قدامنا ونطويه على الحشو بادينا الاثنين كده نساويه ونبرمه ونحاول بقدر الامكان ان تكون اللفه محبوكه كويس عشان تبقى ماسكه نفسها ونبرمها بادينا الاثنين فى نفس الوقت لحد ما تتلف لاخر الورقه


ممكن بالفرشاه كده ندهن الورقه قبل ما نلفها بالسمن السايح لكن يعنى لو كنتى اول مره تلفي جلاش كده بلاش لحد ما تتمكني من اللف ونبقى نرش السمن فى الاخر زي ما هانشوف

بعد ما نلف ورقتين الجلاش ننقلها بالراحه على الصنيه ونفضل نكرر ده لحد ما تخلص الكميه وتكون شكلها زي كده

بعد كده هانقطعها تقريبا طول كل حته خمسه سم وطبعا رصهم جمب بعض كده بيخليى تقطيعهم سهل جدا مع بعض

وبعد كده هانرش عليها السمنه بالمعلقه ونحاول نرش فى مكان القطع عشان السمنه تدخل بين الطبقات

زي الصوره دي كده



بعد كده هاندخلها الفرن بتقعد حوالي ربع ساعه بالكتير حسب سخونة الفرن عندك

وخلي بالك الفرن ما يكونش عالي عن 200 عشان ما يتحرش من فوق

وبنطلعه لونه اصفر دهبي جميل


وبنسقيه وهو سخن والشربات بارد ونسيبه فى الصنيه لحد ما يبرد وبعد كده نطلعه ونقدمه زي كده





وبالهنا يارب


يا لا بقى على المطبخ سريعا و وروني الشغل الجامد موت




الثلاثاء، 13 أكتوبر، 2009

طاجن المسقعه



السلاااااااام عليكم


اهلا بكم فى مطبخنا السعيد


اه سعيد فى مانع ؟؟


المهم زي ما انتم شايفين وعنيكم مزغللين على طاجن المسقعه الى فوق ده


عزيزتى نوره الى ما نقدرش ناخرلها امنيه مصراويه ابدا


قالتلها انها سمعت عن المسقعه وعايزه تجربها وها هي المسقعه بشحمها ولحمها وبتنجانها


يلا الى العمل


البتنجان الايام دي فى السوق عادي مش عارفه المفروض يبدأ يختفي بس هو فى السوق وحلو كمان


يلا هو احنا نقدر نستغنى عن البتنجان


طبعا لو قولنا هانعمل كيلو بتنجان مثلا


هايكون حوالي الكميه الى قدامكم دي هانقشره (وفى ناس مش بتقشره مش مشكله ) ونقطعه


انا باقطعه بالطول زي ال في الصوره ده عشان بيقولوا كده بيشرب زيت اقل


بعد كده هانقلي الباذنجان فى زيت طبعا يكون سخن بس اول ما نحط الباذنجان نهدي النار عليه شويه عشان يستوي وفى نفس الوقت ما يتحرقش

ويطلع لونه اصفر وحلو كده بعد ما نخلص الباذنجان وقليته هانحطه على ورق كلينكس عشان يشرب الزيت


والحقيقه انا باعذبه شويه زياده واحطه فى مصفاه ومافيش مانع اكب عليه كوبايتين مايه سخنه بتغلي فينزل اكبر كميه ممكنه من الزيت


ونسيبه يصفى ونروح نعمل شغل تاني


هانجيب بصله ونقطها جوانح (نص دائره او ربع دائره) او حتى نفرمها فى المفرمه زي ما نحب

وندعك البصله بملح وفلفل


وبعدين هانقطع حبة فلفل رومي مكعبات اخضر أو الوان او الاثنين عادي زي الى فى الصوره ده


وكمان حبايتين طماطم ونقطعهم مكعبات


و3 قصوص ثوم مهروس

خلا ص كده جاهزه كل حاجه


نروح على الطاسه الجميله دي ونحط معلقة زيت واول حاجه نحطها البصل ونقلب لحد ما يدبل شويه بس


وبعدين نحط التوم




ويادوب ثواني تقليب عشان التومه ما تتحرقش ونزود بقى الفلفل وبعدها دقيقتين ونحط الطماطم ونقلب برضه









بعد كده بقى عندنا اختيارات كتيره

فى ناس تحب للمسقعه صلصه تقيله شويه فى الحاله دي هانحط حوالي كوبايتين عصير طماطم على الخليط الى فات ده


وممكن كمان نعمل المسقعه باللحمه المفرومه فنحط لحمه مفرومه برضه قبل ما نحط عصير الطماطم ونقلبها 3 دقايق ونسيبها شويه وبعدين نزود عصير الطماطم


المهم بعد ما نزود عصير الطماطم او الشوربه (مرقه ) او حتى مايه مش مشكله هانسيب الخليط ده يغلي شويه لحد ما يتسبك شويه





وبعد كده بقى نروح على الطاجن الجميل بتاعنا ده ( وممكن نعمله فى صنيه او قالب بايركس مافيش مشكله)

بس الطاجن ده بيبقى له طعم خاص مع الاكل


ونحط بقى شويه من الخلطه بتاعة الطماطم وطبقة بتنجان وبعدين خلطه الطماطم وبعدين باذنجااااان وهكذا لحد ما نخلص الليله كلها ويبقى شكلها كده






بعد كده بقى ندخلها الفرن و نسيبها بس حوالي نص ساعه وهاتطلع زي الطاجن الى فوق الى وشه احمر وشكله يجوع ده


وانا صايمه عيب كده والله


المهم ممكن بقى لو انتى عامله لحمه قطع مستويه جاهزه تحطيها على وش الطاجن قبل ما يدخل الفرن وبتطلع شكلها وطعمها جميل جدا


وممكن كمان يكون عندك عصاج جاهز فتحطيه على وش الطاجن قبل ما يدخل الفرن برضه بيعمل شغل ميه ميه


بس كده عايزين شغل بقى


والبنات المبتدئين عايزه تجارب بقى فى البشر

ههههههههههههههههه







السبت، 3 أكتوبر، 2009

نودلز بالدجاج والخضروات


سلاااااااام عليكم

النهارده يا جماعه هانعمل اكله سهله اوي وجميله اوي
ولأجل خاطر عيون الجميله ريم

بسكوته يا اخواتي البت دي


هى قالتلى ان جوزها وولادها بيحبوا النودلز وعليه فقررنا استعجال النودلز ولو ان انا كنت ناويه لكم على كشري بس زي بعضه نمشيها نودلز


الاكل بتاع النهارده ده بالكتييييييييير نص ساعه يكون خلصان


قدامي على الشغل بقى


هنعمل كميه تكفي تقريبا 3 اشخاص
نحتاج 2 باكيت نودلز (ممكن نجيبه بالدجاج الخضروات اي حاجه تمشي مع الدجاج )


وكمان صدر فرخه مخلي ومقطع مكعبات


فلفل ملون (اخضر اصفر ا حمر ) ونقطعه مكعبات


جزره كبيره مقطعه مكعبات


وأي مكونات تانيه بنحبها
ممكن ماشروم او بسله


اول حاجه بقى هانعملها هانقطع الفراخ كده


ونروح على طاسه على النار ونحط نص معلقة سمن او زيت


ولما يسخن هانزل الفراخ عليه ونقلب وبعدين نحط بقى التوابل الى نحبها

احيانا بتكون النودلز معاها كيس توابل خاص كده انا باحطه على الفراخ بقى ومعاه اي حاجه احبها

وساعات احط كاري وسماق بيبقى حلو برضه

هانحط التوابل ونقلب ونسيبها على النار شويه حوالي عشر دقايق بس هاتكون بدأت تستوي وتكون كده


انا بقى على ما صدور الدجاج تستوي ما نقفش فاضيين


نكون حاطين على النار حوالي 3 كوبايا مايه ولما يغلوا نسقط فيهم النودلز ويادوب 3 دقايق ونطلعها عشان ما تبقاش مهريه

ونصفيهافى مصفاه كده ونحط عليها مايه عشان ما تعجنش برضه من السخونيه ونسيبها تصفى

ونرجع للفراخ بقى هاتكون بدأت تستوى نحط عليها الجزر ونسيبه خمس دقايق كده يادوب هو كمان يبدأ يستوي ويكون كده
وممكن هنا بقى نحط مع الجزر بسله او مشروم




وبعدين فى الاخر بقى نضيف الفلفل الالوان انا ما كانش عندي النهارده الا احمر ماشي الحال

وممكن كمان نزود مكعبات طماطم على خفيف




ونقلب وطبعا نحط ملح مع الحاجات دي ونسيبها على النار يادوب 3 دقايق


لو كنا هناكل خلاص دلوقتي حااااالا


يبقى ناخد النودلز المسلوقه وننزلها على الفراخ الى عملناها مع الخضروات ونقلب بقى بالراحه عشان ما نهرسش الحاجات


عارفين الشيفات الصينى الى بيجبوهم يقلبوا الحاجات كده لفوق والحركات دي


بس ما تعملوش كده مش عايزين نولع فى البيت النهارده


هانقلبها يادوب كده تسخن وتاخد صوص الفراخ يادوب دقيقتين


وتكون جاهزه خلاص للاكل وتكون زي الصوره الى فوق دي


وطبعا مع اضافة بسله وفلفل اوان بيبقى الوان الطبق تحففففه


مافيش اسهل من كده بقى


يعنى نعمل ايه بقى عشان الشت تتحرك من مكانها


مافيش غير اننا ننجد الشلت بقى وطاخ طاخ طاخ


ورونا الهمه ويارب تعجبكم



الخميس، 24 سبتمبر، 2009

تورتة الفراشه (فى عيد ميلاد احلى فراشه حنين القلب )










التورته دي خصيصا مخصوصا عشان حبيبة قلبي حنين القلب


الى عيد ميلادها النهارده وانا اخترت لها تورته الفراشه الجميله دي عشان ان شاء الله تكون سنه الوانها مزهزه كده مع حنين الصغيره ان شاء الله


كل سنه وانتى طيبه يا حنين وعقبال ميت سنه سعاده وهنا يارب



يلا بقى عشان اعلمكم تعملوا التورتايه دي عشان كلكم تعملوها وتجبوها لحنين




اولا احنا هنحتاج لاثنين كيكه مدوره زي دي كده



ممكن نعمل كيــــك عــــادي من المقدار بتاعي الى عملناه قبل كده (المقدار الواحد هايعمل كيكتين )



وممكن نعمل كيك اسفنجي لكن انا مش باعمله كتير بصراحه بافضل الكيك العادي



هانجيب الكيك ونشق كل كيكه فيهم اثنين بالعرض بحيث تبقى طبعتين يعنى عشان تدينى تورتايه من اربع طبقات وممكن نسيبها من غير ما نشقها مش مشكله



هانجيب بقى الكريم شانتيه ونحط طبقه كيك وطبقه كريمه لحد ما يخلصوا الاربع طبقات بسلام



وبعدين نغطيها كلها بالكريم شانتيه



لحد لما تدينى تورتا يه مدوره متغطيه بالكريمه البيضا تماما

معلش نسيت اصور الخطوه دي

المهم بعد كده بقى هانعمل ايه

نقسم التوراتايه دي بالسكينه الكبيره نصين بالظبط

وبعدين نلف النصين بحيث ان حواف الصنيه الاثنين يكونوا للداخل ولامسين بعض

شوفوا كده الصوره دي عشان تتخيلوا الوضع



ايه الى فى النص ده

انا كنت عامله كيكه تانيه صغيره كده قطعت منها جزئين بيضاوين عشان اعمل منهم راس الفراشه وجسمها وحطيتها جمب الاجزاء الكبيره كده وغطيتها بالكريمه برضه

ينفع من غير كيك يعنى نعمل ده بفواكه مثلا هاتبقى حلوه برضه

بعد كده بقى هانبدأ اول حاجه بكيس الكريمه وقمع الورده نعمل حرف للكيكه عالي عشان نديها شكل الفراشه فعلا ونحدد الشكل بتاعها

ولو حبيتوا نبقى نخطي الجوانب قبل ده بمكسرات مجروشه او جوز الهند او مش مهم خالص

وبعد كده بقى انتى وزوقك وفنك كده وتعملي جناحين الفراشه متماثلين يعنى شبه بعض

وطبعا انا مزينه فوق بتفاح وخوخ ومشمش وده الى كان عندي يومها

وطبعا ممكن يكون فى فاكهه بالوان تانيه كتير تعمل اشكال مذهله يعنى

بس كده وتكون جاهزه

كل سنه وانتى طيبه يا حنين وياااااااارب دايما منوره البلوج كده وعقبال ما تقومي بالسلامه ونطمن عليكى

والى يجرب يفرج عليها حنين ويجبلي حته

ههههههههههههههه




الخميس، 17 سبتمبر، 2009

الغريبه


احلامك اومر يا ريم


الى المطبخ بقى بدون رغي عشان انا بانضف الشقه مش فاضيالكم


وفاضل ستاره واحده فيكم تكون طويله تيجى تعلقها عشان انا ايدى واجعتنى بقى


المهم


المقادير


كوبايتين سمنه بلدي جاموسي (لونها ابيض يعنى) = نصف كيلو سمن


كوباية واحده سكر بودره ابيض برضه


والدقيق بقى حسب ما تاخد هو المقدار ده ياخد حوالي 3 كوبايات دقيق


وبياض بيضتين


طبعا ممكن نستعمل اي سمن بس الغريبه بالذااااات لو ما اتعملتش بسمنه بلدي بتبقى طعمها مش حلو

وكمان السمنه الى لونها اصفر بتخليها تطلع صفرا فمش بتكون زي الغريبه الى فى المحلات بس عادي هايطلع طعمها حلو


الطريقه


السمنه البلدي بقى تكون جامده شويه بس مش اوي اوي يعنى ممكن نحطها فى التلاجه ربع ساعه قبل ما نشتغل لو بقت جامده اوي نسيبها تسيح شويه


هانحط عليها السكر البودره ونضربها بالمضرب لحد ما تبقى شكلها زي الكريمه
ونكون مجهزين بياض بيضتين نضربهم بالمضرب كويس وبعدين نضيفهم على السمنه والسكر الى فاتوا دول
ونضربهم برضه هاتبقى زي الكريمه برضه بس خفيفه اكتر
زي الصوره دي كده وتدينا برضه علامة المنقار


بعد كده نبدا بقى نزود الدقيق شويه شويه ونقلب باطراف صوابعنا كده


يااااادوب العجينه تمسك نفسها وتسيب جدار الطبق الى بنعجن فيه عشان تبقى دايبه ونغنيلها ونقولها يا حلوه يا ناعمه يا غريبه


وتبقى عجينه لونها فاتح وطريه ز الى فى الصوره دي




بعد كده نعملها كور


ما نبططهاش هى هاتفرد لواحدها احنا نعملها كوره كاملة الاستداره ونرصها فى الصنيه وبعدين نزينها من فوق بقى يا اما باي نوع مكسرات (لوز مقشر بندق مقشر )

ونحط اللوزه مثلا نضغط ضغطه خفيفه علشان تمسك فى الغريبايه وكمان الغريبايه تتبطط سنه كده


وممكن من غير مكسرات مش هاتقول لا يعنى


معلش نسيت اصورها قبل ما تتخبز


هانحطها بقى فى الفرن الى حرارته حوالي 170 درجه

ومش بتقعد كتير يادوب عشر دقايق ويادوووب نلاقي حروفها بدأت تلون خفيف اوي نكون شلناها عشان احنا عايزنها تفضل بيضاء زي ما هى


ونسيبها فى الصنيه بس تبرد خمس دقايق


وبعد كده نشيلها فى علبه ونقفل عليها لحد ما نيجى نقدمها زي الطبق الى فووووووق ده


بس خلاص


قوموا بقى اشتغلوا ما تفرسونيش


والستاره اهي مش عاملاها الا لما حد فيكم يجى يعملها





الأربعاء، 16 سبتمبر، 2009

بسكويت النشادر



سلام عليكم


شلت شلت شلت


ولا واحده فيكم عملت حاجه


وجت قالت انا عملت حاجه وتفرحنياخس عليكم يا وحشين


ايه العيال المحبطه دولطب بلاش الحريم يأسنا منهم

حد من الرجاله طيب جرب

طب بلاش حد من الرجاله خد الطريقه اداها للمدام عملتها هى افتحوا نفسي يا رخمييييييييين


ما علينا

قدامي بقى على الشغل يا رخمين برضه


هانعمل النهارده بسكويت النشادروالى مش عارفه اشمعن هو بالذات الى بيعملوه فى العيد بصراحه ما البسكويتات كتيره اشمعن ده

يلا بلاش رغي


المقادير

1 كيلو دقيق

كوب وربع زبده او سمن

كوبايه ونص سكر بودره
4بيضات +الفانليا

معلقه كبيره نشادر

معلقه صغيره بكنج بودر


الطريقه

اولا: الزبده لازم تكون بدرجة حراره الغرفه يعنى تكون طريه مش جامده


هانحط الزبده فى الطبق الكبير الى هانشتغل فيه وعليه السكر البودره زي كده

ونضربهم بالمضرب لحد لما تبقى عامله زي الكريمه زي كده
ولما نشيل منها المعلقه تكون العجينه طالعه كده شكل المنقار (هىاسمها علامة المنقار )


ونكون مجهزين البيض ضربنا كويس بالمضرب فى وعاء تاني ومعاه الفانيليا ونصبه على العجينه الي فاتت دي ونضرب تاني بالمضرب

لحد برضه ما هاتدينى عجينه شبه الكريمه بس طريه شويه عن الى فاتت



وبعد كده نكون مجهزين الدقيق منخول وضفنا عليه البكنج بودر والنشادر وخلطناهم كويس

ونضيف الدقيق شويه شويه لان ممكن العجينه ما تاخدش الدقيق كله هانفضل نزود الدقيق ونقلب العجينه بالرااااااااحه حتى لو بايدينا بس تبقى باطراف صوابعنا بس علشان ما نكتمش العجينه

لازم العجينه تجمد وتتجمع على بعضها وتسيب جدار الطبق معلش نسيت اصور العجينه بعد ما خلصت


نيجى بقى بعد كده لتشكيل العجينه


المحلات بيعملوه احيانا بقمع مخصوص للبسكويست الحقيقه انا ما لقتوش السنه دي بس الراجل قالي انه كان عنده وخلص يعنى فى امل اجيبه ان شاء الله يوما ما


الطريقه التقليديه هى المفرمه اليدوي دي القديييييييييمه دي لها اشكال بتركب عليها وبتطلع البسكويست عامل زي الى فى الصوره الى فوق دي


انا كان عندي قطع زمان على مفرتي المولنكس بتعمل برضه نفس شكل البسكويت ده ممكن تستخدميها لو عند


وممكن تشكليه باي شكل تحبيه وباي قطاعه تحبيها


بس اعرفوا ان العجينه بتكون ناعمه وطريه جدا وصعبه النقل بعد التشكيل


ده شكل البسكويت بعد ما شكلناه ورصناه فى صنية الفرن









وهانحطه فى فرن حامي يعنى حوالي 200 درجه

وبياخد تقريبا عشر دقايق الصنيه الواحده لاننا مش عايزينه يحمر اوي يادووووب نتفخ وياخد لون فاتح

ويكون زي ده كده

والف هنا ليكم وكل سنه وانتم طيبين


اه كل ما تطلعي صنيه طبعا تسبيها خمس دقايق وبعدين تطلعي البسكويت بالمقصوصه كده بالراحه وتكونى مجهزه علبه كبيره او حله كبيره بس جواها كيس بلاستك وترصي البسكوت بالراحه لحد ما تخلصي الكميه بتاعتك كلها وتسبيه ساعه او ساعتين لحد ما يبرد وبعدين تربطي عليه الكيس او تقفلي العلبه البلاستيك كويس اوي
لانه لو فضل فى الهوا هايرطب ويقطم وما يبقاش مقرمش
والبيتى فور برضه كده


بكره انشاء الله الغريبيه ربنا يسهل


اتحركوا بقى خنقتوني على فكره