الخميس، 26 مارس، 2009

شكلمه (من ايدين مريم )



ازيكم يا قوم

النهارده جايبالكم صنف سهل جدا وسريع جدا عشان فى ناس قالولي يا مفتريه منك لله مش عايزين اصناف متعبه احنا هانقعد فى المطبخ طول النهار

ومصطفي ريان قالي عايز حاجات سهله عشان الحاجه ما تضربنيش لما اجي ا نفذ


النهارده هانعمل شكلمه وليييييييييه بقى شكلمة مريم

ده لان مريم حبيبتى بنتى الى طالعااااااالي جاتلي مره وانا واقفه فى المطبخ فى احدى افتكساتي دي وقالتلي يا ماما انا فى وصفه شوفتها على سبيس تون وعايزه اعملها

طيب يا مريم اسمها ايه قالتلى كعك جوز الهند .

اه وصفه وكعك جوز الهند ما هو سبيس تون بقى


المهم على ما خدت منها معالم الوصفه اتضح انها شكلمه


وبدأنا التنفيذ اليكم الوصفه كما قامت بعملها الانسه مريم حفظها الله
وطبعا بعد ما عملتها قالتلى لو سمحتى يا ماما صوريها ونزليها على المدونه بتاعتك
هههههههههههههههههههههههه


المقادير :

كوب جوز الهند

بياض ا ثنين بيضه +فانليا

نصف كوب لبن مكثف محلى


بالنسب للبن المكثف المحلى
انا باعمله فى البيت ( بنحط 3 كوبايات حليب على النار ومعاهم 3 الى خمس معالق سكر حسب ما بنحب السكر ونسيبهم حوالي نص ساعه ) بس كده اه والله بس كده

ولو كلكع منك خدي لفه فى الخلاط كده على السريع وبيبقى احلى من الجاهز بمراحل


نرجع مرجوعنا يا حلوين للشكلمه


الطريقه

الاول هانخفق بياض البيض بالمضرب السلك لحد ما يبقى منفوش ولونه ابيض

وبعدين فى طبق تاني نحط جوز الهند وعليه الحليب المكثف المحلى ونقلبه وبعدين نضيف بياض ا لبيض مع الفانليا ونقلب برضه

لحد ما يبقى شكله كده


وبعدين نجيب صنيه ونبطنها بسمن ودقيق ونعمل الخليط ا لى فات على شكل دواير زي كده وتكون كده جاهزه تدخل الفرن



مش بتاخد كتير فى الفرن حوالي 20 دقيقه وبنطلعها ياااااادوب تكون اصفرت مش هاتحمر اصلا وبيكون شكلها كده وهى طالعه من الفرن

ونستنى عليها لما تبرد وبعدين نطلعها من الصنيه ونقدمها زي الطبق الى فوق ده والف هنا يارب





والى يجرب يقولي يا حلوين

هناك 11 تعليقًا:

mostafa rayan يقول...

يا سلام وجول وجول وجول انا اول تعليق
اشكرك يا ام مريم ربنا مايحرمنا منك
هي وصفة سهلة هاخد كوباية جوزهند من امي واحاول اعملها وهقولك النتايج ايه
تحياتي ليك ولمريم

صبرني يارب يقول...

نورت يا مصطفى

ماشي قولي بقى لما تعملها ان شاء الله

mony يقول...

بابا بيحب الشكلمة اوي


شكلها سهلة جدا و مابتاخدش وقت ولا عك في المطبخ خااالص


بس الي مكيفني طريقة اللبن المكثف

بجد يا صبرني بيطلع زيه
علي ضمانتك يعني؟؟؟
اصل انا صارفة مصروف البيت عليه تقريبا

صبرني يارب يقول...

موني

بصي يا موني انا عموما ما باحبش طعم الحاجات المحفوظه

يعنى مثلا انا احب اشرب حليب طازه طبيعى
ما باحبش طعم المبستر وكده


فأنا برضه طعم اللبن المكثف على الشاي مثلا مش باحبه اللبن المكثف المحفوظ


انما الحليب العادي الى انا باعمله بيفضل طعمه حليب طازه برضه ومافيش طعم مواد حافظه ولا كلام من ده

فانتى جربي الاول فى كوبايتين حليب
وشوفي طعمه ايه معاكي

وابقى اعملي بيهم الشكلمه لوما عجبكيش طعمه

لكن يا موني اتعودي دايما على طعم الحاجه الطبيعيه وعودي ولادك عليها

اي خدمه يا جميل لو اعرف كنت قلتلك من زمان على الطريقه دي

بنت مصر يقول...

يم يم يم

بحبها جداااااا وشكلها سهل

تسلم الايادي

صبرني يارب يقول...

تسلمى يا جميل واعمليها بقى وقوليلي

شفـقــة و إحســــان يقول...

حلوة اوى اوى الوصفة دى انا بموت فى الشكلمة ربنا يخليكى لينا

صبرني يارب يقول...

ِشفقه هانم

ده ايه النور ده يا ولاد

تعيشي يارب

عايزينك تجربي وتقوليلنا ما دام بتحبيها

Dr . Rosa يقول...

حلوه قووووووووى
عملتها النهارده
بس مش عارفه حاسه انها محتاجه شويه سكر


بس طلعت جميله
تسلم ايدك

صبرني يارب يقول...

دكتوره روزا

طيب الحمد لله تعالى

لا ماهو السكر ده بقى حسب زوقك بقى

انا فى واحده قالتلى انها بتحط عليها سكر بورده بس انا باحب الحاجه مايعه شويه

المره الجايه حطي سكر بودره يا جميل

تسلمى يارب

حكاية قلب يقول...

انا عملت الحليب المركز زى ماقلتى وقعد اكتر من ساعه ونص على النار ومتقلش اصلا اتقل سنه بسيطه من الحليب العادى مش مركز ولا حاجه