الأربعاء، 11 أغسطس، 2010

جلاش مثلثات بالكاستر



معلش ما لحقتش النهارده اعملكم طبخه جامده

فقلت الحق اكلكم  حلويات بقى

الحقيقه الجلاش ده انا باحبه اوي اوي وكان نفسي اعمله النهارده
والطبق الى فوق ده شكله جوعني

بس ما حدش عبرني ولا جابلي جلاش

يلا بسرعه نشتغل عشان مش فاضيالكم الاكل على النار

اولا هانحتاج قولوا نص كيلوا جلاش

كوباتين كاستر او كريم باتسيير
كوباية سمن   او زبده

وكوباية شربات لونها وسط مش تقيله اوي ومش خفيفه وبارده


هانجيب الجلاش يا حلوين هو بيبقى مربع هانقطعه شرايط بالطول قول على ثلاثه او اربعه حسب حجم الورقه بتاعتك

وبعدين هناخد شويه الى هانشتغل بيهم والباقي نغطيه كويس بفوطه نضيفه او جوه كيس بلاستيك عشان ما ينشفش احنا فى الحر

 وهناخد 3 طبقات من الشرياط دي وهانفردها على صنيه زي الصوره دي كده ونحط معلقة من الكاستر او الكرييم باتسيير كده فى اول الشريطه فوق كده




وبعدين نطويها للجنب
 زي كده


ونفضل بقى ونكون بفرشاه دهنا باقي الشريط ده سمنه

ونقعد بقى نطويها على بعضها زي طريقة السمبوسك كده لحد ما يبقى شكله مثلث

زي كده


بعد كده هانشيلها نحطه فى صنيه مدهونه سمنه برضه

ولما نخلص الكميه نحط برضه على وشها سمنه من فوق

يعنى معلقه على كل مثلث تقريبا

وبس وندخله الفرن وبيطلع شكله كده

هانسقيه وهو سخن بالشربات البارد ونسيبه حوالي عشر دقايق بس يبرد شويه ويشرب الشربات

وبعد كده نقدمه فى طبق زي الي فوق ده وبالهنا والشفا

وكل سنه وانتم طيبين يا حلوين

هناك 10 تعليقات:

ELMOSTAFZ يقول...

هوا في صور كمان ؟ احنا متفقناش علي كده :)
تصدقي من زمان كنت هموت و اعرف بيعملوا المثلثات دي ازاي ، انا امي و اخواتي بيعملوها طبقات فوق بعض و بينهم كاستر و خلاص...
بس كويس انك فهمتيني ايه كريم البشكير ده ، احسن اسمه مريب :)

أحــوال الهـوي يقول...

كل سنه و انتي و اسرتك بخير و سعاده

شكرا علي الصور الجميله لصنف جلاشي جميل

لان الصور هي اللي باقيالي

ربنا لايمتعك بالصحه و العافيه\

تحياتي

فاتيما يقول...

تسلم ايدك يا صبصب

امى بتعمله بالمكسرات و فقط
اقوله عاوزينه بالكسترد
تقولى اعمليه انتى

اكسل انا
فميتعملشى

انما دا طلع سهل خالص

اجربه و اقولك ان شاء الله

رمضان كريم يا حبيبتى

و دايما كدا مدلعانا

ندى الياسمين يقول...

المستفز

اها فى صور طبعا امال ايه احنا لنا بركه الا انتم يعنى

وضحكت ضحك على الكريم البشكير ده يا سيدى نوع كريم زي الكاستر كده

لو عملت كليك على الاسم هايطلعلك الطريقه وبالصور برضه
هههههههههه
وبعدين هات حد من اخواتك يشوف الطريقه ويعملولك

ندى الياسمين يقول...

احوال الهوى

كل سنه وانت طيب وبخير وسلام

بس والنبى انت غلط غلطه مطبعيه مريعه
هههههههههه

حطيت لا قبل الدعاء والنبى ارجع فى كلامك

هههههههههه

ويا باشا هابعتلك صنيتين جلاش من عنيه ولا يهمك قول انت بس

ندى الياسمين يقول...

فاتيما يا كسلانه
ههههههههههههههه

لا يلا بقى اعمليه ده سهل اوي والله وبعدين اليوم بقى طويييييييييل اهو تسالي بقى

كل سنه وانتى طيبه يا قمر

richardCatheart يقول...

احييييييييييييييه جنان يابت يا ندى

هافضى كده وافطر فى البيت ان شاء الله وهاضربلهم منه

كل سنه وانت بالف خير انت وعيالك وجوزك

ندى الياسمين يقول...

قلب القطه

يا حبيبتى وحشااااااني مووووت

يلا بسرعه اعمليه كده وقوليلى الاخبار

وكل سنه وانتى طيبه يا قمر

Wanda يقول...

ايوه كده الواحد يعيد على دردر بنفس
تعرفى و الله احاول اجربه بكرة او بعده

كل سنة و انت ماكلنا يا دردر:-))

ندى الياسمين يقول...

وندتى ازييييييييييييك

وحشاااااني
وجربي يلا وقوليلي