الاثنين، 29 يونيو، 2009

تورته بالفواكه والشيكولاته



السلاااااااام عليكم يا حلوين


انا قلت بقى نعملكم تورته لطيفه جميله كده بما ان احنا فى الصيف والمناسبات كتير



وبما انى مريضه حاليا وملازمه الفراش قلت اطبخ بقى وانا نايمه ما دام مافيش طبيخ فى المطبخ



هيا الى المطبخ


طبعا علشان نعمل التورته لازما ولا بد يكون عندنا كيك


هانحتاج لمقدار لكيكتين من الى فى الصوره ده


انا فى الحقيقه ما باحبش الكيك الاسفنجي

بينى وبينه طار بايت لا باحب اعمله ولا باحب اكله


انا باعمل دااااايما كيكه عاديه زي الى انا عملتها معاكم قبل كده هنـــــــــا



طبعا انا بافضل اعمل اكيك رقيق شويه يعنى بعد ما يستوي يبقى سمكه لا يتعدى الخمسه سم


وباقسم كل واحده اثنين


وكده هايبقى عندي اربع طبقات باحشي بقى الطبقات دي كريمه


اي نوع كريمه تحبيه كريم شانتيه

كريم باتسيير مخلوط على كريم شانتيه ممكن برضه ما يقولش لا


انا بافضل الكريم شانتيه دايما فى التورتات عشان عندي العيال مدمنين


بعد كده بقى يا حلوين هانعمل الاتي


بالسكينه وانقسم الكيك الى حشيناه ده الى نصفين متساويين بالتمام زي الصوره دي كده

ونغطي نص منه بالكريم شانتيه بس والنص التاني بصوص الشيكولاته زي الصور هالى فوق دي تماما


وانا باتعمد اقسمها كده عشان اخد راحتي اثناء التغطيه وما يتخلطوش على بعض وتبقى حوسه سعيده

وبعد كده باحطها فى التلاجه عشر دقايق بس عشان اعرف احركها


وبعدين اضمهم على بعض بقى يرجعوا دايره كامله زي ا لصوره كده


وبنعمل خط بالكريم شانتيه تزيين طبعا زي الصوره دي كده علشان نغطي الفاصل


وكمان نعمل حرف للنص الى بالكريمه عشان الفاكهه ما تتزحلقش من عليه

وتبقى ساعتها تمام زي الصوره دي

بعد كده بقى نجيب فاكهه اي فاكهه المتوفر عندك بس يفضل كده تكون لها الوان حلوه


انا هنا الى لقيته كان فراوله وكنتلوب وبرتقال


المهم

عشان نجهز الفاكهه ونحطها على التورته نعمل الاتي


نقطعها بالشكل الى نحبه بحث نقدر نرصها على التورته بشكل حلو


وبعدين نكون مجهزين شويه شربات صغيرين (قطر _شيره ) ونسخنه شويه مش لدرجه انه يغلي

ونحط فيه الفاكه ونقلبها شويه ونسيبها خمس دقايق وبعدين نصفي من عليها الشربات ونسيبها لحد ما تبرد خالص قبل ما نستعملها


والاحسن من كل ده الجيلاتين طبعا جيلاتين خام شفاف وندوبه فى مايه سخنه ولما يبرد نقلب فيه الفاكهه او حتى جيلى


بس انا بافضل استخدم جيلي لونه فاتح اناناس مثلا عشان ما يغيرش لون الفاكهه


وده كله عشان الفاكهه تفضل على لونها وما تدبلش وما تسردش مايه على التورته وتكون لامعه وشكلها حلوه


بعد كده بقى نرص الفاكهه على النص الى بالكريمه زي الصوره دي وبالشكل الى نشوفه حلو


والنص التاني ممكن تسبيه شكيولاته ساده كده او تكتبي عليه اسم

او تحطي بشر شيكولاته او فى شكيولاته تزيين بتكون على شكر ورق شجر او وردات او حيوانات للاطفال


او اي حاجه تحبيها


ويطلع فى الاخر الشكل ده




وممكن تعمليها فى كيكه مربعه بتقسميها نصين بحيث كل نص مثلث وتعملي نفس الى عملناه بيبقى تحفه برضه


وممكن بنفس الطريقه تعملي نكهات مختلفه


ان شاء الله كل ما اعمل افتكاسه من دول هاصورها واوريهالكم ازاي


يلا بقى قوموا اشتغلوا كفايه انا نايمه


والى يجرب يقولي





الاثنين، 15 يونيو، 2009

المسقعه بالبشاميل




السلااام عليكم


المسقعه حياتي المسقعه باموت فيها امال احنا ا يه جايبنا ورا


الباذنجان الايام دي يا جماعه روعه باحب اكله جدا فى شهر خمسه وسته اول ما يدخل شهر سبعه انسوا مش بادوقه بيبقى مريع وبيعملى حموضه


فقلت الحق بقى اعملكم مسقعه بالبشاميل وفى طمان جاي قريب طاجن المسقعه كله جاهز والنبى

يلا ندخل على الشغل عشان مش فاضيالكم


هانحتاج حوالي كيلو باذنجان




ولحمه مفرومه عصاج يعنى للصنيه المتوسطه نحتاج حوالي نص كيلو او حسب ما نحب


وواحده فلفل اخضر رومي مقعه حلقات او قطع صغيره وينفع فلفل الوان وينفع فلفل بلدي مش هايقول لا يا جودعان


كله كده تمام

الى العمل


اول حاجه البتنجان هانقطعه انا عن نفسي باحب اقطعه بالطول لان والله اعلم بيقولوا كده بيشرب زيت اقل

الى فى الصوره ده متقطع بالعرض مش انا الى مقطعاه دي ماما


هانقطع البتنجان وغسله ونرش عليها ملح خفيف مش كتير اوي ونسيبه نص ساعه كده وبعدين نقليه


ونطلعه لونه فاتح على اد ما نقدر افتح من الى فى الصوره برضه مش انا الى قالياه دي ماما


المهم نجيب الصنيه


ونحط كوباية بشاميل تحت ونفردها وبعدين نرص البتنجان فوق البشاميل زي الصوره دي كده


وبعدين نفرد عليها العصاج زي الصوره دي


بس انا باحب فى العصاج بتاع البتنجان احط فص توم مع البصله وكمان ازود عليه 3 معالق كبار صلصه طماطم مركزه



بعد كده هانرص الفلفل الاخضر بس نسيت اصورها دي والمشروم ان وجد وزتون ما يقولش لا وبعدين نرص فوق الكل طبقة بتنجان تانيه زي الصوره دي كده





بعد كده نغطي الصنيه بالبشاميل الباقي تتغطى كويس زي كده


وندخلها فرن حامي 200 درجه وبتقعد فى الفرن حوالي ساعه الا ربع الو ما تتحمر بس لان هى كل حاجه مستويه اصلا

وممكن فى نهاية السوى نبقى نرش عليها من فوق جبنه رومي او موتزريلا


وبتطلع بالحلاوه دي يا جودعان وناكل ونتخن ونربرب وما حدش واخد منها حاجه





اه بالنوسبه لبتوع الرجيم ممكن تعملوا بشاميل من غير سمن الى هو بتدوبي الدقيق فى اللبن وبس على كده وتحطيه على نار هاديه وتقلبي لحد ما يربط

والبتنجان بعد ما تقليه تفرديه فى مصفاه وتصبي عليها مايه سخنه وتسبيه شويه هاينزل كل الزيت الى فيه


ولما تاكل من المسقعه دي ما تحفيش يعنى قطعه واحده بلاش طفاسه وفى الغدا مش فى العشا


ههههههههههههههههههه


يلا عايزه شغل يا حلوين


الى يجرب قوووووووولي والف هنا



الجمعة، 12 يونيو، 2009

هديه من نكهه مغربيه



جالي هديه رقيقه وجميله


من الرائعه والجميله حبيبتى


الى من غيرها بلوج الطبخ ده مالوش لا طعم ولا لون ولا رائعه



والهديه اهي

بجد متشكره اوي اوي يا نكهه جميله اوي زيك تمام وفرحت اوي انك افتكرتينى بها على طول

وباهديها لكل الناس على البلوج الى انا فعلا باحبهم اوي اوي اوي

باحبكم فى الله جميعا

بس انتى لكى حته زياده يا نكهه يا عسل انتى

الأحد، 7 يونيو، 2009

الكيـــــــــــك





السلام عليكم



وبعد كام يوم من البهدله العامه اخيرا هانزل بوست يا قوم


اليكم الكيك باسهل طريقه ممكن تعملي بها الكيك ويطلع تحفه ان شاء الله



طبعا انا معلش الصور لماها من كل حته شويه يارب تكون معقوله


انا هاعمل كيك بس كده ساده وبعد كده هانعمل عليه ادخالات بقى ومواضيع كتير


دي الطريقه الاساسيه للكيك بالنوسبه ليا يعنى




انا عارفه ان فى طرق كتير وحاجات كتير اوي بس زي ما بيقولوا كل شيخ وله طريقته



هيا بنا نعمل



المقاديــــــــــــــــــــر:

3كوب دقيق ( خاص بالحلويات)

2كوب زيت دره او عباد شمس( يمكن استعمال الزبد او السمن بدلا من الزيت)





2كوب سكر مش لازم مطحون بس يكون ناعم افضل





ملعقه سمن بلدي( للنكهه يعنى) وممكن نص كوباية قشطه بس فلاحي يا معلم وده في حالة استخدام الزيت



3 ملعقه كبيره بكنج بودر ( كيسين )

1كوب زبادي او حليب


6بيضات /فانيلياّّّّّّّّّّّّّّّّّّّّّّّّّّّّّّّ



******************* *******


الطريقــــــه:

اولا : يخفق البيض باضافه الفانيليا ,


وينخل الدقيق ويضاف اليه البكنج بودر



ثانيا: نحضر اناء عميق نضيف السكر + الماده الدهنيه ويخفق بالمضرب الكهربي لمده 3 دقائق تقريبا حتى يصبح متجانس





ثالثا: يضاف اليه البيض المخفوق مع الفانيليا ونعاود الخفق بالمضرب الكهربي لمده 3 دقائق حتى يتجانس مره اخرى ثم يضاف الزبادي او اللبن الحليب ونخفق ايضا حتى يتجانس تماما





رابعا: يضاف الدقيق بالتدريج مع التقليب بالملعقه في اتجاه واحد على طريقة دائره ونصف قطر


( يعنى نعمل دايره ونقطعها بنصف قطر بعدين نشيل المعلقه ونبدأ تاني دايره من نفس المكان والاتجاه ونعمل نص قطر وهكذا)



الى ان يختفي الدقيق ونضع غيره وهكذا حتى ينتهى المقدار



وبيبقى شكل العجين كده زي الصوره دي


وطبعا النكهات بقى براااااااحتكم ممكن نحط شيكولاته انا باحبها تقيله زي كده


يا اما تجيبى كاكاو وتحليه فى مايه او شيكولاته وتسيحها فى حمام مايه سخنه كده يعنى


وممكن تحطي قرفه او نسكافيه بيبقى يجننننننن وممكن جوز هند مع العجين واي نكهه تحبيها ان شاء الله تمشي





وممكن تعملي خليط من نكهتين زي كده مثلا

وبتطلع زي طبق الكيك الى فوق خالص ده



الكميه الى احنا عاملاناها فوق دي تعمل صنيتين متوسطتين



خامسا: نحضر صنيتين متوسطتين ويبطنوا جيدا( بدهنها السمن ثم رش الدقيق عليها) ونصب العجين فيها وندخلها الفرن على درجة حراره 170 مئويه وتنضج بعد حوالي 20 دقيقه



وبتطلع شكلها كده يا حلوين









ما تفتحوش الفرن كل شويه عشان ما تهبطش على الاقل فى اول عشر دقائق ما تفتحهوش خالص






*لمعرفة اذا كانت نضجت من الداخل يمكن غرس سكين جاف فى منتصفها لو طلع نظيف لا يحمل عجين تبقى استوت:d




وبالهنا والشفا يارب


وادعولي بقى لما تجربوها بس مش تبوظوها بقى


بس كده يا حلوين