الأحد، 19 أبريل، 2009

لحمه بتلوا بصوص البرتقال

احبائي المدونين

اولا قبل ما ندخل على الطبيخ حد فيكم يشوفلي حل انا مش عارفه افتح المدونه بتاعتي الرئيسيه على الاكسبلورر العادي مش عارفه مالها
اتصرفووووووووووا وحلولي المشكله دي

انا بافتحها مع فاير فوكس او اوبرا الله يصلح حالها عاشقة الرومانسيه الى قالتلى


ندخل على الطبيخ

البرتقال

طبعا الايام دي ومن شهر فات والبرتقال البلدي كتير اوي فى السوق
وانتم عارفين انى باحب استخدم الحاجه فى موسمها
ايمانا منى ان وجودها في الوقت ده فى المكان ده لها حكمته

المهم ندخل على الشغل
هانعمل حوالي نص كيلوا لحمه
انا هنا عامله لحمه بتلوا قطع
وعملتها برضه ريش بتلو
وطبعا تنفع لحمه عاديه بس هتاخد سوا اكتر على النار
نص كيلو لحمه
ونعمل التتبيله بقى
انا حبيت اعمل التتبليه بتاعتها كلها سايله
يعنى مثلا كوباية عصير برتقال
وعصير بصلتين
وممكن لمون بس البرتقال كفايه
وربع كوباية خل
وملح وفلفل وبهارات زي ما تحبوا
وممكن ربع معلقة توم مجفف او فص واحد توم وممكن ما نحطوش اصلا
البهارات كلها تكون مطحونه كويس كمان
كل ده نتبل به اللحمه لمده 3 ساعات على الاقل يعنى ممكن نعملها من بالليل
وبعد كده هانحطها على النار لحد لما تستوي ولو التتبليه بتاعتها نشفت قبل ما تستوي نبقى نزودها مايه ونسيبها كمان شويه
لو كانت بتلوا هاتستوي على طول مش هاتستحمل عشان متبله
المهم بعد ما تستوي وقبل ما تنشف اوي ناخد من الصوص بتاعها حوالي كوبايه
ونسيبها تكمل وتنشف وتتحمر زي كده
بعد كده نشيلها من الحله او الطاسه او وات ايفر
حلوه وات ايفر دي صح ؟
وبعدين نرجع للصوص الى شلناه ونرجعه تاني على النار ونجيب معلقة دقيق كبيره
وندوبها الاول فى ربع كوباية مايه وبعدين ننزلها على الصوص الى فى الطاسه من خلال مصفى سلك عشان ما ينزلش كلاكيع دقيق ونقلب فى نفس الوقت بسرعه
هاتبقى شكلها كده
ونسيبه بقى يغلي زي الصوره دي
يادوب 3 دقايق ويبقى تمام
جايز نحس انه تقيل ومحتاج يكون اخف
ممكن نزوده عصير برتقال او شوربه او حتى شوية مايه
وبعد كده بقى يا اما نرجع اللحمه تاني تاخد غلوه دقيقتين كده مع الصوص
ياما نقدمها زي الصوره دي
يعنى نحطها فى الطبق الى هانقدمه زي ما هى ناشفه ومحمره بس تكون سخنه طبعا
ونحط معاها الصلصه فى طب تاني او فى قشرة البرتقال زي ده كده
وممكن نحط معلقتين صوص بس على اللحمه زي كده
وعلى فكره الصوره دي ريش بتلو مش قطع
يعنى تمشي كده وكده برضه
وكمان
بالنوسبه للصوص
المفروض ان الصوص الى من النوع ده بيتحط عليه كريمه لباني فى الاخر معلقتين كده
او الدقيق ده ندوبه فى حليب
الا انى مش باحب احط البان مع اللحمه لان اللبن فى كالسيوم
والكالسيوم ده بيمنع امتصاص الحديد الى فى اللحمه
على عكس بقى البرتقال الى فيه فيتامين سي والى بيساعد الجسم على امتصاص المعادن من الطعام وخصوصا الحديد
وعليه الواحد من المفيد اوي يشرب كوباية عصير برتقال او لمون مع الاكل او بعد الاكل مباشرة
واللحمه بصوص البرتقال تنفع مع رز وتنفع مع مكرونه
العيال عندي حبوها اوي مع المكرونه
واحب اقولكم ان رضا يومها قالي انا هابقى ادخل اقولهم ان الريحه كانت جناااااان
وقالي الصوص ده اسمه ايه
قلتله ده اختراع وهاسجله باسمي فى الشهر العقاري المطبخي
قالي طيب سميه صوص الرضا
هههههههههههههههههههههههههههه
ربنا يرضى عليكم يارب
وانتى يا فاتيما وانا وامثالنا الى بيعملوا دايت كفايه علينا نص رغيف سن مع قطعتين لحمه وزي بعضه معلقتين صوص وطبعا طبق سلطه خضرا
على فكره عملت نفس الطريقه تقريبا مع اختلافات بسيطه مع الفراخ وان شاء الله نبقى نعملها تاني مع بعض
كانت تحففففففففه
والف هنا يارب
والى يجرب يقولي

هناك 17 تعليقًا:

أنـــا حـــــــــرة يقول...

صبرنى .. أنا أول مرة أدخل و جايالك باعتراف يا أختى ، أنا فرحى كمان شهرين و شوية ان شاء الله و مابدخلش المطبخ بس تفرغت و سيبت شغلى و قلت أقعد أتعلملى اكلتين ، كنت بدخل قبل كده بس ف حالات استثنائية زى إن أمى تبقى مسافرة غير كده نو .. أنا بقى كنت بقول الطبيخ ده حاجه سهلة مش محتاجه غير ان الواحد يبقى ليه نفس يطبخ مش الطبيخ نَفَس :) !! و نجرب كام مرة فتتظبط و يمكن ربك يسترنا دنيا و آخرة و تتظبط من أول مرة بس الحقيقة لما دخلت عندك المدونة و جيت أقرا حسيت إن الموضوع كبير

فطمنينى الله يرضى عنك و قوليلى لو عايزة أبدأ أتعلم إيه السهل أبدأ بيه عشان أفرح بشبابى ؟

أنا ناوية أعمل كشكول اكتب فيه اللى اتعلمه عشان أنا مش بحفظ و أكيد مش هحفظ من أول مرة و أمى بتقترح أشترى كتاب للطبخ .. يللا بقى كملى جميلك و أفيدينا أفادكم الله

Dr . Rosa يقول...

لا بجد روعه روعه روعه
كفايه اصلا شكلها
هعملها ان شاء الله

تسلم اكلاتك والله

صبرني يارب يقول...

انا حره

لا لا يا جميل ما تخافيش خالص

ده الطبيخ ده اسهل حاجه فى الدنيا

وانا فعلا ناويه اعمل شوية اكلات كده خفيفه وسريعه
على شويه نصايح للناس الى زيك الى بقوا كتير للاسف

الامهات اصلهم حالهم بقى فى النازل وما عادوش بيعملوا بناتهم حاجه

الموضوع سهل خالص وان شاء الله نتعلم سوا هاسرع فى البوستات الى قلتلك عليها عشان انتى قربتي

وكتب الطبخ دي نظام فاشل

ولو جه على بالك حاجه اسألينى فيها يا جميل وانا اعملهالك على طول

صبرني يارب يقول...

روزا

لما تعمليها قوليلي يا جميل مستنيه النتيجه اوي

بنت الغربة يقول...

حبيبتى ياصبرنى
انا عجبتنى طريقة اللحمه قوى دى ..وانا النهارده هاجربها على الفراخ..وهانقعها ساعتين بس..
بيتهيئلى كفايه..
عموما هاجرب وااقولك رأى ياقمر..وتسلم ايديك ومخك العبقري ياجميل
تحياتى ياعسل

أنـــا حـــــــــرة يقول...

وانا فعلا ناويه اعمل شوية اكلات كده خفيفه وسريعه
على شويه نصايح للناس الى زيك الى بقوا كتير للاسف

الامهات اصلهم حالهم بقى فى النازل وما عادوش بيعلموا بناتهم حاجه

________________________

إيه ده انتى بتهزقينى أنا و أمى و للا إيه !!

لا أنا أمى ست الستات ، بس بما إنى بنت واحدة فمتدلعة و على طول كانت نشاطاتى بره بيتنا و كمان المشكلة كانت ف دراستى العملية و بعدين الشغل فيدوبك باجى البيت أنام .. الست حاولت و جوزها ( أبويا يعنى :) ) حاول بس أنا شخصيتى قوية شوية :)


اعتذريلى أنا و أمى لو سمحتى عشان ندوق أكلك بنفس :)

صبرني يارب يقول...

بنت الغربه

يا جميل تمام اوي جربي وقوليلى

الفراخ بقى ممكن تحطي على الصوص كريمه لباني او تدوبي الدقيق فى حليب اصلا

وكمان تبقى تدخلي الفراخ لواحدها بعد ما تستوي الفرن او تحت الشوايه شويه عشان ما تبقاش طريه

ولو حبيتى تلوني الصوص بكركم او صلصه عشان الفراخ تطلع ملونه

وقوليييييييلي

صبرني يارب يقول...

أنا حره

حجة البليد مسح التخته يا اختي

قال الدراسه والشغل قال

طيب خليهم ينفعوكي بقى ههههههههههههههههههههه

وبعدين انا ما غلطش فى ماما يا جميل انا اقدر

بس برضه هى غلطانه كان لازم تتك عليكى فى الشغل شويه عشان تطلعي ست بيت شاطره
وبابا برضه كان لازم يشخط فيكى ينططك ويقولك قومي يا بت يا حره اعليلى العشا كده يعنى
ههههههههههههههههههههههه

لا لا اعتذراتي لماما طبعا

انتى لا ده انا هابقى ابلتك فى المطبخ وهاعورك لو عملتي حاجه غلط
هههههههههههههههههههههههه

mony يقول...

تسلم ايدك يا صبصب


كتير كنت بكون مستغربة صوص البرتقال في الطبخ
بس جربتوا في تتبيلة الشاورمة وكان تححححفة
لسة ماجربتوش صوص
بس علي ايدك نجربه يا جميل
قبل ما البرتقال يختفي علشان خلاص الصيف دخل

انا عندي عرق فلتوا ممكن اقطعه شرايح و اعملها ان شاء الله

تسلميلي يا جميل

صبرني يارب يقول...

موني

ماشي يا جميل ابقى قوليلى رايك برضه


على فكره انا اليومين دول باتبل بالبرتقال على طول كل حاجه

أنـــا حـــــــــرة يقول...

ماشى فى انتظار الدروس يا ميس :)

نكهة مغربية يقول...

مممممممممممممممممم
ماشاء الله عليك
شكلها لديد جدا
تسلمي على الطريقة الحلوة

reem يقول...

كدا يعنى يا صبرنى تجوعينى كدا وانا لسا مش اتغديت

تحفة الللحمة تسلم ايديكى انا بعشق اى حاجة فيها صوص

وخلاص كدا عرفت غدا بكرا ريحتينى من التفكير

دايما انتى مفيدة كدا وكل نصايحك بتنفع وانتى فهمانى طبعا

صبرني يارب يقول...

انا حره
البوست الى جاي حلو ان شاء الله

الى بعده بقى نبدا فى الطبيخ العادي مش اصناف غريبه وكده عشان الغلابه الى زيك
الى العلام بوظهم هههههههههههههههههههه

صبرني يارب يقول...

ريم

شوفتي بقى

عدي الجمااااااااايل

هههههههههههههههههههههههههههه

الف هنا يا قمر

ابقى قوليلى النتيجه

صبرني يارب يقول...

المطبخ المغربي

ايه ده النور ده يا ولاد

طيب مش تقولولي يا ناس ان فى مطبخ مغربي على البلوج

تسلمى وتعيشي يارب ولو جربتي قوليلى يا جميل

الورده يقول...

بصراحه تسللللللللللللللللم ايدك على الى بتعمليه انا بقول انتى لازم تعملى كتاب
كنت عايزة اعرف بقى صوص الاناناس والباربيكيو بيتعمل ازاى
وصوص اللحمه المشويه ستيك
مرسييييييييييييييييه