الأربعاء، 25 أغسطس 2010

تورتة ايس كريم



ايس كريم فى رمضاااااااان يا مدام

كنت باحب الاعلان ده مش عارفه ليه ما عادش بيجى 

الحقيقه رمضان السنه دي عايزنا نقعد اساسا جوه التلاجه بتاعة الايس كريم

انا ولادي تقريبا ادمنوا الايس كريم من اول رمضان لازم كل يوم يبقى فى اي ايس كريم

طبعا هو الايس كريم عشان نعمله فى البيت هو سهل اوي  هاقولكم الطريقه بسرعه 

بصوا انا هاعملكم نكهة الفانيليا واي نكهه تانيه تقدروا تزودوها على المقادير عادي جدا

هانحتاج 2 كوب حليب  ومعلقتين كبار سكر  و معلقتين كبار نشا و وكوباتين كريم شانتيه  وطبعا فانيليا  عشان النكهه

هانحط الحليب على النار وندوب فيه السكر والفانيليا كمان   ولما يدفى ناخد منه شويه لبن صغيرين ندوب فيهم النشا ولما يغلي الحليب نزود اللبن بالنشا بسرعه ونقلب كويس اوي عشان ما يكلكعش لو كلكع منك اعمليه بمضرب الكهربا هايفك على كول

طبعا ده كأننا بنعمل مهلبيه بس سايبه شويه

هانسيبها بقى تبرد خااالص ونحطها فى التلاجه كمان  لما تسقع كويس

وهانكون مجهزين الكريم شانتيه  ونحطها عليها ونضرب بالمضرب لما يختلطوه تمام وبس على كده حطيها فى الفريزر

اي نكهه تانيه بقى زي المانجه مثلا طبعا هانستخدم مانجه طبيعى ودى احلى حاجه فى الايس كريم الى بتعملوا فى البيت  انه كل حاجه بتبقى طبيعى

الشيكولاته ممكن تستخدمى الكاكاو الخام بس تبقى تزودي السكر شويه فى الحليب وممكن تستخدمي شكيولاته خام بس هاتسيحيها فى حمام مايه وتخلطيها مع المهلبيه  قبل ما تبرد وتحطيها فى التلاجه لحد ما تبرد

الفراوله كده برضه
والنسكافيه ولا اسهل دوبي معلتين نسكافيه وضفيهم على الخليط

والليمون  والكراميل وكل نكهه تحبي تعمليها عادي

اما بالنسبه للحريم الشلت حبايبى فممكن تجيبى  الايس كريم البودر وتعمليه  او اشتري الايس كريم جاهز بقى ونقفل المدونه دي خالص
ههههههههههههه

بالنوسبه بقى لتورتة الايس كريم الى فوق دي عشان انا باحبها اوي

هى انا فى الغالب باعملها قوالب عشان تتقطع شرايح زي الصوره دي كده بتبقى اسهل للعيال

هاتكوني مجهزه صنية كيك حلوه كده تعمليها انتى بلاش الكسل ده

وتقسميها من اثنين من العرض يعنى زي التورته كده وطبعا تراعي النكهات يعنى لو الكيكه شيكولاته تحطي ايس كريم شيكولاته كده يعنى
وقبل ما تحطي ا لايس كريم فى الفريزر بقى

هاتجيبص صنيه وتبطنيها ببلاستيك وتحطي طبقه من الكيك وبعدين تصبي عليها الايس كريم الى عملتيه وهو لسه سايل وبعدين تغطيها بالطبقه التانيه من الكيكه وتتكي بالراااااحه اوي عشان يبقى متساوي وتدخليها الفريزر بقى اربع خمس ساعات كده حسب ما تجمد

وتطلعيها لما تكون جمدت تمام تسبيها بره خمس دقايق قبل ما تقطعيها  وبعدين تقطعيها انا هنا فى الصوره حاطه عليها صوص شيكولاته طبعا تقدري انتى تحطي اي صوص يعجبك

وطبعا ممكن تستخدميها تورتايه عاديه فى اي عيد ميلاد بس طبعا تعملي حسابك انك تعطيها الفنش التزيين النهائي يعنى وقت التقديم بالظبط عشان الايس كريم ما يسيحش

وبالهنا والشفا يا حلوين  ورمضان كريم

الأحد، 15 أغسطس 2010

بطه محشية



 كان نفسي انزل كل يوم صنف بس مش قادره يا جماعه والله رمضان السنه دي مرهق جدااااا

حاسه ان انا فى صراع مع الزمن بالاضافه لان الواحد حاسس انه هايجيله جفاف من العطش والحر والميه الى بتنزل من الواحد فى المطبخ الى بافكر الغيه من الشقه على ما رمضان يخلص
ربنا يجعله فى ميزان حسناتنا جميعا يارب

المهم انا قررت النهارده ادلعكم بقى اخر دلع واعملكم بطه ايوه والله هى بشحمها ولحمها

بس بما انكم فقريين البطه دي صغيره وكمان مش بلدي  دى بطه بيضا   اه هى جت كده بقى ما تتامروش

يلا قدامي على المطبخ

الحقيقه البط الابيض ده بالذات ما ينفعش يتعمل عادي مسلوق فى الشوربه حيث انه سمين وريحة شوربته تطفش بلد معلش اصل انا يا اخواتي مش واخده عليه

هانجيب البطه وطبعا نغسلها بالملح والدقيق وننضفها تمام التمام  وبعدين هانتبلها طبعا ليكم تعملوا اي تتبيله تحبوها

انا هنا فى الصوره دي عملت التتبيله عباره عن ربع كوباية خل وبصله وكوباية زبادي أو لبن رايب  وعصير لمونتين ومعلقتين كاري   وملح وفلفل طبعا وانا باحب اضرب كله مع بعضه فى الخلاط وممكن ازود شويه مايه عشان تبقى سايله اكتر



وليكى طبعا تعمليها باي شكل واي تتبيله تحبيها هاتجيبى التتبيله بقى وتدلكى بيها البطها من بره ومن جوه وتسبيها في التتبيله  اربع خمس ساعات حبذا لو من على بيات  

بعد كده نعمل الحشو بقى  انا هنا حاشياها رز  وممكن طبعا تحشيها فريك او لسان العصفور او اي حاجه ايا يكن انا باحب اسوي الحشو الاول عشان ما يبقاش ني جواها لانى مش هاغمرها فى المايه هاتشوفوا دلوقتي

انا باحمر بصله واحط لحمه مفرومه او كبد وقوانص  او مش مهم خالص وبعدين احط التوابل برضه انا هنا حاطه كاري  عشان تبقى نفس الطعم
ولما تستوى الكبد والقوانص والبصله معاهم وتبدأ ميتها تنشف بازوزها مايه خفيفه

وباحط مايه للرز قليله شويه عن العادي عشان ما يبقاش معجن  باسقط الرز فوق الخلطه زي الصوره كده  وطبعا لما يستوي باطفي عليه واسيبه يبرد وبعدين احشي البطه
زي كده

بعدين نقفلها زي الصوره كده بخلة  او ممكن تخيطيها كمان مافيش مشكله  بس الخله اسهل اكتر من خله ممكن لحد ما تقفلي على الرز كويس

وحظكم الفقري برضه البطه دي لقيت رجليها الاثنين مكسورين حاجه مش ممكن انتم على فكره

المهم بعد كده  بقى نروح نسخن معلقة سمنه فى طاسه كبيره او صنيه  ولما تسخن كويس نحط البطه بعد ما نكون شيلنااي رز او بصل عليها من بره( بس ما ترميش التتبيله عايزاها انا )

نحمر البطه من كل اتجاه على اد ما نقدر عشان ده بيخلي جلدها يشد وما يتقطعش فى السوى  زي الصوره دي ..

بس ناخد بالنا لو بتعملوا بطه بيضا جلدها بيبقى ضعيف جدا وفعلا بيتقطع بسرعه واحنا محتاجين الجلد عشان شكل البطه يبقى حلو وكمان عشان تحمي اللحم ما ينشفش فى الفرن

اه هانحطها فى الفرن طبعا

المهم بعد التحمير  هايبقى شكلها كده

 هايبقى قدامنا حلين
يا اما هانحط عليها التتبيله تاني ونحطها فى صنيه ونغطي الصنيه بالفويل وندخلها الفرن ولو كانت بطه بيضا هتاخد ساعتين فى الفرن  تقريبا ساعه وهى متغطيه وساعها وهى مش متغطيه

ولو بطه بلدي اقل حاجه 3 ساعات حسب عمرها بقى ايوه ابقوا سننونها قبل الطبيخ هههههههههههههههههه


والحل التاني يا بهوات  تعملوا زيي كده



البطه والتتبيله فى الحله البرستو وتقفلوا عليها نص ساعه لو بطه بيضا وساعه لو بطه بلدي  ... وطبعا لو مافيش حله برستوا عادي بتحطيها فى حله عاديه على النار بس تزودي التتبيله كوبايتين مايه كل شويه بس ما تغمريهاش مايه عشان الرز الى جواها ما يعجنش  وطبعا هتاخد البطه البيضا حوالي ساعه  وشويه ونكمل سويها فى الفرن بقى


وبعدين تطلعوها بقى على الفرن مش هتاخد كتير ساعه بالكتير اوي 

 عشان بس تاخد لون نعمل ايييييييييه بقى

التتبيله الى كانت معانا دي ناخدها وعليها  معلقة صلصة و معلقة سكر .. ايوه ايوه

وده الى بيخليها لونها احمر ومقرمشه من بره زي الصوره الى فوق دي الى مش بتاعتي اصلا
ايووووه
 الصوره الى فوق دي  مش من عندي انا جايباها من على النت
عشان البطه الى انا سويتها عندي ما لحقتش اصورها والله اتاكلت بسرعه
ههههههههههههههههه
كنا اول  يوم رمضان وانا كنت خلاص على المغرب فى النزع الاخير وعلى استعدت وعيي بعد العصير كانوا الشعب قام بالواجب بقى
بس انا والله اخترت الصوره الاقرب للحقيقه يعنى
بتبقى طالعه كده فعلا والله

المهم نرجع للشغل يا رغايين مش معقول كده

وبعدين ناخد التتبيله دي او حتى لو شوية شوربه ونفضل كل عشر دقايق نطلع البطه نرش عليها من الخلطه دي شويه وندخلها الفرن تاني
لحد لما تحمر وتاخد اللون المطلوب

وطبعا البطه هاتكون استوت وبقت تمام  التمام

وبالهنا والشفا  محتاجه حلة محشي الصراحه وتبقى فى التمام 

اه نسيت اقولكم ينفع تتبعوا نفس الطريقه مع الديك الرومي
او حتى فرخه عاديه

والى يجرب يقولي وبلاش نداله
كل سنه وانتم طيبين يا حلوين




الأربعاء، 11 أغسطس 2010

جلاش مثلثات بالكاستر



معلش ما لحقتش النهارده اعملكم طبخه جامده

فقلت الحق اكلكم  حلويات بقى

الحقيقه الجلاش ده انا باحبه اوي اوي وكان نفسي اعمله النهارده
والطبق الى فوق ده شكله جوعني

بس ما حدش عبرني ولا جابلي جلاش

يلا بسرعه نشتغل عشان مش فاضيالكم الاكل على النار

اولا هانحتاج قولوا نص كيلوا جلاش

كوباتين كاستر او كريم باتسيير
كوباية سمن   او زبده

وكوباية شربات لونها وسط مش تقيله اوي ومش خفيفه وبارده


هانجيب الجلاش يا حلوين هو بيبقى مربع هانقطعه شرايط بالطول قول على ثلاثه او اربعه حسب حجم الورقه بتاعتك

وبعدين هناخد شويه الى هانشتغل بيهم والباقي نغطيه كويس بفوطه نضيفه او جوه كيس بلاستيك عشان ما ينشفش احنا فى الحر

 وهناخد 3 طبقات من الشرياط دي وهانفردها على صنيه زي الصوره دي كده ونحط معلقة من الكاستر او الكرييم باتسيير كده فى اول الشريطه فوق كده




وبعدين نطويها للجنب
 زي كده


ونفضل بقى ونكون بفرشاه دهنا باقي الشريط ده سمنه

ونقعد بقى نطويها على بعضها زي طريقة السمبوسك كده لحد ما يبقى شكله مثلث

زي كده


بعد كده هانشيلها نحطه فى صنيه مدهونه سمنه برضه

ولما نخلص الكميه نحط برضه على وشها سمنه من فوق

يعنى معلقه على كل مثلث تقريبا

وبس وندخله الفرن وبيطلع شكله كده

هانسقيه وهو سخن بالشربات البارد ونسيبه حوالي عشر دقايق بس يبرد شويه ويشرب الشربات

وبعد كده نقدمه فى طبق زي الي فوق ده وبالهنا والشفا

وكل سنه وانتم طيبين يا حلوين

الأحد، 30 مايو 2010

شطارة ستات ... ري فريش الاكل البايت

البوست ده يا جماعه مخصوص عشان خاطر استاذنا عصام ...احوال الهوى
عشان هو بيحب الافكار دي فقلنا نغرقه افكار بقى

شوفوا انا اعظم مشاكل حياتي المطبخيه خصوصا فى رمضان عشان العزايم وخلافه هو الاكل البايش  قصدي البايت
اه اصله بصراحه بيبقى تاني يوم تحس انه بايش كده ومالوش معنى
وما حدش يقولي الاقتصاد واطبخي على ادك والحركات دي
باعمل كل ده ولا مفر من الاكل البايت خصوصا فى  العزومات
وطبعا مهما حاولت اوزعه على أي ناحيه ساعات بيفضل برضه وحرام بجد رمي الاكل وهو سليم فانا بقى عادة باعمل ايه
اعادة  تصنيع
او يعنى الواحد ياخد الاكل يعمله ريفريش ويجيبه تاني

هاقولكم شوية افكار كده ان شاء الله تستفيدوا منها

* الكيك البايت: يمكن حفظه فى الثلاجه لايام او وضعه فى كيس بلاستيك او علبه محكمه الغلق وحفظه فى الفريزر لحفظه لمده اطول واستعماله فى عمل تورتة جيلى او شارلوت ( هانقبى نقولكم مقادرهم بعدين)

او يمكن تقطيعه او فركه وتحميصيه  فى الفرن واستعماله فى تشيز كيك
وممكن نعمل كده برضه فى البسكوت او الكيك الى طلع مش ناجح اوي برضه يشتغل عادي

* اللبن البايت او الزبادي القديم شويه:

من الحاجات الى ما باحبش ابدا ارميها أي لبن او مشتقاته
وهى اصلا ما تترميش ابدا دايما لها فايده معينه
سبحان الله

لو لبن راب عندك او اختبرتيه لقتيه هايروب سبيه يكمل روبان للاخر واعمليه جبنه قريش حتى لو كان سبق غليانه كمان مافيش مشكله  او حتى لو زبادي بايت كتير

و لوكانوا كميه بسيطه
ممكن تحفظيه فى كيس بلاستيك فى الفريزر واستعمليه فى صنع الكيك او البسبوسه او حتى سلطة الزبادي .( او اعملى اعصري فوقه لمونه وعملى به ماسك تفتيح وترطيب للبشره )

* قشر اللمون: بعد ما تعصري اللمون ما ترميش القشر ممكن تبشري منه بسيط اوي على اي تتبيله انتى عاملها بيدى ريحه حلوه. وكمان لما تخلصى شغل دلكي ايدك بقشر اللمون بيشير الروائح ( البصل بقى والتوم وكده ) وكمان بينعم ويفتح.

* الخضار الفريش: ما تسبيش حاجه فى التلاجه لحد ما تبوظ كل الخضار ينفع يتخزن فى الفريزر القلقاس والبسله   والباميا والملوخيه والباذنجان والفاصوليا  والبطاطس كمان ممكن تخزينها بس للقليه فقط هابقى اقولكم ازاي الا الكوسه بس دي ما بتنفعش لكن ممكن تقطعيها وتشوحيها وده يخليها تستنى عندك فى التلاجه يومين كمان زياده  اى حاجه تحسي انها هاتبوظ خزنيها فى الفريزر او صنعيها أي حاجه  زي مربى مثلا او عصير .
بواقي الفطير والجلاش : والرقاق كمان والسمبوسك والميل في واي عجينة رقيقه تنفع   نحمصها ونخزنها فى التلاجه لحد ما نعملها ام علي

* العيش الفينو البايت: طبعا احنا كل يوم بيفيض عندنا عيش فينو غير صالح للاكل نشفيه واحفظيه عندك لما تكونى كميه تستاهل الدوشه تكونى مشغله الفرن كسري العيش وحطيه فى الفرن خمس دقايق ماتحرقيهوش بعدين طلعيه اطحنيه فى المطحنه او الكبه حتى لحد ما يبقى ناعم واستعمليه بقسماط جميل
يمكن خلطه ببعض الدقيق الابيض واضافة البهارات والملح وفركه بقطع سمن صغيره ( بيثبت اكتر الى الاكل وانتى بتقليه) وحفظه فى الثلاجه.


* الموز المستوى جدا: اضيفى عليه كوب حليب ونص كوب ايس كريم يفضل بالحليب وقليل من السكر واعمليه فى الخلاط عصيير بيبقى تحفففففه.

*الارز البايت: تاني يوم اعمليه رز بالشعريه يرجع طازه تاني( حمري الشعريه عادي وضيفى عليها الماء حسب الكميه واول ما تبدأ فى تشرب الماء ويحدث ذلك سريعا اضيفى الرز وقلبي جيدا حتى يتم الاختلاط وهدي النار واتركيه على النار حتى يسخن جيدااااا.

* البتنجان والفلفل المقلي البايتين برضه : تاني يوم اعمليهم مسقعه

* السمك المقلي البايت برضه: تاني يوم اعمليه صياديه

* البحريات البايته عموما: ( جمبري كاليماري باكلويز كابوريا) اعمليه ارز صياديه
*أي لحوم بايته : برضه عشان اللحمه غليت يا اخويا ما ترميش ولا فتفوته ده احنا فى الاخر هانوزنها بميزان حساس زي الدهب
المهم اللحوم بقى تخليها عندك لو الفتره هاطول يعنى اكتر من يومين ياريت يبقوا فى الفريزر
وتطلعيهم وتعملي منهم بقى بيتزا مثلا
او كريب
او حتى تقطعي بصل وفلفل وطماطم وتشوحيهم على النار لما يقربوا يستوا وبعدين تقطعي اللحمه او الفراخ المستويه وتحطيها عليها وشوية توابل وتقليبتين كده على النار
وتعمليه سندوتشات وطبعا تضحكي على العيال وتقوليلهم عملالكم شاورمه طازه اخر حاجه


بس كفايه كده عشان مش فاكره حاجه تانيه الى مش فاهمه حاجه بقى تقولي والوصفات الى اتقالت فى النص دي وما سبقش لنا عملها ان شاء الله نعملها سوا بعدين بس ابقوا فكروني بقى 

ميرسي يا حلوين على حسن استماعكم ويارب ما اكونش صدعتكم وافدتكم 

...... ملحوظه رفيعه يا قوم ... انا سبق ونشرت موضوع زي ده بس طبعا انا اضفت عليه شوية حاجات  بس نشرته فى منتديات قبل عهدي بالمدونات ... اه احسن حد يشوف الكلام ده في منتدى يمين ولا شمال يقول ندى بتلطش موضوعات وتقرطسنا لا والنبى يا اختي ده من مطبخنا راسا اليكم
سي يو يا قطاقيط

الثلاثاء، 20 أبريل 2010

مربى الفراولة


سيداتي انساتي سيداتي   على راي ابو حفيظه

ازيكن والسلام عليكن ووحشتوني  نونه برضه عشان الوزن بس

اوطبعا طبعا الساده الرجال الى يشرفوا طبعا منورين القاعده والله شكلكم جايين تاكلوا بس

انتم عارفين ان انا احب واعز موت اعمل الحاجه فىموسمها
وحاليا فى موسم الفراوله

فكل واحده فيكم تروح تشتري قفص فراوله حلو كده وتيجى

عشان هانعملها مربى
اولا وباديء ذي بديء الصوره الى فوق دي انا لطشها من على النت مش من عندي
بس اوعدكم بارتفاع مستوى الصور بعد كده حيث اننى اشتريت موبايل جديد
بكاميرا 3.2 بكسل وهاشهيصكم صور

خلينا فى الفراوله يا رغايين

اول حاجه هانشتري الفراوله ما تكونش مستويه اوي وما تكونش خضرا برضه
حمرا كده ومصحصحه وفله
انا باحب فى المربى اعمل فراوله صغيره  عشان ما اقطعاش عشان تبقى قطع داخل المربى

لكن طبعا فى ناس بتحب الفراوله مقطعه ومهروسه شويه كمان فى  المربى حسب كل واحد وذوقه طبعا

شوفوا كده الفراوله بتاعتي دي



طبعا انا جبتها ونضفتها وغسلتها وزي ما انتم شايفين حجمها صغير اوي شوف كام واحده فى ايدي

سمعاكي يا كلبه اه انا ايدى كبيره بس مش للدرجه دي

المهم

تعالوا اقولكم الحاجات الى هانحتاجها عشان تجبوها

هانعمل المقدار كيلوا فراوله
ولو ان طبعا لو هاتعملي كتري شويه يعنى 3 كيلو على الاقل عشان تستاهل الدوشه يعنى

المهم

كيلوا فراوله ـ كيلو سكر ـ علبة جيلى فراوله  او معلقتين جيلى باودر خام


طبعا غسلنا الفراوله ووضبناها نجيب بوله بلاستك مثلا
ونحط فيها شويه سكر وبعدين شويه فراوله وبعدين سكر طبقات يعنى لحد ما الكميه تخلص ونغطي وشها من فوق بالسكر ونسيبها اد اربع خمس ساعات اوقات انا اعملها من بليل واسييبها فى التلاجه للصبح


هانصحى الصبح نلاقي شكلها بقى كده



سردت مايه كتير هانقلبها بعد كده فى مصفاه بقى وناخد المايه بتاعتها مش هانرميها طبعااااااااااااااااا

هاتبقى عباره عن مايه نازله من الفراوله ومعاها السكر
ونسيبها تصفى ساعه كده مثلا

فى هنا بقى حاجه لطيفه انا عملتها المره الى فاتت
انا ما باحبش الحاجه الى تبقى سكرها جامد جدا
وبعدين بعد التجارب بقى
واسأل نفسي يا ترى يا هلترى المربى الجاهزه بتبقى متامسكه ولونها فاتح ومش مسكره اوي زي البيتى ؟؟؟

وبعد تجارب بقى وصلت لنتيجه معقوله جدا

اولا السكر مش باحط الكميه كلها سكر
باستعمل عسل البطاطس وهو لزج جدا وسكره قليل
وده موجود عن بتوع لوازم الحلوانيه بالكيلو

بالتالي انا بانقع الفراوله بنص كيلو سكر بس وبعدين باضيف  نص كيلوعسل البطاطس بعدين
وكده هاتبقى المربى مش مسكره جاااااامد اوي وكمان عسل البطاطس لزج جدا لما يبرد هايديها تماسك

بس مافيش مشكله برضه لو ما لقتيش عسل بطاطس
حطي كيلو  الا ربع سكر كفايه ونزود الجيلاتين شويه عشان التماسك


نيجى للخطوه الى بعد كده
انا هاخد المايه الى نزلت من الفراوله

واحطها على النار زي الصوره دي ونسيبها تغلي لحد لما تنعقد زي الشربات بتاع الحلويات كده
واول ما تبدأ تعمل رغاوي اكتر من الصوره دي شويه تبقى كده خلاص استوت

لو كنا بقى عندنا عسل البطاطس وهانستخده هانزوده دلوقتي عشان يبدا يتغلط ويسيح مع شربات الفراوله الى عملناه

وهانروح نجيب الفراوله بقى بتاعتنا وسقطها فى شربات الفراوله المعقود ده
هاتبدأ تغلي الفراوله كده

وتبدأ تسرد مايه كمان زياده وتلاقي المايه فى الحله بدأت  تزيد

تاخدي نص كوبايه تقريبا مايه من على الفراوله وتدوبي فيها كيس الجيلي بالفراوله  او معلقتين الجيلاتين
ندوبها كويس اوي

وبعدين نزودها على الفراوله تاني ونسيب الفراوله تغلي
حوالي ساعه الا ربع لحد لما تبدأ مايتها تنشف ونخلي بالنا اوي


عشان احنا عايزنا تطلع لونها احمر مش بنى غامق
كل ما كانت لونها قريب للطبيعى تكون احسن

 وطبعا نهدي عليها النار ونكشف الحله عشان البخار يطلع وما تفورش على البوتجاز 


وكده هى خلاص استوت


طبها هايكون شكلها سايب لسه وشكلها مش المربى ما تتخضوش احنا حاطين فيها جيلاتين لسه هايجمد من التلاجه

غير ان السكر نفسه وعسل البطاطس لما بيبردوا بيدوا قوام اتقل بكتير

بالتالي احنا هانسيبها تبرد وبعدين لو كنا عاملين كميه هانعمبيها فى برطمنات ازاز بغطاء محكم ونحطها فى التلاجه افضل طبعا
لاننا مش مستخدمين مواد حاظه ولا حاجه

وكمان ناخد بالنا لو كانت كميه كبيره شويه اننا طول ما احنا بنعبيها نهز البرطمان عشان ما يبقاش في فقاقيع هوا جوا وده يخليها تبوط خصوصا لو هاتسبيها بره التلاجه شويه

كمان لو حصل ولقتيها بعد ما بردت وحطناها فى التلاجه لسه قوامها خفيف اوي فى حال انتى قدرتي غلط يعنى
مافيش مشكله رديها على النار تاني

ولو لقيتى الشربات بتاعها كتير اوي  اوقات الفراوله بتسرد مايه بزياده حسب نوعها

انا بقى اعز كده موت موت
لان باخد المايه دي من عليها واحوشها عندي واستخدمها صوص فراوله فى الحلويات والايس كريم يا لهوي بتبقى جميله جدا

والف هنا يا حلوين ويا حلوات
والى يجرب يقولي
والى عنده اضافات يتفضل
نرحب بالافكار الجديده  يا ساده

السبت، 13 مارس 2010

شوربة العدس





واخيرااااااااااا
اول بوست فى المقر الجديد
ومعلش يا واندا مش السمك  يا اختي على ما طلبية البياض توصل بس


وعارفه ان الناس الى فى مصر هايصوتوا فى وشي ويقلولي الجو بقى حررررررررر


شوربة عدس ايه فى الحر ده


اقولكم  الدنيا هاتبرد تاني يوم الاربع لعلمكم
ههههههههههههههههههههه


والبت واندا يا حبة عين مامتها هاتتجمد هناك يا عينى


فقلت ادفيها بشوية شوربة عدس


المهم يكون فى علمكم ان مريم هى الى عامله يومها شوربة العدس وكانت طالعه جميييييله بس مشطشطه موت


ولما لقتنى باصورها قالتلى يا ماما لما تنزليها على المدونه ابقى قولي ان انا الى عملتها


بنعمل ازاي شوربة العدس بقى


هحاول احط  مقادير
نقول كوباية عدس اصفر  زي الى فى الحله ده
ونغسلها طبعا
ونحط عليها  كوسايه  جزره  بصله  طمطمايه  وفصين توم  وطبعا كل ده متقشر ومتقطع


وبعدين نزوده مايه قولي خمس كوبايات مايه او شوربه


ونرفعها على النار
هتاخد حوالي 20 دقيقه  وطبعا ممكن اكتر وممكن اقل حسب الظروف  المهم تكون المكونات استوت وبقت بالشكل ده
وتختبري الخضار كمان يكون استوى كويس جدا


بعد كده هانسبه بس تهدى شويه ونضربها فى الخلاط كويس لحد ما تبقى شوربه زي كده

وبعدين بنرجعها تاني على النار ونحط عليها بقى الملح زي ما تحبوا ملحه
ولو لقيناه تقيل شويه نزوده مايه او شوربه لحد لما يبقى سمك الشوربه معقول

طبعا بنحط بهار
انا باحط فلفل وكمون وشطه خفيف

لو بتحبوا اي حاجه تانيه معاه اوك

ونسيبه على  النار يادوب يغلي  ما نغطيهوش نخلي بالنا لانه بيفور
وبعدين نسيبه بس خمس دقايق عشان الرغاوي على الوش  تروح
وفى ناس بتعمله كمان طاشة تقليه وتزودها عليها بدع ما يخلص خالص كده

يعنى بتحطي معلقة سمنه كبيره فى طاسه وتحمري بصله صغيره وفص توم  وبعدين تحطيهم على العدس وتقلبي وتهدي النار وتسبيه خمس دقايق بس على النار
بيبقى حلو برضه مش وحش
بس التقليه الحقيقه بتبقى  تقيله جداااااا ونار بقى يا معلم على صدرنا واحنا مش ناقصين
انا الحقيقه باعمله نى فى ني كده وباحبه كده

وبعدين نقلبه كويس قبل ما نغرفه لانه بيرسى لتحت

وعلى  السلطانيه دوغري  ويا سلام لونص لمونه وبالهنا والشفا  زي الصوره الى هناك فوق دي
فى ناس كمان تحب تعمله بالشعريه او بلسان العصفور
بيتحمري الشعريه او لسان العصفور فى معلقة سمن لحد ما تاخد لون اصفر
وبعدين تقلبيها على حلة العدس وطبعا تزوديه مايه لان الشعريه هاتشرب مايه وتخليه تخين


على فكره ماما بتعمل اوقات مع ال عدس فتة عدس بتبقى جميله اوي برضه

نفس طريقة  الفته العاديه

لكن بدل ما نزود العيش شوربه هانزوده عدس

ونسيبها تغلي خمسه بس والرز على وشها

بس مش بنعملها تقليه زي الفته الى بالخل والتوم

والف هنا يا قوم  والى يجرب يقولي





الأحد، 28 فبراير 2010

ام علي ...... يا عليييييي


السلااااااااام عليكم


ام علي يا واندااااااااا بتسلم عليكى والله

بصوا انا مصوره ام علي دي من السنه الى فاتت وفضلت اجلها لحد ما الصيف دخل قلت لا بقى دي عايزه البرد يا جدعان

وادي الشتا ده قرب يخلص وانا لسه باجل برضه عالم فاشله اخر حاجه

المهم بقى بناءا على طلب الجماهير

الى هما واندا السواحه

والبت شيما المخطوفه على راي فاتيما

والبت ام مريم نبر تو مش انا دي خليفتى فى الملاعب

فقلنا ننزلكم موضوع جديد

لايق على البرد والتجمد الى انا فيه حاليا فى الرسبشن بتاعي المتلج موت

لا لا مش زي التلج بتاعك يا وندا انتى غير يا ماما خليكى عايشه فى الفريزر حتى بعد الفريزر بشويه


اليكم يا حضرات ام علي

ام علي دي لها باكتس كده بتتباع فى السوق اشتريتها مره لقيتها حاجه تعبانه جدا مالهاش اي لازمه عباره عن شويه حاجات ناشفه كده ولو قديمه يبقى طعمها مش ولا بد ويادوب بالعافيه تعملي اربع اطباق

قوم انا قلت كلا الفته لا يمكن نشتغل فى الكلام الفارغ ده

وحاليا انا باعمل ام علي باي حاجه تقابلنى

اليكم الاتي وده بالترتيب من الاحسن

الفطير الفطير المشلتت العادي طبعا طبعا مش باعمله ما تحلموش انما انا عندي العيال بيحبوه فبنشتريه كتير والى بيبات منه ما بيتاكلش

انا باحوش البواقي دي ممكن فى الفريزر حتى لو الحكايه هاتطول وبعدين اول ما افتح الفرن لاي سبب اقوم مطلعه البواعي دي ومقطعها ومفرفراها كده وبعدين ادخلها الفرن عشر دقايق وبما ان الفطير بيبقى فيه سمن اصلا بتطلع بقى الدنيا محمصه وحمرا وزي الفل

لو مش هاستعملها فى والتو واللحظه باسيبها تبرد واعبيها فى كيس واسيبها فى التلاجه لحد ما احتاجها تبقى جاهزه على طول ما تاخدش عشر دقايق


وممكن كمان نعملها بالجلاش او بالرقاق وانا لما بيفيض اي حاجه من دول او حتى كسر منهم مش بارميه ولكن بالحقه على الفطير اياه برضه

لكن الجلاش والرقاق بقى مش بيبقى عليهم سمن فلازم نحط عليها معلتين ثلاثه سمن حسب الكميه كده ونقلبها عليهم او لو ورق الجلاش كامل احنا ندهن ورقه ورقه بفرشاه كده بالسمن وندخلها الفرن هما ثلاث دقايق وهاتلاقيها احمرت نطلعها على طول

ايا يكن

فان ام علي تعتمد على عجينه بنرقها جدا ونحمصها مع سمن فى الفرن قشطه كده ؟؟؟

يعنى حاجه زي الفته كده وادي شكلها بعد التحميص

بعد كده هانجيب اللبن طبعا هحاول جاهده انى احددلكم كميات عشان انا باعملها بالنظر

لو قلنا عندنا كوبايتين مثلا من الفطير المحمص او الجلاش المحمص فاحنا هنحتاج حوالي لتر حليب

هانسخن اللبن الحليب على النار ونحط عليه سكر مناسب حسب ما بتحبوا وفانيليا ولما يغلي على طول هسقط الفطير او الجلاش المحمص

ونقلب ونسيبه يغلي حوالي عشر دقايق مع التقليب عشان ما يلزقش ونكون مهديين النار عليه زي كده

لحد كده هى ممكن تبقى تمام

لكن انا فى حاجه باعملها لانى ما باحبش ام علي تكون سايبه اوي كده ويبقى فيها لبن لو لقتيها سايبه معاكي اوي تدوبي معلقة نشا فى معلقتين مايه وتزوديهم وهى بتغلي كده فى الاخر هاتلاقيها مسكت شويه وبقت تمام

انا الحقيقه مش باحبها تبقى مكتومه اوي يعنى كلها فطير او جلاش فبحب اسيبها حبه واحطلها معلقة النشا دي بتظبط الدنيا كويس



بعد كده بقى نجيب الطواجن الصغيره او ممكن نستخدم سلاطين بايركس او بورسلين اي حاجه بتستحمل الحراره يعنى ونوزع عليها الخليط الى عملناه فوق ده ونحط على الوش بقى مكسرات او فول سوداني او مش مهم خالص زي ما بتحبوها

ومعلقة قشطه كبيره

او بشر زبده زي الصوره دي كده حسب ما تلاقي عندك بس القشطه الصراحه بتبقى اجمل

اهو صوره دي بالقشطه عشان ما تزعلوش نفسكم


طبعا بما انى مش عامله طبق واحد هانرص كل الاطباق على صنيه واحده وندخلها الفرن بس الشعله الى فوق الشوايه يعنى لمده عشر دقايق فقط


ونحط الصنيه فى الرف الوسطاني حتى بانزله ساعات تحت شويه


فى ناس بتحمرها بالنار كده سريعا من فوق مش فاكره اسم البتاع ده يا اخويا الزهايمر اشتغل مش مهم

لكن انا باحبها اكتر تدخل الفرن شويه بتمسك نفسها وتاخد لون حلو

وبس على كده تطلع بقى حمرا وبتزغرت كده يا اخواتي وتتاكل فووووووووووورا عشان تدفي



وباقدم اعتذاراتي على الصور والله انها مش حلوه لا الموبايل بتاعي بيصور كويس ولا البرنامج الى كنت باشتغل عليه يظبط الصور راضي يشتغل


والف هنا يا جودعان وطبعا بعد ما الواحد يضرب طبق ام علي الي فوق ده هايلاقي وشه ضرب احمر فى زرتقاني وينام بقى للصبح فى التمام

والى يجرب يقولي بلاش ندااااااااله