الثلاثاء، 31 مارس، 2009

المكرونه بالبشاميل

طبعا انتم عارفين انا باتصلب لما حد يطلب مني حاجه وخصوصا لو جاهزه عني
ابو زيد النهارده طلب مني المكرونه بالبشاميل وهى فعلا صورها جاهزه عندي
ودلوقتي يلا بقى نشتغل
اولا عشان نعمل صنيه مكرونه متوسطه محتاجين نص كيلوا مكرونه
نص كيلوا مش 400 جرام
يعنى لو جبتى كيس 400 جرام ابقى زودي شويه فوقه
ومحتاجين كمان حوالي من اربع الى خمس كوبايات بشاميل
طبعا احنا عملنا البشاميل البيتى مع بعض قبل كده
بس لو عايزين تجيبوا اكياس بشاميل جاهزه وتنضموا لفريق الحريم الشلت اوك جو اون
المهم نعمل المكرونه
وهانحتاج كمان نص كيلوا لحمه مفرومه معموله عصاج
تمام كده ؟
الطريقه بقى مافيش اسهل من كده
قلبي كل الى فات ده على بعضه وحطيه فى الفرن
ههههههههههههههههههههههههههه
لا طبعا استنوا انتم ما بتصدقوا ولا ايه
المهم
طبعا هانسلق المكرونه
ممكن نستخدم مكرونه اقلام او مكرونه اي شكل لكن المركرونه الاقلام بتخلي قطعة المكرونه بعد كده ماسكه فى بعضها
نسلق المكرونه ونغسلها من المايه الى فيها نشا ونصفيها كويس
وبعدين نضيف لها نص كمية البشاميل تقريبا الى عندنا
ونقلبها كويس لحد ما يتوزع البشاميل بس من غير ما نعجن المكرونه يعنى
بعد كده بناخد نص كمية المكرونه ونفردها فى صنيه ونساويها كويس ونغطي ارضية الصنيه تمام بالمكرونه
وبعدين نحط العصاج ونفرده برضه كويسه فوق المكرونه بالتساوي
وبعدن نرجع نحط باقي المكرونه ونساويها كويس اوي
يعنى هانعملها طبقات زي الصوره دي كده
ملاحظين شكل الطبقات ولا ايه ؟
المهم بعد كده نساوي الصنيه كويس
وبعدين نصب عليها البشاميل الباقي بالراحه ونساويها برضه كويس جدا
لحد لما تبقى زي كده
كده بقت جاهزه نسخن الفرن بقى لحد 200 تقريبا وبعدين نحطها فى الفرن
فى بقى حاجتين ممكن نعملهم عشان نخلي وش المكرونه احمر وحلو
هو اولا اننا نحط بيضه زياده ونخلطها بالبشاميل الى احنا سبناه للاخر ده للوش وده قبل ما نفرده طبعا
او نجيب جبنه رومي اوموتزريلا مبشوره ونرشها على الوش بس قبل ما المكرونه تطلع بربع ساعه كده عشان ما تنشفش ولا تتحروق
والمكرونه بتقعد فى الفرن حوالي ساعه ولو احمرت قبل الساعه بحاجه بسيطه نطفي عليها خلاص
ولو احتاجت ربع ساعه زياده عشان تحمر من فوق برضه اوك
وعلى فكره ممكن تغيري فيها وفى طعمها من خلال العصاج
ممكن تزودي على العصاج وانتى بتعمليه مشروم
وممكن كمان وانتى بتفرديه على المكرونه تحطي معاه حلقات فلفل اخضر او حلقات زتون وجبنه رومي او كل ده مع بعضه
دي كلها حاجات بتدي نكهات جديده كنوع من التغيير
كتير بيسألوني ليه احنا بنعمل المكرونه تطلع ناشفه ؟
ده بيكون سببه :
لو البشاميل تقيل او قليل او الاثنين معا تطلع كده
انا باحب البشاميل بتاع المكرونه بالذات يكون كتير وخفيف شويه عشان كده بتطلع طريه وقشه بالصلاه على النبى
ههههههههههههههههههه
انى كويشنز انا جاهزه

هناك 27 تعليقًا:

mony يقول...

تسلم ايدك يا صبصب

انا كنت بستخدم الباشاميل الجاهز و كنت من ضمن فريق الحريم الشلت بس ربنارحمني و حماتي قالتلي علي طريقةقريبة من الباشاميل الجاهز بس ببتعمل في البيت

قالتلي كيلو اللبن نحط عليه 4 ملاعق كبيرة دقيق و اضرب يا معلم في الخلاط
و بعدين حطيهم في حلة علي النار و عليهم ملح و فلفل

و قلبي لحد ما يصل للقوام المطلوب

احلي باشاميل من ايد حماتي

علي فكرة هي ماكانتش عايزة تقوللي عليه
بس انا مسكت واحدة من بناتها و قررتها لحد ما اعترفت


بيطلع خفيف و كريمي ساعات كتير مابحطش عليه سمن
هي حماتي بتحط ملعقتين سمن
بس انا بطنش
و ممكن بيضه


معلش يا اختشي طولت عليكي

كيــــــــــــارا يقول...

جوعينا بقي عاااااااااا

عارفه انا مش بجيب بشاميل جاهز خالث ماما كانت رفضاه وتقول دايما دا عملاه بايدي مش زي الجاهز وعلمتني ازاي بيتعمل

جوعتيني والدايت هيبوظ عاااااااااااااااا

magi يقول...

بموت فى المكرونه بالباشميل وطريقتك ممتازه

والباشميل فعلا لازم يتعمل بيتى انا شخصيا بعمله كل مره بطريقه شكل

kochia يقول...

حلوة
والحقيقة انا بعملها تقريبا زيك كدة تمام
وبتطلع زي الفل الحمد لله

تحياتي

خمسة فضفضة يقول...

السلام عليكم ورحمة الله وبركاته

ماشاء الله تسلم الايادي يا ام مريم

شوفي يا ستي هاقولك علي شوية حاجت تخليلك المكرونه بالبشامل دي تحفه :

اول حاجه بطني الصينيه بالسمنه او الزيت ورشيها بطبقه من البقسماط الناعم

اه البقسماط اللي بنغطي بيه البانيه
عارفه ده بيخلي المكرونه مش لازقه خالص خالص والله الصينيه بتبقي اكنها مغسوله

تاني حاجه خلي البشاميل بتاع المكرونه خفيف شويه عن اي بشامل

كمان حطي فيه شوية جبنه مبشوره سواء رومي او موزاريلا وبضتين بيخلو المكرونه حلوه ويدوها لون حلو طبعا دول غير البيضه اللي علي الوش


رابع حاجه حطي علي العصاج شوية عصير طماطم وغليه شويه علي النار لحد قرب ما يتسبك يعني برضو يبقي سايل شويه مش قوي وقبل ما تنزليه من علي النار قطعي عليه شوية بقدونس بيخليه تحفه

اخيرا بقي انا مش باقلب البشاميل في المكرونه ، باعملهم طبقات

الاول بشاميل تحت خالص وبعدين مكرونه وبعدين بشامل وبعده لحمه مفرومه وبعده بشاميل وبعدين مكرونه وبعدين بشاميل بزياده شويه علي الوش

وبالف هنا وشفا


سلام ياقمر

صبرني يارب يقول...

كيارا
كويس انك اتعلمتى يا كوكي شاطره والله

وبوظي الدايت اشمعن انا يعنى

صبرني يارب يقول...

موني

اه تصوري حكاية الدقيق الني دي واحده قالتلى عليها قبل كده بس كل مره اقول هابقى اجربها مره اكون عامله مكرونه قليله

يعنى لنا احنا بس

والنبى يا اختي اليوم ده ما جاش لسه من زمان يعنى

وما كانتش عايزه تقولك ليه يعنى هو سر عسكري
هههههههههههههههه

هابقى اجيبلك كرس كهربائي لاي واحده تعصلج معاكي فى وصفه

وحلو حكاية من غير سمن دي عشان الدايت وكده يعنى
الواحد ممكن ياكل كوسه بالبشاميل براحته

هاجربها ياموني ان شاء الله

نورتي يا جميل

صبرني يارب يقول...

كوشيا

طيب يا جميل تسلم اديكى

نورتي يا قمر

صبرني يارب يقول...

ماجي

كل مره بطريقه شكل ازاي قوللنا طيب يمكن نطلع بحاجه جديده

نورتي يا ماجي

صبرني يارب يقول...

فضفضه

يا قلبي انا باحط فعلا فيها سمن او زيت من تحت نسيت اقول الخطوه دي وهى عموما مش بتلزق معايا عادي عنى

لكن انا مش باحب طريقة الطبقات دي باحس المكرونه طالعه مش ماشيه مع بعضها

باحب اكتر المخلوطه فى بعضها

والبيض والجبنه دول انا قلتهم فعلا انت يظهر وقع منك كوبليه يا جميل


والصلصه على العصاج انا باعملها فعلا كده

بس فى ناس مش بتحبها كده فقلت خلينا نكتبها من غير طماطم والى يحب الطماطم يحط

البقدونس كلا البت يقتلوني لو عملت كده يا فضفضه
ههههههههههههههههههههه

دول بينقوه من السلطه ويرموه عيال رخمه موت يعنى

نورتي يا جميل والله

بنت مصر يقول...

تسلم الايادي يا أم مريم

بفكر اعملها النهارده اصل احنا لسه الصبح ولسة ما قررتش اعمل ايه وعندي المقادير بتاعتها

ايوة كده احب انا الافكار الحلوة دي لحسن انا بزهق من التفكير في السؤال الغلس بتاع كل يوم " حعمل أكل ايه النهارده "

تسلميلنا يا قمرة

صبرني يارب يقول...

بنت مصر

اووووووووووك جو اون طيب اعملي اي فكره شوفتيها جديده على الوصفه هنا وقوليلي طلعت اخبارها ايه

نورتي يا جميل

خمسة فضفضة يقول...

السلام عليكم ورحمة الله وبركاته

يا ام مريم اقصد موزاريلا جوه البشاميل نفسه مش علي الوش

ولو هاتحطي بضتين برضو جوا البشاميل غير البيضه اللي بنضربها ونوزعهاعلي وش الصينيه

اما البقدونس مش هايحسوا انه موجود لانه هايبقي شبه مستوي ومش باين جوا العصاج وبالتالي تبقي اكلتيهلهم واستفادوا من قيمته الغذائيه طالما مش بيحبوه لوحده

وساعات باحط كمان فلفل رومي مقطع بس ده باسيبو يستوي شويه مع العصاج

عموما يا بنتي صينية المكرونه مهما كانت معموله ازاي مش بتستني

سلام

فضفضتي يقول...

حلوه مدونتك
ما شاء الله عليكي
شاطوره خالص
انا كمان بحب المطبخ والطبيخ
وخصوصا السهل والسريع وطبعا اللذيذ
بس للأسف عامله دايت اليومين دول ومش عارفه اجرب اي حاجه براحتي
وسمعت اننا بلديات من موني
وقولت اسلم عليكي
:)

صبرني يارب يقول...

خمسه فضفضه

والله يا جميل انا عارفه ان الطرق اساسا بتختلف حسب كل حد وذوقه

وانا مش باحط بيضه على الوش انا بازود ساعات البيض فى البشاميل بتاعة الوش

والجبنه والفلفل والمشروم والزتون كله اه ممكن يتحط جوه

وكله بيتااااااكل يا باشا انا عارفه
هههههههههههههه

صبرني يارب يقول...

فضفضتي

يا حبيبتى تشرفينى يا جميل

طيب ما انا برضه عامله دايت بس باجرب عشان القبيله الى فى رقبتي
ههههههههههههههه

وبلدياتي طيب نعزمك على اكله دايت يا باشا ولا يهمك
هههههههههههههههه

نورتي

فاتيما يقول...

صبرنى يا قمر يا ام القمرين
أقولكم بقى طريقة الحاجة امى ...
امى بتعمل حاجة تانية
بعد ما بتحط البشاميل فى الآخر على وش الصينية بتضرب بيضة بملح و فلفل و تفردها على كل الجوانب و بعدين تجيب بقسماط مطحون ( بتاع الفراخ البانيه دا) و تروح رشاه بخفة كدا يعمل طبقة خفيفة ...
لما المكرونة تستوى بيبقى مقرمش و طعمه حلو و بيتحمل الحرارة و ميحرقش وش الصينية لو قعدت فى الفرن مدة أو حبيتى تسخنيها تانى يوم ...
الله ينور عليكى بجد
تعرفى ...
المدونة بتاعتك دى تتصنف ضمن فئة درجة اولى ممتاز ...
متتصورييش مجرد بس القراية بتكون ممتعة و مفيدة و محفزة إن الواحد يشارك و ينفع و يقترح على غيره إزاى
تسلم غيدك يا صبصب

صبرني يارب يقول...

فاتيما

والله حكاية البقسماط دي فكره برضه مش بطاله

نبقى نجرب

شوفوا يا ولاد قاعده الحريم حلوه ازاي ومفيده
هههههههههههههههههه


تسلمى يا فاتيما على الكلام الى قولتيه عن المدونه ربنا يكرمك يارب وما اتحرمش من طلتك عليا يا قمر

احساس طفلة محبة للرومانسية بس واقعية يقول...

تعرفى يا صبرنى عمرى ما عملت مكرونة
وطلعت بنت ناس وتتاكل
ودئما السبب البشاميل
بس فكرة مونى دى ظريفة هبقى اجربها
كمان المقادير هبقى اخلى بالى منها
وفكرة الجبنة اللى على الوش دى كمان ممتازة
اية دا امال انا كنت بعمل اية
لما مكنتش بعمل كل الحاجات دى
:)
هجرب بقى واشوف هتطلع ازاى
شكرا ليك يا اجمل صبرنى

تقبلى مرورى

reem يقول...

تسلم ايديكى يا صبرنى
المكرونة بالبشاميل دى محبوبة الجماهير

انا على فكره زيك مش بحط بيض على الوش خالص خالص ولا كمان في البشاميل لانى مش بحبه وبتطلع حلوة جدا ومش بتفرق عن اللى فيها بيض

ومش بحب البشاميل الجاهز وبحب اعمله انا
هييييييييه طلعت مش من الستات الشلت

انا النهارده عامله كفتة البطاطس بتاعتك وبعد الغدا هاقولك على الاخبار ايه

وتسلم ايديك يا جميل وربنا ما يحرمنا منك ومن اكلاتك الحلوة

فاتيما يقول...

أنا بقول رأى محايد يا صبرنى
لأنى دخلت مدونات للمطبخ تانية كتير
أسلوبك مميز و سلس كدا يحسس الواحدة ان الطبيخ دا زى شكة الدبوس ...
ربنا يباركلك يا رب
منتظرة البيتزا على أحر من الجمر
أنا بعملها معقولة ... و نفسى أشوف طريقتك اكيد هلاقى فيها حاجة تفيدنى اكتر و تخلى النتيجة أظبط و باين أصلا من شكلها إنها احسن من بتاعتى بكتيييير
أصل الطبيخ دا نفس و إنتى ما شاء الله نفسك حلو ...
خالص حبى يا صبروتى

صبرني يارب يقول...

احساس طفله

طيب جربي وقوليلى كده هاتعملي ا يه

ده المكرونه دي اسهل حاجه نص ساعه على الاكثر وتكون فى الفرن

صبرني يارب يقول...

ريم

ايوه يا حبيبتى هانعمل هنا قايمه للحريم الى مش شلت ونكرمهم هههههههههههههههههههههههههههه

نورتي يا جميل

صبرني يارب يقول...

فاتيما

والله فرحانه بكلامك يا فاتيما

وانا ما اعرفش مدونات طبخ الى مطبخ شموسه ومدام سلاموني

لو تعرفي مدونات تانيه ابقى ادينى لنكات عشان ازورهم واحطهم فى القايمه عندي

والبيتازا عيييييييينى هى الى عليها الدور ان شاء الله

وانتظروا قايمة قريبا بقى فيها حاجات جامده جدا

Soooo يقول...

على فكره انا باجي هنا اجوع وامشي
مش اسلوب يعني

المفروض يكون في بوفيه على جمب الواحد يضرب منه اي حاجه


بس بجد بجد .. تسلم ايديكي ودماغك انك عامله المدونة دي





سلامووووووووووز

صبرني يارب يقول...

ٍسووووووووو

منور والله ومتشكره لك اوي

صبرني يارب يقول...

الاخ ابو زيد انت سألتنى فى المدونه التانيه

على ان المكرونه طلعت وشها ابيض

انت كان ممكن تسيبها فى الفرن زياده شويه

وكمان هى المفروض تظبط الرف الى فى النص ترفعه فوق شويه عشان الحاجه تحمر من فوق حيث ان الفرن من فوق بيبقى حامي على ا لنص عشان الهوا الاسخن بيكون اخف

وانا باسويها من غير شوايه ولا اي حاجه


والحاجه التانيه انها تبقى تحط بيضه على كوباية بشاميل من الى هايتحط على وش الصنيه

واساسا هى المفروض يبقى لونها دهبي زي الى في الصوره كده

وتحياتي لحضرتك واي خدمه