الجمعة، 15 مايو، 2009

تنظيم الفريزر والثلاجه




النهارده يا حلوين


هانتكلم عن تنظيم فريزر ا لتلاجه


والتنظيم ده موضوع سهل اوي وله فوايد كتير جدا


اولا : تقدري توصلي للحاجه بسهوله


ثانيا : الفريزر بياخد اكتر بكتيييييييير جدا


ثالثا : ما فيش حاجه تتركن لما تبوظ او تبقى منتهية الصلاحيه او تقدم اوي وتبقى مش صحيه


الترتيب بقى ازاي


شايفيين الصوره دي ؟؟




شوفي الاكياس معموله ازاي ؟؟


بتحطي الحاجه فى الكيس تكون لحد نص الكيس بس وبعدين تطبقي الكيس تطويه للجنب كده على مرتين وترصي الحاجه فوق بعضها كده


شايفين الصوره شكلها ازاي


دي اكياس خضار انا الى مجهزاهم فى البيت بسله وجزر وقلقاس


والصف التاني طعميه والىجنبها سبانخ


ان شاء الله هانعمل بوست عن تجهيز الخضار للحفظ فى الفريزر


شوفوا كمان الصوره دي

طبعا الفريزر بيبقى رفين فانا باعمل رف للحاجات الى بتبقى مفركشه شويه او اكياسها كبيره

زي مثلا الفراخ البط ايام ما كان فى بط يا ابو زيد دلوقتي خلاص راح

زي الصوره كده فى اكياس عيش والاصفر ده كيس كنافه بس برضه الواحد يفضل يعمل تباديل وتوافيق كده على اد ما يقدر الحاجه تترص تاخد اقل مكان ممكن

واكياس اللحمه برضه باعملها بنفس الطريقه الاكياس المبططه دي

وده كمان بيخليها لما تيجى تفككيها اسهل بكتير

كمان فى حاجه مهم

شايفين التلاجه فى الرف الى فوق فى فتحتات التبريد حاولي بقدر الامكان ما تقفليهاش باكياس طريه علشان التجميد فى الفريزر يفضل كويس

يعني من الاخر نبطل نربط الكيس ونزقله فى اي ركن فى التلاجه

انا مش باربط الا الاكياس الى بتكون سايله اوي

لبن مثلا صلصه طماطم كده يعنى

وبرضه باملا نص الكيس واقل وافرغ الكيس من الهوا واربطه من فوق خالص واحطه على مكان مسطح فى الفريزر عشان برضه يبقى مبطط ومفرود ما يعمليش ازمه

لوفى حاجات بقى رفيعه او ازايز او برطمانات بلاستك صغيره

باحطها فى باب الفريزر

ده بالنسبه للفريزر

بالنسبه للثلاجه نفسها بقى

دايما دايما ما تحطيش حاجه مكشوفه لانها اولا هاتنشف وتبوظ وثانيا لو لها ريحه هاتخليلك ريحة التلاجه مش تمام

وممكن تغير ريحة الاكل الى في التلاجه

على طول علب لها غطا او حطي الطب نفسه داخل كيس

والفاكهه الى لها ريحه برضه حطيها فى كيس زي الجوافه والموز

وفى حاجه كمان حلوه اوي ممكن تعمليها انك تجيبى قطعة فحم

فحم ايوه من الى بنولع فيه ده وتلفيها فى منديل ورق خفيف عشان بس ما تنزلش اسود فى التلاجه وتحطيها كده فى ركن في التلاجه دي بتمتص الروايح وممتازه فعلا

بس كده يا جودعان

اي خدمه يا بنات المتبدئين

الى عنده اي ملاحظات يقول كده ويفكرني لو نسيت حاجه

هناك 10 تعليقات:

نكهة مغربية يقول...

تسلمي على الموضوع يا عسل و الله أفكار حلوة
بس قلولي ان الموضوع اللي جاي رهيب مش كده؟؟؟؟؟؟؟؟؟
ههههههههههههه
نهارك سعيد يا قمر

صبرني يارب يقول...

نكهه

والله لاجل عيونك يا قمر قلت ما دام اوان الكرنب فى المغرب ننزل الكرنب
هههههههههههههههههه

نورتي يا قمر

نكهة مغربية يقول...

أوووكككككييييي يا جميل
ربنا يخليكي يا قمر و الله انت تحفة
ممممممووووووووووححححح

ELMASRYA - SHAMLOOLA HANEM يقول...

ماشاء الله لا قوة إلا بالله

برافو عليكي يا صوصو

ربنا يحميكي إنتي ست بيت ممتازة وتلاجتك منظمة ونضيفة وجميلة

معلومة تبطيط أكياس اللحمة لسهوة فكها عجبتني

وموضوع الإبتعاد عن فتحات التهوية كمان

وإننا مانملاش الكيس غير للنص

شطورة يا صوصو وفي انتظار الملفوف بس يبقى سخن لو سمحتي ولو ممكن تحمريه بعد الطبخ علشان نعرف نتخم كويس

أحبك في الله

صبرني يارب يقول...

شملوله

الله يكرمك يارب

انا سعيده انى افدتك فعلا

اه يا اختي باحبه كده اوي بس كان زماااااااان

دلوقتي باكل محشي دايت

ايوووووه ما تستغربوش هانعمله سوا

صبرني يارب يقول...

نكهه مغربيه

عشره اموووووووووووووح

عاشقه الرومانسيه يقول...

حلوه فكره الفحم دى واول مره اعرفها
تسلم ايدك
مش عايزين حد يااجر ثلاجتكم قانون جديد او حتى مفروش انا موافقه
(;

صبرني يارب يقول...

عاشقة الرومانسيه

حتى التلاجه طمعانه فيها

طب خديلك كيس طعميه من الى الفريزر ده واقعدي ساكته

هههههههههههههههههه

نورتي

roshyandhany يقول...

ماشاء الله عليكى بصراحة تسلم ايدك وربنا يحفظك ويخليكى لزوجك واولادك

معبسال عن حاجة تضيع الريحة اللى فى الفريزر لانى بجد غلبت فيه بحس بريحة غريبة كدة مع انى والله بنظف الفريزر وافضيه خالص وانظفه بماء وصابون وكلور عشان يعقمة وانشفة وبيبقى حلو بس بعد التخزين لما بحط الحاجة بلاقى ريحته مش ظريفة وده بصراحة مش مشجعنى انى افرز حاجات كتير

لكن انا دلوقتى حامل ومحتاجة الفريزر اوى عشان لما اولد اكون مجهزة شوية حاجات زى الطاطم والتوم والبصل الفلافل والخضار

معلش طولت عليكى بس بالله عليكى افيدينى

صبرني يارب يقول...

روشي معلش ما شوفتش التعليق بتاعك الا دلوقتي

بصي يا جميل

فى حاجه كده انا باشتريها من عند بتوع الادوات المنزليه او بتوع المنظفات

كيسه كده جواها حبيبات بتتحط في التلاجه

وفى كمان تحطي حتة فحم

انما فى حاجات لا اخفي عليكى ما بياثرش معاها الكلام ده

زي التوم مثلا

عشان كده انا ما باخزنش ابداتوم مفروم


ودايما لما تحطي حاجه فى الفريزر اقفليها كويس عشان ما تسربش روائح

واسفه خالص ما شوفتش تعليقك الا دلوقتي


وربنا يقومك بالسلامه
انا كنت باقعد قبل الولاده اخزن حاجات متجهزه يجي شهرين

الله يعينك