الأحد، 22 فبراير، 2009

السمن البلدي الفلاحي .... وتحدي


احباااااااائي اعزاااااااائي حبايبي وحبايب مطبخي الى هو برضه حبيبى
هانعمل النهارده يا حلوين السمن البلدي
الي هو بلدي بلدي يعنى مش اوانطه من الى فى العلب الى مالهاش اي علاقه بالبلدي من وجهة نظري المطبخيه الفلاحيه خالص بتاتاا لبته وعمري عمري ما دخلته بيتى هاهنا بتاتا البته
المهم عارفه يا اليس يا بتاعة بلاد العجائب انتى طالبه باتيهات وحوادق عييييييييييييني المره الجايه ان شاء الله
هاعملك حاجه تحفه اوي والله
بس سالي حاجات جوايا حوشت القشطه وزمانها عاملالها ازمه فى الفريزر
رغي رغي رغي وبلاش نشتغل النهارده قداااااااااامي
يا صفايح الزبده السايحه يا براميل القشطه النايحه (وش بيلعب حواجبه )
نيهااااااهاهاهاها
شوفوا يا بنات احنا طبعا عندنا قشطه فلاحي نشتريها نقشطها من على اللبن ماليش دعوه
الجاموسي ينفع والبقري ينفع الاثنين حلوين والاثنين طعمين
بس البقري بيكون لونها اصفرررر فاقع لونها تسر الناظرين
والجاموسي بيبقى لونها ابيض عاجي كده
وممكن نعمل خليط منهم برضه هايمشي
بس الجاموسي الصافي سعرها اعلى جدا فى السوق
والى انا مستعملاه هنا الجاموسي
احنا طبعا بالنسبه لكى يا سالي وليا انا كمان بنبقى محوشين القشطه فى الفريزر فلازم نطلعها تفك خاااااالص
وكمان ما تبقاش بارده اوي تكون درجة حرارة الغرفه كده
لان لو بدأنا شغل فيها وهى بارده اوي مش هاتتحول لزبده بتاتا وايدينا هاتتكسر ضرب ولا حياة لمن تنادي
هانحط القشطه فى حاجه واسعه ونزودها شويه ملح صغيرين قولي مثلاااا لو انتى محوشه حوالي 3 كيلو قشطه حطلهم كبدايه كده معلقه كبيره ملح
رشيها عليهم وبعد كده تنزلي ضرب فى القشطه لما تموتيها( دي اسمها مرحلة خض القشطه لتحويلها الى زبده )
ماما العزيزه رايها انه ما ينفعش بالمضرب لازم ايدك لكن انا ساعات بتتحوش معايا كتير وماا قدرش اعملها بايدى خالص مالص باعملها بالمضرب
طبعا كلكم حريم شلت زيي كده يبقى على طول نعمرها بمضرب الكهربا ونفضل نضرب فيها ونبقى نريح المضرب فى النص عشان ما يتحرقش
والمهم هانفضل نضرب لحد لما نلاقيها عملت تكتلات وفصلت الزبده عن المايه زي الصوره دي بالظبط


معلش الصوره مش واضحه كان عندي برنامج باظبط به الصور مش راضي يشتغل شكله كان ترايل اعذروني يا حلوين على ما نظبط نفسنا
المهم بعد كده نضربها برضه شويه كده بادينها بقى ونحاول نجمع بادينا التكتلات بتاعتها على بعضها وبعدين نعمل منها كور ونعجنها كده بادينا لحد ما تتخلص من الميه الى فيها
والكور الى هاتتطلع دي هى الزببببببببببده
ايوه صفايح الزبده بس لسه ما ساحتش
وبيكون شكلها كده
(الميه الى هاتطع ما ترميهاش خساره دي بتبقى كلها لبن وفرافيت زبده . ممكن تعملي منها بشاميل او تزوديها لبن وتعمليها منها طاجن معمر زي الفل )

بعد ما نخلص الخطوه الرخمه المتعبه دي نرفعها بقى على النار انا بافضل تعمليها فى تيفال لانها احيانا بتلزق وتبقى رخمه اوي
المهم هاتحطي الكميه الى هى نقول 3 كيلو ونزودها ملح بقى عشان المرته تطلع نحط قولي معلقتين ملح كبيره ونرفعه على النار ولما تسيح نهدي عليها النار اوووووي ونقلبها كل ربع ساعه كده عشان نشوف المرته ما تتحرقش والسمنه كمان
بتاخد على النار من ساعه لساعتين حسب الكميه وجوودة الزبده وحاجات كتير
(ملحوظه مهمه لو هاتعملي كميه كبيره من السمنه وناويه تخزنيها مثلا يبقى الزبده الى تطلع دي اعمليه كور ورشي عليها ملح وسبيها في مصفى لحد تاني يوم هاتلاقيها نزلت مايه كتير وبعد كده تحطيها على النار بقى )



ولما تبدا المرته ترسى فى الحله كده ويبقى شكلها سمنه يعنى السمنه تفصل عن المرته وطبعا كان فى مايه فى الزبده اتبخرت
وبيبقى شكلها كده

بناءا على تذكير ستيته ستوته شايفين الريم الابيض الى على الوش ده ده بقى تشلوه كده بالراحه بالمعقله وتسبوه فى طبق كده وده انا باسميه المورته البيضاء وطعمها رااائع وانا بموت فيها على فكره
اساسا هى ما بتلحقش توصل للطبق من الحله على اللقمه على بؤي على طول هههههههههههههههههههههه

هانسيبها على النار لحد لما المورته بتاعتها تبقى لونها بني فاتح خااااالص زي كده







وبعدين نطفي عليها ونسيبها تستهدى شويه وبعدين نصفيها بمصفى سلك وتطلع فى المصفى المورته الي فوق دي باحبها اوي اوي ههههههههههههههه


وبعدين نعبي السمنه فى برطمانات وتفضل البرطمانات الازاز خصوصا لو هاتخزنيها فتره كبيره

ولو هاتخزنيها كتير اوي زودي الملح الى بتحطيه ساعة ما تيجى تسيحيها على النار وحطي فيها حبوب فلفل اسود مش مطحونه وانتى بتعبيها ويا حبذا لو كنا فى الصيف اوي حطيها فى التلاجه

وده شكلها بالظبط اول ما اتعبت


ولما بتبرد بيبقى شكلها زي الى فى الطبق الى فوق ده بالظببببببببط




ملحوظه مهمه جدا خصوصا للحريم الشلت جدا برضه :

بالنسبه لخطوة ضرب القشطه لتحويلها لسمنه . ممكن تستغني عن هذه الخطوه

اه والله زغرتي بقى لوووووووووووووولي

ممكن تحطي ملح على القشطه زي ما هى كده وتحطيها على النار تحطي مثلا معلقه كبيره لكل كيلو وتحطيها على النار

بس بقى الطريقه دي لها مشكلتين قابلوني

اولا : انا بتغيب جدا على النار ممكن تقعد بتاع 3 او اربع ساعات وكمان لازم تقلبيها كتير اوي عشان القشطه بتلزق وتاخدي بالك كمان تهدي النار عليها جدا وتحطيلها شياطه عشان ما تفورش

ثانيا : انك ما تعرفيش تطلعي زبده وانا باحب اطلع حته زبده كده من غير ما احولها لسمنه عشان باستخدمها فى الحلويات

وطبعا لها برضه ميزتين :

انك هانتفضي لمرحلة خض القشطه ده لانه رخم شويه

وان كمية المورته الى بتتطلع بتكون اكتر كتير من الطريقه الاولى



اه ملحوظه بالسمنه البلدي : المورته الناتجه عن القشطه الى انتى محوشاها من على اللبن الحليب المغلي بتكون مخرزه شويه وما بتكونش شبه المورته الى طالعه من السمنه المعموله بالقشطه الي طالعه بالفراز او من على اللبن الرايب
بس بيبقى طعمها حلو انا باحبها


بس خلاص انا مش فاكره حاجه تانيه

ياريت الى عنده استفسار يقولي
مش عارفه حاسه انكم مش فاهمين سالي فهمتي ؟؟؟
فضفضه تعالى قوليلي بقى زي ما بتعمليها ولا ايه
يلا منتظراكم



‏هناك 31 تعليقًا:

أحــوال الهـوي يقول...

ياني يا كلوسترولي ياني

اعشق السمن البلدي
و الفول بالسمن البلدي
و البيض المقلي البيتي الطازج و هو متغطي بالسمن البلدي

ناولني يابني الحبايه

تحياتي

ستيته حسب الله الحمش يقول...

فاضل شيء واحد ياقمر
لما تحطوها على النار بيجي عليها وش ابيض
شيلوه في أطباق لحد ما يجمد
دي المرته التحفة اللي أبندج اللي يسيح لي السمنة ويكرتن عليها

دي اهم من السمنة ذاتها يابشر

وش الحلة اللي هو رغاوي بيضه هي دي الخلاصة لاصة

تسلم ايديكي يابتاعة البلدي يوووووووووووووووووكل

صبرني يارب يقول...

احوال الهوى

لعلمك الخاص يا استاذنا السمن البلدي كليستروله اقل من الزيت ا لنباتى لما يتسخن
وطبعا احنا اغلب الاكل الى بناكله بيكون فى زيت مسخم قصدي مسخن

كل بالسمن البلدي بس ما تكترش اوي السمن

يعنى ملازم البيض يبقى متغطي بالسمن ههههههههههههه


على فكره انا لما باكل حاجه معموله بالسمن البلدي عمري ما اتعب ولا يجيلى حموضه
انما الزيت
اعوذ بالللللللله بتبقى ليله سودا

شمس النهار يقول...

تسلم ايدك
بس عايزه اقول لأحوال الهوي ان السمن البلدي مابتعملش كلوسترول خالص لو بالمعقول
انا شخصيا لااستعمل غيرها والحمد لله بخير

صبرني يارب يقول...

ستيته ستوته حياتي

لا لا بصي ما تقوليش لهم الاسرار بقى
هههههههههههههههههههههه

فعلا حكاية الوش دي انا نسيتها

اصل يا اختي انا مش باعمل كميات كبيره يعنى يوم ما تكتر الحكايه معايا تبقى خمسه كيلو قشطه

فالمورته البيضا دي بتبقى معلقتين

دول يا فندم باكلهم سخنين يبردوا ايه بقى ههههههههههههههههه

نورتي يا جميل

صبرني يارب يقول...

شموووووووسه حياتي

انتى هنا يا جميل وانا اقول مال المدونه منوره كده

اه انا قلتله اهو

مين ده الى يعمل كلسترول يا ماما الناس زمان كانوا قلوبها حديد ليه

نورتي يا جميل

nody يقول...

احنا بقى بنشترى الزبده جاهزه
وبنسيحها فى البيت

بنوفر على انفسنا مشقه ضرب القشطه

بس ماما بتقولى ان السمنه البقرى اخف كتير من الجامسى
مع ان لونها بيبقى فاقع قوى
ماعندكيش وصفه الواحد يتخلص بيها من ريحه التسيح الى بتقلب معدتى دى؟

صبرني يارب يقول...

نودي
ههههههههههههههههههههههههههه

مالها ريحة التسييح

انا احب اسيح الزبده الجاموسي عشان كده بيكون رحيتها احلى

الزبده البقري اه اخف يقال ذلك والله اعلم ماما برضه بتقول كده


اما بالنسبه لضرب القشطه

فاحب اعلمكم جميعا انى مش باجيب قشطه عشان اعمل سمنه

كلا البت

العكس

انا باعمل سمنه عشان القشطه بتتحوش عندي ارميها بقىىىىىىى ؟؟؟؟؟؟؟؟

لا طبعا باعملها سمنه

تحياتي يا نودي
والحل الوحيد انك تبقى تيجى تتغدى عندنا يوم التسييح

mony يقول...

ربنا يكرمك يا ام مريم انا من زمان و نفسي اعرف ممكن اعملها ازاي بالقشطة


بس ممكن استخدم المضرب الكهربائي بدل ما اقلب بنفسي

علشان ايدي ماتتكسرش

جزاك الله خيرا يا صبرني
استاذة فعلا

حاجات جوايا يقول...

حبيبىىىىىىىى
تسلمى يا قمر
وتسلم ايدك

شوفى هو كله تمام بس حتة الزبدة دى رخمة شوية .. وشكلى كده هستنى لما احوش حبة كمان عشان يبقى التعب واحد .. وبالمرة اكون غيرت الانبوبة عشان شكلها قربت تفضى ههههههههه ربنا يجازيهم بقى لسه مدخلوش عندنا الغاز

مستنية الحوادق بقى عشان اول ما اركب الانبوبة افضيها فى وقتها على طووول هو انا لسه هستنى هههههههههه

تسلمى يا قمر

صبرني يارب يقول...

حاجات جوايا

حبيبتى لو هاتعمليها لاول مره جربي الاول فى الشويه الصغيرين الى عندك

والانبوبه يا ستى على حسابنا هههههههههههههههه

صبرني يارب يقول...

موني

تسلمى يا جميل

اه طبعا ينفع المضرب بس فى لما تفصل الزبده عن المايه لازم تستخدمي ايدك بقى عشان تعملي كور وتطلعها منها الميه

نورتي يا جميل

nody يقول...

يعنى هو الحل الوحيد انى اجى اتغدى عندكم يومها
اوك
وعلى العموم هى خطوتين من الاتوبيس الجديد للدراسات

اوعى انتى بقى الى ترجعى فى كلامك
هههههههههه

صبرني يارب يقول...

نودي
هههههههههههههههههههه

يا جميل والله تنوري

لا مش بارجع فى كلامي

تعالي عندنا سمك مشوي النهارده

mony يقول...

الو الو الو


يا صبرني عايزة اوصلك

مش بتفتحي الميل بتاعك ولا ايه


كنت عايزاكي

صبرني يارب يقول...

الو موووووني حول

معلش يا موني الاميل ده بيبقى مفتوح كده ومش باخد بالي ساعات مين هناك انا اول ما احط راسي فى البلوج اقول بوللم بوللم واغوص بقى

انا بافتح اوف لاين على طول ابى رنيلى يا كوتي

ঔღঔ نـــوارة ঔღঔ يقول...

ميررررررسي يالغلاا

عالسمن البلدي اختي دايما

بتقول مفيش احلى من السمن البلدي

بس انا متعودة على السمنة الجاهزة

روابي ^ـ^

هبقى اجرب طريقتك

ربي يعطيكي الف عافيي

صبرني يارب يقول...

نواره

لا اسمعي يا جميل كلام اختك

وبلاش السمنات الصناعي دي مضره جدا يا حياتي ربنا يعافيكى ويديكى الصحه يارب

ونورتينى يا جميل

mostafa rayan يقول...

والله يا صبرني انا احترامي ليكي زاد قوي بعد قرأة هذا البوست خصوصا انك في البداية نوهتي انك مش بستخدمي غير السمن البلدي في اكلك . الاكل لما يبقي بالسمنالبلدي بيكونله طعمتاني خالص حاجة كدة تسري وتمري على الصحةوتفتح العقل وتنشط الجسم مش سمن العلب اللي لا طعم ولا لون ولا رائحة
انا بصراح افضل الطريقةالتانية وهي ضرب القشطة ليه بقي علشان السمنة هتكون كتير ونسبةالمورته هتقل وانا
الانسان لازم يفكر دايمافي المفيد وفي البهاريز مش المورتةاللي عادةبتوجع البطندي
على فكرة لما اجي اتجوز لازم اخليكي تتكلميمع مراتي وتديها نصايح عن اهمية وحتمية استخدام السمن البلدي في الطعام
واهمية تصنيعه في المنزل
وكفايةكدةبقي لأني جوعت وشكلي هتخانق مع امي اللي عادة بتطبخ بسمن العلب اوبتلجأ لحل وسط - علشان تسكتني بس -
وهوانها بتحط دةعلي دة
لك التحية والود
اه صحيح هي الطبخ الجايةايه ؟

mostafa rayan يقول...

ايه دةيا صبرني دة انا الراجل الوحيد اللي علق هنا
بس مش مهم معروف ان دي اكتر مدونة ليكي انا بحبها وكمان ماكانش ينفع افوت بوست السمن البلدي دة

mostafa rayan يقول...

ربنا يسامحك يا صبرني ريحةالسمن البلدي دخلت دماغي ومش قادر اخرجها منها
ربنا يستر بقي
يلا سلام عليكم بقي

صبرني يارب يقول...

مصطفى ريان

لا لا الراجل الوحيد ايه حاااااسب

احوال الهوى اهو اول واحد يا فندم واول من قال اه يا كلسترولي ياني


وبالنسبه لماما قولها ان الزبده البقري حدانا هنا فى المنصوره بقت ب 17 جنيه ممكن تجيبها وتعملها سمنه وهاتبقى احسن من العلب ميت مره

وعلى فكره انا صحيح باعمل السمنه فىالبيت

بس باستعملها قليل جداااا فى الاكل عشان مش ناقصين يعنى

وبعدين مراتك المستقبليه يا عمي هاتها عندي دوره تدريبيه لمدة اسبوع بس قبل ما تاخد عليها مقاس فستان الفرح ههههههههههههههههه
عشان هاتتخن عندي فله

وانت شرفتنا يا فندم ومستعده اجيبلك برطمان سمنه هديه لما تتجوز يا عم هههههههههههه
ونفس البرطمان الىفى الصور ده

صبرني يارب يقول...

ان شاء الله يا سيدى الطابخه الجديد اكلير بالجبنه بناءا على طلب اليس فى بلاد العجائب

mostafa rayan يقول...

معلش انا مااخدتش بالي
تحياتي الكبيرة جدا لاستاذنا احوال الهوي
- عارفة يا صبرني انا بفكر اجيب امي
تشوف مدونتك الطبيخية الجميلة دي
-رغم انها مالهاش في الكمبيوتر- بس المشكلة بعدها ممكن تحتل الجهاز وترفض تقوم من عليه واتعطل انا
هههههههه
ربنا ييسر لك الخير يا اختى الفاضلة

صبرني يارب يقول...

مصطفى ريان

يا لهوي ده احنا نتشرف هو احنا نيجى جنبها ايه

ابقى قولي لو جبتها عشان اعمل حسابي واظبط التسبيكه اصل ما نعجبهاش يا ابنى هههههههههههههه

ربنا يكرمك يارب ونورت

خمسة فضفضة يقول...

السلام عليكم ورحمة الله وبركاته

هاقولك علي حاجه مش عارفه بقي صدفه دي ولا تلاقي مدونات ولا ايه بالظبط

انا وماما كنا يوم الاحد اللي فات اللي هو يوم نزول التدونه دي قاعدين محتاسيين في ضرب القشطه وتحويلها لزبده اه والله وعمالين نشد نشد في الكيس عشان نطلعه من الصفيحه وكل واحده تاخدلها دور في ضرب القشطه لحد ما بقت زبده

اصل احنا في موسم القشطه بنجيب كميه ونضربها ونشيلها في الفريزر زبده عشان في الموسم اللي هو من نص شهر 2 الي اخر شهر 3 بيبقي الدسم في اللبن والقشطه اكتر لان العلف بيبقي برسيم اخضر مس تبن زي بقيت السنه ، وبالتالي بيبقي انتاجها للسمنه اعلي
ومش بنسيحها كلها مره واحده عشان تفضل طازه ومحتفظه بريحتها والترميله الجميله بتاعها فابنقسمها علي اكياس كل واحد بيطلع تقريبا 2 كيلو سمنه ، اخر كيس من بتاع السنه اللي فاتت لسه ماما مسيحاه الاسبوع اللي قبل اللي فات

وبالنسبه للناس اللي خايفين من السمنه البلدي احب اقلهم انها اصح حاجه موجوده دلوقتي اولا لان مافيهاش اي مواد حافظه ولا منكهات ولا روايح صناعيه اللي بتبقي في الزيت وكل حاجه فيها طبيعيه
ثانيامافيهاش الفري راديكل ( الشوارد الحره) اللي بتبقي في السمنه الصناعي واللي بيكونوا ناتجين من هدرجة الزيت عشان يتحول لسمنه

ثالثا الواحد عاملها علي ايده وضامن مكوناتها وعارف صلاحيتها


سلام

خمسة فضفضة يقول...

اه صحيح نسيت اقولك ان المورته( علي فكره احنا بنسميها عندنا عجوزه ) لان ملحها كتير فابيبقي غلط تاكلي منها بكميات فاممكن لو عندك حبه ومش عاوزه ترميه حطيهم في المش بيخلوه تحفه

صبرني يارب يقول...

اه يا فضفضه

بصي انا اكتشفت حاجه وانا باعمل السمنه اول امبارح

اه اصل انا برضه كان عندي قشطه وباعملها اول امبارح وكانت كتير شويه عشان فعلا اللبن الايام دي حلو

واه هو موسم تخزين السمنه والزبده بيبقى فى امشير

احسن لبن واحسن زبده واحسن جبنه فى السنه كلها

فى الموسم ده الفلاحين الى عندهم مواشي بيعملوا لبن رايب ومنه ياخدوا القشطه ا لى بتتعمل سمنه

واللبن الرايب بيعملوه جبنه قريش ويحطوها فى المش الى زودوه لبن ومرتة القشطه الى عملوها


ويقال مش عارفه الموضوع ده ان المش الى بيتعمل فى هذا الوقت من السنه الى هو شهر امشير ما يطعلش فيه دود ولا سوس وبيبقى طعمه احلى

انا ما عنديش مش فمش عارفه


وبالنسبه للمورته ايوه فى ناس بتقول عليها عجوزه

بس انا بقى يا كوتي مش باعملها حادقه اوي

لانى مش باعمل كميات كبيره اوي من السمنه وبالتالي مش بتقعد عندي كتير بالكتير شهر

فمش مشكله لو كان الملح قليل مش هايحصل حاجه

ولو طلعت حادقه اوي بابعتها لحماتي فعلا تحطها فى المش

نورتي يا جميل

ashraf يقول...

اللبن بتغليه ولا لأ

Mom يقول...

ما بينفعش نستعمل زبده علشان نعمل المنه البلدي؟ لازم قشطه يعني؟؟
و كمان اكيد السمنه البلدي مليان كولسترول و مواد بتقفل الشرايين....صح؟
تسلم ايديك..و شرحك صافي و وافي تمام:)

روان وروقة يقول...

سلام ياقمر ازيك

دي اول مرة ادخل هنا والمدونة عجبتني اوي

انا بحب اعمل منتجات الالبان غالبا في البيت

اتبسطت اوي

شكرا ياعسولة