السبت، 29 نوفمبر 2008

الخرشوف بالخضروات والجبنه

الخرشوف بعد ما جوعناكم بقالنا فتره غايبين عليكم
وخضار اهو يا داليا بنت الغربه لاجل عيونك
الخرشوف للي ما يعرفوش بيبقى شكله وهو اخضر زي الصوره الى فوق دي وده مش صباعي انا معلقه الصور دي من على النت هههههههههههههههههههههههههه
المهم طبعا احنا بنجيب الخرشوف وننضفه نشيل الورق الاخضر الى بره ده وبنشيل كمان قلبه
وعشان نجهزه كمان لازم نشوحه الاول فى معلقة سمن او زيت كده وننطقه بالحله لحد لما يستوي شويه وفى النهايه بيكون شكله زي الى فى الصوره ده والى برضه معلقنها زي ما انتم شايفين

ونرصه فى الصنيه كده زي ما هو قدامنا وبعدين نبدأ نحشيه
الحشو بقى بيكون زي ما تحبوا

انا باحب الحشو الى بيكون لحمه مفرومه معصجه + مشروم برضه مشوح قبل كده ومقطع صغير + زتون مفروم او مقطع صغير + جبنه رومي او متزريلا او شيدر مبشوره .
كل ده بنخلطه على بعضه ونحط تقريبا معلقه كبيره فى كل واحده خرشوف
وعلى الوش نحط معلقتين بشاميل او شريحه جبنه من اي نوع
وندخلها الفرن بقى على كده وطبعا كل المكونات مستويه اصلا يعنى يادوب تسخن والجبنه تسيح
قولي حوالي ربع ساعه وتطلعيها
ويكون جاهز للاكل على كده وممكن تقدمي معاه بطاطس محمره وكول سلو ويبقى اكل خفيف ولذيذ جدا

والحشوات بقى ممكن تغيري فيها على كيفك
فى ناس بتحشيه من غير لحوم وفى ناس بتحشيه سبانخ كمان وعلى وشه جبنه برضه
زي ما تحبي يعنى
وعلى فكره فى خرشوف مجمد نص سوى لما باتزنق باجيبه وبيبقى حلو برضه وسهل طبعا
وما لقيتش صوره بقى يا جماعه معلش
ايوه قولوا يارب رضا يصلح لها الكاميرا
الى يجرب يقولي





هناك 18 تعليقًا:

أحــوال الهـوي يقول...

الحرشوف من الوجبات اللي مش معتادنها يمكن الاسكندرنيه بيحبوه
بس ازي نعرف الخرشوفه الطريه من اللي مفتلة ؟؟

انا جربته باللحمة بس بدون جبنة

تسلم ايديك

تحياتي

صبرني يارب يقول...

احوال الهوى

والله انا بانقيه وهو اخضر من خلال انه يكون مش صغير اوي عشان الاقي قلبه بحم مناسب وكمان يكون اخضر وشكله فريش من بره اوراقه يعنى

انما ماقابلتنيش واحده مفتله قبل كده

وانا برضه على فكره مش باعمله كتير

ووجربه كده بالخلطه دي بيبقى حلو اوي

وتسلم وتعيش يارب ونورت
تحياتي لحضرتك

mostafa rayan يقول...

بصي بصراحة انا ماقرأتش البوست دة لكن قرأت بوست البسبوسة وان شاء الله هعملها او اقول للامي تعملها
تحياتي لمدونتك الطبيخية الجميلة

بنت الغربة يقول...

حبيبتى ياصبرنى ربنا يخليك ليا -ايوة كده كان نفسى من زمان اعرف الخرشوف ده بيعمل ازاى والباشا جوزى دايما يقولى اعمليه وأنا مطنشه لأنى ببساطه ماكلتوش اصلا قبل كده- بس انا هاجربه بكره ان شاء الله وهاعملها مفاجاه لجوزى - وربنا يعديها على خير-وأنا متشكرة قوى ياقمر - وعلى فكرة الوزغه يعنى البرص عندنا فى مصر وانا اتولدت فى السعوديه مش فى دبى-وتعالى نورينى ياقمر

صبرني يارب يقول...

داليا

اي خدمه يا جميل وضروري تقوليلي عملتي ايه فى الخرشوف

وتسلمى يا جميل

صبرني يارب يقول...

مصطفى ريان

طيب يا مصطفى بس شوف بقى يا اما تساعد ماما يا اما تجيب الطلبات على حسابك اها عشان ماما تدعيلى مش تقولك ام مريم والى يجي منها
هههههههههههههه

نورت يا مصطفى

أليس في بلاد العجائب يقول...

زي ما انتي عارفة اني باكل وكده:)

انا بصطاده من شوربة الخضار بسسسسسسسسسسس علشان الباشا ميقوليش اكلتي ايه واقول ساندوتش:) اهو اي منظر يعني

انا طول عمري مش باكله طبعا بس مؤخرا (مجبر اخاك يعني) بصطاده كده من شوربة الخضار علشان اخلص من زن نااااس :)

تسلم ايديكي :)

صبرني يارب يقول...

اليس

طيب كويس ان الزن بيجيب نتيجه

طيب جربي اعمليه كده وورينا الفلاحه عشان اقوله طيب

صبرني يارب يقول...

العفو يا استاذ بيبرس اي خدمه

لما تعمله ابقى قولنا طلع ايه

mony يقول...

مش عارفة يا ام مريم انا مافيش عمار بيني و بين الخرشوف ده خاااالص

اصل انا باكل الحاجة اللي شكلها يعجبني

مين عارف ممكن في يوم من الايام ادوقه


بس تامر طلبه مني قبل كده و قلتله خلي مامتك تعملهولك


كده بأه معنديش حجة

لما يرجع انشاء الله لو طلبة مني اهه الوصفه معايا ممكن اجرب
و زي مانا شايفة مافيهوش غلبة


طبعا تسلم ايدك يا جميل و مانتحرمش من وصفاتك الحلوة ديه

صبرني يارب يقول...

موني

ربنا يجيبه بالسلامه ان شاء الله او تروحي انتى له ويجمعكم على خير

وتسلمى ونورتي يا جميل

بنت الغربة يقول...

حبيبتى ياصبرنى انا جربت الخرشوف -معلش متأخر شويه- بس عملته الحمد لله وكان حلو قوى وعجب جوزى أخيرا - بس أنا ملقتش غير فروزن مش عارفه ليه بس طلع حلو قوى تسلم أيديك ياقمر - وعايزه طريقة الكولسلو لو سمحت ياجميل وشكرا مرة تانيه - تعباكى معايا- داليا -

صبرني يارب يقول...

بنت الغربه

طيب خيييييييير تسلم اديكي انتى والف هنا يارب

وانا على فكره باستسهل الفروزن كتير خصوصا لو في عزومه

والكول سلو عينى حاضر بس انزل شغل العيد بس الرقاق والبيتى فور

ان شاء الله انزل الكول سلو

نورتي يا جميل

خمسة فضفضة يقول...

السلام عليكم ورحمة الله وبركاته

تسلم اديكيا صبصب يا اختي دايما كده مدلعانا وجيبالنا الحلو كله

بصي انا عمري ما عملت الخرشوف ده ولا هاعرف الحلو من الوحش لو جيت اشتريه لانه اصلا مش بيتباع عندنا مش عارفه ليه
يمكن البياعين بيعتبروه مش من مستوانا

ههههههههه


بس تسلم اديك هاحاول اشتريه واجربه اصلي نفسي اجربه من زمان


----------

سؤال بيلح علي جدا

هو الجبنة القريش بتاعنا دي هي جبن الماعز اللي بيقولوا عليها في برامج الطبخ بتاع فتافيت ، اصلي باحسهم متشابهين خالص وكمان كانوا مره جايبين طريقة التصنيع لقيتها متشابهه الي حد ما

افيدوني افادكم الله

كمان طلب معلش عارفه اني غلست ، بسرعه نزليلنا بقي هانعمل ايه بالشرش اللي نزل من الجبنه القريش لان دي الحاجه الوحيده اللي مش عارفاها في استخدمات اللبن اعرف ان فيه فيتامينات وبروتينات كتير بس مشض عارفه هانعمل بيه ايه


سلام يا قمر وكل سنةوانت طيبه

صبرني يارب يقول...

فضفضه

لا اعتقد جبن الماعز دي مختلفه لانها بتتعمل بمنفحه تقريبا بس هادور عليها واقولك ان شاء الله

والشرش هاقولك على السريع انا مش بارميه غالبا لانه مفيد وانا باستحرم ارميه

اولا باعمل منه عصير الجوافه والفراوله وازودهم لبن كمان

وكمان ساعات اعمل بهم كريم بتاتسيير حسب اتسعملاته

وساعات بازود به البشاميل

بس كل ده لو كان الشرش شلتيه قبل ما تزودي الملح

انما بعد الملح بقى مالوش عندي غير استعمال واحد

انا بازود به المش

بس انا ما عنديش مش للاسف عشان لو جبته هاموت من كتر ما هاكله بس حماتي عندها

باحوشه لها لو كانت عايزاه وابعته

لكن لو هاتزوديه على المش فعلا يبقى لازم الاول تغليه كويس وتزوديه ملح عشان ما يخليش المش يدود ويفضل لو انك تعملي كده فى الشتا بس مش فى الصيف

بصي المصانع بياخدوا مصل اللبن ده الى هو ماية الجبنه ويزودوه لبن بودره وحاجات تانيه اي كلام ويعملوا منه جبنه قشطه وزبادي وحاجات من دي

وجربي الخرشوف مش هاتندمي ان شاء الله وابقى قوليلى النتيجه

وعنيه ليكى يا فضفضه

بنت الغربة يقول...

صبرنى ياحبيبتى ابقى ادخلى المدونه عندى وادينى رايك - رايك يهمنى
-داليا-

مسعدة يقول...

الله




انا جعت



مسعدة مسعود أبو السعود

صبرني يارب يقول...

مسعده

حبيبتى ما شوفتش ردك الاا لنهارده

نورتي يا جميل مدي ايدك وكلي طيب
ههههههههه