الثلاثاء، 28 أبريل، 2009

طاجن الباميا باللحمه الضاني


السلام عليكم يا مطبخيينا الاعزاء


بعون الله تعالى وفضله هانفتتح النهارده سلسلة مطبخ المبتدئين الى هانطبخ فيها طبخات عاديه وسهله ان شاء الله ونراعي فيها ان الناس الى بتقرا يادوب بيعرفوا يعملوا شاي


سواء بنات صغنين او كبار بس شلت او رجاله يا عينى عذاب وغلابه وقاعدين من غير جواز زي الشبابيك الى من غير ازاز


وعموما انا كل البوستات بعد كده هراعي فيها الناس الغلابه دول وافصل شويه فى الكلام


هانبدأ النهارده نعمل اكله عتيقه من المطبخ المصري العظيم الشأن الى ماكلنا ومبوظلنا الدايت


هانعمل طاجن باميا باللحمه الضاني


سامعه حد بيقول يعععع ضاني مش باحبها


احب اقولك ياعمنا ما تبقاش تاكل انت اللحمه الا ان انا اكتشفت ان اللحمه الضاني دي موجوده عشان نعمل بها الباميا

والباميا برضه موجوده عشان تنطبخ مع اللحمه الضاني فقد خلقوا لبعضهم الاثنين الحلوين دول .


بجد الباميا باللحمه الضاني شكل تاني يا جودعان


ندخل على المطبخ وكفايه رغي



هانعمل نص كيلو باميا وده هايكون كافي لحوالي 3 اشخاص

وهانحتاج معاه واحد بصله متوسطه

اثنين فص توم

واحد قرن فلفل اخضر (يفضل يكون حامي او قرن شطيطه يعنى ) مش عايزين حامي عادي تمشي

نص كيلو طماطم

او يعنى اربعه أو خمس حبات


وطبعا لحمه ضاني برضه نقول نص كيلو


ابو زيد بلاش انت لحمه روح للجزار هات منه حته ليه كفايه عليك

ههههههههههههههه


الطريقه

هانفرم البصل والتوم

ونجهز الحله الى هانشتغل فيها تكون ناشفه

ولما تسخن نحط فيها نص معلقة سمنه

او ممكن لو عندنا ليَه بتاعة اللحمه الضاني نقطعها حتت صغيره ونحطها على طول فى الحله السخنه وهى بتسيح لو قلبناها دقيقتين


ونحط البصل اولا ونقلبه لمدة 3 دقايق يادوب يدبل وبعدين نضيف التوم المفروم برضه ونقلب دقيقتين

وبعدين الفلفل ونقلب كمان 3 دقايق لحد ما البصل يصفر


ونكون عملنا الطماطم فى الخلاط (هانقطعها اربعه ونحط معاها ربع كباية مايه فى الخلاط ونضربها )


ونطشها بقى مع البصله ونشهق واحنا بنطشها

هههههههههههههههههه


ونغطي عليها ونسيبها تغلي ولما تغلي نوطي عليها النار ونحط لها الملح زي ما نحب ونسيبها بتاع نص ساعه


الباميا بقى فى النص ساعه دي نجهزها


هانحط مايه تغلي على النار


وعلى ما تغلي نكون قمعنا الباميه

الى هو نشيل الحته فوق فى الباميه ونشك واحده الباميه شكه واحده بالسكينه من الجنب عشان تستوي من جوه


وطبعا ما نشيلش نص قرن الباميا واحنا بنشيل راسه من فوق


ونغسلها وبعدين نسقطها فى المايه الى غليت خلاص

ونسيبها على النار بالكتير ربع ساعه اول ما تبدأ تلين كده فى ايدينا

وبعدين نقلبها فى مصفاه فى الحوض ونصفيها من المايه اللزجه دي وانا باحب كمان اغسلها باسيب عليها شويه مايه خفيف كده


وبعدين كده تكون الطماطم اتسبكت نقوم مزودينها شوربه اللحمه الضاني


ابو زيد انت حطيت ليَه خلاص حط مايه انت بلاش شوربه (زعلان انت من اللحمه )


وبعدين نسقط الباميا بقى فى التقليه نسيبها لحد ما تغلي وبعدين نصبها بقى فى الطاجن ونرص اللحمه على وش الطاجن وندخلها الفرن لمدة ثلث ساعه تقريبا لحد ما تتشرب الصلصه ووش الطاجن يحمر


ممكن نسيبها تغلي على البوتجاز فوق ربع ساعه بس نوطي عليها عشان ما تلزقش


وبعدين نصبها فى الطاجن ونحط على وشها اللحمه ونولع لها الشوايه بقى خمس دقايق بس عشان وشها يحمر


وبتطلع من الفرن تزغرد وتقول كولوووووووووني بقى


طبعا هاتقولولي فين الطاجن يا نصابه انتى عاملاها فى قالب بايركس

هاقولكم والله يا جودعان الطواجن بتاعتي كانت طالعه دليفري لبن رايب يومها فقلت القالب بقى ما يقولش لا



دي الطريقه التقليديه لطاجن الباميا باللحمه الضاني


نيجى بقى للغلابه بتوع الدايت مش هانحرمهم من حاجه بتيتا


اي خدمه


انا كنت على فكره مش باكل الباميا فى الدايت على اساس انها لازم نعملها تقليه وفيها سمنه وكده يعنى


انما مره من ذات المرارير رضا فقعنى بمبه زين الزين وقالي هاجيبلك سمك وانا جاي وبعدين كلمته الساعه 3 فين يا بوي السمك قال اخخخخخخخخخخخخ نسييييت


جريت على التلاجه عشان كان بابا هايتغدى معانا مش طالبه تهزيء


كان عندي لحمه ضاني مشوحاها وقلت اسيبها لبكره طبعا جري كملت طبيخها


وطلعت الباميا من الفريزر (انا باجيبها واقمعها واسلقها واعينها فى اكياس فى التلاجه تبقى جاهزه على الطبيخ على طول )


وكذلك الطماطم دايما عندي صلصة طماطم مركزه جاهزه فى الفريزر برضه على طبيخ على طول (هانعمل بوست ان شاء الله عن حفظ الخضار فى التلاجه )


قووووووووم طلعت كيس الباميا وكيس الطماطم


وفى الكبه حطيت البصله والتومه والفلفل واخبط فى الكبه


وحطيت كله على بعضه وعليه الشوربه بتاعة اللحمه الضاني


وخلاص نصف ساعه كان الاكل جاهز


كانت تحفففففففه واتمسحت وطبعا انا كلت منها لان مافيهاش سمنه ولا ليه واللحمه الضاني كانت يومها موزه مافيش فيها دهن


بث كده

الى عنده سؤال يجوووووووووووولي يا بوي


والى يجرب يقولي كالعاده





هناك 29 تعليقًا:

عاشقه الرومانسيه يقول...

الف هنا ياجميل
كل ما نفسى تروح لاكله هاطلب منك وصفتها
ولا اقولك
لما اتجوز اخدك معايا
ههههههههههههههههه

mony يقول...

ايه الحلاوة ديه يا صبصب

شامة ريحتها من هنا

طيب اللي يحب اللحمة و مايحبش البامية
يعمل اييييييييه

الحمد لله انا و جوزي نفش الشكل

بس بنغمس الصوص اللي حواليه فقط و البامية بتترمي في الأخر
يعني ناكل التسبيك و اللحمة فقط لا غير

عندكيش طريقة احب بيها البامية

صبرني يارب يقول...

عاشقه الرومانسيه


ماشي ياعم اجي بس على شرط

صبرني يارب يقول...

موني

على فكره انا كمان مش باحب الباميا اوي

لكن مش عارفه فى الاونه الاخير بقيت اكلها شويه خصوصا لما اكون انا الى عاملاها

انما قبل كده ما كنتش باكلها

طيب اعمليها كده بللحمه الضاني وشوفي ايه الموضوع

وابقى لما تسلقيها اغسليها زياده شويه عشان ما تبقاش مزحلقه اوي

نورتي يا قمر

kochia يقول...

حلوة جدا فكرة المبتدئين دي
تسلم الايادي

تحياتي

صبرني يارب يقول...

كوشيا

نورتي يا قمر

اي خدمه

ابو زيد يقول...

وحياة الغاليين عندك يارب تحجى يارب كل ما بكتب تعليق فى المكتب بيقول مطلوب حساب على جوجل ليه بقى معرفش انشاءلله معدمك تقولى لى اعمل ايه اولا غيرى فكرتك عن ايوزيد فى اللحمه من بعد ما المدام والعيال جم ربنا فتحها عليه ومتعرفيش ازاى رزقهم معاهم والحمد لله بخصوص اللحمه فتح جبنا جزار سورى بس ايه اشطه بيشفى لك اللحمه الضانى بفرق 3 ريال عن اللحمه العاديه وممكن تاخد العظم عشان كانت الحجه بتقول انه بيخلى للشوربه طعم وبعدين هنا فى اختراع اسمه الحورى بضم الحاء وكسر الراء ودى اغنام اتربت على اعشاب طبيعيه بس. يعنى مفهاش اى مواد كيماويه مش بتاكل طول حياتها غير عشب من الصحراء ودى غاليه اوى وجميله لابعد حد المشكله الجديده بقى هنا ايه الباميه من كام يوم قلنا هنعمل باميه ورحت اشترى باميه اصل المدام ناصحه بتكتب الطلبات فى ورقه وانا اجيبها وساعة ما نخرج منشتريش حاجه عشان تستمتع بالخروجه وكده كده فى اللى بيجيب الا لو فى حاجه ضروريه نرجع للباميه لقيت الباميه ب17 ريال والتفاح ب4 ريال جبت تفاح وروحت بتقولى فين الباميه يا راجل بقولها اطبخى تفاح هههههه بلد مجننونه فى الاسعار قال 17 ريال قال مش واكل باميه بس جبتها مجمده وامرى لله خفت من طقم الساكين الجديد لسه متجربش احسن تقول لازم اجربه ويجعله عامر

صبرني يارب يقول...

ابو زيد
ههههههههههههههههههههه

طب اعمله ايه بس

يا ولاد مش حد يقولي ان التعليقات مقفوله عندي على الاعضاء

معلش يا ابو زيد خلاص فتحناها ونقلت تعليقك هنا يا باشا

والباميا طيب نصدرلكم باميه ولا ايه

وابقى ياعم احدفلنا طيب حته حوري وافتكرنا يعنى

انا فعلا كنت باحب ا لضاني فى الخليج عن الضاني هنا

لما تعملوا الباميه قولي النتيجه يا فندم

نكهة مغربية يقول...

في ناس كتييييييير حتحب المودوع
ونا وحده منهم علاشان بحب الاكل المصري و دي أحسن حاجة ممكن اتعلمها بطريقة سهلة و ممتعة

خمسة فضفضة يقول...

السلام عليكم ورحمة الله وبركاته

ايه الجمال ده يا صبصب

اولا نا بيني وبين الباميه سوء تفاهم من زمان اوي اوي مع ان جوزي بيموت فيها وباللحمه الضاني برضو
فابضطر اني اعملهاله واكل منها وامري لله او يعني باعمل نفسي اني باكل منها عشان مايزعلش بس بقوم اكمل جبنه من غير ماياخد باله ههههههههههه

طريقة الطبيخ زيي بالظبط باعمل الطريقتين التانيه لما اكون مستعجله والاولانيه في الرواقه :)) بس مش باحط الفلفل لا حامي ولا بارد

وعشان تبقي ميه ميه باطبخها علي بيات ولعلمك الباميه كل ما قعدت في التلاجه كل ما بقت احسن
وكمان الماطم لازم نتوصي بيها شويه عشان الباميه بتحب الطماطم الكتير

تاني حاجه بعد ما تستوي لازما وحتما ولات بد اعملها تشط ثوم ( دا غي التوم اللي في الاول ) كام فص توم كده يجي نص راس ويتحمروا في معلقة سمنه بلدي ويطشوا علي الوش ( زي الملوخيه يعني بس من غير الكسبره الناشفه ) وبعدين تقلبيها و تغطيها شويه
بيديها طعم احلي
وباعمل نفس الطشه دي للسبانخ برضو

ولازم بردو يكون جميها باذنجان من الابيض الطويل مقلي ومحشي بخلطة التوم والتوابل ومتغرق ليمون
او باذنجان اسود طويل برضو بس مسلوق ومحشي بالثوم اللي بيبقي شبه المكدوس السوري

حاجه اخيره لما تكون الباميه لسه جايه من السوق مش باسلقها باقمعها واغسلها وعلي الحله علي طول واشوحهاشوية مع البصل والثوم وبعدين احط عليهم الطماطم
بس في العاده ببقي مجهزاها في الفريزر وطبعا لازم تتسلق قبل التجميد

وبالرغم من كل المحاولات دي لفتح النفس و لتحسين الطعم الا انه بيفضل بيني وبينها سوء تفاهم رهيب


ههههههههههه

سلام يا قمر

ঔღঔ نـــوارة ঔღঔ يقول...

طررريقة جديدة عليي جداااا

بس انا مش بحبها هيك لازم لازم اقلي الباميا مش اسلقها بيكون طعمها الذ بكتير

هنا الناس بتعملها بطريقتين في ناس بتقليها وبعدين بتطبخها عادي وبيكون طعها يجنن

وفي ناس بتحطها تستوي مع اللحمة وصلصة البندورة من غير قلي او حتى سلق يعي مش بحبها

ومش بنحط الثوم والفلفل بالاول بنعملها قدحة زي الملوخية

اول مرة اعرف الطريقة المصرية

تسلم ايدك ياقمر

صبرني يارب يقول...

نكهه مغربيه

يا قلبي عنيه ليكى والمحشي نازل قريب كمان
هههههههههههههه
شوفي بس بتحبي ايه وانا هنا اهو مطبخ مصري متكلم

صبرني يارب يقول...

فضفضه

مش عارفه انتى شكلك كده شبهي ومشمره وواقفه فى المطبخ ولا ايه


هههههههههههههههه

انا والله برضه ماليش تقل على الباميا
بس انا مش باكلها مجاملة لجوزي

عشان انا بعيد عنك ام مفتريه لا اقبل نهائيا كلمة ما باحبش

وطبعا انا اول من يطبق عليه القانون

الطبخه ياكل منها الكل بالذااااات الخضروات


بالنسبه للطشه لا مش باعملها لا ممكن ابدا ما اقدرش
ده ايه التوم والسمنه ده

هههههههههههههههه

وبعدين انا جوزي الود وده يخلينى الغي التوم من المطبخ
اقوله ياعم الحاج فى اكل ما ينفعش من غير توم
امبارح باقوله هاتلي توم وانت راجع قالي لا ما باحبوش
ياعم هو انا عملك سندوتش توم
ههههههههههههههه

بس انا لازما ولا بد اسلق الباميا واتخلص من الزحلقه الى فيها شويه اصل باتخنق منها

اما حكاية الباميا تبات اه طبعا ده لازما ولابد

نسيت اكتبها دي دايما تفكرينى كده يا فضفضه الله يصلح حالك

هازودها دلوقتي

بس ايه بتنجان اببيض واسود هما ميت طبخه
هى حاجه واحده بس ههههههههههههههههههه

نورتي يا جميل
ما نتحرمش منك ابدا

صبرني يارب يقول...

نوراه

يا راااااااجل

بتقلوها

لا دي الى جديده فعلا

طب بتقلوها وبعدين تحطوها فى صلصه برضه ولا ايه العوباره

طيب جربي كده يمكن تعجبك

تسلمى يا قمر ونورتي

نكهة مغربية يقول...

و الله فرحتيني لما قلت محشي دنا بشوفو في التلفزيون و بس

و الله حستني بفارغ الصبر نفسي أشوفو بطريقة مصرية
صح النت مليان بس مش زي مبشوفو في التلفزيون دي كل الناس بتحبو و نا لس مجربتوش

يالا ياحبيبتي شدي حيلك و تخليناش نستني كتييييييييير

صبرني يارب يقول...

نكهه مغربيه

لا لا لا

بتكلمي جد ؟؟

يا حبيتى اخطفي رجلك وتعاااااالي ده كلام ده


انا كنت مصوره لكم محشي كرنب ملفوف يعنى
بس مش اوانه

هاستنى بقى اصورلكم محشي ورق عنب


عارفه انا كنت فى الامارات

كنت مزيطه العماره بتاعتنا محشي الصراحه
ههههههههههههههههههه

وحقيقى كل العرب بيحبوه

بس ولا يهمك

هاعملهولك هنا وهحااااول جاهده اصور فيديو للف ولو انى مش بالاقي حد يصورني

نورتي يا جميل

زقطـوطـة يقول...

الله عليكي
بجد يسلموا الأيادي
عجبتني جدا فكرة المدونة دي والله
ربنا يباركلك يا رب : )))
هبقى أجرب اللحم الضاني أصل أنا مش من أنصاره الحقيقة
أنا نباتية باكل فراخ بس
: D : D

نكهة مغربية يقول...

شكرا يا قمر و الله فرحت خالص بردك لأنا حستنا الروق عنب معلش يا حبيتي استنينا الكتير مفضلش غير القليل

معلش خد راحتك
بالنسبة للفديو و لايهمك الصور كافية المهم الخلطة و تتبيلة

تسلمي كلك دووووووققق
يا بخت العمارة ألي في الامارة.....هههههه

صبرني يارب يقول...

زقطوطه

ايه ده انتم بتجيبوا فراخ مزارع اكيد بقى

مش نباتيه
هههههههههههههههههههههههه


تسلمى يارب وشكرا على الاطراء ونورتي

وهاستنى منك النتيجه

صبرني يارب يقول...

نكهه مغربيه

الخلطه مافيش اسهل من كده

قريب يا جميل ان شاء الله


والله انا الى فرحانه بجودك بجد

reem يقول...

تسلم ايديك ياقمر

بصي انا جوزى مش بيحب البامية بس انا مصممة اخليه يحبها

هعملها واقولك النتيجة زى ما بعمل كل مرة


لقمة القاضي كانت تحفة

عاوزين حلويات كمان بليييييز

Mom يقول...

nice recipe...easy to do too when you have almost everything half cooked...i get the egyptian frozen bamiah, edfina or any other brand..they are all good for cooking too, just in case you do not find the fresh bamiah in the stores.
thanks for sharing

صبرني يارب يقول...

رييييم

لازم مامته بتعملها وحشه
هههههههههههههههههههه

انتى تعمليها بهذه الطريقه وبعدين تقوليله لاااااااااااا هو برضه الباميا الى انت تعرفها زي باميتى

كده يعنى انفخي نفسك اوي وانتى بتتكلمي وهو هايصدق على طول ههههههههههههههههه

والف هنا لقمة القاضي والحلويات عييييينى يا جميل
ابقى بصي على القديم كده كان فى بسبوسه حلوه وسهله اوي

صبرني يارب يقول...

summer

u welcom dear

yes u right > its so easy when u have evry thing half cooked

Usually i have vegetables
half cooked

but i make it by myself
thanks dear

نكهة مغربية يقول...

اييييييييييييهههه هو المالح بتاعي عمل فيكي حاجة بس ديني اشارة دنا خيفا يكون حصلك تسمم من ورايا ههههههه

بس طمينيني عليك و لايهمك مش حزعل لو محبتهش..............

صبرني يارب يقول...

نكهه مغربيه

ههههههههههههههههههههههه

لا والله يا قمر ده كان جميل

وخدت منه عند حماتي
وسلايفي قعدوا يقلولي هاتي الطريقه وخلص فى عشر دقايق

تسلم اديكى

أنـــا حـــــــــرة يقول...

حلو اوى انا ناوية اطبخ كمان يومين كده ، طريقتك شجعتنى ، و ماله نبدأ بالبامية و يارب يبقى ف وش بلوجك القبول

دعواتك و لو ظبطت هاجى أقولك البشارة :)

صبرني يارب يقول...

انا حره

اليومين خلصوا وانتى ولا حس ولا خبر

تعالي يا بنتى قوليلى جرالك ايه الله يصلح حالك

طب طمنينى على الى كلوا الباميه
هههههههههههههههههه

ايمي يقول...

عاشت ايدك وتسلم عله الاسلوب الظريف لشرح عمل الباميا