الثلاثاء، 13 أكتوبر 2009

طاجن المسقعه



السلاااااااام عليكم


اهلا بكم فى مطبخنا السعيد


اه سعيد فى مانع ؟؟


المهم زي ما انتم شايفين وعنيكم مزغللين على طاجن المسقعه الى فوق ده


عزيزتى نوره الى ما نقدرش ناخرلها امنيه مصراويه ابدا


قالتلها انها سمعت عن المسقعه وعايزه تجربها وها هي المسقعه بشحمها ولحمها وبتنجانها


يلا الى العمل


البتنجان الايام دي فى السوق عادي مش عارفه المفروض يبدأ يختفي بس هو فى السوق وحلو كمان


يلا هو احنا نقدر نستغنى عن البتنجان


طبعا لو قولنا هانعمل كيلو بتنجان مثلا


هايكون حوالي الكميه الى قدامكم دي هانقشره (وفى ناس مش بتقشره مش مشكله ) ونقطعه


انا باقطعه بالطول زي ال في الصوره ده عشان بيقولوا كده بيشرب زيت اقل


بعد كده هانقلي الباذنجان فى زيت طبعا يكون سخن بس اول ما نحط الباذنجان نهدي النار عليه شويه عشان يستوي وفى نفس الوقت ما يتحرقش

ويطلع لونه اصفر وحلو كده بعد ما نخلص الباذنجان وقليته هانحطه على ورق كلينكس عشان يشرب الزيت


والحقيقه انا باعذبه شويه زياده واحطه فى مصفاه ومافيش مانع اكب عليه كوبايتين مايه سخنه بتغلي فينزل اكبر كميه ممكنه من الزيت


ونسيبه يصفى ونروح نعمل شغل تاني


هانجيب بصله ونقطها جوانح (نص دائره او ربع دائره) او حتى نفرمها فى المفرمه زي ما نحب

وندعك البصله بملح وفلفل


وبعدين هانقطع حبة فلفل رومي مكعبات اخضر أو الوان او الاثنين عادي زي الى فى الصوره ده


وكمان حبايتين طماطم ونقطعهم مكعبات


و3 قصوص ثوم مهروس

خلا ص كده جاهزه كل حاجه


نروح على الطاسه الجميله دي ونحط معلقة زيت واول حاجه نحطها البصل ونقلب لحد ما يدبل شويه بس


وبعدين نحط التوم




ويادوب ثواني تقليب عشان التومه ما تتحرقش ونزود بقى الفلفل وبعدها دقيقتين ونحط الطماطم ونقلب برضه









بعد كده بقى عندنا اختيارات كتيره

فى ناس تحب للمسقعه صلصه تقيله شويه فى الحاله دي هانحط حوالي كوبايتين عصير طماطم على الخليط الى فات ده


وممكن كمان نعمل المسقعه باللحمه المفرومه فنحط لحمه مفرومه برضه قبل ما نحط عصير الطماطم ونقلبها 3 دقايق ونسيبها شويه وبعدين نزود عصير الطماطم


المهم بعد ما نزود عصير الطماطم او الشوربه (مرقه ) او حتى مايه مش مشكله هانسيب الخليط ده يغلي شويه لحد ما يتسبك شويه





وبعد كده بقى نروح على الطاجن الجميل بتاعنا ده ( وممكن نعمله فى صنيه او قالب بايركس مافيش مشكله)

بس الطاجن ده بيبقى له طعم خاص مع الاكل


ونحط بقى شويه من الخلطه بتاعة الطماطم وطبقة بتنجان وبعدين خلطه الطماطم وبعدين باذنجااااان وهكذا لحد ما نخلص الليله كلها ويبقى شكلها كده






بعد كده بقى ندخلها الفرن و نسيبها بس حوالي نص ساعه وهاتطلع زي الطاجن الى فوق الى وشه احمر وشكله يجوع ده


وانا صايمه عيب كده والله


المهم ممكن بقى لو انتى عامله لحمه قطع مستويه جاهزه تحطيها على وش الطاجن قبل ما يدخل الفرن وبتطلع شكلها وطعمها جميل جدا


وممكن كمان يكون عندك عصاج جاهز فتحطيه على وش الطاجن قبل ما يدخل الفرن برضه بيعمل شغل ميه ميه


بس كده عايزين شغل بقى


والبنات المبتدئين عايزه تجارب بقى فى البشر

ههههههههههههههههه







هناك 21 تعليقًا:

reem يقول...

الله على المسقعة الحلوة

من ايدين احلى صبرنى

تسلم ايديكى ياتوتة

هاغش منك زى كل مره واعملها

تصدقي انتى بتحسي بيا

لسا بفكر واقول انا زهقت عاوزة تغيير في الاكل

لقيت المسقعة ادامى

تسلمى لنا ياقمر

صبرني يارب يقول...

ريم يا حبيبتى

الف هنا يا قمر

اي خدمه انتى بس فكري واحنا هنا اهو

نورة يقول...

عزيزتي الجميلة الف الف الف شكر على المسقعة و لاهتمامك بطلبي...لا تتصوري كم اسعدني ذلك ...و دعيني اقول لك انت انسانة متواضعة و روحك طيبة ....
اما بالنسبة للمسقعة فانا متشوقة جدا لاعدادها و انا طماعة ايضا شوية لان طلباتي ستزداد لاني مش فاهمة اكلة المهلبية معناها ايه و الكباب ايضا و البسترمة و كلمات اخرى كثير .
لا اطيل عليك لكن مرة اخرى اقول انا سعيدة جدااا لمعرفتي بك و انا متتبعة لمدونتك طابخين ايه النهاردة - رغي امراة غير مطحونة و رؤية اسلامية متواضعة.
مع تحياتي ..

صبرني يارب يقول...

نوره

العفو يا جميل انا تحت امرك

بالنسبه للمهلبيه عنيه ليكى هاصورها مره واعملهالك

والكباب بيقلوا عندنا على اللحمه المشويه على الفحم

والبسطرمه دي يا ستى طريقه لحفظ اللحمه

بيجيبوا عرق اللحمه وبيعملوا خلطه من التوم والحلبه وتوابل وملح ويلفوا فيه اللحمه

كانت فى واحده مدونه عاملاها بالصور هابقى اجيبلك الوصله

انا مش باعملها والله

واي اسأله تانيه يا جميل انا تحت امرك

وانا فرحانه اوي بجد انك متبعاني كده ونورينى دايما بتعليقاتك ورايك

متشكره اوي يا نوره

نورة يقول...

نسيت حاجة تحبي ابعتلك وصفات لبعض الكعك او الاكل الخاص ببلادنا .

نورة يقول...

شكرا على ردك اذن اختي هي لي فازت لانها كانت تقولي الكباب هو لحم مشوي و انا كنت اقول هو كبدة مشوية ... المهم انا ايضا تحبي ابعتلك وصفات خفيفة و صغيرة ممكن تعجبك خاصة بالنسبة للكعك
و مرة اخرى الف شكر
اختك في الله

bobo يقول...

انا جربت الطاجن دا اول امبارح وطلع تحفة.. اصلي دايما كنت بعمل المسقعة عادي كدة على البوتاجاز من غير طواجن ومكنتش بحط بصل مع الخلطة السحرية بس جربتها بالبصل وطاجن في الفرن طلعت تحفة.. بجد ربنا يكرمك.. انا بستفيد من وصفاتك كتير على فكرة.. تسلم ايديكي

صبرني يارب يقول...

نوره

يا حبيبتى اي وصفه جديده انا احب اجربها

بس انا مش عارفه انتى منين اصلا

فانتى قولي بقى الى يعجبك واحنا نجربه

ولو حبيتى تبعتيلى الوصفات على الاميل وانا هانفذها واصورها وانشرها باسمك ان شاء الله

ده الاميل اهو

sbarny_yarb@yahoo.com

واختك تكسب معانا طاجن مسقعه هديه
هههههههههههههههه

صبرني يارب يقول...

بوبو

الله يمكرمك يا جميل

متشكره اوي والله وتسلمى انتى وتسلم اديكى
انتى الى طبختيها حلو كمان

منووووووره وانا سعيده انك بتستفيدى والله

نورة يقول...

شكرا كثير اختي العزيزة اوك سوف ابعث لك وصفات على اميلك ...هكذا احسن لاني احببتك في الله و اردت ان اعطيك وصفات للاستعمال الشخصي لك مع اسرتك ...يعني هم وصفات بسيطة من تونس و الجزائر ان شاء الله يعجبوك جربيهم ... لكن انتظريني فقط ايام عندي بعض الظروف و سوف اتفرغ تماما لارسالهم اليك ....مرة اخرة اشكرك على روحك الطيبة
اختك نورة

صبرني يارب يقول...

نوووووره

امممممم تونس والجزائر

راح ناكل كسكسي يعنى

اوك يا جميل انا فى انتظار وصفاتك وانشاله تكون الظروف خير وبراحتك يا جميل

نورة يقول...

لقد بعثتلك اميل هذا المساء اذا وصلك اختي العزيزة اخبريني ربما اكون قد اخطات في حرف من عنوان الاميل .
مع تحياتي

Anonymous يقول...

الاخت صبرنى

معلش انا عايزة اعرف طريقة عمل البلوظة لأنى جيت اعملها امبارح باظت منى و بوظت الدنيا خالص

كنت حروح فيها ربنا لا يوريكى

لو قولتلك كنت حطلق فيها مش حتصدقينى


اختك المعذبة

bobo يقول...

هو ايه النظام؟ مفيش اكل جديد ليه؟ انا كل يوم استنى كفاية كدة لازم تكتبي كتير كتير كتير
عيد جوازك عدا ازاي؟ كل سنة وانتي طيبة

صبرني يارب يقول...

نوره

لا يا جميل والله مش وصلني حاجه

راجعي كده الاميل تاني

صبرني يارب يقول...

المعذبه

بالووووووظه

والنبى يا اوختشي ما عنديش فكره بتتعمل ازاي

انا رايي تطلقي احسن ما دام جوزك له فى البالوظه

خليكى معذبه بقى
هههههههههههههههههههههههه


ما تخدوش فى بالكم يا جماعه ده موضوع كده

صبرني يارب يقول...

بوبو

والله يا جميل انشغلت شويه اليومين الى فاتوا

عيد جوازي عملت تورته ما لهاش حال هانزلهالكم يوم على عيد الحب بقى مش دلوقتي

حالا هاينزل بوست جديد لعيونك يا جميل

Abu ShoSho يقول...

الأستاذة أم مريم ألهمك الله الصبر
هل توجد طريقة أخرى لعمل المسقعة بدون قلي. الوالدة لا تستطيع أكل المقليات.

أنا جربت الميكرويف و الشوي و لم تكن النتيجة جيدة.

أكون شاكر لحضرتك جدا لو أتحفتنا بطريقة تكون صحية أكثر.

تحياتي
أبو شوشو

صبرني يارب يقول...

ابو شوشو

موضوع القلي ده امره سهل

انت ممكن تعمله فى الفرن بس تدهن الباذنجان زيت بفرشاه او ترش عليه بالبخاخ خفيف

وكمان تحد شويه خل ابيض عليه

وتدخله الفرن وان شاء الله تطلع النتيجه معقوله

وجرب قولي

الفقيرة إلى الله أم البنات يقول...

يخرب عقللك ملكيش حل رائعه وروعه وتجنن وهانفذها ان شاء الله والدعاء موصول لك يا قمر

ندى الياسمين يقول...

تسلمى يا بيرو يا جميله ابقى قوليلي عملتي ايه