كحك العيد

اسفه اسفه اسفه يا بنات

والله النت قاطع من اول امبارح قاصدنها معايا

انا عملت الكحك من اول امبارح عشان الحقكم والله

وعموما انا جاهزه اهو يلا على الشغل

وعايزه كل واحده فيكم بجد تجرب السنه دي تعمل كيلو واحد كحك مش هاتخسروا حاجه والله بالعكس وهايطلع ان شاء الله احسن من الجاهز واجمل وكفايه انه من صنع ايدك ومش بياخد مجهود والله باعكس ده سهل جدا

يلا نشتغل

المقادير

كيلو دقيق ابيض (7 كوب )

كوبايتين ونصف سمنه ( بلدي او مخلوط على نباتي )

ملعقه صغيره خميره (فوريه او عاديه ) مذابه في ربع كوب لبن ومعلقتين عسل ابيض 

كوب حليب تقريبا 

حوالي 3 معالق كبيره سمسم محمص

بنحط روائح بقى ممكن فانيليا وفى حاجه عندنا فى مصر بنجيبها من عند العطار اسمها رائحة الكحك عباره عن بودر كده

دى الى انا باستعملها

وفى ناس بتحط حاجه اسمها رائحة الموز انا مش باحبها

المهم

الطريقه بقى

بسم الله

اولا هانجهز الدقيق هاننخله وبعدين نحط عليه رائحة الكحك والسمسم زي الصوره دي كده

ونخلطهم كويس ويكونوا كده ونعمل فى النص حفره كده عشان هانسقط فيها السمنه

هانكون جهزنا السمنه بقى قبلها على النار وخليناها لحد ما سخت اوي لا انا محتاجه العجينه بتاعتي تفضل دافيه لحد لما اشكلها واخلصها عشان ما تبقاش العجينه ناشفه

هانجيب السمنه وفى الحفره الى فى النص ونسمى باسم الله كده ونحط السمنه وبالراحه بمعلقه كبيره ونقعد نقلبها كتير لحد لما يختفي الدقيق كله فى السمنه وتكون السمنه بردت شويه يعنى ادينها تستحملها ونبدا نفرك العجين عشان نتأكد ان مافيش اي تجمعات دقيق ونضمن ان الدقيق يتشرب السمنه

دى بنقول عليها نبس العجين هانبس العجين او نفركه لحد ما يبقى شكله كده

اهو في تجمعات بس تجمعات هشه وعباره عن دقيق مخلوط فعلا مع السمن

هانجيب الخميره الى دوبناها فى ربع كوباية حليب وربع معلقة سكر ونسمي باسم الله كده شطاااااااار

ونحطها على العجين ونعجن ونبدأ نزود الحليب شويه شويه ونعجن(والحليب يكون دافي )

هانعجن ازاي باطراف صوابعنا كده عشان ما نكتمش العجينه وونفضل نحط الحليب لحد لما العجينه تتكور على بعضها تبقى عجينه ياااااادوب

ممكن نحتاج اكتر من كوبايه وممكن نحتاج اقل من كوبايه

المهم تعطينى فى الاخر عجينه طريه لكن متماسكه وسخنه كمان وهانجمع العجينه مع بعضها كده ونحطها فى طب صغير على ادها ونغطيها ببلاستيك ونسيبها ترتاح عشر دقايق

بعد كده بقى يا حلوين نبدأ نقعد نشتغل ناخد جزء من العجين وهو متغطي ما تكشفيش العجين عشان ما يبردش وينشف بالراحه تمدي ايدك تاخدي حته وتكوريها وبعدين تفرديها دايره وتحطي فى قلبها الحشو زي كده

الحشو ده بقى ممكن يكون ملبن او مكسرات او الاثنين معا او بلح او عجميه الى كانت تيته الله يرحمها بتعملها

وبعدين نرجع نقفلها على الحشو ونكورها كده

وبعدين نشكلها من فوق انا باحب اوي اعملها بالمنقاش التقليدى القديم ده مافيش احلى منه لا من نقشتي يا ولاد يا حلاوتها والنبى


لكن طبعا ممكن تعمليها انتى بالختامه او باي شكل تحبيه

وهانرص الى نعمله فى صنيه ويبقى جاهز لحد ما يجى وقت الخبز

بس خدي بالك لو انتى هاتنقشي او بطيئه او كده يعنى خلي حد يكون معاكي ساعة التشكيل بس لان لو سبتي العجينه تبرد هاتنشف ومش هاتعرفيها تشكليها كويس

افضل نتيجه للنقش تيجى لما تشتغلي والعجينه لسه دافيه عشان كده هانشتغل بسرعه وياريت يكون فى حد مثلا انتى تقطعي وتحشي وهو ينقش

شغلي جوزك معاكي بقى

امال هياكلوا على الجاهز ولا ايه

بس خلاص هانسيبه بقى يخمر حوالي ساعه او ساعتين حسب الجو وحسب الخميره الى انتى مستعملاها فوريه ولا عاديه

هو مش هايتضاعف زي العيش يعنى لانه دايب فيه سمن لكن انتى هاتلاحظي انه انتفخ شويه

نسخن الفرن كويس اوي حوالي 200 درجه مئويه

ونحطه فى الفرن الصنيه هتاخد بالظبط ربع ساعه تقريبا وتطلع لونها وردي فاتح وجميل كده

بعد كده اول لما يطلع نشيله من الصاج ونسيبه شويه لما يبقى دافي ونرشه بعد كده بالسكر وهو دافي كده عشان السكر يثبت عليه

لكن لوهانسيبه فتره طويله يستحسن نسيبه من غير سكر عشان السكر بيشرب سمنته

المقدرا الى احنا عملناه ده يطلع حوالي 2 كيلو كحك معمول وبدون سكر السكر زودي ربع كيلو كمان

احسبى بقى تكاليف كيلو الكحك عندك فى البيت كام حسب المكونات الى هاتستخدميها لو سمنه بلدي ولا لمكسرات ولا من غير ده

وصدقينى مافيش انضف ولا اجمل من الى هاتعمليه بايدك

يلا عايزه تجارب ونتايج وعايزه شغل شغل شغل بلاااااش الشلت دلوقتي والنبى