السبت، 7 فبراير، 2009

عجينة الشو

عجينه الشو طبعا مهمه اوي فى عالم الحلويات وبيتعمل منها اصناف كتير جدا جدا
غربي زي الاكلير مثلا وغربي زي بلح الشام
فانا قلت اعملها فى بوست لواحدها عشان هانستخدمها كتير لسه
قدامي على المطبخ
المقادير :
كوب ونصف دقيق
كوب ماء
نصف كوب زيت على سمن
من 8 الى 10 بيضات + فانيليا
الطريقه :
اول حاجه بنعملها بنحط كوباية المايه على النار ومعاها الزيت والسمن وعلى فكره انا جربت اعملها زيت بس طلعت ناشفه جدا وبتلزق فى الصنيه وجربتها سمن بس او زبده بس وبتطلع طريه اوي زياده عن اللزوم لكن لما جربتها الاثنين على بعض طلعت ناجحه جدا
المهم حطيناهم على النار ا هو


ولما يغلوا بس ما نسبهومش على النار يغلوا لحد ما ينشفوا هههههههههههههههه
لما يغلوا على طول نضيف الدقيق المنخول مره واحده ونقلب بسرعه جدا هانلاقي على طول طلعت عجينه زي الى فى الصوره دي واتكورت حوالين المعلقه


بعد كده هانسبها تبرد شويه وما نسيبهاش كتير عشان ما تنشفش وتعذبنا لما نيجى نضيف البيض
ولما تبرد شويه نبدأ نضيف البيض واحده واحده وبعد كل بيضه نقلب بالمعلقه لحد ما البيضه تختفي مع العجينه
والمقدار ده بياخد حوالي من 8 الى 10 بيضات حسب الدقيق بقى والحركات دي
وطبعا مع البيض نحط الفانليا
المهم يطلع العجين فى الاخر زي الصوره دي كده تمام
عجينه طريقه جدا وناعمه .
اقولكم خليكم فى النص وحطوا 9 بيضات ههههههههههههههههههه عارفه انا الامخاخ بتاعة وانا اعرف منين

المهم كده عجينة الشو جاهزه بقى نقدر نعمل بها شغل جامد جدا

وان شاء الله اول حاجه هانعملها النهارده اكلير الشيكوللااااااته عشان فى ناس مصدعينى عليه وكتبته فى ورق يجى عشر مرات وبيضيعوا الورق وما شوفتش منهم ولا اكليرايه واحده ستاااااات شلت .

اه ومعلش التصوير مش اد كده عشان المساعد بتاعي كان سكه جدا واي كلام
سامعه يا بت يا هبه ؟؟؟ ساااااااااااااااكه انتى مساعد ساكه


هناك تعليقان (2):

الفراغ يقول...

مش ممكن مافيش تعليقات
دا حتى يبقى حرام تتعبى وماتلاكيش حد يقول شكرا
بل الف شكر على تعبك معانا
وبالصور كمان
ربنا مايحرمنيش منك

صبرني يارب يقول...

الفراغ

ههههههههههههههه ايوه شوفتي بياكلوا وينكروا

بس هو عشان انا نزلت عجينة الشو وبعدها على طول فى نفس اليوم الاكير وما اعلنتش عن العجينه على المدونه التانيه وكده

على اعتبار انها مش صنف انما جزء منه بس انا عملتها لواحدها عشان لسه هاستعملها كتير فى اصناف تانيه

نورتي يا جميل وجبرتي بخاطري يا اختي
هههههههههههههه