الثلاثاء، 20 أبريل 2010

مربى الفراولة


سيداتي انساتي سيداتي   على راي ابو حفيظه

ازيكن والسلام عليكن ووحشتوني  نونه برضه عشان الوزن بس

اوطبعا طبعا الساده الرجال الى يشرفوا طبعا منورين القاعده والله شكلكم جايين تاكلوا بس

انتم عارفين ان انا احب واعز موت اعمل الحاجه فىموسمها
وحاليا فى موسم الفراوله

فكل واحده فيكم تروح تشتري قفص فراوله حلو كده وتيجى

عشان هانعملها مربى
اولا وباديء ذي بديء الصوره الى فوق دي انا لطشها من على النت مش من عندي
بس اوعدكم بارتفاع مستوى الصور بعد كده حيث اننى اشتريت موبايل جديد
بكاميرا 3.2 بكسل وهاشهيصكم صور

خلينا فى الفراوله يا رغايين

اول حاجه هانشتري الفراوله ما تكونش مستويه اوي وما تكونش خضرا برضه
حمرا كده ومصحصحه وفله
انا باحب فى المربى اعمل فراوله صغيره  عشان ما اقطعاش عشان تبقى قطع داخل المربى

لكن طبعا فى ناس بتحب الفراوله مقطعه ومهروسه شويه كمان فى  المربى حسب كل واحد وذوقه طبعا

شوفوا كده الفراوله بتاعتي دي



طبعا انا جبتها ونضفتها وغسلتها وزي ما انتم شايفين حجمها صغير اوي شوف كام واحده فى ايدي

سمعاكي يا كلبه اه انا ايدى كبيره بس مش للدرجه دي

المهم

تعالوا اقولكم الحاجات الى هانحتاجها عشان تجبوها

هانعمل المقدار كيلوا فراوله
ولو ان طبعا لو هاتعملي كتري شويه يعنى 3 كيلو على الاقل عشان تستاهل الدوشه يعنى

المهم

كيلوا فراوله ـ كيلو سكر ـ علبة جيلى فراوله  او معلقتين جيلى باودر خام


طبعا غسلنا الفراوله ووضبناها نجيب بوله بلاستك مثلا
ونحط فيها شويه سكر وبعدين شويه فراوله وبعدين سكر طبقات يعنى لحد ما الكميه تخلص ونغطي وشها من فوق بالسكر ونسيبها اد اربع خمس ساعات اوقات انا اعملها من بليل واسييبها فى التلاجه للصبح


هانصحى الصبح نلاقي شكلها بقى كده



سردت مايه كتير هانقلبها بعد كده فى مصفاه بقى وناخد المايه بتاعتها مش هانرميها طبعااااااااااااااااا

هاتبقى عباره عن مايه نازله من الفراوله ومعاها السكر
ونسيبها تصفى ساعه كده مثلا

فى هنا بقى حاجه لطيفه انا عملتها المره الى فاتت
انا ما باحبش الحاجه الى تبقى سكرها جامد جدا
وبعدين بعد التجارب بقى
واسأل نفسي يا ترى يا هلترى المربى الجاهزه بتبقى متامسكه ولونها فاتح ومش مسكره اوي زي البيتى ؟؟؟

وبعد تجارب بقى وصلت لنتيجه معقوله جدا

اولا السكر مش باحط الكميه كلها سكر
باستعمل عسل البطاطس وهو لزج جدا وسكره قليل
وده موجود عن بتوع لوازم الحلوانيه بالكيلو

بالتالي انا بانقع الفراوله بنص كيلو سكر بس وبعدين باضيف  نص كيلوعسل البطاطس بعدين
وكده هاتبقى المربى مش مسكره جاااااامد اوي وكمان عسل البطاطس لزج جدا لما يبرد هايديها تماسك

بس مافيش مشكله برضه لو ما لقتيش عسل بطاطس
حطي كيلو  الا ربع سكر كفايه ونزود الجيلاتين شويه عشان التماسك


نيجى للخطوه الى بعد كده
انا هاخد المايه الى نزلت من الفراوله

واحطها على النار زي الصوره دي ونسيبها تغلي لحد لما تنعقد زي الشربات بتاع الحلويات كده
واول ما تبدأ تعمل رغاوي اكتر من الصوره دي شويه تبقى كده خلاص استوت

لو كنا بقى عندنا عسل البطاطس وهانستخده هانزوده دلوقتي عشان يبدا يتغلط ويسيح مع شربات الفراوله الى عملناه

وهانروح نجيب الفراوله بقى بتاعتنا وسقطها فى شربات الفراوله المعقود ده
هاتبدأ تغلي الفراوله كده

وتبدأ تسرد مايه كمان زياده وتلاقي المايه فى الحله بدأت  تزيد

تاخدي نص كوبايه تقريبا مايه من على الفراوله وتدوبي فيها كيس الجيلي بالفراوله  او معلقتين الجيلاتين
ندوبها كويس اوي

وبعدين نزودها على الفراوله تاني ونسيب الفراوله تغلي
حوالي ساعه الا ربع لحد لما تبدأ مايتها تنشف ونخلي بالنا اوي


عشان احنا عايزنا تطلع لونها احمر مش بنى غامق
كل ما كانت لونها قريب للطبيعى تكون احسن

 وطبعا نهدي عليها النار ونكشف الحله عشان البخار يطلع وما تفورش على البوتجاز 


وكده هى خلاص استوت


طبها هايكون شكلها سايب لسه وشكلها مش المربى ما تتخضوش احنا حاطين فيها جيلاتين لسه هايجمد من التلاجه

غير ان السكر نفسه وعسل البطاطس لما بيبردوا بيدوا قوام اتقل بكتير

بالتالي احنا هانسيبها تبرد وبعدين لو كنا عاملين كميه هانعمبيها فى برطمنات ازاز بغطاء محكم ونحطها فى التلاجه افضل طبعا
لاننا مش مستخدمين مواد حاظه ولا حاجه

وكمان ناخد بالنا لو كانت كميه كبيره شويه اننا طول ما احنا بنعبيها نهز البرطمان عشان ما يبقاش في فقاقيع هوا جوا وده يخليها تبوط خصوصا لو هاتسبيها بره التلاجه شويه

كمان لو حصل ولقتيها بعد ما بردت وحطناها فى التلاجه لسه قوامها خفيف اوي فى حال انتى قدرتي غلط يعنى
مافيش مشكله رديها على النار تاني

ولو لقيتى الشربات بتاعها كتير اوي  اوقات الفراوله بتسرد مايه بزياده حسب نوعها

انا بقى اعز كده موت موت
لان باخد المايه دي من عليها واحوشها عندي واستخدمها صوص فراوله فى الحلويات والايس كريم يا لهوي بتبقى جميله جدا

والف هنا يا حلوين ويا حلوات
والى يجرب يقولي
والى عنده اضافات يتفضل
نرحب بالافكار الجديده  يا ساده

هناك 11 تعليقًا:

همس الاحباب يقول...

ما فيش سندوتش مربى
احسن انا جوعت من طول البوست
وبعدين انا ما عنديش مرارة اعمل مربى
مالها فيتراك زى الفل وكلها فراولة غير مغسولة علشان الفيتامينات
هههههههههه
تسلم الايادى

sony2000 يقول...

بصي بقه
انا عوذه خدمه
اعميلي مربي علي ذوقك كدا
بمناسبه عيد ميلادي
موشي:)

shimaa elkholy يقول...

همس الاحباب

سندوتش واحد يا باشا نجيبلك مصنع فيتراك كله
بس ادفع انت تمنه بقى
هههههههههههههههههه

نورت يا استاذنا

shimaa elkholy يقول...

سوني

بس كدددددددده

اعملك شادر مربى كل سنه وانتى طيب يا جميل ويارب ميت سنه هنا وسعاده وصحه ان شاء الله

bastokka طهقانة يقول...

انا ماليش في المربى بس تسلم اديكي و عنيكي
انا بقى اروح اخدلي صحن شوربة عدس من البوست الي فات
اممممم
جميلة

الى الامام و ربنا يوفقك دايما

shimaa elkholy يقول...

طهقانه

مرسي يا جميل ربنا يخليكى

طب جربي المربى بالقشطه والنبى
باحبها اوي

ههههههههههههههه

richardCatheart يقول...

يا صباح المربى

والله شطوره وتسلم ايدك
والاجمل انك عمله بنفسك بالصور

ممكن برطمان لو سمحتى يا اختى

ماما بتعملنا المربات دى وهاديها طرقتك
اسهل ايون لازم نستغلك ههههههههه

صباحك فرواله

shimaa elkholy يقول...

قطقوطه الجميله

ايه ده يااختي ما تعملي انتى

انتى هاتروحي تشغلي ماما ولا ايه
هههههههههههههه

نورتي يا جميل

مونتي بوكيه ورد يقول...

جميل اوي طبخك يا ندي الياسمين
زرته و حبيته و حسيت اكلك الجميل
و الفروت سالات بموت فيه بس منك مختلف و لزيز اكيد لو فتحتي مطعم ندي الياسمين للاكلات والتحليات هينجح اوي ان شاء الله
:)
وحاجه جميله انك بتكتبي علي كل حاجه اسمك و لو محتاجه برامج لفونتات حلوه انا تحت امرك
اخوكي
مونتي

مونتي بوكيه ورد يقول...

تعرفي النهارده عملنا بيكاتا عشان محمد ابن خالي جاي م الغردقه و بيشكر فيها هناك اوي
و قال انها هي هياها بس كان ناقصها الكريمه اللباني ال بدلناها بزبادي
فياريت تقوليلنا معلوماتك الفنيه عن البيكاتا

النسر المثالي يقول...



نقدم لكم شركة المثالية للتنظيف بالاحساء الشركة الرائدة في تقديم جميع خدمات التنظيف الشاملة للمنازل والشقق والفلل والمجالس والكنب والسجاد والموكيت والمفروشات بجميع مدن ومحافظات المنطقة الشرقية بالمملكة العربية السعودية فتعد شركة المثالية للتنظيف بالاحساء افضل شركة تنظيف بالاحساء حيث تقوم بجميع خدماتها بالاعتماد علي كافة الادوات والاساليب والحديثة بالاضافة الي خبرة عشرات السنوات بمجالات التنظيف ومكافحة الحشرات ورش افضل انواع المبيدات الامتة والفعالة فلدينا شركة المثالية لمكافحة الحشرات بالاحساء والمتخصصة في مكافحة جميع انواع الحشرات وابادتها ابادة تامة بالضمان باستخدام اقوي انواع المبيدات الامنة والفعالة وذات الجودة الدقة العالية فتقدم ابادة الحشرات بافضل جودة وارخص الاسار فحقا هي الشركة المثالية للتنظيف بالاحساء فهي حقا افضل شركة تنظيف ومكافحة حشرات بالاحساء والجبيل وباقي محافظات المنطقة الشرقية بالمملكة العربية السعودية فلدينا شركة مكافحة حشرات بالجبيل المتخصصة بتقديم خدمات مكافحة الحشرات بالجبيل

شركة مكافحة حشرات بالجبيل
شركة تنظيف شقق بالجبيل
شركة تنظيف فلل بالجبيل
شركة تنظيف مجالس بالجبيل
شركة تنظيف بيوت بالجبيل

شركة نقل عفش بالاحساء
شركة نقل اثاث بالاحساء