السبت، 24 يناير، 2015

الكابوريا






الكابوريا ازاي  نشتريها ونقشرها ؟؟


دي اول صوره لنوع الكابوريا المنتشر في مصر ركزوا معايا لما تيجي تشتريها لازم تكون سليمه مش اديها واقعه عشان الي اديها واقعه دي غالبا بايظه كمان لما تتكي علي ما تتفقش في ايدك من تحت لازم تكون جسمها جامد .. ولونها زاهي ... شوفوا في حجمين ولونين للكابوريا في الصوره دي .. ليييييه ؟؟ لان الي فوق الي لونها زيتي دي نتايه اي بنت والي زرقا واديها طويله دي دكر اي ولد ... ولسه هاقولكم علامه تانيه لا تخطيء ان شاء الله .. المهم الكابوريا اهي صحيحه واديها سليمه وكمان تبقي تنقي الكابوريايه التقيله عشان يبقى فيها لحم





















طبعا بتوع السمك لازم يقولك ده كابوريا نوتي يا ابله ومبطرخه وطبعا بيقولوا كده على الدكوره عادي على اعتبار ان الناس مش عارفه يعني دول نفس الكابوريتين الي فوق دول بس مقلوبين ركزي معايا الي فوق الي نتايه المثلث على على بطنها ده عريض وقصير .... الدكر الي تحت الغطا بتاع البطن رفيع وطويل ... واضحه ؟؟

















هنقشرها ازاي بقى ؟؟ لو نايه ولو مستويه التقشير واحد .. اول حاجه هاتخلعي الرجلين بتاعتها كلها وهي بيبقى فيها لحم يعني لو مستوي تكسريها باسنانك وافترسي ما بداخلها خصوصا الادين الكبار الي فيهم كلابات .. ولو نيه ما ترميهاش طبعا ممكن ترمي الايدين الصغيرين او تعملي بيهم شوربه ... بعد ما تشيلي الايدين هاتخلعي الغطا ترفعيه بضافرك او بسن السكينه احسن وده الي هنفتح الكابورياياه من عنده من تحت الغطا وتفصلي الغطا الصدفي الي فوق عن الجسم الي تحت







































ده شكلها بعد ما تتفتح وطبعا انا كده باشتغل فيها وهي نيه مش مستويه ولسه محتاجه تنضيف ... عشان تنضفيها للطبيخ .. هتشيلي الجزء الصدفي ده خالص الي على الشمال ده هايترمي وممكن لو عايزه تعملي شوربه تغسليه وتحطيه مع الايدين بيعمل شوربه حلوه .. خصوصا لو كان في بطروخ اووووعي ترميه تسويه وتاخدي البطارخ من جواه عشان ما ازعلكيش










التنضيف بتاعها هتاخدي الجسم الي على اليمين هتلاقي فوق خطوك كده على الجنبين هشه عامله زي الاسفينج بتشيليها وكده بقى الي باقي عضم ولحم وبس تغسليها بقى على كده ..




طب ليه ما نفصصهاش لحم بس ؟ هو ممكن بس الحقيقه فقعه جدااااا وبتتهري الحمه بتاعتها انا بافضل اني اطبخها بالعضمه الاخيره بتاعتها بتحفظ اللحم وتخلي طعم الشوربه جميل وطبعا لو مصممه تخليها عادي هتنفع بس انصحك ما تخليش الا لو حجمها كبير عشان تبقى تستاهل






الاصفر ده البطروخ وبيبقى ساعات داخل في الاركان جوه العضمه عشان كده باقولك لو لقتيها مبطرخه يستحسن ما تنضفيهاش قبل الطبخ ولو نضفتيها ما ترميش العضم سويه يعمل شوربه ومصمصي البطروخ بقى










ودي شكلها وهي متقشره ومتنضفه ومغسوله وممكن تسيبيها كامله وممكن لو هتعمليها في شوربه او مدفونه في الرز تقسمي كل واحده اتنين من النص زي مافي الصوره كده في مقسوم وفي لا ... ولاحظي في مبطرخ وفي لا برضه





  

وطبعا ممكن نشويها او نسلقها بطرق كتير عادي وهي مقفوله بنغسلها من بره بس كويس عشان الرمل وبعدين بنقشرها ساعة الاكل بنفس الطريقه 
وعامة هي حلوه في كل الاحوال هاتوها بس واندهولي :D

الثلاثاء، 13 يناير، 2015

القراقيش او منين



المقادير
كيلو دقيق عليه 2 كوب سمنه او زيت او خليط منهم يبقى احسن .. رشة ملح معلقتين خميره بيره معلقة بكنج بودر حوالي كوبايه ونص لبن للعجن
الطريقه
تسيحي السمنه انا مش باقدحها لكن في ناس بتقدحها بيقولوا بتبقى بتقرمش اكتر لكن انا جربت الاتنين مش لاقيه فرق
المهم هاتحطي السمنه السايحه وسخنه شويه على الدقيق وتفركيه لحد ما يتشرب السمنه كويس هتكون بردت او بقت دافيه ممكن تضيفي البكنج بودر بعدين تكوني ربيتي الخميره في ربع كوباية لبن دافي ونص معلقة سكر وتسيبيها لحد ما تعمل رغاوي وتصبيها على العجين وتزودي اللبن الدافي وتعجني بقى لحد ما تتكور وتبقى تمام تغطيها وتسيبها ترتاح عشر دقايق بس بعدين تقسميها اتنين او تلاته على حسب المكان الي بتشتغلي فيه ... هتفردي بالنشابه لحد ما تديلك سمك نص سم تقريبا وتحطيها في الصنيه وتسيبها ساعه تخمر وبعدين اخبزي على نار حاميه
المحشي بالعجوه بتفرديها بس سمك اقل يعني 3 ملي مثلا وتحطي العجوه برضه تفرديها على نص العجينه بالطول بعدين تطويها بالطول وبالنشابه تعدي عليها بالراحه كده عشان تفردي العجوه جواها وتقطعي بالسكينه وترصيها في صينيه وتخبزي برضه
وبالهنا

الخميس، 8 يناير، 2015

سينابون



العجينه
4 كوب دقيق + نصف كوب زيت او سمن + معلقة صغيره خميره فوريه +معلقتين كبار سكر بودره + كوب حليب +رشة ملح + نص معلقه بكنج بودر
..
بندوب الخميره في ربع كوب ماء دافيء ونص معلقه صغيره سكر .. ونسيبها لحد ما تعمل رغاوي على الوش عشان نتاكد انها سلميه ....بنفرك الدقيق بعد ما نضيف عليه الملح والسكر والبكنج بودر  بالزيت او السمن لحد ما يختفي فيه .. نضيف الخميره والحليب تدريجي لحد ما العجينه تتعجن معانا كويس .. ونسيب العجينه ترتاح نص ساعه
..
هنفرد العجينه زي الصوره

 نخليها سمك حوالي نص ملل ونفرد عليها معلقة زبده خليها طريه مش جامده ومش سايحه عشان تتفرد وماتسيلش معاكي بعد كده حطي سكر خشن حوالي معلقتين كبار ونوزعهم بالطول وعليهم معلقة قرفه صغيره ونفردها زي الصوره
..
هنبرمها بشكل طولي ونقطعها زي الصوره دي

..
نرصها في صنيه وندهنها بخليط من البيض واللبن والسكر مضروبين كويس ببعض ونسيبها تخمر نص ساعه
.. بتاخد في فرن حامي حوالي ربع ساعه وتابعيها ممكن اقل حسب الفرن 
لو مش بتحبي القرفه ممكن تحطي نسكويك او بشر شكولاته خام .. او عجوه حتى مفرود رقيق ..اي حشو ينفع بالنكهه الي تحبيها 
لكن في الاصل السينابون بيتعمل بالقرفه والسكر البني
...............
صوص الكريمه :
نص كوب كريمة خفق .. لو مافيش هاتي كريم شانتيه عادي واضربيه وطلعيه خفيف شويه عن العادي
3 قطع جبنه نستو او 3 معالق جبنه كريم اي نوع عادي +معلقة زبده مش سايحه ولا جامده
فانيليا+نصف ملعقه بكنج بودر
هتخلطي ده كله مع بعضه في الخلاط او كبه المهم يتخلط كويس
..
صوص الشيكولاته
بتحطي الشكيولاته في حمام مايه سخنه او في الميكرويف بس على تفكيك المجمدات عشان ما تتحرقش ... تسيحيها يادوب ما تسيبهاش لما درجة حرارتها تبقى مرتفع وتجيبي مايه سخنه مش بتغلي يعني بس سخنه وتحطي تدريجي على الشيكولاته وتقلبي بالشوكه او بالمضرب بس مش على الدرجه السريعه لحد ما تتخلط وتعطيك قوام مناسب
..
اول ما يطلع السينابون من الفرن وهو سخن تنقليه في طبق التقديم وتحطي على كل واحده معلقة من صوص الكريم ولما تسيح تزيني بقى بالشيكولاته وممكن ما تحطيش شيكولاته زي ما انتي عايزه
....
ملحوظه الي في الصوره وحدات صغيره لو عايزه تعملي وحدات كبيره تبقى تكبري العجينه تخليها اعرض من كده وتلفيه تديلك دايره اكبر من كده وتخلي كمان سمك العجينه اكبر