الأحد، 30 مايو، 2010

شطارة ستات ... ري فريش الاكل البايت

البوست ده يا جماعه مخصوص عشان خاطر استاذنا عصام ...احوال الهوى
عشان هو بيحب الافكار دي فقلنا نغرقه افكار بقى

شوفوا انا اعظم مشاكل حياتي المطبخيه خصوصا فى رمضان عشان العزايم وخلافه هو الاكل البايش  قصدي البايت
اه اصله بصراحه بيبقى تاني يوم تحس انه بايش كده ومالوش معنى
وما حدش يقولي الاقتصاد واطبخي على ادك والحركات دي
باعمل كل ده ولا مفر من الاكل البايت خصوصا فى  العزومات
وطبعا مهما حاولت اوزعه على أي ناحيه ساعات بيفضل برضه وحرام بجد رمي الاكل وهو سليم فانا بقى عادة باعمل ايه
اعادة  تصنيع
او يعنى الواحد ياخد الاكل يعمله ريفريش ويجيبه تاني

هاقولكم شوية افكار كده ان شاء الله تستفيدوا منها

* الكيك البايت: يمكن حفظه فى الثلاجه لايام او وضعه فى كيس بلاستيك او علبه محكمه الغلق وحفظه فى الفريزر لحفظه لمده اطول واستعماله فى عمل تورتة جيلى او شارلوت ( هانقبى نقولكم مقادرهم بعدين)

او يمكن تقطيعه او فركه وتحميصيه  فى الفرن واستعماله فى تشيز كيك
وممكن نعمل كده برضه فى البسكوت او الكيك الى طلع مش ناجح اوي برضه يشتغل عادي

* اللبن البايت او الزبادي القديم شويه:

من الحاجات الى ما باحبش ابدا ارميها أي لبن او مشتقاته
وهى اصلا ما تترميش ابدا دايما لها فايده معينه
سبحان الله

لو لبن راب عندك او اختبرتيه لقتيه هايروب سبيه يكمل روبان للاخر واعمليه جبنه قريش حتى لو كان سبق غليانه كمان مافيش مشكله  او حتى لو زبادي بايت كتير

و لوكانوا كميه بسيطه
ممكن تحفظيه فى كيس بلاستيك فى الفريزر واستعمليه فى صنع الكيك او البسبوسه او حتى سلطة الزبادي .( او اعملى اعصري فوقه لمونه وعملى به ماسك تفتيح وترطيب للبشره )

* قشر اللمون: بعد ما تعصري اللمون ما ترميش القشر ممكن تبشري منه بسيط اوي على اي تتبيله انتى عاملها بيدى ريحه حلوه. وكمان لما تخلصى شغل دلكي ايدك بقشر اللمون بيشير الروائح ( البصل بقى والتوم وكده ) وكمان بينعم ويفتح.

* الخضار الفريش: ما تسبيش حاجه فى التلاجه لحد ما تبوظ كل الخضار ينفع يتخزن فى الفريزر القلقاس والبسله   والباميا والملوخيه والباذنجان والفاصوليا  والبطاطس كمان ممكن تخزينها بس للقليه فقط هابقى اقولكم ازاي الا الكوسه بس دي ما بتنفعش لكن ممكن تقطعيها وتشوحيها وده يخليها تستنى عندك فى التلاجه يومين كمان زياده  اى حاجه تحسي انها هاتبوظ خزنيها فى الفريزر او صنعيها أي حاجه  زي مربى مثلا او عصير .
بواقي الفطير والجلاش : والرقاق كمان والسمبوسك والميل في واي عجينة رقيقه تنفع   نحمصها ونخزنها فى التلاجه لحد ما نعملها ام علي

* العيش الفينو البايت: طبعا احنا كل يوم بيفيض عندنا عيش فينو غير صالح للاكل نشفيه واحفظيه عندك لما تكونى كميه تستاهل الدوشه تكونى مشغله الفرن كسري العيش وحطيه فى الفرن خمس دقايق ماتحرقيهوش بعدين طلعيه اطحنيه فى المطحنه او الكبه حتى لحد ما يبقى ناعم واستعمليه بقسماط جميل
يمكن خلطه ببعض الدقيق الابيض واضافة البهارات والملح وفركه بقطع سمن صغيره ( بيثبت اكتر الى الاكل وانتى بتقليه) وحفظه فى الثلاجه.


* الموز المستوى جدا: اضيفى عليه كوب حليب ونص كوب ايس كريم يفضل بالحليب وقليل من السكر واعمليه فى الخلاط عصيير بيبقى تحفففففه.

*الارز البايت: تاني يوم اعمليه رز بالشعريه يرجع طازه تاني( حمري الشعريه عادي وضيفى عليها الماء حسب الكميه واول ما تبدأ فى تشرب الماء ويحدث ذلك سريعا اضيفى الرز وقلبي جيدا حتى يتم الاختلاط وهدي النار واتركيه على النار حتى يسخن جيدااااا.

* البتنجان والفلفل المقلي البايتين برضه : تاني يوم اعمليهم مسقعه

* السمك المقلي البايت برضه: تاني يوم اعمليه صياديه

* البحريات البايته عموما: ( جمبري كاليماري باكلويز كابوريا) اعمليه ارز صياديه
*أي لحوم بايته : برضه عشان اللحمه غليت يا اخويا ما ترميش ولا فتفوته ده احنا فى الاخر هانوزنها بميزان حساس زي الدهب
المهم اللحوم بقى تخليها عندك لو الفتره هاطول يعنى اكتر من يومين ياريت يبقوا فى الفريزر
وتطلعيهم وتعملي منهم بقى بيتزا مثلا
او كريب
او حتى تقطعي بصل وفلفل وطماطم وتشوحيهم على النار لما يقربوا يستوا وبعدين تقطعي اللحمه او الفراخ المستويه وتحطيها عليها وشوية توابل وتقليبتين كده على النار
وتعمليه سندوتشات وطبعا تضحكي على العيال وتقوليلهم عملالكم شاورمه طازه اخر حاجه


بس كفايه كده عشان مش فاكره حاجه تانيه الى مش فاهمه حاجه بقى تقولي والوصفات الى اتقالت فى النص دي وما سبقش لنا عملها ان شاء الله نعملها سوا بعدين بس ابقوا فكروني بقى 

ميرسي يا حلوين على حسن استماعكم ويارب ما اكونش صدعتكم وافدتكم 

...... ملحوظه رفيعه يا قوم ... انا سبق ونشرت موضوع زي ده بس طبعا انا اضفت عليه شوية حاجات  بس نشرته فى منتديات قبل عهدي بالمدونات ... اه احسن حد يشوف الكلام ده في منتدى يمين ولا شمال يقول ندى بتلطش موضوعات وتقرطسنا لا والنبى يا اختي ده من مطبخنا راسا اليكم
سي يو يا قطاقيط

هناك 17 تعليقًا:

ELMOSTAFZ يقول...

بالنسبة للعيش البلدي البايت ، كنا زمان بنبله ف مية و نظغطه للبط دلوقتي مصيره ايه بالظبط بعد ما بقاش في بط ؟؟؟

ندى الياسمين يقول...

المستفز

ههههههههههههههههههههه

العيش البلدي البايت والله ما لقتلوش حل حضرتك

هو ممكن يتحمص ويتعمل بقسماط برضه بس ما بيبقاش اد كده

بس خلي بالك العيش المبلول مش للتظغيط

اعتقد كانوا بيظغطوا فول

انما العيش المبلول كان البط بياكله لواحده

وبعدين المنظمات الحقوقيه العالميه دلوقتي منعت التظغيط بيقولوا انه تصرف وحشي ضد الحيوان
شوفت بقى ياعم

ELMOSTAFZ يقول...

و الله مستبعدهاش...دي البطة يا عين أمها بتفضل تتلوي ف ايد الواحد و هي بتلعن اليوم اللي اتفقست فيه...
بس بجد أول مرة أشوف حد بيتكلم عن الأكل البايت...كده لسة فيه ناس بتقدر نعمة ربنا :)
لكي تحياتي...

أحــوال الهـوي يقول...

لو سمحتي
البوست ده ما ينفعش يتسمي شطارة ستات
لاني بجد مش شايف اشطر منك

في الاكل البايت
اللي بيبقي طازة تسلم ايديكي و التماخيخ بتاعتك و الافكار الجميلة
انا بجد اول واحد هااطبقها
لسبب بسيط انا قاعد لوحدي فبابقي المشئول الاوحد عن الامن الغذائي
و بما اني ما باحبش الاكل البايت و يا مااكترة فانتي ادتيني كنز ربنا يكرمك
لاني باستحرم ارمي الاكل و باسيبه لغلية لما يخسر و ارميه

يارب ثواب كل لقمة تبقي في ميزان حسناتك

ملحوظه انا ما عرفتش انك صبرني الا من وصفة ام علي لانها ملكيه حصرية باسمك

تحياتي

أحــوال الهـوي يقول...

اسجل شكري لحضرتك انك اهديتي البوست الرائع ده لاخوكي الكبير


تحياتي

richardCatheart يقول...

والله تسلم ايدك يا ندود
ماشاء الله شطوره وافكار سهله جميله
ياريت الناس تطبق الكلام دا علشان نعمه ربنا فى ناس مش لقينها
فى حاجات كنت بعملها وفى حاجات جديده طبعا هاجربها ان شاء الله

تسلم ايدك

ندى الياسمين يقول...

المستفز

اه بجد بيزغطوا فول سألت ماما

انا عمري ما شوفت المنظر ده قبل كده انما باتخيله مريع

والحمد لله على نعمته طبعا باقدر النعمه ومهما كانت قيمتها قليله هى نعمة ربنا لازم نحترمها

ندى الياسمين يقول...

أحوال الهوى

معقوله ؟

عموما كويس انك اكتشفتنى

وربنا يخليك على الكلام الجميل متشكره اوي

ونورتنا

ندى الياسمين يقول...

قطتى

تمام يا جميل ربنا يخليكى يارب نورتي يا بطه

mrmr يقول...

شاطره يا ندى
بس انا اشطر منك
هههههههه
افكار جميله
كمان عايزه اقول ان العيش البلدى البايت ممكن تحمصه وتستعمله مع شويه شوربه فول نابت كدددددده
وبالهنااااا

لـــولا وزهـــراء يقول...

احلى ندى مندية على خدود القمر مهدية بتقولك تسلم الايادي ياصبية ومتنسيش تعزميني على اكلة حلوة المرة الجاااااااية

لـــولا

Wanda يقول...

دردر
سريع كده و النبى
الطعمية بتتعمل ازى ؟؟

ميشوو يقول...

ماشاءالله تبارك الرحمن انتي شغيله عين النبي تحرسك ..
انا من الكويت ونقول للمرأه اللي تهتم بالطبخ وفبيتها انها*قرمه* وانتي ام القرامه..
اختي قاعده يمي واهي متزوجه قاعده تبارك عليج :)

وعلى فكره احنا الدجاج البايب نسوي فيه مكرونه فوتيشيني او نحطه في توست مع خلطه معينه..


وانا بكتب خطرة على بالي فكره,,تعملي موضوع خاص لطبخات رمضان وكل زائر يحط الاكله ومكوناتها..

تسلم ايدك :)

ندى الياسمين يقول...

وندا والله ما شوفت خالص تعليقك الا دلوقتي
طب كنتى تعالي على الميل بتاع ياهو قوليلي يا بنتى

عموما حالا هاحطلك الوصله بتاعة الطعميه

ندى الياسمين يقول...

مرمر

لا ما جربتش حكاية الفول النابت دي اصل انا مش باحبه اصلا ههههههههههه

وطبعا انتى اشطر يا جميل

ندى الياسمين يقول...

لولا

تسلمى يا جميل ربنا يخليكى

ندى الياسمين يقول...

ميشووو


يا لهوي ايه ده هما نزلوا كلام جديد ولا ايه
ههههههههههههه
بالراحه عليا شوي يا ميشو

انا اينعم باعرف خليجى شويه بس امارتي مش كويتي يا حاجه

البوست المفتوح حاضر هاعملهولكم لرمضان
هاحطلكم الميل بتاعي لو حبيتوا ترسلوا على الوصفات وانا انشرها عادي

بس شوفي بقى اول حاجه عايزه اعرفها

الدجاج البايب نسوي فيه مكرونه فوتيشيني او نحطه في توست مع خلطه معينه..

ايه ده يا اختي والنبى ما فهمتش ولا كلمه
هههههههههههه
بصي لما تحتاري فى كلمه قوليها لغه عربيه ولا مصري ولا كويتيي

مرسي اوي اوي اوي على الكللام الى قولتيه عليا
وان شاء الله المدونه هاترجع تاني تشتغل بقى فى رمضان

وتحياتي ليكى ولاختك