الأحد، 1 نوفمبر 2009

كشري اصفر



السلام عليكم


النهارده يا جماعه هاعملكم اكله بقى حرشه عشان انا دلعتكم كتير بصراحه


وهى الكشري

ولكن مش الكشري المصري المعروف الى بيتعمل بالعدس البنى


كلا البت ده كشري اصفر بعدس اصفر


وعمايله سهله سووووو ماتش


هانحتاج كوباية ونص ارز مصري وكبايه ونص عدس اصفر او برتقالي يعنى


انا باحب انقع الرز نص ساعه قبل ما اخلطه على العدس عشان الرز لو مش منقوع بياخد سوى اكتر من العدس بالتالي العدس بيستوى اوي ويبقى الكشري معجن


الاول هاننقع الرز نص ساعه وبعدين نخلص عليه العدس ونغسلهم كويس وبعدين نحط 2 كوب ماء عليهم ومعلقة ملح كبيره و3 معالق زيت

ونحطهم على النار


بعد عشر دقايق تقريبا هايكونوا غلوا وبدأت المايه فيهم تنشف يتشربها الرز والعدس


نهدي النار عليهم اوي وياريت نحط صاجه تحت الحله ونسيبها لمدة ربع ساعه تقريبا وبعدين بظهر المعلقه ونقلب الكشري بحرص عشان الحله كلها تبقى سوى واحد


وبعدين نغطي عليها ونسيبها حوالي ربع ساعه كمان يعنى المهم لحد ما نلاقي الرز استوى


وده بيكون شكله بس معلش الصوره طلعت اي كلام




بسسسسسسس كده


الكشري ده بقى عندنا مش بيتعمل لواحده كده


لاااااااااا كلا البت

لازم تفضي واقفه قدام البوتجاز ساعتين كده تقلي حاجات


بتنجان مقلي وففل مقلي وبطاطس مقليه وبيض مسلوق ومتحمر


زي الطبق الى فوووووووق ده كده


وكمان سلطه خضرا ومخلل


طبعا مش لازم تعملوا كده ممكن صنف واحد او صنفين بس


لكن احنا بنعمله كده


والف هنا يا رب


والى يجرب يقووووووووولي


نوره معيشاكي اهو مصري مصري



هناك 15 تعليقًا:

عابرة السبيل = ام بقلظ باشا يقول...

انا بقى عملت الكشرى اول امبارح بس المصرى اللى هو زى بتاع المحلات
بموووووووووت فيه

بس هبقى اجرب الكشرى الاصفر ان شاء الله

هو بيبقى اكله لذيذة فى وسط الاسبوع المسبك والمحمر

تسلم ايدك

احساس طفلة محبة للرومانسية بس واقعية يقول...

حبيبتى يا صبصب ايوة خليكى فى المكونات السهلة دى انا بعمل مع الكشرى دا سلطة و مسقعة وبيض مسلوق بس اول مرة اعرف ان ممكن بعد ما اسلقة احمرة وكمان نقع الرز دى هبقى اجربها

هرخم عليكى شوية لو ممكن انا عايزة اعرف طريقة عمل شوربة العدس بما ان الشتاء دخل
وانتى لسة متكلمة على العدس

تسلم ايدك يا صبصب
تقبلى مرورى

صبرني يارب يقول...

عابرة سبيل

تسلمى يا جميل
مستنيه اعرف نتيجة التجارب

صبرني يارب يقول...

احساس طفله

يا جميل انا تحت امرك انت قول بس

بصي يا ستى

انا هاقولك كده على السريع على ما ابقى اصورها وانزلها على المدونه

انتى تجيبى العدس لو مثلا كوباية عدس تحطي عليها 3 كوبايات مايه

وانا بقى باحب احط كل حاجه تتسلق مع العدس مش باعمل انا تقليه للعدس بيبقى يا اختي يطلع على القلب يموت
هههههههههههه

باحط مع العدس جزره وبصله وكوسايه وثلاث فصوص توم وحباية طماطم او معلقة صلصله

وتسبيهم على النار لحد ما يستوو كلهم كويس
يعنى قولي 20 دقيقه كده

وبعدين لما يبرد شويه تاخدي على الخلاط بقى طااااااخ بقى شوربة عدس
هههههههههه

لا طبعا لازم ترجعيه على النار تاني وتحطيله بقى ملح وكمون وفلفل ويا حبذا لو شوية شططططططه
وطبعا تظبطي المايه بتاعته

ولو تحبيه بالشعريه او بلسان العصفور حمري شوية شعريه وحطيها عليه فى هذا الوقت

بس زودي مايه عشان الشعريه هاتشرب المايه الى فيه

وبالهنا يا جميل

قوليلي لما تعمليه

Zianour يقول...

الله يصلح حالك

انا لسه عاملة كشري برضه النهاردة

بس اورديحي فقط معاه شوية سلاطة ودمتم

بس كان فيه مخلل واحده صاحبتي بعتت لي شوية

تسلم الايادي

على فكرة اخطر حاجة الزيت ده والبتنجان والفلفل والمخلل

بس سيبك ولا يهمنا

ويجعله عامر

Zianour يقول...

باقول لك ايه يا صبرني

هو انا ممكن اتجرا واطلب منك حاجة يعني

عايزة اعرف طريقة الفطير المشلتت

معلش مزنوقه فيه
اصل الناس هنا بيقولولي في الافلام المصرية بيقولوا فطير مشلتت
شو هو الفطير المشلتت سوي لنا اياه؟
وطبعا دي سمعة مصر ولا ايه؟؟

شكرا يا صبرني مسبقا وتسلم ايديكي على الاكل الهايل ده

احساس طفلة محبة للرومانسية بس واقعية يقول...

صبصب
وانا اقول لية لما بحط شعرية مبيبقاش شربة عدس خالص بيبقى عدس مش غير شوربة
وكمان انا كان بيقع منى حاجات مش بحطها فيه مش عارفة كان بيتأكل ازاى دا الظاهر انى كنت بعمل حاجة تانية غيره اساسا

شكرا يا صبصب
ربنا يبارك فيك
تمام كدا هيكلوا شوربة عدس بجد
واكيد هبحسوا الفرق
تسلمى

صبرني يارب يقول...

زيانور

ايه الطلبات دي

ههههههههههههههههه

بصي هو انا مش باعمل فطير فى البيت لانه محتاج نار حاميه

يعنى جربته مره فى البيت زمان وطلع ناشف اوي وسالت طنط ام سماح الى بتعملنا الفطير هههههههههههههه

فقالت النار كانت هاديه عليه

بس انا هاقولك طريقته جااااااايز ينفع معاكي

هو سهل جدا

انتى بتعملي عجينه عاديه من المايه والدقيق فقط
وممكن تعجنيه بلبن برضه ما يقولش لا

ومن غير خميره
وتسبيه يرتاح نص ساعه قبل الشغل

وبعدين على ترابيزه واسعه بقى وترشي دقيقى وتبدأي تفردي

طبعا زمان كانوا بيبططوا باديهم

حاليا النشابه اسهل بكتير

افرديه بالنشابه بس دايما تحطي دقيق تحته وفوقه

عشان لا يلزق فى الترابيزه ولا يلزق فى النشابه
بس برضع خفيف خفيف عشان العجينه ما تنشفش منك

وطبعا تحافظي انك ما تقطعيش العجين وتفضلي ترقيه بالنشابه وتشديه يمينا ويسارا لحد لما يبقى رقيق جدا شفاف
وبعد كده تججيبى سمنه او زبده سايحه وترشيها على العجين المفرود ده

وبعدين تبدأي تطبقيها على بعضها ومع كل تطبيقها ترشي سمن تاني
وهكذااااا

لحد لما تبقى كلها على بعضها تشيلها فى صنيه وباديك وبالراااااااحه خالص وبرضه تكوني راشه سمنه على الوش وتبططيها لحد ما يبقى سمكها سم او سم ونص كده

وتسبيها ترتاح شويه وبعدين تدخليها الفرن على نار حاميه يادوب تحمر من بره

طبعا انتى عشان اول مره تعمليه جربي فى حته عجين صغيره
اتعودي تعملي تجارب صغيره كده على ما تمشي معاكي

يعنى اعجني كوبايتين دقيق وجربي فيهم قبل ما تصيحيى للجيران وتفضحينا
هههههههههههههههههه

وعموما الشتا جاي وانا باحب اعمل عجاين فى الشتا اوي هاحاول اعملكم فطير واصوره عووونيه

يلا انا عايزه علم مصر يرفرف عاليا

صبرني يارب يقول...

احساس طفله

يعنى من يومهم بتاكليهم عدس مغروف وتضحكي عليهم
ههههههههههههههههههههه

ما تقوليش عدس مغروف يعنى ايه هابقى اعملهولكم مره ان شاء الله

وبعدين طلع تقيل معاكي حطي مايه يا لينا

املي الاوضه مايه تبقى شوربه يا لينا
ههههههههههههههههه

جربي بقى وقوليلي

Zianour يقول...

صبرني مش عارفة اشكرك ازاي والله

انا هادعيلك بقى بالبركة والستر والصحة انتي واسرتك الجميلة
ربنا يجعله في ميزان حسناتك

وشكرا لانقاذ سمعة مصر بجد يعني

ودام بلوجك عامرا بالاكلات الشهية

تحياتي

بنت مصر يقول...

اولا وحشتوني جداااااااااا

دايما كده مجوعانا بأكلاتك الجميلة

تسلم الأيادي

صبرني يارب يقول...

زيانور

العفو يا جميل اي خدمه احنا تحت امرك

سمعة مصر امانه فى رقابتك دلوقتي

صبرني يارب يقول...

بنت مصر

انت فين يا جميل مختفيه ليه

والله جيتى على بالي بس تصوري ما عرفتش اوصل لبلوجك

هافتكر دلوقتي احطه على الريدر عندي ان شاء الله

نورتي

شلاطة يقول...

انا عاوز اسال واعرف
فين البصله اللي بتتحمر في الاول

دي اللي بتديله الطعم الجميل
ولا ممكن كده وممكن كده؟

صبرني يارب يقول...

لا يا شلاطه الكشري ده انا مش باحمرله بصله

احنا بنعمله كده

جربه بس انت