الثلاثاء، 28 أبريل، 2009

طاجن الباميا باللحمه الضاني


السلام عليكم يا مطبخيينا الاعزاء


بعون الله تعالى وفضله هانفتتح النهارده سلسلة مطبخ المبتدئين الى هانطبخ فيها طبخات عاديه وسهله ان شاء الله ونراعي فيها ان الناس الى بتقرا يادوب بيعرفوا يعملوا شاي


سواء بنات صغنين او كبار بس شلت او رجاله يا عينى عذاب وغلابه وقاعدين من غير جواز زي الشبابيك الى من غير ازاز


وعموما انا كل البوستات بعد كده هراعي فيها الناس الغلابه دول وافصل شويه فى الكلام


هانبدأ النهارده نعمل اكله عتيقه من المطبخ المصري العظيم الشأن الى ماكلنا ومبوظلنا الدايت


هانعمل طاجن باميا باللحمه الضاني


سامعه حد بيقول يعععع ضاني مش باحبها


احب اقولك ياعمنا ما تبقاش تاكل انت اللحمه الا ان انا اكتشفت ان اللحمه الضاني دي موجوده عشان نعمل بها الباميا

والباميا برضه موجوده عشان تنطبخ مع اللحمه الضاني فقد خلقوا لبعضهم الاثنين الحلوين دول .


بجد الباميا باللحمه الضاني شكل تاني يا جودعان


ندخل على المطبخ وكفايه رغي



هانعمل نص كيلو باميا وده هايكون كافي لحوالي 3 اشخاص

وهانحتاج معاه واحد بصله متوسطه

اثنين فص توم

واحد قرن فلفل اخضر (يفضل يكون حامي او قرن شطيطه يعنى ) مش عايزين حامي عادي تمشي

نص كيلو طماطم

او يعنى اربعه أو خمس حبات


وطبعا لحمه ضاني برضه نقول نص كيلو


ابو زيد بلاش انت لحمه روح للجزار هات منه حته ليه كفايه عليك

ههههههههههههههه


الطريقه

هانفرم البصل والتوم

ونجهز الحله الى هانشتغل فيها تكون ناشفه

ولما تسخن نحط فيها نص معلقة سمنه

او ممكن لو عندنا ليَه بتاعة اللحمه الضاني نقطعها حتت صغيره ونحطها على طول فى الحله السخنه وهى بتسيح لو قلبناها دقيقتين


ونحط البصل اولا ونقلبه لمدة 3 دقايق يادوب يدبل وبعدين نضيف التوم المفروم برضه ونقلب دقيقتين

وبعدين الفلفل ونقلب كمان 3 دقايق لحد ما البصل يصفر


ونكون عملنا الطماطم فى الخلاط (هانقطعها اربعه ونحط معاها ربع كباية مايه فى الخلاط ونضربها )


ونطشها بقى مع البصله ونشهق واحنا بنطشها

هههههههههههههههههه


ونغطي عليها ونسيبها تغلي ولما تغلي نوطي عليها النار ونحط لها الملح زي ما نحب ونسيبها بتاع نص ساعه


الباميا بقى فى النص ساعه دي نجهزها


هانحط مايه تغلي على النار


وعلى ما تغلي نكون قمعنا الباميه

الى هو نشيل الحته فوق فى الباميه ونشك واحده الباميه شكه واحده بالسكينه من الجنب عشان تستوي من جوه


وطبعا ما نشيلش نص قرن الباميا واحنا بنشيل راسه من فوق


ونغسلها وبعدين نسقطها فى المايه الى غليت خلاص

ونسيبها على النار بالكتير ربع ساعه اول ما تبدأ تلين كده فى ايدينا

وبعدين نقلبها فى مصفاه فى الحوض ونصفيها من المايه اللزجه دي وانا باحب كمان اغسلها باسيب عليها شويه مايه خفيف كده


وبعدين كده تكون الطماطم اتسبكت نقوم مزودينها شوربه اللحمه الضاني


ابو زيد انت حطيت ليَه خلاص حط مايه انت بلاش شوربه (زعلان انت من اللحمه )


وبعدين نسقط الباميا بقى فى التقليه نسيبها لحد ما تغلي وبعدين نصبها بقى فى الطاجن ونرص اللحمه على وش الطاجن وندخلها الفرن لمدة ثلث ساعه تقريبا لحد ما تتشرب الصلصه ووش الطاجن يحمر


ممكن نسيبها تغلي على البوتجاز فوق ربع ساعه بس نوطي عليها عشان ما تلزقش


وبعدين نصبها فى الطاجن ونحط على وشها اللحمه ونولع لها الشوايه بقى خمس دقايق بس عشان وشها يحمر


وبتطلع من الفرن تزغرد وتقول كولوووووووووني بقى


طبعا هاتقولولي فين الطاجن يا نصابه انتى عاملاها فى قالب بايركس

هاقولكم والله يا جودعان الطواجن بتاعتي كانت طالعه دليفري لبن رايب يومها فقلت القالب بقى ما يقولش لا



دي الطريقه التقليديه لطاجن الباميا باللحمه الضاني


نيجى بقى للغلابه بتوع الدايت مش هانحرمهم من حاجه بتيتا


اي خدمه


انا كنت على فكره مش باكل الباميا فى الدايت على اساس انها لازم نعملها تقليه وفيها سمنه وكده يعنى


انما مره من ذات المرارير رضا فقعنى بمبه زين الزين وقالي هاجيبلك سمك وانا جاي وبعدين كلمته الساعه 3 فين يا بوي السمك قال اخخخخخخخخخخخخ نسييييت


جريت على التلاجه عشان كان بابا هايتغدى معانا مش طالبه تهزيء


كان عندي لحمه ضاني مشوحاها وقلت اسيبها لبكره طبعا جري كملت طبيخها


وطلعت الباميا من الفريزر (انا باجيبها واقمعها واسلقها واعينها فى اكياس فى التلاجه تبقى جاهزه على الطبيخ على طول )


وكذلك الطماطم دايما عندي صلصة طماطم مركزه جاهزه فى الفريزر برضه على طبيخ على طول (هانعمل بوست ان شاء الله عن حفظ الخضار فى التلاجه )


قووووووووم طلعت كيس الباميا وكيس الطماطم


وفى الكبه حطيت البصله والتومه والفلفل واخبط فى الكبه


وحطيت كله على بعضه وعليه الشوربه بتاعة اللحمه الضاني


وخلاص نصف ساعه كان الاكل جاهز


كانت تحفففففففه واتمسحت وطبعا انا كلت منها لان مافيهاش سمنه ولا ليه واللحمه الضاني كانت يومها موزه مافيش فيها دهن


بث كده

الى عنده سؤال يجوووووووووووولي يا بوي


والى يجرب يقولي كالعاده





الخميس، 23 أبريل، 2009

لقمة القاضي




السلااااااام عليكم يا حلوين




النهارده حلووووو يا حلو انت يا حلو






طبعا لقمة القاضي بتهيئلي مافيش حد ما بيحبهاش


لها اسامي كتير


ساعات الاقي ناس بتقول عليها زلابيا


وناس بتقول بقلاوه


مش هانختلف يعنى المهم ناكل


ههههههههههههههههههههههه




ومن الجدير بالذكر


حلوه الجدير بالذكر دي


المهم لقمة القاضي دي دايما لما اعملها افتكر شخصيه عدت عليا فى الذاكره السحيقه


كان واحد بيمشي جنب بيتنا زمان ينده ويقول


لقمه يا سيدى لقمه


بنغمه كده عجيبه وفريده


طبعا انا ما كنتش فاهمه اساسا هو بيقول ايه الاول




المهم الراجل ده كان نضيف نضافه يا جودعان


اه والله مش عشان كان ماشي فى الشارع كان حد مش نضيف يعنى


لا كان بيلبس يوني فورم ابيض ايوه والله العظيم


ومكوي ومزهر وبيشيل لقمة القاضي فى صنيه كده كبيره على راسه والصنيه المونيا وبتلمع اخر حاجه ومتغطيه بقماشه بيضه نضيفه كذلك


ومعاه مسند خشب كده شايله على كتفه وكل ما حد يجيش يتشري منه يقف وينزل المسند الخشب الكبير ده ويحط عليه الصنيه وبعدين يدي الى طلب ويرجع يشيل تاني




سنين سنين وهو على هذا الحال اوعى عليه الاقيه راجل عجوز وفى نهاية عهدي به فى شارعنا القديم كان بيمشي ومعاه بنت صغيره لانه ما كانش بيشوف كويس


دؤؤؤؤؤب نشيط نضيف متقن لعمله عنده اصرار على العمل والانتاج رغم تقدمه فى السن




ايه الرغي ده




قدامي على المطبخ






المقادير بسرعه بقى بلاش رغي




كوباية دقيق ابيض


كوباية نشا


( النشا الى بيخليها تطلع ناشفه زي الجاهزه اكتشفت كده مؤخرا )


كوبايه ونص مايه


ملعقه كبيره خميره عاديه او فوريه (بس انا باحب العاديه )




بث كده


اه والله




الطريقه




بنخلط الدقيق على النشا الاول


وبعدين نكون جهزنا الخميره دوبناها فى شوية مايه دافيه وربع معلقة سكر




وبعدين بقى بالمعلقه او المضرب ونحط المايه على الدقيق والنشا وطبعا قبل المايه نحط الخميره


ونزود المايه شويه شويه عشان جايز ما نحتجهاش كلها(لكن هى عموما بتبقى عجينه سايبه )




وبعد نغطي عليها وسيبها ساعه تقريبا وهاتبقى شكلها كده




وده بيكون سمكها كمان والخميره بتخليها تشد شويه وتبقى فيها فقاقيع زي دي كده





اهم حاجه بقى بعد كده تكوني سريعه شويه قدام النار طبعا فى الاول مش هاتبقى سريعه ولا حاجه ده انتى هاتبقى هبله


فانصح اي واحده هبله قصدي اول مره تقف فى المطبخ انها تعمل نص الكميه بس فى الاول


وكمان تستخدم طاسه صغيره على ادها كده نونو




هانبدا نقلي بقى


نجيب طاسه زي الى فى الصوره دي عميقه شويه ونحط فيها زيت كتير ونحطها على النار تسخن


والعجينه قبل ما نبدا شغل نقلبها عشان الفقاقيع الكبيره دي تروح شويه وما يبقاش شكلها وحش وكمان ما تفرقعش فى وش حضرتك


وهانشكلها ازاي


معلش دي ما عرفتش اصورها عايزه فيدو وانا كنت لوحدي


بس هاوصفها( طبعا بنهدي النار بقى )




هانجيب معلقه صغيره وناخد بها عجينه ونبل صباعنا السبابه مايه وبعدين بطرف صباعه وبسرعه وخفه كده يا خفه وتنزل العجين مره واحده وفى مكان واحد فى الطاسه عشان يطلع مدور زي الى فى الصوره ده




ها اقريها تاني عشان تفهميها والى ما فهمهاش يقولي وانا ابقى اصورها فيديو المره الجايه ونستعين بصديق




وطبعا بسرعه نحاول نملا الطاسه عشان تاخد سوا واحد


وطبعا ممكن تطلع منك منبعه مش مدوره اوي مش مشكله كله هايتاكل ما تعذبيش نفسك


وهايكون شكلها كده يا حلوين




ونفضل نقلبها كل شويه عشان تاخد لون دهبي حلو كده







وبعدين نطلعها على كلينكس لما تحمر طبعا


ودقيقه واحده ونسقطها فى شربات (سيرب - قطر ) بارد طبعا ونقلبها ونسبها 3 دقايق لو بنحبها تشيل سكر شويه


ونطلها فى مصفاه


وبعد لما تبرد نقدر نضرب طبق زي الى فى الصوره فوق ده وبكده نكون قضينا على ام الدايت الى بنعمله


هههههههههههههههههههههههههههههههههه




فاتيما ما تعديش من جنب البوست ده خالص ماشي


ابقى تعالى فى ا لاوبن داي يا اختي




كالعاده يا قطاقيط الى يجرب يقوووووولي



ومن المره الجايه ان شاء الله نبدا مجموعة بوستات جديده تحت تبويب مطبخ المبتدئين



لان كتير طلبوها مني سواء بنات لسه هايتجوزوا او كمان ياعينى رجاله مغتربين ويقعدوا يقطعوا فى قلبي ويقلولي بتجوعينا وكده يعنى



المهم هايكون الكلام فيها على طبخات عاديه مش اصناف صعبه ولا جديده



وكمان هاعمل بوستات تانيه ازاي تبقى ست بيت شاطره مش عبيطه



ولا ايه رايكم يا قوم









الأحد، 19 أبريل، 2009

لحمه بتلوا بصوص البرتقال

احبائي المدونين

اولا قبل ما ندخل على الطبيخ حد فيكم يشوفلي حل انا مش عارفه افتح المدونه بتاعتي الرئيسيه على الاكسبلورر العادي مش عارفه مالها
اتصرفووووووووووا وحلولي المشكله دي

انا بافتحها مع فاير فوكس او اوبرا الله يصلح حالها عاشقة الرومانسيه الى قالتلى


ندخل على الطبيخ

البرتقال

طبعا الايام دي ومن شهر فات والبرتقال البلدي كتير اوي فى السوق
وانتم عارفين انى باحب استخدم الحاجه فى موسمها
ايمانا منى ان وجودها في الوقت ده فى المكان ده لها حكمته

المهم ندخل على الشغل
هانعمل حوالي نص كيلوا لحمه
انا هنا عامله لحمه بتلوا قطع
وعملتها برضه ريش بتلو
وطبعا تنفع لحمه عاديه بس هتاخد سوا اكتر على النار
نص كيلو لحمه
ونعمل التتبيله بقى
انا حبيت اعمل التتبليه بتاعتها كلها سايله
يعنى مثلا كوباية عصير برتقال
وعصير بصلتين
وممكن لمون بس البرتقال كفايه
وربع كوباية خل
وملح وفلفل وبهارات زي ما تحبوا
وممكن ربع معلقة توم مجفف او فص واحد توم وممكن ما نحطوش اصلا
البهارات كلها تكون مطحونه كويس كمان
كل ده نتبل به اللحمه لمده 3 ساعات على الاقل يعنى ممكن نعملها من بالليل
وبعد كده هانحطها على النار لحد لما تستوي ولو التتبليه بتاعتها نشفت قبل ما تستوي نبقى نزودها مايه ونسيبها كمان شويه
لو كانت بتلوا هاتستوي على طول مش هاتستحمل عشان متبله
المهم بعد ما تستوي وقبل ما تنشف اوي ناخد من الصوص بتاعها حوالي كوبايه
ونسيبها تكمل وتنشف وتتحمر زي كده
بعد كده نشيلها من الحله او الطاسه او وات ايفر
حلوه وات ايفر دي صح ؟
وبعدين نرجع للصوص الى شلناه ونرجعه تاني على النار ونجيب معلقة دقيق كبيره
وندوبها الاول فى ربع كوباية مايه وبعدين ننزلها على الصوص الى فى الطاسه من خلال مصفى سلك عشان ما ينزلش كلاكيع دقيق ونقلب فى نفس الوقت بسرعه
هاتبقى شكلها كده
ونسيبه بقى يغلي زي الصوره دي
يادوب 3 دقايق ويبقى تمام
جايز نحس انه تقيل ومحتاج يكون اخف
ممكن نزوده عصير برتقال او شوربه او حتى شوية مايه
وبعد كده بقى يا اما نرجع اللحمه تاني تاخد غلوه دقيقتين كده مع الصوص
ياما نقدمها زي الصوره دي
يعنى نحطها فى الطبق الى هانقدمه زي ما هى ناشفه ومحمره بس تكون سخنه طبعا
ونحط معاها الصلصه فى طب تاني او فى قشرة البرتقال زي ده كده
وممكن نحط معلقتين صوص بس على اللحمه زي كده
وعلى فكره الصوره دي ريش بتلو مش قطع
يعنى تمشي كده وكده برضه
وكمان
بالنوسبه للصوص
المفروض ان الصوص الى من النوع ده بيتحط عليه كريمه لباني فى الاخر معلقتين كده
او الدقيق ده ندوبه فى حليب
الا انى مش باحب احط البان مع اللحمه لان اللبن فى كالسيوم
والكالسيوم ده بيمنع امتصاص الحديد الى فى اللحمه
على عكس بقى البرتقال الى فيه فيتامين سي والى بيساعد الجسم على امتصاص المعادن من الطعام وخصوصا الحديد
وعليه الواحد من المفيد اوي يشرب كوباية عصير برتقال او لمون مع الاكل او بعد الاكل مباشرة
واللحمه بصوص البرتقال تنفع مع رز وتنفع مع مكرونه
العيال عندي حبوها اوي مع المكرونه
واحب اقولكم ان رضا يومها قالي انا هابقى ادخل اقولهم ان الريحه كانت جناااااان
وقالي الصوص ده اسمه ايه
قلتله ده اختراع وهاسجله باسمي فى الشهر العقاري المطبخي
قالي طيب سميه صوص الرضا
هههههههههههههههههههههههههههه
ربنا يرضى عليكم يارب
وانتى يا فاتيما وانا وامثالنا الى بيعملوا دايت كفايه علينا نص رغيف سن مع قطعتين لحمه وزي بعضه معلقتين صوص وطبعا طبق سلطه خضرا
على فكره عملت نفس الطريقه تقريبا مع اختلافات بسيطه مع الفراخ وان شاء الله نبقى نعملها تاني مع بعض
كانت تحففففففففه
والف هنا يارب
والى يجرب يقولي

الأحد، 12 أبريل، 2009

الـــلـٍبــــــه


ازيكم يا اعزائي ا لمطبخيين
انا النهارده عاملاكم حاجه اكيد هاتضربوني عشان يمكن اغلبكم مش هايعرف يوفرها
بس انا الامانه تحتم عليا انى برضه اقولكم يمكن حد فيكم يستفيد
اولا انتم عارفين انا باحب اعمل الحاجه فىموسمها
معلش الموضوع ده كان لازم ينزل من شهر على الاقل
لكن يلا بقى احفظوه يمكن ينفعكم
انتم عارفين لبن السرسوب ؟؟
بتاع البنى ادمين
ايوه
الى هو بينزل للبيبى فى اول 3 ايام بعد الولاده
ده بيبقى فيه طبعا فوايد جمه
حلوه جمه دي
بجد حاجه طبعا سبحان الله فوق الوصف ولو قعدنا نتكلم عن لبن السرسوب ده محتاجين ساعتين
كمان الجاموس والبقر عندهم نفس القصه
لبن السرسوب
سبحان الله على راي واحده فلاحه
تقولي هو ده الى بيصلب العيال
ده العجل بيشربه وبعد ساعه يقوم يقف على حيله
هههههههههههههههههههههههههههه
المهم لبن السرسوب ده بقى اسمه الحركي الفلاحي لــــبه (بتشديد الام وكسرها )
ودي طبعا لازم تيجى من حد بيربي بقر او جاموس او حتى غنم بس انا ما جربتش الغنم
وطبعا لازم تكون الجاموسه والده
ماليش دعوه بقى تجبوها منين اتصرفوا
هههههههههههههههههههههههههههههههههههه
انا قلت لام محمد واول ما الجموسه بتاعتها ولدت جابتلي يا اخويا وانا مااااااالي
وعلى فكره موسم الولاده بتاعهم بيبقى فى اواخر الشتا
ايوه زي اغنية اليسا
ندخل على المطبخ بقى
الطريقه سهله جدا جدا جدا
اللبه الى بنجيبها من الجموسه بتبقى عامله زي اللبن الحليب بالظبط
بس تقيله ولونها اصفر ( زي اللبن المكثف كده فى شكلها بس )
دي ممكن تحفظيها في التلاجه اسبوع مثلا وتفضل سليمه
نعملها ازاااااااي بقى
تاخدي كوبايه من اللبه
ومعاها خمس كوبايات حليب عادي (مغلي طبعا وبارد )
والسكر بقى زي ما تحبي (أنا باحط حوالي 3 معالق كبيره انا باحب الحاجه سكرها قليل )
وتقلبي كله فى بعضه
وفى طاجن فخار مطلي او بيركس او حتى صنيه عاديه
وتحطيها فى الفرن وهو سخن
بسسسسسسسسسسس
هى بتغيب شويه يعنى ممكن تقعد نص ساعه او ساعه الا ربع على ما تحمر كده زي الصوره الى فوق دي
هاتلاقيها بقى ربطت ووشها بدأ يحمر كده بس خدي بالك بتحمر فجأه عشان كده طلعت حته وحته كده
المهم تطلعيها وتسبيها تبرد شويه بقى
وتقطعيها بقى بالظبط بتبقى عامله زي الكريم كراميل
بس احلى بكتيييييييير
حقد عشان احنا عندنا ام محمد وانتم لا مش عاااااااايزين

الأربعاء، 8 أبريل، 2009

الـبـيـتـــزا

واخيراااااااا البيتزا
شوفوا يا حلوين احنا هانبدأ شغل على طول مش عايزين رغي بقى
هانحتاج ايه
عشان نعمل بيتزا كبيره يعنى كبر مقاس فى الصواني العاديه مش الصواني بتاعتي انا
هانحتاج تقريبا مقدار عجينه واحد من عجينة المخبوزات الى عملناها مع بعض
(وفاتيما فكرتني ان ممكن فى عجينة البيتزا نزود ملح وتوابل وانا عن نفسي باحب احط زعتر وجنزبيل )
ولو حد بيحب البيتزا رقيقه اوي ممكن يبقى يشيل جزء من العجينه صغير برضه ما نخليهاش رقيقه اوي عشان ما تنشفش
يبقى كده بقى عايزين مقدار عجينة مخبوزات
ومقدار من صوص صبرني الي انا اخترعته وعملناه من شويه
وهانحتاج حوالي 400 جرام جبنه موتزريلا
وممكن كمان نعمل خليط من الجبنه (جبنه رومي وجبنه موتزريلا وجبنه فلامنك او كمان بارميزان يعنى اي جبنه بتسيح )
المهم البيتزا الواحده بتاخد من 300 الى 400 جرام
و 3 معالق كبار زيتون اسمر حلقات ويمشي اخضر ما يقولش لا وممكن الاثنين
و فلفل اخضر الوان ويمشي اخضر لواحده برضه مش هاعيط يعنى مقطع مكعبات او ترنشات مدوره احلى
كمان واحد حبة طماطم كبيره مقطعه ترنشات مدوره او نص دايره
ويا حبذا لو كمان 3 او 4 معالق من المشروم الى شوحناه فى معلقة زيت كده على جنب
ممكن نعمل البيتزا بسسسسسسس بالحاجات الى فاتت دي وتبقى بيتزا خضروات
وممكن بقى نزود اي نوع لحوم نحبه
هاديكم شوية امثله فى الاخر مع الصور
طيب هانبدا شغل
أول حاجه العجينه اهو جاهزه
طبعا احنا سبناها ترتاح لمده عشر دقايق وبعدين لو كنا عاملين اكتر من واحده بنقسم العجين على اد العدد بتاعنا
وبعدين نحطه على صنيه مفروشه دقيقه ونغطيه بقماشه نضيفه ونسيبه من ساعه الى ساعتين حسب الجو طبعا
عشان تخمر ولما تخمر نبدا بقى نفردها
شوفوا احنا ممكن نفرد العجينه دي كده على الرخامه او على اي ترابيزه عندك بالنشابه ونحاول نحافظ على انها تفضل مدوره وطبعا هانفردها كده بالنشابه فلازم كمان يكون تحتها دقيق وعلى وشها دقيق زي الصوره دي عشان ما تلزقش فى الرخامه او فى النشابه
وكل ما يضيع الدقيقه وتبدأ تلزق نرش رشه خفيفه ونوزعها بايدنا ونرجع نفرد تاني وكمان نحط تحتها لحد ما ناخد المقاس الى احنا عايزنه ويبقى كده تمام ونقلها فى الصنيه بقى
والطريقه التانيه لفردها اننها نحط معلقة زيت فى الصنيه الى هانعمل فيها البيتزا وبعدين بادينا بقى نفرد العجينه نبططها يعنى لحد ما تاخد شكل الصنيه
انا عن نفسي بافضل الطريقه التانيه خصوصا لو عامله كميه
طبعا بعد ما نفردها نسيبها برضه مفروده فى الصنيه قبل ما نبدأ شغل عليها حوالي نص ساعه كده عشان ترجع ترتفع تاني لاننا لما فردناها طلعنا منها الهو ا الى نتج عن التخمير ا
وبعد ما نفرد العجينه ونحطها فى الصنيه زي الصوره دي كده
زي ما شايفين كده بدأن بقى نحط الطبقات
اول حاجه بنحطها هى الصوص صوص صبرني يارب
وبالنسبه للحريم الشلت ممكن نحط كاتشب بس او كاتشب على مايونيز وبس
وبعد كده نرش الجبنه
ممكن نحط ثلثين الجبنه ونسيب الثلث الاخير نحطه فى الاخر خالص فوق
وبعد الجبنه الاولى نحط بقى نوع اللحوم لو كنا هانحط لحوم
ممكن لحمه معصجه عاديه زي دي
وممكن كمان نعملها بحلقات السوسيس زي دي
وممكن نعملها بالخليط من كل حاجه من دول زي كده مثلا
وممكن سلامي وممكن جمبري وممكن سمك او تونه وممكن شاورمه وممكن اييييي حاجه
كمان انا دايما لما يكون عندي عزومه وانتم عارفين ما نتواصش فى العزايم فى كميات الاكل طبعا لازم بيتبقى لحوم
والحوم البايته دي بتبقى بايشه كده وما لهاش لازمه
فانا باقطعها كلها وشويه بصل على توابل على حبشتكنات كده معاها واعمل بيها بيتزا بتبقى زي الفل وياسلام لو حته فحمه فى وسطها بعد ما تخلص تديكى نكهة الباربكيو
المهم يعنى اي نوع لحوم
وزي ما شايفين فى الصوره بقى
فوق اللحوم باحط بقى الفلفل والطماطم والمشروم والزتون و ثلث الجبنه الى باقي لو ما كناش حطيناه
الكل كليله يعنى
فضفضه كمان فكرتني بالزعتر انا باحب احط على الوش شويه زعتر بنفركه على الوش عشان يطلع ريحته
وكمان لو كنت عاملاها جبنه بسه بيبقى النعناع مالوش حل
وبندخلها الفرن بتاخد من ثلث ساعه الى نصف ساعه فى فرن حامي يعنى 200 درجه على الاقل
وطبعا اول ما تستوي العجينه بنطلعها ونقطعها مثلث زي الصوره الى فوق او مربع زي دي مثلا
وبالهنا والشفا والى يجرب يقولي خيلكم جدعان بقى

صوص صبرني

معلش كمان الصوص ده هاقوله بسرعه كده عشان برضه انا باستعمله فى اكتر من حاجه
مش عارفه اسميه ايه عشان انا اخترعته وحيث انى مستعجله فسميته صوص صبرني
الصوص بقى بسرعه نعمله برضه قبل البيتزا عشان هانستخدمه فى البيتزا
المقادير :
نص كوب مايونيز
توابل زي ما تحبي (يعنى لما تكوني هاتستخدميها مع اسماك حطي توابل سمك ولما تكوني مع لحمه حطي لحمه )
3 معالق عصير لمون
نص كوب كاتشب حار (او مش حار ) ولو عايزين نولعها ممكن نحط صويا صوص بدل الكاتشب
ولو ما لقتيش كاتشب ( حطي في الخلاط الآتي: معلقتين صلصة علب بس من الى لونها فاتح + واحده فلفل احمر حامي او حلو زي ما بتحبي +معلقة سكر صغيره + معلقتين خل كبار او عصيرلمون + معلقه كبيره زيت )وتخلطيهم مع بعض فى الخلاط
وبعد كده تحطي عليهم الحاجات الى فوق دي بقى المايونيز والتوابل واللمون واي حاجه معديه قدامك هاتمشي
ههههههههههههههههههههههه
وده الصوص كده جاهز للاستخدام
وممكن يتقدم الصوص ده على السفره بارد كده زي ما هو على طول وممكن يتحط فى حاجات زي الكريب او البيتزا او يتدهن بها الباتيه او الاكير الحاده حاجات كتير
احيانا انا بعد ما اخلصها لو هاقدمها كصوص بارد احب احطها فى طاجن فخار او بايركس فى الفرن عشر دقايق بس تدفى يادوب عشان لونها بيحمر اكتر وبتبقى بتلمع وشكلها تحفه
ومعلش مافيش لها صور عندي مش عارفه ليه سقطت سهوا لما اصورها هابقى انزلها صور ان شاء الله
بس يااااااااارب نوصل للبيتزا بقى
هاروح مشوار وارجع لو لسه في نفس هانأكلكم بيتزا ان شاء الله

عجينة المخبوزات

مش معقول كده على فكره

فاتيما يا حبة عينى قاعده مستنيه البيتزا وانا مش عارفه اوصل للكمبيوتر من يومها

معلش يا فاتيما والله يا اختي الوندوز بتاعي ضرب اصل الحكايه نقاصاه وغيرته وكمان برنامج الصور الى عندي ما اشتغلش عليه اصلى منزله فيستا عقبال عندكم يعنى

ام هند بقى بلاش رغي على المطبخ بسرعه

هانعمل بسرعه كده اهم عجينه على الاطلاق فى عالم المخبوزات

يعنى تقدروا تسموها العجينه الام للمخبوزات كلها منها بنشتق حاجات كتير وهانستخدم المقدار ده فى عمل حاجات كتير اوي اوي عشان كده ركزوا معايا بقى

اولا المقادير :
اثنين كوب دقيق ابيض
نصف كوب زيت او سمنه او زبده مش هانختلف
حوالي كوب زبادي او حليب
معلقه صغيره خميره (فوريه او عاديه ) انا عن نفسي باحب العاديه الطازه بتكون احسن عموما
واحد بيضه

الطريقه:

أول حاجه : نربي الخميره ( يعنى ندوب الخميره فى ربع كوب ماء دافيء مع نص معلقة صغيره سكر ونسيبها ربع ساعه )

ونبدا شغل بقى

اولا هاننخل الدقيق وبعدين نحط عليه الزيت ونفركه كويس لحد ما يختفي تماما ونفركه كمان لحد ما تحتفي اي كلاكيع فى الدقيق ويبقى شكل الدقيق زي الصوره دي


بعد كده نحط الخميره ا لى زمانها لو كانت فوريه بالذات عملت رغاوي وزاد حجمها (كده تبقى سليمه لو فوريه العاديه ممكن ما تعملش كده بس بتبقى شغاله )

ونقلب العجين باطراف صوابعنا كده وبعدين نضيف البيض ونكمل تقليب وبعدين نضيف الزبادي او الحليب ونعجن بقى كويس لحد لما الدقيق كله يختفي ولو لقينا لسه فى دقيق ممكن نزود شوية حليب ا و زبادي او حتى مايه
ولو طلعت العجينه مننا طريه اوي يعنى ملزقه فى ايدينا وفى الوعاء ا لى شغالين فيه نزوده شويه دقيق صغيرين ونقلب لحد لما تدينى عجينه طريه ومتماسكه ومحترمه كده زي الى فى الصوره دي

معلش الصوره الى قبل ما ارش الدقيق باظت مني وانا بانسقها
المهم
العجينه كده تبقى جاهزه
لكن اي عجينه بالخميره لازم قبل ما نشتغل بها نسيبها الاول ترتاح حوالي عشر دقايق بس نغطي عليها كويس
بس كده
هاقوم انام ساعه كده اصل الشحن عندي فضي
واحاول اعملكم البيتزا قبل ما اروح نبدأ فى طبيخ الفرح
يلا سلام يا حلوين