السبت، 20 فبراير، 2010

القلقاس




واخيرااااااااااااااا وبعد طوووووووووول انتظار القلقاااااااااااااااس يا واندا


يا سلام الواحد حاسس ان القلقاس حمض فى اديه

القلقاس ده يا جماعه من الطبخات الى بتتعمل بمليون طريقه وكل بلد لها طريقه شكل بل وكل عيله لها طريقه شكل لكن الحقيقه انا ما باحبش اي طريقه منهم الا الطريقه بتاعتنا والى علمتهالي كانت تيته الله يرحمها كانت استاذه الحقيقه فيها


المهم طبعا احنا المره الى فاتت قلنا ازاي نقشر القلقاس ونقطعه ونخزنه فى الفريزر وهكذا يبقى جاهز للطبخ فورااااااا


وممكن طبعا يبقى فريش عادي زي الى فى الصوره ده







الموضوع بقى المهم فى طبخ القلقاس هو تقلية القلقاس


مكونات التقليه دي يا اعزائي المطبخين الكرام


عباره عن كسبره خضراء وتوم


فى ناس بتحط ورق سلق وفي ناس بتحط بصل




لكن الحقيقه انا باحبها بكسبره خضراء وتوم




بنغسل الكسبره الخضراء ونقطعها صغير وتكون متصفيه كويسه من المايه


والتوم كذلك بنقطعه او نهرسه بالسكينه المهم نعمل اختراق للقشره الخارجيه


ونيجى فى طاسه كبيره ونحط كميه من السمنه مناسبه عشان نحمر فيها الكلام ده ولما السمنه تسخن نحط الكسبره والتوم زي الصوره دي كده بالظبط








وهانفضل بقى نقلب فيها على النار وبالتدريج كده هاتفضل تدبل الكسبره وتسرد مايتها واحنا بنقللللللللب برضه


وبعد كده المايه هاتنشف ونبدأ نحمر بقى الكسبره زي الصوره دي كده ولاحظوا معايا تدرج الالوان كده




لما نوصل بقى ان شاء الله للون البنى ده وساعتها واحنا بنقلب هاتلاقي الكسبره لها صوت خرفشه كده وده معناه انها نشفت وبقت تمام


معلش هى الصوره طبعا مش واضحه اوي لكن المهم اننا بنطلعها لونها بني غامق زي بصلة الكشري كده

وبعد كده بنسيبها تبرد شويه وبعدين بنحطها فى الكبه او المفرمه او وات ايفر ونفرمها فطلع عامله زي المعجون زي الصور دي كده



الحقيقه موال رخم جدا وبيبهدلي المطبخ عشان كده انا باجي فى الشتا وبتكون الكسبره كتيييييييره فى السوق اجيب عشره خماشر ربطه كده

واعمل بقى كميه كبيره من التقليه وبعدين اقسمها فى ورق سلفر كده الحته على اد الطبخه واطبقها واحفظها فى الفريزر بحيث ساعة الاستعمال اخدها كده جاهزه من الفريزر بتبقى حاجه جميله جدا

كده تقليتها جاهزه والحمد لله


ندخل على الطبيخ بقى


القلقاس يستحسن ويفضل انك تخزنيه فى شهر يناير او بالاحرى شهر طوبه لانه بعد كده بيبقى بينشى ورخم وقبل كده بيبقى سواه وحش اوي

طيب لو كان القلقاس من النوع الى بينشى او حتى مش بينشى اوي لكن انتى هاتطبخيه مثلا وهاتتغدوا بعد ساعتين ثلاثه

فى هاذوها الحاله لازم تاخدي القلقاس غلوه الاول فى شوية مايه وبعدين ترمي المايه ويا حبذا لو تحطي فى المايه معلقة طماطم او نقطتين لمون

الاول بنغلي المايه وبعدين نسقط فيها القلقاس ويادوب يغلي اربع خمس دقايق وبعدين نصبه فى مصفاه ونغسله بمايه بارده لحد ما المايه اللازجه دي تروح منه

بعد كده بقى نرجعه الحله تاني ونحط عليه شوربه ونص كوباية عصير طماطم او معلقة صلصه ونسيبه يغلي


ولحد ما يستوى بقى مش هياخد سوى كتير ان شاء الله يادوب ربع ساعه كده هايكون استوى تماما وطبعا نطلع قطعه نجربها مش عايزينه يتهري من فضلكم


بعد كده هناخد معلقه كبيره من التقليه الى احنا عملناها فوق دي ونحطها على القلقاس زي الصوره دي كده


ونقلب ويادوب يغلي ونظبط ملحه ونطفي عليه خلاص


ما نحطش التقليه من بدري عشان تفضل على لونها ما تبهتش


وبعد كده يكون القلقاس بهذا الشكل العظيم المريع وبالف هنا يا قوم

أي خدمه يا وندا مش عارفه من غيرى كنتم هاتكلوا قلقاس ازاي




هناك 18 تعليقًا:

Wanda يقول...

يم يم يم يم يم يم يم يم يم يم يم

:-)))))))))))))))))))))))))))


ايوه كده ندلع المعدة شوية
تسلم ايدك

بس حلوة اختراق للقشرة الخارجية للثوم :-)) صبرنى انت بتحاربى فى الطبخ و لا :-)) ايه بالظبط ؟

بس انت كده مطنشه السلق ليه ؟ الرجل الغلبان ده حنستخدمه فى ايه و كله اخضر و حديد ؟؟؟؟
تعرفى انا مش بتاعت كسبرة قوى بس علشان شكل الطبق :-)) التهمته كله
:-))))

متشكرين يافندم

المولد قرب
لازم بقى تدلعين بحاجة :-))) حلوة :-)))

بنت قلبى يقول...

عارفه يا ابله شيماء
انتى بتضحكى على المطبخ مش هوا الا بيضح عليكى
وسامحى ماما بقا لانها بتقول الله يسامح الا وخده عقلك فى الكمبيوتر
وخربا بيت ابويا بكل حاجه انتى بتعمليها
وانا بعمل تورته زى الا عملتيها فى البوست الا فات وهنزلها واقول ان دى من تعليمك
وربنا يسترها بقا انا بكلمك والكيك فى الفرن

أحــوال الهـوي يقول...

نفسي فيه


الله عليكي قلقاس
علي الرغم انه منوم خطير يوم لما اكلة
اغماء و غيبوبه
بس نفسي فيه

انا غرفت شويه من الصورة و بالعافيه

تصبحي علي خير

تحياتي

صبرني يارب يقول...

وندا

اينعم اختراق ايه فاكره ان احنا مش بنشتغل فى المطبخ بالعلم ولا ايه
ههههههههههههههه

انا مش مطنشه السلق بس يعنى لقيته باحطه ما لقيتوش مش مشكله الكسبره ما بتقولش لا
وانتى مش بتحبي ا لكسبره امال دوشاني على القلقاس ليه ماهو معروف بيتعمل بالكسبره

والحلو ان شاء الله عونيه

اختاري اعملكم ايه

عندي متصور جاهز صنية بطاطا فى الفرن وام علي
هااااااااا
ديموقراطيه انا اهو

صبرني يارب يقول...

بنت قلبي
ازييييييييييك يا بنتى انتى فين

وبعدين على الله ماما تدعي عليا

يسامحني ماشي حلو اوي

انما اياااااااك تدعي عليا هاقطعك انتى والبنت

وانتى عارفه ان ليا ادين فى المنطقه عندكم
ههههههههههههههههههه

طيب بتعملي تورتات وبتطلع حلوه ؟؟

خلاص عايزين ايه بقى هاتنهبوا ولا ايه
هههههههههههههههه

والكيكه فى الفرن ما تحرقيهاش قومي يا اختي شوفيها

صبرني يارب يقول...

احوال الهوى

يا خبر يااستاذنا

اشحنلك حله حالا فى الدي اتش ال

او نشوف مندوب من مندوبينا عندك يعملهولك ولا يهمك

نورت يا فندم وبجد انا فرحت اوي ا نك بتنفذ حاجات من وصفاتي لما قلت عند ريم

متشكره لك ونورت يا فندم

القدر و انا يقول...

جبيبتى ريم
وحشانى جدا
مبروك المدونة
اول مرة اعرف انك عاملة مدونات تانية
نزلتها عندى كلها
بجد انت ست جميلة وبتفيدى البنات والزوحات كتير
انا حاقرا على راحتى وأنقى بقى
بس القلقاس مش بحبه ومش ناوية اعمله
لو الاولاد عايزينه يطلبوه من اختى وهى شاطرة زيك كده
سلامى لكتاكيتك يا قمر ولرضا بيه طبعا

صبرني يارب يقول...

القدر وانا

يا جميل انا اسمي شيماء

ريم حبيبتى اول الشارع على ايدك اليمين

هو عشان كلمتينا احنا الاثنين يوم اللقاء تفضلي تتلخبطى فينا ولا ايه
ههههههههههههههههه

ومرسي على الكلام الجميل عن المدونه وعني

ربنا يكرمك يارب

والقلقاس بتاع الولاد عليا يا باشا ولا يهمك
هههههههههههه

نورتي

hana يقول...

ياربي يجننن
تعرفي عمري ما كلته بجــد ههههه
ماما مبتعملوووش خالص مش بتحبه
بس الصور والطريقة ايه واووووو
حاسة الريحة ماليه الصفحة
بجد نفسي ادووووووء
تسلم ايديكــــي بجد

بنت قلبى يقول...

ابله شيماء معليش سؤال رخم
ومش عارفه اعمل ايه فيه
انا عملت التورته والحمد لله وكان طعمها زى مابيقولوا حلو
بس فيها عيب
الكريمه كانت سايحه خالص
ومش جامده
بعد ما عملتها طيتها فى الفليزير
على اساس انها تجمد فا جمدت وبعد ما سبتها شويه ساحت تانى
وفاضى منى كريمه كتيره
جبت كيس كريمه تانى وحطيته على الا فاض عندى علشان تتقل حطيته من ير لبن خالص فا برضو حسا انها ها سنه
فا اعمل ايه وانا فاض منى كتير

صبرني يارب يقول...

هنا

حبييييييييبى عنيه ليكى

خدي الطبق كله تعالى


طب ماما مش بتحبه يلا اعمليه انتى بقى ووريهم الاكل ازاي

منوره يا جميل

صبرني يارب يقول...

بنت قلبي

انتى عملتي اي تورته فيهم ؟؟

عموما الكريمه

انا مش عارفه انتى جايبه نوع ايه

فى انوا كريمه فى السوق سايبه بتكون رخيصه شويه واي كلام نسبة السكر فيها عاليه وده بيخليها تسيل كده

فلما تيجى تشتري كريم شانتيه سايب قولي عايزه كريمه سكر قليل بتكون اغلى بس نتايجها احسن بكتير


وممكن تكوني حطيتى لبن زياده عن المقدار

وممكن تكوني ما خفقتيهاش كويس

وممكن يكون اللبن مش بارد كفايه لان اللبن لازم يكون ساقع متلج

وليه اصلا تحطيها فى الفريزر

انتى بتضربيها 3 دقايق لحد ما تبقى نافشه
وبعدين تحطيها فى التلاجه

والى باقي عندك من الكريمه ما دام مش نافع كريمه

حطي علي نص كيلو فراوله وكيس جلي حليه فى مايه وسبيه يبرد واضربيهم فى الخلاط كلهم وسبيهم فى الفريزر يطلعوا ايس كريم
ولا سحر ولا شعوزه

اي خدمه يا اموله

Anonymous يقول...

صبرنى حبيبة قلبى اول مره اجى عندك هنا بس ان شاء الله اكون موجوده معاكوا على طول القلقاس طبعا جميل جدا واحب اقول للجميع انى تلميذة صبرنى فى كل حاجه وخاصة المطبخ وكمان هى اثرت فيا فى حاجات كتير قوى ربنا يكرمك ياصبرنى

صبرني يارب يقول...

ايه ده

مين هناك

تلميذتى تلميذتى ؟؟؟!!!

عروستى ؟

شكلك كده البت ام مريم رقم تو

صح ؟؟


فين الاكونت الجديد يا بنتى مش تجربيه تشوفيه مقاسك ولا ايه
ههههههههههههههه

منوره يا جميل

bibo يقول...

على فكره القدر و انا مش اول مره تتلخبط بينكم
دايما كده
انا ملاحظ الحكايه ديه

الصنف ده صعب يتطبخ هنا لانى مش عارف اسمه هنا ايه؟؟؟
و مش ناوى اعمله
و مش ناوى اطبخ و هاجيب شغاله تعملى الاكل و خلصنا بقي
بس تسلم الايادى
و دايما مجريه ريقنا
الله يسامحك

صبرني يارب يقول...

بيبو

ايه ياعم في ايه

بعد اذنك هنا منوع دخول المطاوي

القدر وانا بتتلخبط اه اصل انا وريم اصحاب وكلمناها سوا يوم اللقاء جايز السلوك داخله فى بعضها


بيبو كويس انك مش عارف تطبخ القلقاس ومش هاتلاقي شغاله تعرف تعملك القلقاس

وفاضل الحقيقه تغزني عشان انا عامله مدونة طبيخ وباجري ريقك
هههههههههههههههههههه

انا بتهيئلي اصلا انا اول مره اشوفك هنا

بس انت منور يا بيبو

وانا يسعدنى ويشرفكم انى دايما مجريه ريقكم اصل انا فى الاذيه مؤذي
نيهاهاهاها

bibo يقول...

انتى مش عارفانى يا صبرنى هانم
انا بيبرس

صديقك اللدود

صباحك فل يا استاذه

صبرني يارب يقول...

بيييييييييرس

والله انا شكيت لعلمك

وقلت شكله بيبرس بس يعنى ليه داخل باكونت تاني

منور يا بيبرس وايه البروفايل الغامض ده ياعم


واحد قلقاس هنا وصلحه لبيبرس الصديق ا للدود