الثلاثاء، 31 مارس، 2009

المكرونه بالبشاميل

طبعا انتم عارفين انا باتصلب لما حد يطلب مني حاجه وخصوصا لو جاهزه عني
ابو زيد النهارده طلب مني المكرونه بالبشاميل وهى فعلا صورها جاهزه عندي
ودلوقتي يلا بقى نشتغل
اولا عشان نعمل صنيه مكرونه متوسطه محتاجين نص كيلوا مكرونه
نص كيلوا مش 400 جرام
يعنى لو جبتى كيس 400 جرام ابقى زودي شويه فوقه
ومحتاجين كمان حوالي من اربع الى خمس كوبايات بشاميل
طبعا احنا عملنا البشاميل البيتى مع بعض قبل كده
بس لو عايزين تجيبوا اكياس بشاميل جاهزه وتنضموا لفريق الحريم الشلت اوك جو اون
المهم نعمل المكرونه
وهانحتاج كمان نص كيلوا لحمه مفرومه معموله عصاج
تمام كده ؟
الطريقه بقى مافيش اسهل من كده
قلبي كل الى فات ده على بعضه وحطيه فى الفرن
ههههههههههههههههههههههههههه
لا طبعا استنوا انتم ما بتصدقوا ولا ايه
المهم
طبعا هانسلق المكرونه
ممكن نستخدم مكرونه اقلام او مكرونه اي شكل لكن المركرونه الاقلام بتخلي قطعة المكرونه بعد كده ماسكه فى بعضها
نسلق المكرونه ونغسلها من المايه الى فيها نشا ونصفيها كويس
وبعدين نضيف لها نص كمية البشاميل تقريبا الى عندنا
ونقلبها كويس لحد ما يتوزع البشاميل بس من غير ما نعجن المكرونه يعنى
بعد كده بناخد نص كمية المكرونه ونفردها فى صنيه ونساويها كويس ونغطي ارضية الصنيه تمام بالمكرونه
وبعدين نحط العصاج ونفرده برضه كويسه فوق المكرونه بالتساوي
وبعدن نرجع نحط باقي المكرونه ونساويها كويس اوي
يعنى هانعملها طبقات زي الصوره دي كده
ملاحظين شكل الطبقات ولا ايه ؟
المهم بعد كده نساوي الصنيه كويس
وبعدين نصب عليها البشاميل الباقي بالراحه ونساويها برضه كويس جدا
لحد لما تبقى زي كده
كده بقت جاهزه نسخن الفرن بقى لحد 200 تقريبا وبعدين نحطها فى الفرن
فى بقى حاجتين ممكن نعملهم عشان نخلي وش المكرونه احمر وحلو
هو اولا اننا نحط بيضه زياده ونخلطها بالبشاميل الى احنا سبناه للاخر ده للوش وده قبل ما نفرده طبعا
او نجيب جبنه رومي اوموتزريلا مبشوره ونرشها على الوش بس قبل ما المكرونه تطلع بربع ساعه كده عشان ما تنشفش ولا تتحروق
والمكرونه بتقعد فى الفرن حوالي ساعه ولو احمرت قبل الساعه بحاجه بسيطه نطفي عليها خلاص
ولو احتاجت ربع ساعه زياده عشان تحمر من فوق برضه اوك
وعلى فكره ممكن تغيري فيها وفى طعمها من خلال العصاج
ممكن تزودي على العصاج وانتى بتعمليه مشروم
وممكن كمان وانتى بتفرديه على المكرونه تحطي معاه حلقات فلفل اخضر او حلقات زتون وجبنه رومي او كل ده مع بعضه
دي كلها حاجات بتدي نكهات جديده كنوع من التغيير
كتير بيسألوني ليه احنا بنعمل المكرونه تطلع ناشفه ؟
ده بيكون سببه :
لو البشاميل تقيل او قليل او الاثنين معا تطلع كده
انا باحب البشاميل بتاع المكرونه بالذات يكون كتير وخفيف شويه عشان كده بتطلع طريه وقشه بالصلاه على النبى
ههههههههههههههههههه
انى كويشنز انا جاهزه

الخميس، 26 مارس، 2009

شكلمه (من ايدين مريم )



ازيكم يا قوم

النهارده جايبالكم صنف سهل جدا وسريع جدا عشان فى ناس قالولي يا مفتريه منك لله مش عايزين اصناف متعبه احنا هانقعد فى المطبخ طول النهار

ومصطفي ريان قالي عايز حاجات سهله عشان الحاجه ما تضربنيش لما اجي ا نفذ


النهارده هانعمل شكلمه وليييييييييه بقى شكلمة مريم

ده لان مريم حبيبتى بنتى الى طالعااااااالي جاتلي مره وانا واقفه فى المطبخ فى احدى افتكساتي دي وقالتلي يا ماما انا فى وصفه شوفتها على سبيس تون وعايزه اعملها

طيب يا مريم اسمها ايه قالتلى كعك جوز الهند .

اه وصفه وكعك جوز الهند ما هو سبيس تون بقى


المهم على ما خدت منها معالم الوصفه اتضح انها شكلمه


وبدأنا التنفيذ اليكم الوصفه كما قامت بعملها الانسه مريم حفظها الله
وطبعا بعد ما عملتها قالتلى لو سمحتى يا ماما صوريها ونزليها على المدونه بتاعتك
هههههههههههههههههههههههه


المقادير :

كوب جوز الهند

بياض ا ثنين بيضه +فانليا

نصف كوب لبن مكثف محلى


بالنسب للبن المكثف المحلى
انا باعمله فى البيت ( بنحط 3 كوبايات حليب على النار ومعاهم 3 الى خمس معالق سكر حسب ما بنحب السكر ونسيبهم حوالي نص ساعه ) بس كده اه والله بس كده

ولو كلكع منك خدي لفه فى الخلاط كده على السريع وبيبقى احلى من الجاهز بمراحل


نرجع مرجوعنا يا حلوين للشكلمه


الطريقه

الاول هانخفق بياض البيض بالمضرب السلك لحد ما يبقى منفوش ولونه ابيض

وبعدين فى طبق تاني نحط جوز الهند وعليه الحليب المكثف المحلى ونقلبه وبعدين نضيف بياض ا لبيض مع الفانليا ونقلب برضه

لحد ما يبقى شكله كده


وبعدين نجيب صنيه ونبطنها بسمن ودقيق ونعمل الخليط ا لى فات على شكل دواير زي كده وتكون كده جاهزه تدخل الفرن



مش بتاخد كتير فى الفرن حوالي 20 دقيقه وبنطلعها ياااااادوب تكون اصفرت مش هاتحمر اصلا وبيكون شكلها كده وهى طالعه من الفرن

ونستنى عليها لما تبرد وبعدين نطلعها من الصنيه ونقدمها زي الطبق الى فوق ده والف هنا يارب





والى يجرب يقولي يا حلوين

الاثنين، 16 مارس، 2009

كفتة البطاطس والخضروات

حبايبى الحلوين المطبخيين اصدقائي
الايام دي البطاطس فى السوق حلوه وكتيره ما شاء الله وعشان كده قلت نستغل الفرصه دي ونعمل منها حاجات كتير
وانا احب لما تكون الحاجه فى موسمها انى استعملها كتير لانها اكيد خلقت فى هذا الوقت لحكمه منه عز وجل
عشان كده انا باغرقهم بطاطس فى موسم البطاطس
ندخل على الشغل بقى
هانحتاج حوالي خمس بطاطسات مسلوقين ومقشرين ومهروسين طبعا(أو 3 بطاطس متوسطه و2 جزر ه)
وبصله متوسطه مفرومه
بيضه
وحوالي نص كوبايه فول صويا مطحون ولو ما عندناش ممكن نحط بداله بقسماط نو بروبلم
ملح وفلفل وبهارات
(ولو حد بيحب طعم الخضره ممكن نزود كمان 3 معالق كسبره على شبت على بقدونس مفرومين )
وبقسماط على دقيق + بيضه للتحمير
الطريقه
هانحط كل المكونات دي على بعضها كده فى الفود بروسيسر او الكبه او وات ايفر مش مشكلتي هههههههههههههههههههههههههه
ونخلطهم كويس لحد ما يطلعوا شكلهم عامل كده

وبعد كده نشكلها صوابع زي الصوره الى فوق دي وبعدين ننزلها فى الدقيق وبعدين البيض وبعدين البقسماط ولو هى ماسكه نفسها يعنى ممكن نخلط البقسماط على الدقيق ونحط فى البيض ونطلع عليهم وبعدين نسقطها فى الزيت وهو سخن وبتاخد تحمير مافيش 4 دقايق وطبعا ما نعليش عليها اوي عشان ما تتحرقش .
وممكن نعملها مدوره زي الصوره دي كده ودى بتنفعني لو العيش بتاع السندوتشات مدور بيبقى ده انسب



وطبعا دي بجد لذيذه اوي ومفيده اوي لو هانحط عليها جزر وصويا بترفع قيمتها الغذائيه
والعيال عندي حبوها جدا
مريم جت من المدرسه قالتلى ماما حلو البانيه الى كنتى عاملاه فى السندوتشات ده
ههههههههههههههههههههههههه
باقول لرضا بنتك بتقولي على البطاطس بتاعة الصبح حلو البانيه ده
قالي بطاطس ؟؟؟
بطاطس ايه ؟؟؟ هو كان فى بطاطس ؟؟ دى كانت طعميه باين ؟؟؟!!!
ناس فله الصراحه هههههههههههههههه
بس بجد بطلع حلوه اوي جربوها وعلى ضمانتي
ولو طلعت منكم فاكه شويه زودوها شويه فول صويا مطحون او شوية بقسماط لحد ما تمسك نفسها
وبالراحه وانتم بتقلوها لانها بتكون طريه اوي عن كوفتة اللحمه طبعا
والف هنا
والى يجرب يقولي

السبت، 7 مارس، 2009

بروفترول




السلام عليكم يا حلوين






يعنى استكمالا لموضوعات الاكلير وتلبية لطلب حبيبتى المخنوقه دايما بنت الغربه




وعشان نلحقها لانها الايام دي فاضيه وكمان عشان نتعاون جميعا على فرغ حجج الباشا الى مش عاجبه الا بروفترول مامته ولو ما عجبوش البروفترول بتاعي انا الى هاروح اخلص عليه تخليصا .




يلا نبدأ شغل بقى




طبعا احنا هانستخدم الاكلير المدور الى احنا عملنها فى الاكلير بالشيكولاته




بس مش مهم نعمله شيكولاته من فوق احنا بس هانحشيه وكده يبقى جاهز للشغل




هنحتاج لكل طبق زي الطبق الى فوق ده حوالي 4 وحدات اكلير متوسطين الحجم




يعنى نقول احنا هانعمل اربع اطباق هانحتاج من 15 الى عشرين واحدة اكلير




هانحتاج للاربع اطباع كوبايتين كريم باتسيير بالشيكولاته او كاستر برضه بالشيكولاته ما يقولش لا




وكوباية كريم شانتيه




وكوباية صوص شيكولاته من النوع التاني (فاكرين احنا عملنا نوعين ) هانستخدم هنا النوع التاني الى هو طري






الطريقه :




انا كنت باكل البروفترول ده بره واقول هو ايه البتاع الى حاطين فيه الاكير ده يا ولاد لا منه باتسييرولا منه كريم شانتيه


عامل زي الموس كده بس برضه مش موس شيكولاته اتقل منه شويه


المهم طبعا عشان انا ما اقبلش حاجه تعدي من تحت ضرسي كده واقول ما باعرفش قعدت اعمل تجارب ما اقلكوش الى عملته فيهم بس الحمد لله استقريت على الطريقه دي




هانعمل الكريم شانتيه ويا ريت يكون بالشيكولاته ولو كان ابيض نزود عليه شوية من صوص الشيكولاته بس يكون بارد


او ندوب شويه نسكويك فى معلتين مايه ونزوده على الكريمه




المهم يعنى يكون لونها شيكولاته




ونحط الكريم شانتيه على الكريم باتسيير او الكاستر الى برضه بالشيكولاته وشيكولاته تقيله كمان ونضربهم مع بعض بالمضرب لحد لما يتخلطوا تماما




وبعد كده نوزعهم على الاربع اطباق يعنى نملى نص الطبق تقريبا




ونجيب الاكلير ونرصه فوقيهم ونزله لتحت شويه كده يعنى يادوب تبقى ثلث الاكليره بس هو الى باين وبعدين نحط معلقتين او ثلاثه كبار صوص الشيكولاته يعنى لحد ما نغطي الطبق ونزينها من فوق بقى




في الصوره الى فوق دي انا حاطه اكليره جاهز متغطيه بالشيكولاته ونعمل وردات او اي شكل من الكريم شانتيه على الوش وبشر الشيكولاته




فى الصيف بقى باحب احط فوق كده بدل الاكليره دي بولة ايس كريم بتبقى روووووووعه ـوممكن ما نحطش خالص مش هانقولكم حاجه يعنى ـ المهم علىالوش شوية كريم شانتيه برضه وفوقيهم صوص الشيكولاته


من الاخر يعنى هو البروفترول ده عباره عن حلة شيكولاته ونقع فيها




ومعلش الخطوات كلها مش متصوره مش عارفه نسيت ازاي اصور




أنا فى الغالب باعمل البلفترول ده لما يكون عندي اكلير مثلا من امبارح اقوم ا عمله شوية الحبشتكنات دي فيطلع بروفترول




وجربوا وقولولي النتيجه بسرعه يا حلوين


بنت الغربه قوليلي ا لطريقه دي زي الى انتى عارفاها ولا ايه ؟؟