الاثنين، 31 أغسطس، 2009

طاجن السمان بالفريك



السلام عليكم


كانت طلبت مني مره شملوله حبيبتى صنف بالفريك بس يكون عشان يكون سهل


واخيرا جبته يا قوم


طاجن السمان بالفريك


السمان ده المفروض انه كان عندنا فى مصر من الطيور المهاجره وكان له مواسم

انما حاليا بقى موجود على طول وعملوا له مزارع


السمان صغير اوي ولما باعمله مش محشي بينشف ويبقى مش اد كده


كمان حشوه موال اوي خصوصا ان الجلد بتاعه خفيف وضعيف مش زي الحمام


المهم جربت اعمله الطاجن ده يلا نعمله بقى ونشوف هايطلع معاكم ايه


الاول طبعا باجيب السمان واغسله كويس بالملح وينضف ويبقى تمام


وبعدين باشق السمانه من ظهرها بالطول زي الصوره دي كده






نقول اننا هانستعمل خمس سمانات مثلا وبعدين بنتبله بقى باي توابل ولمون واي تتبيله نحبها


نيجى للفريك بقى هنحتاج حوالي كوبايه


الاول طبعا بنغسله كويس ولو كان عايز يتنقى ننقيه الاول وبعدين نغسله وننقعه ساعه مثلا وبعدين نصفيه كويس


وعلى النار نحط معلقة سمن بلدي ونكون محضرين بصله مفرومه ونحط البصله ونقلبها لحد ما تبقى شفافه


وممكن نحط الكبد والقوانص بتاعة السمان او لحم مفروم ونفضل نقلب ونحط بقى توابل وملح زي ما نحب


اي توابل لحمه تنفع


ونقلب لحد لما اللحمه لونها يتغير وتبدأ تستوي والميه الى نزلت منها تنشف وبعد كده نحط الفريك الاخضر ونفضل نقلب برضه لحد لما ميته تنشف وبعد كده نحط عليه ربع كوباية مايه ونسيبه على النار خمس دقايق بس


وبعد كده بقى نبدأ نرص الطاجن بتاعنا نحط شويه فريك وبعدين سمانه مفروده زي الصوره دي كده



وممكن نحط على وش كل سمانه حلقات بصل وفلفل وبعد كده نكمل فريك تاااااني وبعدين سمان تاااااني لحد ما تخلص الكميه


وبيكون الطاجن شكله كده


بعد كده نحط على الوش حلقات طماطم وفلفل ماشي برضه




وبعدين نغطيه بورق سيلفر ويدخل الفرن


بياخد فى الفرن حوالي ساعه

السمان مش بياخد سوي كتير والفريك اصلا احنا مسوينه


وبالنسبه للمايه الفريك بيتشرب المايه الى بتنزل من السمان وبيبقى تمام اوي


ولما بيطلع بيبقى شكله زي الصوره الى فوق دي وممكن نبقى نشيل الفويل فى اخر ربع ساعه عشان نحمر الوش


وممكن لو مش عندنا طاجن نعمل ده فى حله بايركس او حتى صنيه تمشي عادي


وعلى فكره الطريقه دي تنفع مع الحمام والفراخ كمان


لكن هايحتاجوا وقت اكبر فى الفرن طبعا


والف هنا يا حلوين والى يجرب يقووووووولي


هناك 12 تعليقًا:

عاشقه الرومانسيه يقول...

ونحجز اول تعليق
ونقول الوووووووووووووو

عاشقه الرومانسيه يقول...

سبحان الله رغم انى مش بحب المطبخ
ولا بقف فيه كتير
الا انى بحب اجى هنا
ليييييييه مااعرفش
بقولك ايه
لسه ساعه على المدفع وانا ريقى جرى
ارحميييييييييينى
سلام يااختى
اللهم انى صايمه

نكهة مغربية يقول...

السلام عليكم و رحمة الله
كده يا صبرني انت هنا و متجيش تزوريني ؟؟
معلش ّأنا بقى حعديها المرة دي بس المرة الجاية لازم تزروني
تعليقاتك وحشاني و الله
تسلمي حبيبتي على الشغل الجامد ده
مممموووححححح
كل سنة و حمة بألف خير

صبرني يارب يقول...

نكهه

والله يا حبيبتى معلش مش لاحقه ازور حد

والله غصب عني حاضر عنيه دلوقتي هاجيلك

ده انا كنت عاوزاكي اصلا

هاتي بوسه كبيره

صبرني يارب يقول...

عاشقه

طيب بدل ما انتى قاعده كده يا اختي قومي ساعدي ماما فى حاجه ولا يعنى هى يا حرام مش صايمه زيك وتعبانه من الشغل

عيال سيس صحيح

نورتي يابت

نكهة مغربية يقول...

شكرا يا عسل على تلبية الدعوة
الياغورت يا عسل يعني الزبادي
و ان شاء الله البوست اللي جاي حيكون الحريرة
انت تؤمريني و بس و ان شاء الله تكون مفهومة

صبرني يارب يقول...

تسلمى يارب يا نكهه

متشكره اوي ربنا يكرمك

عاشقه الرومانسيه يقول...

المهم انك عارفه انى مش باعمل حاجه علشان دراعى متجبس
يعنى انا سيس غصب عنى مش بمزاجى يااختى
كلها اسبوعين وافك الجبس
واهو يكون رمضان خلص
يعنى هاقضيها انتخه لاااااااااخر رمضان

ঔღঔ نـــوارة ঔღঔ يقول...

مممممممممممممممم

يجنن طبعا

من يوم ما اتجوزت وانا مش بعرف الحمام ولا السمان بس احيانا ماما ربنا يخليها بتصدرلي الحاجات دي :]

اكتر حاجة نعرفها الفراخ :]

قوليلي هينفع اعمل كدا بالفراخ وبدال الفريك رز ؟ لانه جوزي مش بيحب االفريك :(

تسلم ايدك اكلات جميلة جدا

ربنا يقويكي ويديكي الصحة يارب

دمتي بالف خير

صبرني يارب يقول...

عاشقه

مش عندك ايد تانيه سلميه يا بت انتى بتتصلبي ولا ايه

صبرني يارب يقول...

نواره

ربنا يخلي ماما يا جميل


ايوه طبعا ينفع فراخ ورز بس تكون فراخ صغيره شويه وتدقيها خفيف وتتبليها خمس ست ساعات

وتزودي مايه عشان الرز بياخد مايه اكتر من الفريك

وطبعا الفراخ تاخد وقت فى الفرن اكتر من السمان

والف هنا يا جميل جربي وقوليلى

نكهة مغربية يقول...

يلا يا عسل الحريرة وصلت و أي حاجة أنا في الخدمة
ممموووححححح