الأربعاء، 21 أكتوبر 2009

اصابع الجلاش


السلااااااااام عليكم


معلش يا جماعه والله المطبخ الواقعي كان مستولي عليا شويه اليومين الى فاتوا على الدراسه والمذاكره بقى

لا مش انا الى باذاكر ياريت كانت بقى اسهل

ده ولادي


انا قلت بقى من زمان ما عملناش حاجه حلوه فاخترتلكم حاجه سهله وخفيفه وجميله


وهى اصابع الجلاش بالمكسرات او الفول السوداني


اولا طبعا هانجيب جلاش يكون طازه او مجمد مش مشكله المهم يكون طري


لو مجمد فككيه فى معزل عن الهواء يعنى ما تطلعيهوش من الكيس الا لما يفك فعلا ووقت الشغل


وهانجيب فوطه نضيفه ونغطي بيها ورق الجلاش واحنا بنشتغل عشان ما نيشفش من الطروف ويبوظ


هانجيب نص كيلو جلاش

وهياخد حوالي نص كوباية سمنه او زبده (ياريت بلدي )

و للحشو بقى زي ما تحبي ممكن مكسرات مجروشه وممكن خلطه زي الى انا باحبها دي

فول سوداني وزبيب وجوز هند وعليهم شويه قرفه او فانيليا زي ما تحبي


وهنحتاج شربات (قطر او شيره ) بس خفيف شويه ما نعقدوش اوي هنحتاج حوالي كوبايه شربات واحده او كوبايه ونص لو بنحب الحاجه سكر زياده


الى العمل بقى


هانجيب ورقتين جلاش ونفردهم كده قدامنا زي الصور دي ونحط معلقة كبيره من الحشو او نزود شويه ونفردها بعرض الورقه زي الصوره دي تمام



وبعدينناخد الطرف بتاع الورقه الى قدامنا ونطويه على الحشو بادينا الاثنين كده نساويه ونبرمه ونحاول بقدر الامكان ان تكون اللفه محبوكه كويس عشان تبقى ماسكه نفسها ونبرمها بادينا الاثنين فى نفس الوقت لحد ما تتلف لاخر الورقه


ممكن بالفرشاه كده ندهن الورقه قبل ما نلفها بالسمن السايح لكن يعنى لو كنتى اول مره تلفي جلاش كده بلاش لحد ما تتمكني من اللف ونبقى نرش السمن فى الاخر زي ما هانشوف

بعد ما نلف ورقتين الجلاش ننقلها بالراحه على الصنيه ونفضل نكرر ده لحد ما تخلص الكميه وتكون شكلها زي كده

بعد كده هانقطعها تقريبا طول كل حته خمسه سم وطبعا رصهم جمب بعض كده بيخليى تقطيعهم سهل جدا مع بعض

وبعد كده هانرش عليها السمنه بالمعلقه ونحاول نرش فى مكان القطع عشان السمنه تدخل بين الطبقات

زي الصوره دي كده



بعد كده هاندخلها الفرن بتقعد حوالي ربع ساعه بالكتير حسب سخونة الفرن عندك

وخلي بالك الفرن ما يكونش عالي عن 200 عشان ما يتحرش من فوق

وبنطلعه لونه اصفر دهبي جميل


وبنسقيه وهو سخن والشربات بارد ونسيبه فى الصنيه لحد ما يبرد وبعد كده نطلعه ونقدمه زي كده





وبالهنا يارب


يا لا بقى على المطبخ سريعا و وروني الشغل الجامد موت




هناك 16 تعليقًا:

نكهة مغربية يقول...

مممممممممممممم
ايه الحلوة الجامد ده يا حلو انت
و الله بتشهي يا خسارة في المغرب مش حقدر أجيب العجينة دي حتعملي حسرة في قلبي زي الفريك هههههههههههههه
مرسي يا عسل و الله يعينك على الاولاد و دراستهم

نورة يقول...

اوك اختي العزيزة مفيش مشكلة و لو اني اخذت و كتبت عنوانك على طريقة coupier coller .
ساحاول ان اعطيك عنوان تجدين فيه كل الوصفات التي كتبتها لك ...
فقط امهليني بعض الوقت لدي بعض الظروف الخاصة منعتني حاليا من كتابة ذلك و ساتتبع اطباقك طبق طبق ... لكنك نسيتني في طبق المهلبية و قبل ذلك هل هي عبارة عن مسحوق الارز يخلط في الحليب و السكر و يطبخ على النار حتى الغليان مع التحريك اذا كان كذلك فنحن نسميه طبق " المحلبي " .
مع تحياتي لك

bobo يقول...

ممممممممممممممم.... هجرب واقولك النتيجة.. تسلم ايديكي وتسلميلي يا رب

صبرني يارب يقول...

نكهه

يا حبيتى اجبهولك واجي ولا يهمك

تسلمى يا جميل تعالى مصر طيب فى اي اجازه واحنا نظبطك بخزين السنه

فريك وجلاش
هههههههههههههه

reem يقول...

يا عينى على الجلاش

ايه يا بنتى الحاجات الحلوة دى

تسلم ايديك ياقمر

شكلها حلو اوى وسهله كمان

نجرب يا باشا

صبرني يارب يقول...

بوبو

اوك يا جميل يلا شدي حيلك

صبرني يارب يقول...

نوره

ماشي على مهلك خالص وربنا يجعله خير ان شاء الله

وبالنسبه للمهلبيه والله لسه ما صورتهاش
عيوني حاضر

وهى قريب من الى بتقولي عليه ده برضه

بس احنا بنعملها بنشا بيضا
ال هى بتعمل من الرز برضه

بصي هاقولك المقدار سريعا لحد لما ابقى اصورها وانزلها

هى تجيبى حليب وتسخنيه اول ما يدفى تاخدي منه كوبايه
تدوبي فيها النشا (معلقه كبيره لكل كوبايه لبن )

واللبن على لسه على النار تحطي السكر زي ما تحبي

وبعدين لما اللبن يغلي تصبي اللبن الى معاه نشا وتقلبي جامد دقيقتين بس وبعدين تطفي عليها وتغرفيها فى اطباق وتزينها بالمكسرات والقرفه

بث كده

صبرني يارب يقول...

رييييييم
حياااااتي

ماشي يا جميل مستنيه التجارب الجامده

بس انا عايزه اثبات يعنى طبق كده يعنى

عابرة السبيل = ام بقلظ باشا يقول...

سلام عليكم

اول مرة اجى المدونة اللى تفتح النفس وتجوع دى

ماشاء الله ولا حول ولا قوة الا بالله

ربنا يباركلك يارب

انا بس عندى سؤال واحد

الكيك معقدنى مش عارفة ايه الغلط فى الل ى بعمله
المهم انها ما بتفشش بالشكل الكافى بتبقى ماسكة كده كانها مكمكمة
ياترى فهمتينى ؟

هل لانى مش عندى مضرب كهربا وبضرب السكر والسمنة فى الخلاط ووالبيض معاهم وبعدين بكمل بالشوكة الكبيرة ؟
ولا عشان بحط الدقيق فى التلاجة ؟

ولا ايه بالظبط؟

صبرني يارب يقول...

ام بقلظ

شكرا يا جميل ربنا يكرمك يارب

بالنسبه للكيك

انتى شوفتي وصفة الكيك الى عندي ؟؟

لو ما كنتيش شوفتيها دي الوصله بتاعتها اهي

http://tabkheen-eah.blogspot.com/2009/06/blog-post.html


الكيكه بتطلع هابطه ومكتومه لكذا سبب

اولا يكون البكنج بودر الى بتستعمليه قليل او بايظ خدي بالك يكون منتهي الصلاحيه او مرطب

ثانيا انك تفتحي الفرن على الكيك وهو بيستوى قبل ما يفوت عشر دقايق على الاقل عليه فى الفرن تحت درجة حراره 170 درجه تقريبا

ثالثا انك ما تكونيش خفقتى الخليط السائل كويس

الى هو الزبده والسكر وبعدين البيض


رابعا: انك بعد ما تعجنيه مثلا تسبيه شويه وبعدين تقلبيه تاني بالتالي كل الهوا الى عمله البكنج بودر فى العجينه بيخرج تاني

الصح انك تخلصي العجينه وتصبيها فى الصنيه او القالب وتسبيها عشر دقايق بس وبعدين تخبزيها على طول


وموضوع الخلاط ده عادي انا باعملها فى الخلاط ساعات

وبعدين خلي ابو بقلظ يجيبلك مضرب كهربا هديه فى عيد ميلادك الجاي
ههههههههههههه

وشوفي كده جربي وقوليلى

Magia da Inês يقول...

Olá amiga!
Conheci seu cantinho e é tudo de bom!
Lindo, criativo, nutritivo e delicioso!...
Parabéns pelo seu trabalho!
Espero você em:
magiadaines.blogspot.com
Um ótimo fim de semana!
Beijinhos.
Brasil

نكهة مغربية يقول...

ده العشم برضو ربنا ميحرمنيش منك يا بطة

صبرني يارب يقول...

نكهه

اموووووووووووووه

صبرني يارب يقول...

Thank you, Maggie
Mas peço que você deve tentar escrever em Inglês eu não entendo sua linguagem, mas um intérprete

Gostaria de continuar o meu blog, mas eu não consigo entender o idioma Português
E seu muito feliz

Espero que a boa linguagem

Porque eu tenho uma página traduzida

عابرة السبيل = ام بقلظ باشا يقول...

سلام عليكم

شكراااااااااااا جدا على النصايح

انا فعلا نفسى فى كيتشن ماشين متكامل

وفعلا كمان انا بحط البيكنج بودرفى التلاجة واكيييييد خد رطوبة

وبرضه بقلب الخليط تانى بعد ما بيخلص

من الاخر ببوظ الدنيا
:)

شكرا مرة تانية ولما هجرب هاجى اقولك النتيجة

صبرني يارب يقول...

عابرة سبيل

طيب بصي استخدمي البكنج بودر الاكياس احسن

على اساس هى بتبقى مقفوله ولا تحطي فى التلاجه ولا حاجه

انا باجيب علبه كبيره وفيها اكياس بقى صغيره الكيس على اد استعمال مره مثلا كده يعنى

ويلا جربي وقوليلي