الأربعاء، 8 أبريل، 2009

الـبـيـتـــزا

واخيراااااااا البيتزا
شوفوا يا حلوين احنا هانبدأ شغل على طول مش عايزين رغي بقى
هانحتاج ايه
عشان نعمل بيتزا كبيره يعنى كبر مقاس فى الصواني العاديه مش الصواني بتاعتي انا
هانحتاج تقريبا مقدار عجينه واحد من عجينة المخبوزات الى عملناها مع بعض
(وفاتيما فكرتني ان ممكن فى عجينة البيتزا نزود ملح وتوابل وانا عن نفسي باحب احط زعتر وجنزبيل )
ولو حد بيحب البيتزا رقيقه اوي ممكن يبقى يشيل جزء من العجينه صغير برضه ما نخليهاش رقيقه اوي عشان ما تنشفش
يبقى كده بقى عايزين مقدار عجينة مخبوزات
ومقدار من صوص صبرني الي انا اخترعته وعملناه من شويه
وهانحتاج حوالي 400 جرام جبنه موتزريلا
وممكن كمان نعمل خليط من الجبنه (جبنه رومي وجبنه موتزريلا وجبنه فلامنك او كمان بارميزان يعنى اي جبنه بتسيح )
المهم البيتزا الواحده بتاخد من 300 الى 400 جرام
و 3 معالق كبار زيتون اسمر حلقات ويمشي اخضر ما يقولش لا وممكن الاثنين
و فلفل اخضر الوان ويمشي اخضر لواحده برضه مش هاعيط يعنى مقطع مكعبات او ترنشات مدوره احلى
كمان واحد حبة طماطم كبيره مقطعه ترنشات مدوره او نص دايره
ويا حبذا لو كمان 3 او 4 معالق من المشروم الى شوحناه فى معلقة زيت كده على جنب
ممكن نعمل البيتزا بسسسسسسس بالحاجات الى فاتت دي وتبقى بيتزا خضروات
وممكن بقى نزود اي نوع لحوم نحبه
هاديكم شوية امثله فى الاخر مع الصور
طيب هانبدا شغل
أول حاجه العجينه اهو جاهزه
طبعا احنا سبناها ترتاح لمده عشر دقايق وبعدين لو كنا عاملين اكتر من واحده بنقسم العجين على اد العدد بتاعنا
وبعدين نحطه على صنيه مفروشه دقيقه ونغطيه بقماشه نضيفه ونسيبه من ساعه الى ساعتين حسب الجو طبعا
عشان تخمر ولما تخمر نبدا بقى نفردها
شوفوا احنا ممكن نفرد العجينه دي كده على الرخامه او على اي ترابيزه عندك بالنشابه ونحاول نحافظ على انها تفضل مدوره وطبعا هانفردها كده بالنشابه فلازم كمان يكون تحتها دقيق وعلى وشها دقيق زي الصوره دي عشان ما تلزقش فى الرخامه او فى النشابه
وكل ما يضيع الدقيقه وتبدأ تلزق نرش رشه خفيفه ونوزعها بايدنا ونرجع نفرد تاني وكمان نحط تحتها لحد ما ناخد المقاس الى احنا عايزنه ويبقى كده تمام ونقلها فى الصنيه بقى
والطريقه التانيه لفردها اننها نحط معلقة زيت فى الصنيه الى هانعمل فيها البيتزا وبعدين بادينا بقى نفرد العجينه نبططها يعنى لحد ما تاخد شكل الصنيه
انا عن نفسي بافضل الطريقه التانيه خصوصا لو عامله كميه
طبعا بعد ما نفردها نسيبها برضه مفروده فى الصنيه قبل ما نبدأ شغل عليها حوالي نص ساعه كده عشان ترجع ترتفع تاني لاننا لما فردناها طلعنا منها الهو ا الى نتج عن التخمير ا
وبعد ما نفرد العجينه ونحطها فى الصنيه زي الصوره دي كده
زي ما شايفين كده بدأن بقى نحط الطبقات
اول حاجه بنحطها هى الصوص صوص صبرني يارب
وبالنسبه للحريم الشلت ممكن نحط كاتشب بس او كاتشب على مايونيز وبس
وبعد كده نرش الجبنه
ممكن نحط ثلثين الجبنه ونسيب الثلث الاخير نحطه فى الاخر خالص فوق
وبعد الجبنه الاولى نحط بقى نوع اللحوم لو كنا هانحط لحوم
ممكن لحمه معصجه عاديه زي دي
وممكن كمان نعملها بحلقات السوسيس زي دي
وممكن نعملها بالخليط من كل حاجه من دول زي كده مثلا
وممكن سلامي وممكن جمبري وممكن سمك او تونه وممكن شاورمه وممكن اييييي حاجه
كمان انا دايما لما يكون عندي عزومه وانتم عارفين ما نتواصش فى العزايم فى كميات الاكل طبعا لازم بيتبقى لحوم
والحوم البايته دي بتبقى بايشه كده وما لهاش لازمه
فانا باقطعها كلها وشويه بصل على توابل على حبشتكنات كده معاها واعمل بيها بيتزا بتبقى زي الفل وياسلام لو حته فحمه فى وسطها بعد ما تخلص تديكى نكهة الباربكيو
المهم يعنى اي نوع لحوم
وزي ما شايفين فى الصوره بقى
فوق اللحوم باحط بقى الفلفل والطماطم والمشروم والزتون و ثلث الجبنه الى باقي لو ما كناش حطيناه
الكل كليله يعنى
فضفضه كمان فكرتني بالزعتر انا باحب احط على الوش شويه زعتر بنفركه على الوش عشان يطلع ريحته
وكمان لو كنت عاملاها جبنه بسه بيبقى النعناع مالوش حل
وبندخلها الفرن بتاخد من ثلث ساعه الى نصف ساعه فى فرن حامي يعنى 200 درجه على الاقل
وطبعا اول ما تستوي العجينه بنطلعها ونقطعها مثلث زي الصوره الى فوق او مربع زي دي مثلا
وبالهنا والشفا والى يجرب يقولي خيلكم جدعان بقى

هناك 11 تعليقًا:

فاتيما يقول...

صبصوبة
ازيك يا ست الستات
بصى الطريقة بتاعتك فيها حاجات مكنتش بعملها خاااااااالص
و اول مرة أسمع حكاية ان العجينة تتعمل بالزبادى أو اللبن ...
أنا كنت بحط ميه !!!
و بعدين فرك الدقيق بالزيت دى كمان مكنتش بعملها كنت بقلب كله على بعضو و دمتم ..
و العجينة كنت أسيبها بس تنفش أول مرة و بعدين لما أفردها فى الصينية بحط الحاجة فوقيها علطول ...
و البيضة شرحو ...مكنتش بحطها
عشان كدا العجينة بتاعتى كانت بتبقى ناشفة شوية
و منيلة بنيلة حبتين ..
الله !!!!
دنا مكنتش بعمل بيتزا أساسا بقى ...
بس أقولك على حاجة برضو يمكن تنفع كنت بحط فى القيق ملح و فلفل و كمون و زعتر ..فتدي العجينة نكهة حلوة
و ريحة كويسة ...
كمان الصلصة بتاعتك دى جديدة عليا خالص ...
بس حكاية المايونيز دى متخليش البيتزا تقيلة يا صبصب ؟!!!
بصى أن شاء الله ناوية أعملها
أصلى بعمل ريجيم و المفروض بيبقى فيه يوم بوظان و اكل على مزاجى ...
هعملها يوميها بقى و أشوف
و لو إنى عارفة من دلوقتى انها هتكون مميزة لأنى مجربة وصفاتك يا حبيبة قلبى
الف مبروك على الفرح و عقبال فرح البنات يا رب
آه ... قبل ما انسى
تسلم إيديك يا ست الستات
و منتحرمشى

حاجات جوايا يقول...

هههههههههههه
تسلم ايدك يا قمر
بس انتى منتظرة انى اعملها مثلا
هههههههههههه
دى ايه الشغلانة دى
ده انا لو بعمل محشى كرنب مع بط مش هياخد المجهود ده كله
يااااااااااربى
هههههههههههههه
ربنا يعينك يا بنتى يارب
دى حتى الطريقة عملتيلها 3 بوستات
هههههههههههه


انا يا ستى بقيت بجيب البيتزا الجاهزة من السوبر ماركت ويدوب تتحشى وتدخل الفرن
وببقى شايلة همها اصلا
لسه هعمل صوص الطماطم وصوص الجبنة واقطع الزيتون وحلقات الطماطم والفلفل يووووووو


تقومى تقوليلى مايونيز وكاتشب ومش عارفة ايه
هههههههههههههههههههههه

لالالالالالالالا انا هعمل مدونة منافسة للستات الشلت اللى زيى ههههههههههه

والله وطلعت شلت ومكنتش واخده بالى
ههههههههههههههههههههههههههههههه



تسلم ايدك يا قمر
بالهنا والشفا
وابقى هاتى حتة بقى المرة الجاية
هههههههههههههههه

حاجات جوايا يقول...

بس على فكرة طريقة عجينة البيتزا بتاعتك هى طريقتى
مع ملاحظة انى بستخدم خميرة فورية
بس المشكلة انها مكنتش بتضبط معايا
مرة تبقى رفيعة ورقيقة اوى فى الصينية
ومرة تبقى سميكة ولما تقطميها كده تلاقى ابيض جواها
وواحدة قريبتى قالتلى العيب من الخميرة
مع انها بتفور وبتنفش فى الكوباية

بس قالتلى العادية بتبقى احسن

ده اللى خلانى زهقت م التعب اللى بيروح فى الفاضى وجبت الجاهز
بس كانت بتبقى اطعم اكيد


لما اروق وافضى كده شوية هعملها تانى بطريقتك ان شاء الله

بس قولى يارب
ههههههههه

سلام يا قمر

mony يقول...

تسلم ايدك يا صبصب

انا كمان بعمل العجين باللبن بيطري العجين كده و مايخليهوش ينشف حتي لو رفيعة


اما باقي طريقتك جديدة علي تماما
و بالذات طريقة الصلصة

نجربها ان شاء الله و نوافيكي بالاخبار

تسلم ايدك يا جميل

خمسة فضفضة يقول...

السلام عليكم ورحمة الله وبركاته

ماشاء الله تسلم الايادي يا صبصب

الصوص ده فعلا جديد واول مره اسمع بيه لازم بقي تسجليه باسمك في الشهر العقاري :))

بس انا باحب اعمل صوص البيتزا بالطماطم والثوم وزيت الزيتون والزعتر لانه بيخلي طعمها شبه اللي جاهزه ،

وكمان برش علي وشها شوية زعتر افركهم بين ايدي كده وانا برشهم عشان ريحتهم تطلع وتبقي مفحفه في الفرن

وعلي راي محمد صبحي البيتزا دي عجينه وعليها شوية بواقي اكل
عشان كده اما احب اكنس الثلاجه اعمل بيتزا وعلي وشها اي بواقي عندي ، حتي السمك وحياتك

سلام يا قمر

بنت مصر يقول...

تسلم الأيااااادي

متهيألي مفيش حد مش بيحب البيتزا :)

في انتظار الطبخة الجاية

صبرني يارب يقول...

فاتيما

ايوه يا جميل انا فعلا باحط ملح وجنزبيل

بس انا عامله العجينه زي ما قلتلك كده هانستخدمها فى حاجات كتير

ونسيت بقى مع البيتزا اقول

نزودها يا قمر ان شاء الله

وبالنسبه للمايونيز

يعنى انتى سبتى الجبنه واللحمه والمولد الى فى البيتزا كله وجت بقى على شوية الزيت الى في المايونيز

يا ستى بيبقى يوم اوبن بقى عيشيييييي
هههههههههههههه

ممكن ما تحطيش المايونيز طبعا وممكن تقللي الكميه بتاعته بس هو لما بيدخل الفرن وتكوني داهنه به الطروف بتخليها حمرا وجميله اوي

تسلمي يا قمر يا رافعه من معنوياتي

ولما تجربي قوليلي

صبرني يارب يقول...

موني

تسلمى يا قمر

هاستنى بجد تقوليلى الاخبار

صبرني يارب يقول...

حاجات جوايا

الخميره الفوريه دي فاشله جدا بصراحه

يعنى افضل حاجه لو هاتجبيها تجيبيها باكتس صغيره وكمان تحفظيها فى التلاجه وبررررررضه انتى وحظك

انا عن نفسي باجيب الخميره البلدي الطازه

وبتقعد اسبوع او اثنين حتى في التلاجه مش فى الفريزر لان لما حطيتها فى الفريزر برضه ماتت

انا كنت الاول باروح اجيبها من مكان بعيد عني شويه بعدين بقى بقيت اتغالس على المخبز الى تحتي واخد منهم ادتني نتايج رائعه فى العجين فعلا


ويا قمر والله العجينه بتاعتي احسن من الى بتجبيها دي الجاهزه بمراحل
دي البيتزا الجاهزه دي اي كلام ولا لها طعم ومره طازه وعشره لا

وبعدين والله الطريقه مش صعبه ولا حاجه
بس هى عملتها على 3 بوستات عشان الصوص والعجينه هاستخدمهم بعد كده مش عايزه اقولهم بقى فى كل بوست

وبعدين نحن معا للقضاء على الشلتيه المستفحله فى هذا المجتمع النامي
هههههههههههههههههههه

ايه رايك فى المصطلح ده
الشلتيه المستفحله
ههههههههههههههههههههه

نورتي يا جميل ولازم تجربي ان شاء الله وتقوليلى

صبرني يارب يقول...

بنت مصر

تسلمي يارب

لا في ناس مش بتحبها

حماتي
هههههههههههههههههه

ان شاء الله يا جميل عملالكم حاجه حلوه المره الجايه

صبرني يارب يقول...

خمسه فضفضه

اه صوص التوم والطماطم ده فعلا بيبقى حلو بس عندي رضا ما بيحبش طعم التوم فى الاكل فاخترعت هذا الصوص العجيب
هههههههههههههههههه

وبالنسبه للزعتر ايوه فعلا انا بابقى افرك عليها زعتر بس نسيت اكتبها دي

وعموما اي توابل تحبيها ممكن تحطيها عادي

وايوه فعلا انا كتير باعمل البيتزا بالبواقي دي خصوصا بعد العزايم

او يكون عندي ضيوف لمدة ايام بتتراكم البواقي بقى

نورتي يا فضفضه
ابقى قوليلي عملتى ايه فى الصوص