الاثنين، 29 يونيو، 2009

تورته بالفواكه والشيكولاته



السلاااااااام عليكم يا حلوين


انا قلت بقى نعملكم تورته لطيفه جميله كده بما ان احنا فى الصيف والمناسبات كتير



وبما انى مريضه حاليا وملازمه الفراش قلت اطبخ بقى وانا نايمه ما دام مافيش طبيخ فى المطبخ



هيا الى المطبخ


طبعا علشان نعمل التورته لازما ولا بد يكون عندنا كيك


هانحتاج لمقدار لكيكتين من الى فى الصوره ده


انا فى الحقيقه ما باحبش الكيك الاسفنجي

بينى وبينه طار بايت لا باحب اعمله ولا باحب اكله


انا باعمل دااااايما كيكه عاديه زي الى انا عملتها معاكم قبل كده هنـــــــــا



طبعا انا بافضل اعمل اكيك رقيق شويه يعنى بعد ما يستوي يبقى سمكه لا يتعدى الخمسه سم


وباقسم كل واحده اثنين


وكده هايبقى عندي اربع طبقات باحشي بقى الطبقات دي كريمه


اي نوع كريمه تحبيه كريم شانتيه

كريم باتسيير مخلوط على كريم شانتيه ممكن برضه ما يقولش لا


انا بافضل الكريم شانتيه دايما فى التورتات عشان عندي العيال مدمنين


بعد كده بقى يا حلوين هانعمل الاتي


بالسكينه وانقسم الكيك الى حشيناه ده الى نصفين متساويين بالتمام زي الصوره دي كده

ونغطي نص منه بالكريم شانتيه بس والنص التاني بصوص الشيكولاته زي الصور هالى فوق دي تماما


وانا باتعمد اقسمها كده عشان اخد راحتي اثناء التغطيه وما يتخلطوش على بعض وتبقى حوسه سعيده

وبعد كده باحطها فى التلاجه عشر دقايق بس عشان اعرف احركها


وبعدين اضمهم على بعض بقى يرجعوا دايره كامله زي ا لصوره كده


وبنعمل خط بالكريم شانتيه تزيين طبعا زي الصوره دي كده علشان نغطي الفاصل


وكمان نعمل حرف للنص الى بالكريمه عشان الفاكهه ما تتزحلقش من عليه

وتبقى ساعتها تمام زي الصوره دي

بعد كده بقى نجيب فاكهه اي فاكهه المتوفر عندك بس يفضل كده تكون لها الوان حلوه


انا هنا الى لقيته كان فراوله وكنتلوب وبرتقال


المهم

عشان نجهز الفاكهه ونحطها على التورته نعمل الاتي


نقطعها بالشكل الى نحبه بحث نقدر نرصها على التورته بشكل حلو


وبعدين نكون مجهزين شويه شربات صغيرين (قطر _شيره ) ونسخنه شويه مش لدرجه انه يغلي

ونحط فيه الفاكه ونقلبها شويه ونسيبها خمس دقايق وبعدين نصفي من عليها الشربات ونسيبها لحد ما تبرد خالص قبل ما نستعملها


والاحسن من كل ده الجيلاتين طبعا جيلاتين خام شفاف وندوبه فى مايه سخنه ولما يبرد نقلب فيه الفاكهه او حتى جيلى


بس انا بافضل استخدم جيلي لونه فاتح اناناس مثلا عشان ما يغيرش لون الفاكهه


وده كله عشان الفاكهه تفضل على لونها وما تدبلش وما تسردش مايه على التورته وتكون لامعه وشكلها حلوه


بعد كده بقى نرص الفاكهه على النص الى بالكريمه زي الصوره دي وبالشكل الى نشوفه حلو


والنص التاني ممكن تسبيه شكيولاته ساده كده او تكتبي عليه اسم

او تحطي بشر شيكولاته او فى شكيولاته تزيين بتكون على شكر ورق شجر او وردات او حيوانات للاطفال


او اي حاجه تحبيها


ويطلع فى الاخر الشكل ده




وممكن تعمليها فى كيكه مربعه بتقسميها نصين بحيث كل نص مثلث وتعملي نفس الى عملناه بيبقى تحفه برضه


وممكن بنفس الطريقه تعملي نكهات مختلفه


ان شاء الله كل ما اعمل افتكاسه من دول هاصورها واوريهالكم ازاي


يلا بقى قوموا اشتغلوا كفايه انا نايمه


والى يجرب يقولي





هناك 17 تعليقًا:

عاشقه الرومانسيه يقول...

انا باعترض وبشده
وهاعمل مظاهره وانقلاب فى المدونه دى
لانى مش بحب الكريمه
ولا بحب الكيكه تكون بيضا
انا عايزاها شيكولاته فى شيكولاته
هى دى التورته اللى تتاكل
انا مش هانكر ان التورته بتاعتك حلوه
وشكلها يفتح النفس
بس انا باتحيز للشيكولاته ورافعه لها الرايه دايما
ادمان ياحبيبتى تقولى ايه بقى

ঔღঔ نـــوارة ঔღঔ يقول...

ممممممممممممممممم

تجننن ياقلبي وسهلة جداااااا

انا مش بحب الكيكة العادية لازم يكون عليها كريمة او شوكلاته مممممممممممم

تسلم ايدك ياعسل

نكهة مغربية يقول...

أنا بقى ليسه مشفتش الموضوع بس نفسي أقولك انك وحشاني جدا و الله وحشاني
انا حروح أشوف الكيك و رجعالك
مووووووووحح

صبرني يارب يقول...

عاشقة الرومانسيه

طيب احنا يا اختي شوفنا منك تورته بالخيار حتى ؟؟

ايه البت دي
ههههههههههههههههههه

صبرني يارب يقول...

نكهه مغربيه

والله وانتى كمان وحشاني يا حياتي

والله ما منعني منكم الا الشديد القوي

يلا مستنيه رايك يا جميل

صبرني يارب يقول...

نوراه

انتى الى عسل وتجنني يا جميل انت


نورتي

نكهة مغربية يقول...

الحمد الله على سلامتك ياقمر مكنتش عرفه و الله انك عيانة الف بعد الشر عليكي
طريقة حلوة جدا في تزيين الكيك و شرحك روعة تسلمنا و الله من كل شر
مممممووووححح

صبرني يارب يقول...

نكهه

الله يسلمك ويكرمك يارب

نووووووووورتي

أحــوال الهـوي يقول...

ايه التعذيب ده

شكل التورته يجنن
رغم اني مش من هواة الحلويات لكني و جدت في الشرح و الصورة ما يسيل اللعاب و يثير الشهيه

رجاءا ممكن حته للغلبان

تحياتي

mony يقول...

ايه الجمال ده يا صبصب
انا مابستحملش اشوف قدامي تورتة و ما اكولش منها

ايه رأيك يا جميل لما نعمل الكيكيتين واحدة عادية و احدة شوكولاتة
و كل واحدة تتقسم نصفين
الشوكولاته حتحطهم فوق بعض
و الفايليا(العادية)فوق بعض

و تبقي تورته شوكولاتة و كريمة قلبا و قالبا
:)

mony يقول...

صحيح

سلامتك الف سلامة
الا رقدة السرير يا اختشي

الاولاد مش هينوكي علي قاعدة اساسا
اسأل مجرب

نكهة مغربية يقول...

حبيبتي ازايك النهارده
ان شاء الله تكوني بألف خير
شدي حيلك يا عسل
قو ليلي الفواكه بتحطيها في شربات دافية هي مبتدبلش؟؟؟؟؟؟؟؟ و تنزل مية؟
تسلمي لي يا عسل

صبرني يارب يقول...

احوال الهوى

يا فندم التورته كلها والله ابعتهالك

شرفت يااستاذنا

صبرني يارب يقول...

موني

اه طبعا ده ممكن جدا ويبقى احسن

انا باعمل كده مع النسكافيه بقى والحركات دي

والنوسبه للسرير والله يا موني سابوني اصله ما كانش ينفع اقوم اصلا

وبعدين يا اختي مريم قالتلى خليكى يا ماما وغسلت هى الاطباق بعد الغدا امبارح شوفتي الهنا الى انا فيه ؟
هههههههههههه

نورتي يا جميل

صبرني يارب يقول...

نكهه

الحمد لله انا احسن يا جميل

الفواكه لا مش بتدبل ولا حاجه لكن انا بافضل لو كنتى هاتسيبى التورته كتير بعد ما تزوقيها الفواكهه تتعمل بجيلاتين طبعا افضل وبعد ما تترص كمان ترشي عليها جيلاتين وهى على التورته بس خفيف

نورتي يا قمر

ذو الوجه المبتسم يقول...

السلام عليكم
ايه الموضوع الايام دى
انتم عندكم فرح ولا ايه
فين نصيبى من التورتى
وكمان الاكل
الله
تسلم ايدك
ممكن اخد معى حتة وانا ماشي

تقبلى تحياتى

شكولاتة يقول...

تورته اه ياني شكلها يجننن واكيد طعمها احلي :9

ماشاء الله عليكي بجد مبدعه
يابخت جوزك وولادك فيكي :)

بسم الله ماشاء الله :)