الجمعة، 22 مايو، 2009

عجينة الباف باستري (المورقه)

عجينة البف باستري
دى يا جودعان مهمه جدا فى عالم المخبوزات
بنعمل منها مليون حاجه
هى يمكن تكون متعبه شويه بس والله لو بتعملي كميه مش كبيره مش هاتبقى مشكله اوي يعنى
انا عن نفسي جربتها بتاع خماشر مره على ما وصلت للنتيجه دي
هههههههههههههههههههههههه
يلا بقى نشتغل عشان مش فاضيالكم
الحقيقه انا قريت مره انه بيتعمل من غير خميره بس انا جربته من غير خميره كانت ناشفه اوي لما خبزتها مش عارفه بقى دا رجع لان الفرن كان بارد شويه ولا لا بس خلينا نقول ان الى من غير خميره تحت الدراسه لسه
الى انا عملتها وطلعت ميه ميه الى هى بخميره
اولا هانتحتاج مقدار من عجينة ا لمخبوزات
احنا عملناها مع بعض قبل كده روحوا شوفوها
ادي العجينه اهي جاهزه
هانرش تحتها دقيف خفيف وفوقها
وبندأ فرد بالمنشبه
بعد ما فردناها خلاص زي ما انتم شايفين ودايما نتاكد ان تحتها دقيق خفيف عشان ما تلزقش مننا ولا تتقطع وطبعا كل ما تلزق فى المنشبه كمان نبل ايدنا دقيق ونحط على العجين برضه عشان ما تلزقش فى النشابه ما تقلقوش من الدقيق خالص
بعد كده هانجيب الزبده حوالي 200 جرام زبده
وهانكون مجمدنهم فى التلاجه مش فى الفريزر
ونبشرهم على وش العجين المفرود زي الصوره دي بالظبط
طبعا مش بنعمل الزبده كلها لا حاجه بسيطه كده على اد ما نقدر
وبعدين نطبقها على بعضها كده من الجانبين
وبعدين نرجع تاني نطبق الطرفين فوق وتحت زي الصوره دي كده


ونسيبها ترتاح عشر دقايق فى التلاجه خصوصا لو كنا فى الصيف .

وبعدين نرجع نرش دقيق تااااااااااان ونفردها تاااااااااااااااني ونبشر زبده تاااااااااني




ونطبقها تااااااااااااااااااااني




ونكرر الحكايه دي بتاع 3 اربع مرات كده على اد ما نقدر يعنى ومابين كل مره والتانيه نسيب العجينه ترتاح 10 دقايق فى التلاجه

وبعدين لما نخلص خالص نفردها بقى زي كده ونقطعها ونشكلها زي ما نحب ونعمل بها الى هانعمله و بعد ما نقطعها ونرصها فى الصواني نسيبها تخمر شويه وبعدين نخبزها



انا جربت العجينه دي فى الباتيه والكرواسون والبغاشه
لو جربتها فى حاجه تانيه هاقولكم
وان شاء الله المره الجايه هانعمل منها البغاشه
وشملوله فكرتني بحكاية حفظها
ايوه احنا ممكن طبعا نعملها ونقسمها مثلا مربعات او مستطيلات ونحطها فوق بعضها ومابينهم شرائح بلاستيك وطبعا ده ياريت يكون على طبع مسطح بلاستيك عشان ما تطلعش معوجه وينفع يتحط فى الفريزر معاها لحد ما تجمد ممكن نشيل الطبق من تحتها
لو بصيتوا فى الصوره الى فى بوست التلاجه عندي البوست الى قبل الى فات
هاتلاقوا فى صوره فيهم فيها عجينة بف باستري معموله كده فعلا فى الجنب على الشمال
شكرا يا شملوله كنت ناسيه اقول الحته دي
يلا نشووووووووفكم على خير
قلولي رايكم






هناك 12 تعليقًا:

مى يقول...

تسلم ايديك يا جميلة انا بعملها وبتطلع جميلة بعمل الكرواسون والباتيه المحشى وممكن الحشوة جبن قريش بالزيتون او البسطرمة ولو حلو ممكن كاستر او شيكولاتة
وهستنى منك البغاشة

ELMASRYA - SHAMLOOLA HANEM يقول...

ماشاء الله لا قوة إلا بالله

إحتراف يا صوصو

روعه بس عايزة واحده غاوية مطبخ علشان تعمل الحاجات الروعة دي

طيب ينفع نعمل كمية كبيرة ونشيلها في الديب فريزر ؟

ولو كده هنشيلها ازاي ؟

نحط بين كل طبقة والتانية ورقة بلاستيك ولا إيه ؟

أفيدونا

kochia يقول...

هجربها ان شاء الله
شكلها كويس

صبرني يارب يقول...

مي

تمام انا باعمل فعلا كده برضه

ومن عنيه البغاشه يا بغاشه

صبرني يارب يقول...

ِشملوله

ايوه يا جميل طبعا ينفع

انا نسيت اكتب دي

انا باعملها فعلا وافردها واقطع مربعات مثلا واحط بينها طبقات بلاستيك زي العجينه الي بنشتريها يعنى

بصي عندك كده فى بوست ترتيب التلاجه
هاتلاقي فى الجنب كده فى صوره فيها عجينه بف باستري محطوطه بنفس الطريقه

تحياتي يا قمر

نكهة مغربية يقول...

يااااااااااااااااا جااااااااامممممممممدددد انت تحفة في عالم الطبخ الجميل
تسلمي يا قمر أنا بحب العجين ده أوي للمالح و للحلو و بيتحشي أصناف كتتتتتتيييييييييررررررررر

تسلمي يا جامدة

صبرني يارب يقول...

نكهه مغربيه

انت الى جامد يا باشا

ده انتى عامله منها عندك اصناف جمييييله باموت انا فيها

جيالك يا باشا بس الجهاز عندي محتل معلش النهارده الجمعه


امووووووووه

صبرني يارب يقول...

كوشيا

ماشي يلا جربي وقوليلى

نكهة مغربية يقول...

هههههههههههه
معلش سبيهم على خطرهم المهم اشوفك بق عندي
مووووووووووحح

صبرني يارب يقول...

نكهه

جيااااالك يا جميل

خمسة فضفضة يقول...

السلام عليكم ورحمة الله وبركاته

صبصب تسلم الايادي
شوفي يا اوختشي انا باعمل كل حاجه واي حاجه في البيت ولحد عجينة الباف باتحول لفريق الستات الشلت ههههههههههه عارف الراجل الاخضر لما يتحول اهو انا ده هههههههههههه

خلقي ضيق جدا جدا وماباصبرش استني اربع مرات بين كل مره ومره وفرد وتطبيق والكلام ده ولانها كمان ماكانتش كل مره بتظبط معايا والتعب يروح علي الفاضي فابشتريها جاهزه وخلاص

بس هاقولك علي حاجه من ضمن الحاجات اللي قريتها خلال ابحاثي في موضوع الباف باستري ده :

المفروض لما نفرد العجينه بين كل مره ومره يبقي الفرد في نفس الاتجاه بمعني اننا هانعلم علامه في الاتجاه اللي فردنا منه بصابعنا عشان في تاني مره نفرده من نفس الحته
هاتقوليلي ليه
اقولك يا ستي :
لان كده بيبقي توزيع الزبده بنفس النظام ومش بتتشتت بين الطبقات وبالتالي لما تيجي تسويها والزيده تسيح بين الطبقات تطلع مورقه كده زي الجاهزه بالظبط

الكلام ده قريته في موقع اجنبي هذا والله اعلي واعلم

خدي الفيديو ده حلو يمكن ينفعك في تجاربك مع العجينة اللي من غير خميره

http://vids.myspace.com/index.cfm?fuseaction=vids.individual&videoid=2752916

صبرني يارب يقول...

فضفضه

اه انا قريت الموضوع ده برضه بس ما باعملوش
ههههههههههههههههههه

بس هاجرب بقى

وهاشوف ا للنك يا باشا