الثلاثاء، 16 ديسمبر، 2008

السمكه الحاره

السمكه الحاره
زي ما بيقولوا عليها فى الخليج
وعلى ما افتكر ان الهنود هما اصل الطبخه دي
وكمان على فكره عندنا البورسعديه بيعملوا حاجه شكلها وهى السمك السنجاري
سهله اوي على فكره واحلى حاجه فيها انها بتتعمل من غير زيت عشان الزيت ده متعب اوي فى كل حاجه
هاهريكم بقى اكل دايت
هههههههههههههههههههههههههههه
احنا هانستخدم اي سمك متوفر انا النهارده كنت عامله سمك بلطي عادي
جربته قبل كده بالبوري كان مالوش حل بصراحه
وقبل كده جربت البياض برضه كان مجرم
يعنى اختاروا السمك الى تحبوه
بس ياريت يكون سمك سمين شويه وكبير شويه
وممكن تعملوا مقطع او السمكه بحالها
المهم
لحوالي كيلو سمك هانعمل الآتي
فى الكبه او المفرمه اوي اي حاجه تعجبك
و2 فلفل اخضر كبير واحمر لو حبيتى ويا حبذا لو قرن شطه معاهم يووووووووه
وبقدونس وكسبره وشبت او المتوفر منهم
انا عن نفسي باحب الكسبره مع الاكله دي بس لو حطيتى كله بيبقى حلو برررررررضه
خمس او ست فصوص توم كبير
حبة طماطم(كنت ناسياها وفضفضه فكرتني هههههههه)
وملح وكمون وبهار
وبعدين بنفرمهم كلهم مع بعض كده جماعه
وبعدين طبعا السمك متنظف ولو كانت سمكه كبيه بتشرطيها بالسكينه (نعمل فتحات يعنى بالعرض فى السمكه )
ونجيب الخلطه ونحشي السمكه من جوه ونحط داخل الفتحات الى عملناها بالسكينه وبعدين نجيب ورقة سلفر ده بنعمل السمكه بحالها يعنى
وندهن الورقه زيت وبعدين نحط معلقه كبيره من الخلطه الى فاتت ونفردها ونخط فوقيها السمكه
وبنحط معلقه كمان فوق السمكه ونفردها
زي الصوره دي كده
معلش بقى المصوراتي سكه
بعد كده نجيب نعصر لمون عليها ونرش خل ومعلقة زيت ونقفل عليها الورقه ونحطها فى صنيه وندخلها الفرن وبعد حوالي ربع ساعه كده نفتح الورق عليها ونسيبها كمان ربع ساعه لحد لما تنشف شويه وتكون استوت على كده
لو عاملين سمك مقطع بقى او حتى فليه ممكن نعمل كده بالظبط بس نرصه فى صنيه ونرش عليه نص كوباية لمون ونص كوباية خل وربع كوباية زيت ونقفل عليهم بالسيلفر بررررضه بتاع ربع ساعه وبعدين نكشفه ونسبها تنشف
وطبعا ممكن نخليها حاره (حاميه يعنى) وممكن لا براحتكم يا قوم
بس خلي بالكم الشطه الكتير مش حلوه على معدتكم
ونطلعها من الفرن ونقدمها زي ما هى فوق كده
الف هنا
وياريت الى يجرب يقولي
والى عايز يسأل يسأل يا جودعان ما تتكسفوش
ملحوظه مسبكه
الحاجات الى على الشمال دي يا حلوين جاهزه بالصور ان شاء الله شوفوا عايزين ايه الاول والاولويه لمن سبق هههههههههههه

هناك 13 تعليقًا:

خمسة فضفضة يقول...

السلام عليكم ورحمة اله وبركاته

تسلم الايادي يا صب صب

باعملها زيك بس عمري ماجربت الا البوري لانه سمين اما البلطي فامبحبش اجيب الا البلدي وده عمره مابيبقي سمين اوي زي بتاع المزارع اللي بيبقي كله دهن وماليان هرمونات

باحط في الخلطه كمان طمطمايه وبصله

وساعات احط طبقه بطاطس رفيعه تحت السمكه وبعملها في صينيه واغطيها بالفويل بس بتبقي تحفه ماشاء الله


سلام يا قمر

صبرني يارب يقول...

خمسه فضفضه

ايه ده هو انا ما كتبتش طماطمايه ؟؟؟

لا انا باحط طماطم هههههههههههههه

طب هاروح ازودها دي هى الى بتعمل الخلطه سايله شويه وبتطري القاعده ههههههههههههه

لا بطاطس ما حبيتهاش بصراحه تحت السمك

واه فعلا هو سمك المزارع مالي الدنيا بس يعنى هانعمل ايه

يلا بقى لما الصيف يجى نبقى نروح نصطاداحنا هههههههههه

بس حتى لو مش سمين ما انا بحط زيت لو كان السمك مش سمين اوي بازود الزيت حبه وبتمشي

نورتي يا جميل

كيــــــــــــارا يقول...

عااااااااااااااااااااااااااا


مش بحب السمك بقي عااااااااااااااا

غيريها لفراخ بقي عااااااااااااااا

صبرني يارب يقول...

مش بتحبي السمك؟؟؟؟؟؟!!!!

عبيطه طول عمرك

برررررررررره ههههههههههههههههههههه

النهارده سمك بقى

mony يقول...

الحمد لله بيني و بين السمك عمااااار كتييير اوي

مابطقش ريحته

و لو كلته لازم اكله بره مش في بيوت ابد


شوفينا باه في الجمبري
طاجن سبيط بالجمبري
جندوفلي(بلح البحر)
كده احبك يا صبرني

انما سمك!!!!



انا جيت اسجل حضور بس

صبرني يارب يقول...

موني خاااااايبه يا موني

شوفي يا موني انا احب البحر

بميته وسماه ورمله وهواه وسمكه وجمبريه وكووووووول حاجه تبع البحر
ههههههههههههههههههههه

نورتي يا جميل

يوم جميل يقول...

تسلم إيدك

عجبتني أوي المدونة دي، وهفضل أتابعها.

أوعي تهمليها!! :)

بنت الغربة يقول...

تسلم ايديك ياصبرنى انا اول ماهخف من البرد هاعملها ان شاء الله
وبعدين انا عايزه سلطة الكوسلو
ماليش دعوة انا الى طلبتها الاول عااااااااا
وبعدها الفراخ انا باموت فيها
تحياتى ليك ياقمر - داليا -

صبرني يارب يقول...

cognition sense

تنورني دايما وان شاء الله ادعيلي بس ربنا يدينى الصحه والوقت ومش هاعملها ابدا ان شاء الله

تحياتي

صبرني يارب يقول...

بنت الغربه

عنيه يا جميل والله عماله اقول من الى كان طالب مني كول سلو

طيب عنيه بس فى صوره من صور المايونيز ضاعت اول ما تجهز هانزلها ان شاء الله
انا اساسا مجهزه الكرنب جوه اهو ههههههههههههههههههه

kochia يقول...

هو انا مش بحب السمك بالخلطة بس هجربه
شكله مثير ولذيذ

وعاوزة الكوسة بالبشاميل بلييييييز

تحياتي

صبرني يارب يقول...

كوشيااااااااااا

ما شوفتش ردك يا جميل الا دلوقتي
عنيه حاضر

معلش بعد الكنافه بقى

مرايتى يقول...

شكراً على المدونة و الوصفات
تابعونا لتتعلموا معنا طبخات اخرى مميزة .

من كل بلد اكلة

نصائح لمطبخ صحى