الأربعاء، 25 أغسطس 2010

تورتة ايس كريم



ايس كريم فى رمضاااااااان يا مدام

كنت باحب الاعلان ده مش عارفه ليه ما عادش بيجى 

الحقيقه رمضان السنه دي عايزنا نقعد اساسا جوه التلاجه بتاعة الايس كريم

انا ولادي تقريبا ادمنوا الايس كريم من اول رمضان لازم كل يوم يبقى فى اي ايس كريم

طبعا هو الايس كريم عشان نعمله فى البيت هو سهل اوي  هاقولكم الطريقه بسرعه 

بصوا انا هاعملكم نكهة الفانيليا واي نكهه تانيه تقدروا تزودوها على المقادير عادي جدا

هانحتاج 2 كوب حليب  ومعلقتين كبار سكر  و معلقتين كبار نشا و وكوباتين كريم شانتيه  وطبعا فانيليا  عشان النكهه

هانحط الحليب على النار وندوب فيه السكر والفانيليا كمان   ولما يدفى ناخد منه شويه لبن صغيرين ندوب فيهم النشا ولما يغلي الحليب نزود اللبن بالنشا بسرعه ونقلب كويس اوي عشان ما يكلكعش لو كلكع منك اعمليه بمضرب الكهربا هايفك على كول

طبعا ده كأننا بنعمل مهلبيه بس سايبه شويه

هانسيبها بقى تبرد خااالص ونحطها فى التلاجه كمان  لما تسقع كويس

وهانكون مجهزين الكريم شانتيه  ونحطها عليها ونضرب بالمضرب لما يختلطوه تمام وبس على كده حطيها فى الفريزر

اي نكهه تانيه بقى زي المانجه مثلا طبعا هانستخدم مانجه طبيعى ودى احلى حاجه فى الايس كريم الى بتعملوا فى البيت  انه كل حاجه بتبقى طبيعى

الشيكولاته ممكن تستخدمى الكاكاو الخام بس تبقى تزودي السكر شويه فى الحليب وممكن تستخدمي شكيولاته خام بس هاتسيحيها فى حمام مايه وتخلطيها مع المهلبيه  قبل ما تبرد وتحطيها فى التلاجه لحد ما تبرد

الفراوله كده برضه
والنسكافيه ولا اسهل دوبي معلتين نسكافيه وضفيهم على الخليط

والليمون  والكراميل وكل نكهه تحبي تعمليها عادي

اما بالنسبه للحريم الشلت حبايبى فممكن تجيبى  الايس كريم البودر وتعمليه  او اشتري الايس كريم جاهز بقى ونقفل المدونه دي خالص
ههههههههههههه

بالنوسبه بقى لتورتة الايس كريم الى فوق دي عشان انا باحبها اوي

هى انا فى الغالب باعملها قوالب عشان تتقطع شرايح زي الصوره دي كده بتبقى اسهل للعيال

هاتكوني مجهزه صنية كيك حلوه كده تعمليها انتى بلاش الكسل ده

وتقسميها من اثنين من العرض يعنى زي التورته كده وطبعا تراعي النكهات يعنى لو الكيكه شيكولاته تحطي ايس كريم شيكولاته كده يعنى
وقبل ما تحطي ا لايس كريم فى الفريزر بقى

هاتجيبص صنيه وتبطنيها ببلاستيك وتحطي طبقه من الكيك وبعدين تصبي عليها الايس كريم الى عملتيه وهو لسه سايل وبعدين تغطيها بالطبقه التانيه من الكيكه وتتكي بالراااااحه اوي عشان يبقى متساوي وتدخليها الفريزر بقى اربع خمس ساعات كده حسب ما تجمد

وتطلعيها لما تكون جمدت تمام تسبيها بره خمس دقايق قبل ما تقطعيها  وبعدين تقطعيها انا هنا فى الصوره حاطه عليها صوص شيكولاته طبعا تقدري انتى تحطي اي صوص يعجبك

وطبعا ممكن تستخدميها تورتايه عاديه فى اي عيد ميلاد بس طبعا تعملي حسابك انك تعطيها الفنش التزيين النهائي يعنى وقت التقديم بالظبط عشان الايس كريم ما يسيحش

وبالهنا والشفا يا حلوين  ورمضان كريم

هناك 9 تعليقات:

فاتيما يقول...

احم احم

رئيس جمعية الحريم الشلت تناديكم
و تقول ازيك يا صبصب
وحشانى جدا
و كان نفسى تيجى ابو الريش قوى
بس معلش انا عارفة و ربنا يعينك

عمو عامل ايه دلوقتى ؟
يا رب يكون بالف خير


حلو التورتة
ماما بتعملنا الكيكة
و انا بشترى الأيس كريم جاهز فى علبته
هوه انا لسه هجيبه بودرة و اضربه ؟؟
قلبك أبيض
لماذا خلقت الشلت طيب ؟!!

بس منظرها يفتح النفس

ممكن شوية مكسرات ع الوش
و معلقة مربى
و كريمة بقى مع صوص الشكولاتة
و يا لهوووووى


تسلم ايدك

richardCatheart يقول...

يا حلوياتك يا مفترح الطنتخ يا جميل
بقولك ايه انا بجيب تورته الايس كريم جاهزه خلاص هو انا معاكى ان حاجه البت احلى بس متعبه اكتر

بالهنا يا يا جميل يا دردر

شمس النهار يقول...

انتي عاملة كل حاجه ضد الرجيم ليه
:)

shimaa elkholy يقول...

فاتيما

هههههههههههههه

لعلمك انا كتير باجيب البودره بس عشان الزنقات يعنى لانها اسرع طبعا

وبابا الحمد لله بقى احسن ربنا يتم شفاه على خير
ومرسي على سؤالك يا جميل

والحمد لله انك بتروحي تجيبى الايس كريم مش بتبعتي اخوكي كمان
هههههههههههههه

منوره يا قمر

shimaa elkholy يقول...

قطتى الجميله

مرسي يا جميل

بتجيبى التورته جاهزه اصلا بالصلاه على النبى احنا نقفل المدونه دي احسن

قومي يا به منك لها اشتغلوا

ايه العيال دي يا اختي
هههههههههه

shimaa elkholy يقول...

شموسه

اهو حالفين اقفلها

ماهو لو على الدايت يا شموسه كنا نقفل المدونه بجد ههههههههه ما كل الاكل اصلا بقى ضد الدايت

وبعدين بتتكلمى على الدايت ليه انتى خلي ده للغلابه امثالي مثلا

منوراني يا قمر

غير معرف يقول...

أول مره أخد بالي من المدونه دي :)

وعندي سؤال ... موش الايس كريم ممكن يخللي الكيكه العاديه تبقا طريه وتتبل ؟؟؟

بمعنى لو عملنا عجينه الباستا فلورا موش تبقى افضل ؟؟

shimaa elkholy يقول...

فتاه من الصعيد

معلش يا جميل لسه واخده بالي

لا مش هايتبل ولا حاجه الايس كريم لو معمول صح يا جميل بيبقى قبل ما تحطيه فى الفريزر اصلا وهو عامل زي الكريمه كده مش سايل يعنى

وبعدين انتى اصلا بتحطيه فى التلاجه او الفريزر فى كل الخطوات بحيث انه دايما يكون بارد جدا بس مش متجمد يعنى

فلما بتصبيه على الكيكه مش بينزل عليها مايه ولا اي حاجه

وانا استخدمت فعلا عجينه قبل كده زي الباستا فلورا .. مين الى قالك هههههههههههه

بصي هى كانت كويسه بس لما بتدخل الفريزر وطبعا لازم تاكليها بارده عشان الايس كريم بتبقى جامده اوي ومش لطيفه الكيك لقيته احلى كتير

وعموما جربي الاثنين وهاتيلى حته هههههههههه

ELMASRYA - SHAMLOOLA HANEM يقول...

حلوة التورتة دي خالص يا ندى

أنا هجرب طريقة الآيس كريم الأول ولما ابقى معلمه كبيره هدخل على التورته

أكيد ولادي هيدعولك لأنهم مدمنين آيس كريم

ومطعم نور الشام اللي انا مشرفه على مدونته بياخدوا من عنده آيس كريم لأنه بيعمله روعه بالفاكهه الخالصه وبدون أي إضافات وكنت مكسوفه أسأله ازاي أحسن يفتكر إني هنافسه ههههههه

يسلموا إيديكي يا ندى وخالص تحياتي