الأحد، 3 مايو، 2009

جبن ابيض طازه


السلااااااااام عليكم


مطبخيينا الاعزاء


انتم عارفين انا باحب منتجات الالبان اد ايه وباحب اوي اعملها فى البيت اقد ما اقدر


ده لان الحاجات الجاهزه ما بتكونش طبيعيه ميه فى الميه

ولان الضمير والحمد لله فى ازمه

بقى فى بلاوي فيها


النهارده هانعمل جبنه بيضاء طازه


جميله اوي وسهله اوي

والعيال والكبار بيحبوها جدا


قبل ما نبدأ شغل عايزه اتكلم معاكم عن المنفحه


المنفحه دي المفروض انها بتكون سائله بيعملوها من الاثنى عشر بتاعة البقر والجاموس

وهى المسؤله عن عملية التخثر (الى هى تحويل اللبن الى جبنه )


اكتشفوها ازاي ؟؟

يقال ان الانسان البدائي بالصدفه اضطر الى حفظ اللبن فى معدة حيوان دبحه فلقى اللبن بقى جبنه


أنا باستعمل المنفحه الطبيعيه السائله ودي موجوده عن بتوع الالبان والاجبان

اعرف ان فى منفحه بودر جافه لكن ما شوفتهاش وما استعملتهاش وما اعرفش ان كانت طبيعيه مجففه ولا ايه الموضوع


لكن قريت انها بتنفع بس ما بتكونش فى نفس الجوده بتاعة المنفحه الطبيعيه


المنفحه السائله المفروض ان المحل الى بيدهالك بيبعها مخففه بمايه بنسبه معينه بحيث كيلو الحليب بياخد من المحلول بتاع المنفحه معلقه واحده

طبعا ممكن يغشوكوا ويخففوها اوي فنعمل حسابنا لو لقينا الجبنه ما بتربطش نبقى نزود المنفحه شويه


المنفحه السائله دي ممكن تقعد شهر فى التلاجه العاديه ولكن حطيها فى برطمان محكم وكمان يكون مكان ضلمه طبيعى التلاجه بتبقى ضلمه لكن ممكن كمان تحجيها فى كيسه سوداء.



يلا على الشغل بسرعه عشان مش فاضيالكم باعمل مسقعه
المقادير


2 كيلو حليب طازه بقري او جموس مش مشكله

2 معلقه كبيره ملح ( لو كنا بنحبها ملح خفيف ونزود بقى لو حبينا )

2 ملعقه منفحه سائله


بس كده


الطريقه


الاول هانجيب الحليب مش هانغليه (لو عملتوا فالحين وقلتوا نغليه عشان الميكروبات مش هايبقى جبنه بيضا ابدا ) هايطلع زي الجبنه القريش شويه


هانحط الحليب على النار يدفى بس يبقى زي درجة حرارة ايدك كده


وبعدين نرفعه من على النار


الافضل انكم تصبوه فى وعاء بلاستيك لان الالمونيا والاواني المعدنيه ممكن تتفاعل مع الحاجات وتاثر على جودة الجبنه


المهم هانغطيها ونسيبها فى مكان دافيء نسبيا يعنى لو كان الجو برد اوي نبقى ندفي لها الفرن شويه


انما لو الدنيا صيف سبيها بره عادي


بالكتير ساعتين وهاتكون ربطت وبقت تمام التمام وجايز قبل كده فى الصيف


المهم هاتربط تبقى عامله زي الزبادي كده



هانجيب السكينه ونقطعها مربعات زي الصوره دي كده




ونسيبها نص ساعه تقريبا هانلاقيها سردت مايه كده

( هنا ممكن بقى نعملها بنكهات مختلفه هاقولكم فى اخر البوست )


نجيب بقى حتى قماش شاش ( او اي قماشه رقيقه شويه ممكن شيفون خفيف او تل )

وبعدين نفردها على مصفاه ونحط تحت المصفاه حله ونصب فيها الجبنه زي الصوره دي كده





بعد كده هانقفل الشاشه دي نلفها حوالين الجبنه وبعدين نحط فوقها حاجه تقيله شويه زي الطاجن ده مثلا الى فى الصوره

او اي حاجه مش مشكله

وهانسيبها كده حوالي ساعتين





هاينزل مايه كتير فى الحله الى تحت المصفاه ده اسمه مصل اللبن المصانع بيعملوا منه حاجات كتير اوي بس انا بصراحه مش باعرف اعمله منه حاجات كتير لو عرفت حاجه هاقولكم


لكن باديه لاي حد عنده مش يزود به المش


وساعات اعجن به بسكوت مملح لانه بيكون فيه ملح اصلا عشان انا باستحرم ارميه



نبص على الجبنه لو لقيناها لسه طريه اوي ومش عامله خرط ز ي الصوره الي فوق دي


نقطعها اربع او ست اجزاء ونلفها تاني ونحط فوقها حاجه تقيله ونسيبها كما نص ساعه


بعد كده نشوفها ونقطعها لو كانت لحمت فى بعضها تاني

ونحفظها بقى فى علبه فى التلاجه ونحط ما بين كل قطعه والتانيه كيس بلاستك عشان مايلزقوش فى بعض


ال2 كيلو بيعملوا حوالي كيلو الا ربع جبنه


الجبنه ممكن تقعد فى التلاجه ثلاث او اربع ايام


اه فى حاجه بقى مهم اوي


لو عايزين نعمل جبنه بنكهات

زتون . فلفل اخضر. بسطرمه . لنشون . شطه . زعتر

اي حاجه بنحبها تنفع


نعمل ايه


نرجع للخطوه بتاعة تقطيع الجبنه مربعات بعد ما ربطت


ونجيب الزتون او الفلفل او وات ايفر (حلوه وات ايفر دي ) ونقطعها حتت صغيره


وبعد ما الجبنه نقطعها اول ما تربط ونسيبها نص ساعه تسرد مايه


نجيب بقى الحاجات المقطعه ونقلبها فيها بس نقلب بالراااااااااحه من غير ما نخلي الجبنه تتفرفت اوي


وبعدين نصبها بقى على المصفاه ونصفيها عادي ونعمل كل الى عملناه عادي


كده ممكن مثلا تعملي نصها بنكهه ونصها ساده بس تكون مجهزه بقى مصفتين وشاشتين وكده يعنى


بس الى بنكهات دي انا بامووووووووت فيها


وبالنسبه لبتوع الدايت الجبنه دي ما تنفعش مع الدايت لانها كاملة الدسم عندكم الجبنه القريش


لكن فاتيما انتى ممكن تاخدي حته زي بعضه

هههههههههههههههههههههههههههههه

والف هنا والى يجرب يقووووووووووولي






هناك 13 تعليقًا:

mony يقول...

تسلم ليدك يا صبصب

اكيييييد لازم اجرب طبعا
لو انا عايزة اعملها في حدق الجبنة الراميلي هتحناج اد ايه ملح

ينفع اجرب في كيلو لبن؟؟؟

اصل يعتبر انا بس اللي باكلها في البيت
فكيلو الا ربع هيكون كتير اوي عليا

صبرني يارب يقول...

موني

الجبنه البراميلى يبقى حطي على الكيلو حوالي معلقتين الى ثلاثه كده

وينفع طبعا تجربي فى كوباية لبن حتى المهم تظبطي المنفحه

وجربي كده وقوليلي

نورتي يا قمر

وجربي لهم النكهات يمكن تعجبهم

ابوزيد يقول...

ياااااااااااااااه يا صبرنى حاجات مظبوطه اوى بس ستى بقى كانت بعتملها على الحصيره والحصيرة دى بقى نسيج من اعواد القمح زى الحصر البلاستيك كده بس التانيه مخصوصه عشان الجبنه بس كانت خطيرهخصوصا وهى لسه طريه ومن ساعة ما جاموسه بدريه ماتت هههه وجدى تخلص من كل المواشى ما عدا اضاحى العيد والحمار بقينا بناكل جبنه من السوبر ماركت الله يرحمك ياستى ويجعله عامر

صبرني يارب يقول...

ابو زيد

ايوه بس انا ما عنديش حصر والله وقالولي موجود فى السوبر ماركت عشان مش عارفه مين كده بيعمل اكله به

بس ما لقتوش عندنا

والشاشه ماشي الحال يعنى فقلت اوك

والله يرحمها ستك

وليه باعهم بس

اهو انا نفسي فى جموسه الصراحه
ههههههههههههههههه

بس لا عندي مكان ولا عندي حد يراعيها انا ما ليش فى الليله دي
نوووووووورت

ELMASRYA - MRS WRITER يقول...

ماشاء الله لا قوة إلا بالله

إيه الجمال ده يا صبصب؟

أنا أعرف الجبنة القريش بتتعمل ازاي هي واللبنة لكن أول مره أعرف إن الجبنة التانية بنكهاتها ممكن تتعمل

بجد أشكرك على الوصف الدقيق ده وهحاول أعملها بس موضوع النكهات حسيت إنه هيبقى صعب شوية تنفيذه أهو هحاول واوافيكي بالتقرير

خالص مودتي و...تحياتي

صبرني يارب يقول...

المصريه

يا جميل نورتينى والله

ربنا يكرمك

مستنيه طبعا النتائج

ياااااااارب تطلع تمام

ابوزيد يقول...

عاجل جدا
ازيك ا ام خالد انا بقى ضربت ممبار عند واحد صاحبى ودى كانت اول مره اضربه بجد وعجبنى خالص قولت عليك وعلى اختك ام خالد هى هتظبط المسائل خالص ومش هستنى البوست الجى ولا اللى بعده عندك الميل ادخل بكره الاقى الميل منور عندى كده والمودام بىق تعيش مع نفسها مش هقول تانى بسرعه تتبعتيه ويجعله عامر

صبرني يارب يقول...

طيب معلش حطلي اميلك تاني

اصل انا مش عارفه هو فين


انا حطيته فى المدونه من جوه مع مجموعة مدونات بيوصلها البوستات بتاعتي


وعنيه حاضر

وعلى فكره كنت بحاول اصور طريقة السجق البلدي بس لسه ما عملتوش

هى زي المنابير برضه

بس عنينا يا فندم

اكتب الاميل واول لما افضى هاكتبهالك

ابوزيد يقول...

اميلى اهو بس مش لما تنفضى انا مستعجل مستقبل البينه هيروح وانا راسى والف سيف انى اكل ممار مع انى مكلتوش قبل كده انجزى عشان العلاقاتى الزوجيه هتتوتر عندنا ومش هنخسر بعض على اكلة ممبار ويجعله عامر medo132005@yahoo.com

صبرني يارب يقول...

ابو زيد

ايه ده بقى بالراحه عليا مش كده

انا غلبانه وعندي 3 مدونات و3 عيال

وكان عندي عزومه النهارده

الرحمه يا بوي

عنيه حاضر ربنا يسهل

خمسة فضفضة يقول...

السلام عليكم ورحمة الله وبركاته

تسشلم الايادي يا صبصب

ماما بتعملنا خزين الجبنه في البيت

في طوبه عشان اللبن بيبقي دسم وحلو ومايصردش ميه كتير

نفس الطريقه ودي بتبقي الجبنه التلاجه اللي بناكله طازه كده

اما عشان الخزين بقي اللي هي الجبنه الدوبل كريم يعني بتاخد خرط الجبنه اللي طلعت دي وترصها علي صينيه وترش عليها ملح خشن وتسيبها تقريبا يومين تلاقيها صردت ميه والخرط نشفت الي حد ما
تجيب صفيحه وتلبسها من جوها كيسين جوا بعض ( متخيله شكلها )

وبعدين تقوم جايه رصه خرط الجبنه في الكيس اللي جوا الصفيحه ومعاها قرون فلفل الشطه الاخضر وتحط عليها من الميه اللي طلعت في الاول ( مصل اللبن )بعد ما تكون دوبت فيه شوية ملح و بس وتتساب كام شهر وكل ما تقدم تبقي احلي علي الاقل ما تتفتحش قبل 3 شهور
بتبقي ولا القشطه والله

سلام يا قمر

صبرني يارب يقول...

خمسه فضفضه

تمام الله يفتح عليك يا باشا

انا ما باعملهاش عشان ما حدش عندي بياكلها اوي

بيحبوا الجبنه الى هى ملح خفيف

انما هى فعلا بتتعمل كده

كنت ناويه اعملها فى بوست لواحدها لما اجربها انا الاول


قشطه عليك يا باشا

حنـــان يقول...

السلام عليكم

طريقة بسيطة و واضحة جداااا..

لكني مافهمتش "المنفحه" هي شنوا بالضبط، لو ممكن توصفيهالي.. علما انه ما يبيعوش عندنا عند اللبان غير اللبن و الحليب و الاجبان بانواعها يعني ما يبعوش المكونات..
فهل ممكن اعوضها بحاجة اخرى ..
اتمنى انك تجاوبيني
شكرا ليكي ..