الاثنين، 22 ديسمبر 2008

الكول سلو(سلطة الكرنب بالمايونيز)



عملتوا المايونيز ؟؟؟
شكلكم كسلانين ولا هاتعملوا حاجه
الحريم الايام دي بقول شلت على راي خالتي فرنسا
المهم
نعمل الكول سلو بقى بسرعه عشان عايزه انام
المقادير :
كوب مايونيز (من الى عاملينه امبارح )
نص كوب حليب
ملعقه كبيره سكر
ملعقه كبيره خل
كوبايتين كرنب ابيض مفروم او مبشور او اي حاجه المهم يكون مقطع رفيع اوي
نص كوب جزر مبشور او مفروم
الطريقه
بنحط المايونيز على الحليب والسكر والخل فى الخلاط ونخلطهم دقيقه واحده بس على ما يتجانسوا وبيبقى شكلها زي المايونيز كده بس خفيفه شويه لكن ما تخفيهاش اوي لو حطيتى نص كوباية لبن ولقيتها لسه تقيله حطي شوية لبن صغيرين كمان واخلطي وهاتبقى ميه ميه ان شاء الله
وبعدين فى وعاء عميق (ولا ابله نظيره يا ولاد) تخلطي الكرنب مع الجزر وتصبي عليه الكلام الى حطيناه فوق فى الخلاط وتقلبيه
وتسيبه الخطه على الاقل 2 ساعتين قبل فى التلاجه قبل الاكل وتغطيها كويس
بس كده وتاكلوها بقى ولا نيجى ناكلها لكم كمان
طبعاااااا ممكن تزودي الجزر وتقللي الكرنب
ولو حسيتى ان السلطه طالعه ناشفه اعملي شوية مايونيز على حليب وسكر تااااني وحطيهم
وفى ناس بتحط فيها بسله بتبقى حلوه اوي
وممكن تحطي خس على فكره كمان بيبقى جميل
بس كده وشكلها طبعا فووووووق لقيتها مش محتاجه لصور فى الخطوات
وبس كده تاكلوها بقى بمعلقه ههههههههههههه
ولا تحبوا نيجى ناكلها احنا
الى يجرب يقولي
ومقدما عشان ما حدش يبوظ الوصفه ويجى يتكلم هنا
زوجة جربتها وقالتلى انها طلعت معاها تحفه
من الاخر الى هاتبوظها انا مش مسؤله يا هوانم

هناك 13 تعليقًا:

أحــوال الهـوي يقول...

من جمال الاكل
الاكل ببطئ
كلو سلو

هو ده المعني مش كده

تحياتي

صبرني يارب يقول...

أحوال الهوى

هههههههههههههههههه

ناكل بالراحه طبعا

صبرني يارب يقول...

بيبرس

طب انت الى تقلت فى الاكل وتقلت ياهو باين
ههههه

كيــــــــــــارا يقول...

صبصبتي

الله عليككي بجد لازم هعملها وهقولك النتيجه

المره الجايه فراخ بقي والا هعتصم هنا

صبرني يارب يقول...

مولان يا قلبي عنيه والله

ان شاء الله المره الجايه فراخ مفروسه

بنت الغربة يقول...

تسلم ايديك ياقمر انا كنت مختفيه علشان سيرفر النت كان عطلان هنا فى دبى بقاله 5 ايام
انا ان شاء الله هاعمله النهارده واكل البت بيبه كمان منه
اما بالنسبه للمايونيز فده قصه كبيرة فى عمايله
انا باجيب مايونيز لايت من السوبر ماركت وخلاص
بس انا قريت الطريقه بتاعتك وعجبتنى بس تنفيذها عايز وقت ومجهود ياصبرنى وانا عازمه بيبه وجوزها وعيالها والشغاله على الغدا عندى النهارده
ولسه فاضلى الخضار والسلطات والحلو
بس انا قلت لازم اعدى عليك ياجميل واسلم - وحشتينى

صبرني يارب يقول...

داليا

عمايله سهله والله انتى الى كسلانه يا دولي

بس ماشي زي بعضه عشان اول مره وعزومه وبتاع

سلميلى على بيبه وقوليلها يارب تعقلي هههههههههههه

طب اجي انا كمان اكل عندكم ؟

بنت الغربة يقول...

تنورى ياقمر - انويها بس وانا اعملك عزومه لوحدك ياجميل
وهاتى العيال وابوهم معاك مايهميكيش
انا لازم لما انزل مصر ااقابلك
تحياتى ليك

خمسة فضفضة يقول...

السلام عليكم ورحمة الله وبركاته

تسلم الايادي يا صب صب

عارفه في حاجه كمان عشان السلطه ما تبقاش دسمه اوي انك تحطي نص كمية المايونيز والباقي يبقي زبادي عشان تقللي الدسم

والسلطه اللي فيها بسله دي السلطه الروسي يتبقي بسله وجزر متقطه مكعبات صغيره وفاصوليا خضرا متقطعه صغير وبطاطس مسلوقه مقطعه مكعبات وبيتقلبوا علي بعض مع خلطة مايونيز زي دي وشوية زيت زيتون صغيرين وملح وفلفل ونص ملعقة خل وبالف هنا

وكمان فيه البطاطس المسلوقه مع المايونيز : بطاطس مسلوقه ومقطعه مكعبات وفص ثوم مفروم وعليهم ملعقه كبيره او اتنين مايونيز حسب كمية البطاطس وتقلبيهم وتاكلي احلي سلطه

وفيه المايونيز بالبيض وده بيض مسلوق تقسمي البيضه نصين وتاخدي الصفار تقلبيه مع شوية مايونيز وعصير ليمون وشوية مسترده صغيرين وفلفل وملح وترجعي تحطيهم جوا البياض تاني وتزوقيهم بانصاف زيتون اسود وبقدونس مفروم ويتقدم مع عيش متقطع حتت صغيره ومتحمص بيبقوا شكلهم حلو اوي واستايل في العزومات

دا طبعا غير المايونيز علي الكاتشاب اللي بيتحط علي الفراخ البانيه او البروست او البطاطس المقليه

ولو افتكرت حاجه تانيه هاقولك عليها ان شاء الله



سلام

أنا حر يقول...

انا مش بحب الكرنب ينفع حاجة مكانه؟
تحياتي

صبرني يارب يقول...

بنت الغربه

يا حبيبتى تسلمي وان شاء الله ربنا يسهل ونشوفك

صبرني يارب يقول...

أناحر

تنفع بالخص وتنفع بالبسله والجزر

وتنفع باي حاجه تعجبك

وينفع ما تاكلش كول سلو ياعم اصلا هههههههههههههههه

نورت

صبرني يارب يقول...

خمسه فضفضه

سلطات المايونيز كتيره جداااااااااا

وانشاء الله هانتكلم عنها مرات جايه

بس حكاية الزبادي دي ما حبيتهاش بتغير طعم الكول سلو شويه بس عادي تمشي