الأحد، 15 أغسطس، 2010

بطه محشية



 كان نفسي انزل كل يوم صنف بس مش قادره يا جماعه والله رمضان السنه دي مرهق جدااااا

حاسه ان انا فى صراع مع الزمن بالاضافه لان الواحد حاسس انه هايجيله جفاف من العطش والحر والميه الى بتنزل من الواحد فى المطبخ الى بافكر الغيه من الشقه على ما رمضان يخلص
ربنا يجعله فى ميزان حسناتنا جميعا يارب

المهم انا قررت النهارده ادلعكم بقى اخر دلع واعملكم بطه ايوه والله هى بشحمها ولحمها

بس بما انكم فقريين البطه دي صغيره وكمان مش بلدي  دى بطه بيضا   اه هى جت كده بقى ما تتامروش

يلا قدامي على المطبخ

الحقيقه البط الابيض ده بالذات ما ينفعش يتعمل عادي مسلوق فى الشوربه حيث انه سمين وريحة شوربته تطفش بلد معلش اصل انا يا اخواتي مش واخده عليه

هانجيب البطه وطبعا نغسلها بالملح والدقيق وننضفها تمام التمام  وبعدين هانتبلها طبعا ليكم تعملوا اي تتبيله تحبوها

انا هنا فى الصوره دي عملت التتبيله عباره عن ربع كوباية خل وبصله وكوباية زبادي أو لبن رايب  وعصير لمونتين ومعلقتين كاري   وملح وفلفل طبعا وانا باحب اضرب كله مع بعضه فى الخلاط وممكن ازود شويه مايه عشان تبقى سايله اكتر



وليكى طبعا تعمليها باي شكل واي تتبيله تحبيها هاتجيبى التتبيله بقى وتدلكى بيها البطها من بره ومن جوه وتسبيها في التتبيله  اربع خمس ساعات حبذا لو من على بيات  

بعد كده نعمل الحشو بقى  انا هنا حاشياها رز  وممكن طبعا تحشيها فريك او لسان العصفور او اي حاجه ايا يكن انا باحب اسوي الحشو الاول عشان ما يبقاش ني جواها لانى مش هاغمرها فى المايه هاتشوفوا دلوقتي

انا باحمر بصله واحط لحمه مفرومه او كبد وقوانص  او مش مهم خالص وبعدين احط التوابل برضه انا هنا حاطه كاري  عشان تبقى نفس الطعم
ولما تستوى الكبد والقوانص والبصله معاهم وتبدأ ميتها تنشف بازوزها مايه خفيفه

وباحط مايه للرز قليله شويه عن العادي عشان ما يبقاش معجن  باسقط الرز فوق الخلطه زي الصوره كده  وطبعا لما يستوي باطفي عليه واسيبه يبرد وبعدين احشي البطه
زي كده

بعدين نقفلها زي الصوره كده بخلة  او ممكن تخيطيها كمان مافيش مشكله  بس الخله اسهل اكتر من خله ممكن لحد ما تقفلي على الرز كويس

وحظكم الفقري برضه البطه دي لقيت رجليها الاثنين مكسورين حاجه مش ممكن انتم على فكره

المهم بعد كده  بقى نروح نسخن معلقة سمنه فى طاسه كبيره او صنيه  ولما تسخن كويس نحط البطه بعد ما نكون شيلنااي رز او بصل عليها من بره( بس ما ترميش التتبيله عايزاها انا )

نحمر البطه من كل اتجاه على اد ما نقدر عشان ده بيخلي جلدها يشد وما يتقطعش فى السوى  زي الصوره دي ..

بس ناخد بالنا لو بتعملوا بطه بيضا جلدها بيبقى ضعيف جدا وفعلا بيتقطع بسرعه واحنا محتاجين الجلد عشان شكل البطه يبقى حلو وكمان عشان تحمي اللحم ما ينشفش فى الفرن

اه هانحطها فى الفرن طبعا

المهم بعد التحمير  هايبقى شكلها كده

 هايبقى قدامنا حلين
يا اما هانحط عليها التتبيله تاني ونحطها فى صنيه ونغطي الصنيه بالفويل وندخلها الفرن ولو كانت بطه بيضا هتاخد ساعتين فى الفرن  تقريبا ساعه وهى متغطيه وساعها وهى مش متغطيه

ولو بطه بلدي اقل حاجه 3 ساعات حسب عمرها بقى ايوه ابقوا سننونها قبل الطبيخ هههههههههههههههههه


والحل التاني يا بهوات  تعملوا زيي كده



البطه والتتبيله فى الحله البرستو وتقفلوا عليها نص ساعه لو بطه بيضا وساعه لو بطه بلدي  ... وطبعا لو مافيش حله برستوا عادي بتحطيها فى حله عاديه على النار بس تزودي التتبيله كوبايتين مايه كل شويه بس ما تغمريهاش مايه عشان الرز الى جواها ما يعجنش  وطبعا هتاخد البطه البيضا حوالي ساعه  وشويه ونكمل سويها فى الفرن بقى


وبعدين تطلعوها بقى على الفرن مش هتاخد كتير ساعه بالكتير اوي 

 عشان بس تاخد لون نعمل ايييييييييه بقى

التتبيله الى كانت معانا دي ناخدها وعليها  معلقة صلصة و معلقة سكر .. ايوه ايوه

وده الى بيخليها لونها احمر ومقرمشه من بره زي الصوره الى فوق دي الى مش بتاعتي اصلا
ايووووه
 الصوره الى فوق دي  مش من عندي انا جايباها من على النت
عشان البطه الى انا سويتها عندي ما لحقتش اصورها والله اتاكلت بسرعه
ههههههههههههههههه
كنا اول  يوم رمضان وانا كنت خلاص على المغرب فى النزع الاخير وعلى استعدت وعيي بعد العصير كانوا الشعب قام بالواجب بقى
بس انا والله اخترت الصوره الاقرب للحقيقه يعنى
بتبقى طالعه كده فعلا والله

المهم نرجع للشغل يا رغايين مش معقول كده

وبعدين ناخد التتبيله دي او حتى لو شوية شوربه ونفضل كل عشر دقايق نطلع البطه نرش عليها من الخلطه دي شويه وندخلها الفرن تاني
لحد لما تحمر وتاخد اللون المطلوب

وطبعا البطه هاتكون استوت وبقت تمام  التمام

وبالهنا والشفا  محتاجه حلة محشي الصراحه وتبقى فى التمام 

اه نسيت اقولكم ينفع تتبعوا نفس الطريقه مع الديك الرومي
او حتى فرخه عاديه

والى يجرب يقولي وبلاش نداله
كل سنه وانتم طيبين يا حلوين




هناك 10 تعليقات:

واحدة مفروسة يقول...

ممممممممممممممم
حنشوف
انا حجرب فى كتكوت الاول
علشان لو باظ مش ازعل عليه اوي
البطة ولا الفرخة ولا الديك
بقوا من الثروات اللى ما ينفعشي نبددها
هههههههههههههههه
ولا نتعلم فيها
و ده لغلوهم طبعا
ههههههههههههههه
كل سنة و انتى بالف خير و سعادة

ندى الياسمين يقول...

مفروسه حيااااتي

ربنا يخليكى يا قمر يا باشا ابعتلك انا البطه جربي براحتك واكلهالك لو مش عجبتك عادي
ههههههههههههههههههههههه

كل سنه وانتى بخير وسلام يا قمره

منوووووووووره

ستيتة حسب الله الحمش يقول...

يا مساء العثل والياثمين :)

انتي عملتيها اول يوم انا كنت في معركة البط امبارح
بس يا اوختشي تضيعي صحتك على بط ابيض والله حرام:)
الا يا نونو ابيض ازاي يعني
شوفي دورتها شمال جبتها يمين معرفش انا غير ان الوز ابيض
كيف كانت البطة بيضاء؟ هل باباها وز ومامتها بطة؟ :)

المهم يا ابلتي انا عملتها بالرز بالخلطة وعلشان كده لازم اشوف الكاري تأثيره ايه
ها اشيل الخلطة حتى بط قادم واقول لك انهي اللي اتنسفت اسرع :)

تسلم ايدك
ايوه كده اعملي حركة لحسن المدونة كانت قربت تفصل شحن
بوسة

ندى الياسمين يقول...

ستيته

حياتي انا عملت بط مرتين والله فى رمضان ده والمرتين ما لحقتش اصور النهايه تخيلي
يلا البطات الجيات اكتر

وبط ابيض يا ستيته يا اختي بط بكينى لونه ابيض
الحقيقه مالوش اي لازمه امي الى جابته مش عارفه ايه ده يا ختي بط صايص ومايص شبه شوباب اليومين دول كده
ههههههههههه

مش بط بقى سوداني بلدي اصيل من الى الاسود الى وشه احمر ويمشي يتدلع كده يمينا ويسارا

لا ابسلوتلي ده شكله ما بيمشيش خالص يا ستيتيه يا اختي هههههههههههههه

انما باباها وز ومامتها بطه ابسلوتلي نوت هانخلط فى الانساب بقى

وايوه زقوني والنبى اصل كنت زعلانه على المدونه دي اوي

أحــوال الهـوي يقول...
أزال المؤلف هذا التعليق.
أحــوال الهـوي يقول...

تسلم الايادي و الله دايما بتتحفينا بالجميل و المفيد واللذيذ


بس واضح الصيام عليكي جدا من اول الوصفه و حضرتك بتزعي فيه زي ما اكون مش فاهم و الا بالحس في الخلطه

لان الخلطه اللي انتي عاملاها تتاكل نيه
انا عمري ما حمرت البطه قبل التسويه و عرفت المعلومه المفيده بشد الجلد و عملية التجميل السريعه

المهم جاري البحث عن بطة بلدي هنا لاني فعلا موافق علي ريحة الشوربهده

سوف نفيدكم بالنتائج
و ان شاء الله مش هتزعقيلي تاني

كل سنه و انتي طيبه

تحياتي

ندى الياسمين يقول...

احوال الهوى

وربنا ما زعقت
ههههههههههههههههههههههههه

يا باشا نبعتلك بطه بلدي مكتفه ومعموله كمان فى الدي اتش ال قول انت بس
ههههههههه
نورت وكل سنه وانت بالف خير وسلام

souhad يقول...

السلام عليكم ورحمة الله
ماشاء الله مدونة حلوة زي صاحبتها
بالتوفيق
وشكرا حبيبتي ندى الياسمين على الوصفة اللذيذة وعلى فكرة انا في الوقت الحالي مخلياها على النار وطريقتي مختلفة على طريقتك بس ما شفتش وصفتك في الاول يا خسارة لان طريقتك في عمل البط كتير حلوة وباين عليها كثير للذيذة امممممممم يسلمو اديك
تقبلي تحياتي
اختك سهاد

مرايتى يقول...

شكراً على المدونة و الوصفات
تابعونا لتتعلموا معنا طبخات اخرى مميزة .

من كل بلد اكلة

نصائح لمطبخ صحى

غير معرف يقول...

روعه تسلم ايدك