الأحد، 7 ديسمبر 2008

الرقاق


كل سنه وانتم طيبين يا جماعه العيد الكبير عيد الفته واللحمه
بس بصراحه انا ورضا مش بنحب الفته في العيد باعمل بقى رقاق مكرونه جلاش كده يعنى
عشان كده قلت نأكلكم رقاق معانا النهارده يلا بسرعه على المطبخ


المقادير

نص كيلو رقاق + نص كيلو لحم مفرومه عصاج + حوالي لتر شوربه او خمس كوبايات كبار
نصف كوب شوربه + نصف كوب لبن حليب+ بيضه + ملح وفلفل (ودول عشان نسقي الرقاق فى الفرن )
وعلى فكره الرقاق بيحب الشوربه تكون متينه يعنى سمينه شويه عشان ما يبقاش معجن يعنى يا ريت تبقى شوربة بط او لحمه سمينه شويه

الطريقه :

اولا بنجيب الرقاق وبيكون موجود على فكره نوعين مدور ومربع عشان حسب الصنيه الى هاتعملي فيها بصراحه انا باعمل فى صواني كبيره اصلا فمش بتفرق معايا المهم نرتبه كويس فى الصنيه
الرقاق بنقسمه نصين وبنبدأ نحط ورقه ورقه وكل ورقه نحطها عليها شويه شوربه نص كوبايه مثلا ولما نخلص نص الرقاق كله فى الصنيه وبيكون شكله كده






بعد كده بنجيب العصاج الى جهزناه قبل كده ونفرده على الصنيه كده
ودي طبعا ايد خالد كان واقف جنبي وعمال ينقي العصاج ياكله ويقولي اييييييييه يا ماما انا بادووووق
هههههههههههههههههههههه



وبعدين نبدأ تاني نكرر موضوع ورقة من الرقاق وعليها كوباية شوربه وطبعا الشوربه عليها ملح وتوابل اصلا

ونعمل كده لحد ما الرقاق يخلص وبعدين يبقى شكله كده





وما تقلقوش انه هايبقى هايش فى الاول وهاتفكروا ان الصنيه مش هاتكفي لكن بعد شويه بيهبط على بعضه وبيبقى زي الى فوق ده بالتمام


وبعد كده نكون مسخنين الفرن طبعا ونحط الصنيه فى الفرن وبعد حوالي ربع ساعه فى الفرن السخن اوي نطلعها ونحط عليها (الشوربه والحليب والبيض والملح والفلفل الى احنا خلطينهم مع بعض فوق دول )

نسقي بيهم الصنيه كويس نوزعهم عليها يعنى وممكن لو وش الصنيه ناشف اوي نعمل فتحات بالشوكه كده عشان يتوزع السائل كويس

وبعد كده بتقعد فى الفرن حوالي ثلث او نص ساعه تقريبا لحد ما وشها يحمر وتبقى شكلها كده





بنطلعها ونصيبها تبرد شويه وبعدين نقطعها ونقدمها زي الطبق الى فوق خالط بالظبط والف هنا يا جماعه وكل سنه وانتم طيبين


اها هايبقى في بعض ورق مكسر من الرقاق ما ترميهوش ممكن تحمريه فى معلقة سمنه او تقلبي فيه السمنه وتحطيه فى صنيه وتدخليه الفرن يتحمص وممكن تعملي منه فته او ام علي

وكل سنه وانتم طيبين وبالف هنا وخير

ما تنسوش تبقوا تقدموا معاه شوربه ولحمه عشان ده عيد يعنى


هناك 22 تعليقًا:

أليس في بلاد العجائب يقول...

عندي كلمتين كده يمكن يفيدوا بخصوص الموضوع دا

اصلي مشاهده قديمة اوي

كانت جدتي الله يرحمها تقعد علي ايد الشغالة و توصفلها تعمل ايه.

علشان اسهل لقرائك :) ممكن علشان تسقي الرقاق تجيبي صينية او غطي حلة كبير و تحطي علي الرقاقة و بالكبشة تنزلي عليه الشوربة و تكون سخنة شوية بحيث الرقاقة كلها تشرب المرقة

كان في باه بيحطوا حتة زبدة او سمن بين كل رقاقة و التانية (بس دي طبعا بتطلع صينية رقاق ذرية وتقيلة . بس بصراحة بتبقي طرية و حلوة)

ماما بتحط علي الوش حتة زبدة بردة علشان الطعم

وساعات بتعمله من فوق مش في الفرن يعني تسويه من تحت لحد ما يحمر و تقلبه علي صينية و ترجعه بالعكس يعني الوش يكون تحت و بردة بيطلع مقرمش

و من عندي انا باه جربي تحطي مع اللبن معلقتين زبادي هيخليه طري :)

شفتي اليوم اللي جه عليكي اوصفلك فيه طبخ :)

كل سنة وانتي طيبة يارب

بنت الغربة يقول...

حبيبتى ياصبرنى - انا عجبتنى قوى طريقة الرقاق ونزلت دورت على رقاق وملقتش فى دبى فانا نويت اجرب الجلاش ومش عارفه طعمه هيبقى ايه بس هاجرب وااقولك وربنا يستر -

كل سنه وانت طيبه - داليا-

خمسة فضفضة يقول...

السلام عليكم ورحمة الله وبركاته

كل سنة وانت كيبه يا صبرني

طريقتك دي اول مره بصراحه اعرفها انا باعمله بطريقه تانيه خالص

بجيب صينيه كبيره فيها كميه من الشوربه السخنه علي نار هاديه عشان ماتبردش وابل الرقاق واحده واحده في الشوربه لحد ما تتخلص من كل النشا والدقيق اللي عليها وتتطري بعد كده احطها في الصينيه

ويعدين احط العصاج والدور التاني نفس النظام ،وفي الآخر احط 3 او 4 ملاعق من وش الشوربه اللي هو الدسم اللي بيبقي علي وشها( احسن شوربه للرقاق يا بط يا رومي ) او ممكن ملعقه سمنة بلدي
وبرضو في قاع الصينيه قبل ما ابدأ ارص الرقاق يا وش الشوربه يا ملعقه سمنة

وبعد كده اسقيها كبشتين او تلاته شوربه وادخلها الفرن

وماباحطش لبن ولا بيض ولا حاجه ، باعمل كده في الجلاش مش الرقاق

-------

بالنسبة للعصاج مش باحط فيه سمنه خالص باقلب البصل علي اللحمه واحطهم علي النار وبيستوي في دهن اللحمه و بعد شويه احط حبة ميه عشان تكمل سواها


عموما اختلفت الطرق والنتيجه واحده ، وكله بيتاكل
وعلي فكره برضو الصواني الصغيره دي ماتحوقش معانا باعمل زيك في الصواني الكبيره اللي حافتها قصيره ، تقريبا الصينيه بتاخد كيلو رقاق علي ما يكفي الناس اللي هايكلو



هههههههه

كل سنة وانت طيبه يا قمر

خمسة فضفضة يقول...

معلش يا صبرني هارد علي بنت الغربه

انت ممكن تعملي الرقاق عندك في البيت

شوية دقيق عادي وتعجنيهم بميهكويس اوي من غير اي خميره بس شوية ملح صغيرين عشان الطعم

بعد كده خدي كور صغيره من العجينه وافرديها لحد ما تبقي رقيقه جدا وسويها علي البوتاجاز من فوق في صينيه او صاج لو عندك لما ناحيه تستوي اقلبيها علي الناحيه التانيه وان شاء الله تعملي الرقاق وتتبصتي

سلام
سلام

صبرني يارب يقول...

اليس

ايوه ماما بتعمل كده بس انا باطنش الحكايه دي وجربتها انى احط على طول فى الصنيه واشتغلت معايا عادي

وبالنسبه للزبده ما هو انا قلت ان الشوربه تكون سمينه ومتينه ويفضل شوربة البط ولو طبعا مش سمينه لازم نحط زبده او سمنه

اضافه جيده يا اليس ونورتي

صبرني يارب يقول...

داليا بصي شوفيه في اي مخبز لبناني وقوليله عايزه رقاق ناشف

وممكن تعملي جلاش برضه عادي انا عن نفسي باحب الجلاش اكتر

وطريقته زيها زي الرقاق تقريبا بس مش بياخد شوربه فى رص الصنيه لا مع الفرن بس

وبين كل ورقتين كده تحطي معلقة زبدة سايحه

والف هنا وكل سنه وانتى طيب

صبرني يارب يقول...

خمسه فضفضه

زي ما قلت لاليس ده يا فضفضه اه فعلا ماما بتعمله كده

بس انا جربته كده مره كنت مستعجله ومشيت معايا قلت اسهل برضه

وبررررضه لازم فعلا تبقى شوربه سمينه او نزود احنا زبده او سمن

والعصاج انا بافضل اشوح البصل الاول

بس برضه زي ما انتى بتقولي يمشي

وانا لو شاريه اللحمه المفرومه انا يا فضفضه باجيبها مش فيها سمين خالص عشان مش ناقصين يعنى بالتالي بتبقى محتاجه سمن خفيفه يعنى
عشان ما تلزقش

وبالنسبه لموضوع الرقاق فى البيت ده ما جربتوش داليا بقى تجربه وتقولنا

بس ماله الجلاش يعنى مش هايقول لا
نورتي يا جميل

كيــــــــــــارا يقول...

الله ياصبصبتي

تسلم ايديكي

صبرني يارب يقول...

مولان

يا كوكي يا حبيبتى تسلمى انتى وتنوري

أحــوال الهـوي يقول...

ايه الاحتراف و التمكن ده
و صور شهية كل سنة وانت مشبعانة و محنسانه باحلي اكل
أليس بطريقة سقي الرقاق زي والدتي رحمها الله ما كانت بتعمل
لكن الطريقة بتاعتك ممكن تكون اسهل و اسرع

تسلم ايديك و يارب يكون عيد عليك ز المسلمين بخير و سعاده
تحياتي

صبرني يارب يقول...

احوال الهوى

الله يخليك يارب ونورتنا ولو كان بادينا يعنى كنا عملنا عينات تدوقوا
هههههههههههه

كل سنه وحضرتك طيب وبخير دايما منورنا

bastokka طهقانة يقول...

انا بحب الرقاق قوي بس طريقتي مختلفة عنك شوية و هي اني بعد اخر طبقة من الرقاق بدهن الوش زبدة و مش بسقي الرقاق بيض و حليب انا بعمل كده مع الجلاش باللحمة المفرومة انما الرقاق شوربة بس
ريحة الرقاق بتاعك مغرقة البلوجر كله ليكي حق تعملي صينية كبيرة علشان تكفي البلوجرية كلهم
تسلم الايادي
و كل سنة و انتم طيبين و اوروفوار

صبرني يارب يقول...

طهقانه

ايوه يا حبيبتى تمام زي ما انتى بتقولي كده لما يكون الشوربه مش سمينه لازم ازود زبده او سمنه بلدي فى الطبقات وعلى الوش
لكن لما تكون الشوربه متينه بط او لحمه سمينه ما لهاش لازمه بقى الزبده

اما اللبن والبيض اه انا عارفه انه الجلاش بس الى بيتحطله كده بس انا بقى جربته مع الرقاق نص كوباية لبن بس وبيضه واحده بلدي بتدي طعم ولون حلو اوي جربيها بس


واها الصواني الصغيره دي يا بنتى ما تاكلش معانا انا فى بيت عيله

اتعودوا على شكل صوانيا بقى

نورتي يا جميل

صبرني يارب يقول...

بيبرس

هههههههههههههههههه اوك لعلمك فى حاجه واحده بس الى عايزه انزلها فيديو وهى الكريب عشان ده ما ينفعش فيه شرح خالص

وبتقول فيها والله على فاتفيت بيجيبوا واحده خليجيه مش فاكره اسمها شوفتها بتعمل كريب كنت هاولع فيها ما طلعتش ولا واحده سليمه مش عارفه جايبنها على اساس ايه

نورت يا بيبرس

جعلوني مريض نفسيا يقول...

كل سنة وانتوا طيبين
بلاش صور الأكل هناك في المدونة الثانية انا داخل لقيت صور الرقاق جعت وجعت اوي كمان الصورة تفتح النفس ماشاء الله بس انا اعمل ايه دلوقتي اصحي الحاجة من النوم تعملي رقاق واحنا الفجر كده مينفعش طبعا بلاش كده تاني ارجوكي
حقوم ادور علي اي حاجة في الثلاجة يمكن انسي

قوس قزح يقول...

ايه ده ؟
هى الحكاية صور و بس ؟
انا عايزة اكل
انا جاية هنا اخد منك نص الصينية
ماليش دعوة بقى
انتى تعزمنى عندك على الرقاق ده
و خلافه ( طبعا انتى عارفة خلافه ده )

كل سنة و انتى طيبة و سعيدة انتى و زوجك و اولادك يا رب

وحشتنى يا بت انتى
هموتك لما اشوفك ههههههه

صبرني يارب يقول...

جعلوني مريضا نفسيا


هههههههههههههههههه معلش حقك عليا اوزبديايه بقى تمشي معاك وخلاص

هههههههههه
كل سنه وانت طيب وربنا يخليلك الحاجه

صبرني يارب يقول...

دولي

انا الى هاقطعك يا بنتى و ربنا وحشاني جدااااااا

وعنيه ليكى رقاق وكل الى انتى عايزاه

بنت الغربة يقول...

حبيبتى ياصبرنى انا عملت الجلاش وطلع حلو الحمد لله - وان شاء الله هاجرب طريقة
الرقاق فى البيت دى مع الشكر لخمسه فضفضه - وهادور على الرقاق زى ماقلتى جايز الاقى - تحياتى ليك

صبرني يارب يقول...

اوك يا داليا الحمد لله

باقولك ايه
انتى عملتى البلفترول ولا لا

يعنى استعجل وانزله من غير صور ولا اتحلت خلاص

أنا حر يقول...

تسلم ايدك بس مكدبش عليكي انا بطلت احاول اقلد اكلاتك خالص
العيب مش فيكي انما فيه انا واضح اني فاشل جدا في الطبخ
تحياتي

صبرني يارب يقول...

أناحر

ليه بس

طب ماهو انا ياما بوظت اكل كتير لازم الواحد يتعلم

وبعدين خلي بالك انا برضه ست بتتكلم عن الطبيخ اكيد فى حاجات بتعدي عليا لانا من المسلمات الى انت ماتعرفها

اسأل ياريت لو فى حاجه مش واضحه وانا عنيه لك ونورت