الجمعة، 4 سبتمبر 2009

عجينة القطايف



السلام عليكم


معلش يا جماعه والله باتاخر عليكم انا عارفه


اجدع سلام لزمايل البت اختي الى مستنيين عجينة القطايف يا قوم


المهم ندخل على الشغل بسرعه بقى


هانعمل عجينة القطايف فى البيت بدل ما نشتريها من بره


سامعه واحده من الحريم الشلت اياهم بتقول وليه وجع القلب ده ماهو على اول كل شارع فى واحد بيعمل كنافه وقطايف


الحقيقه انا كنت باشتريها برضه بس القطايف دي لها مشاكل كتير


اولا الى انا باعملها ما شوفتش زيها فى اي مكان يا اما تجيلى معجنه او ناشفه ولا بايته او تطلع غريبه جدا وبعد ما اقليها تبقى زي الحطبه ما تنفعش تتاكل اصلا ده غير بقى النضافه فى البيت


ثانيا القطايف لازم تكون طازه يعنى لازم تجبيها وقت ما هاتعمليها بالظبط او على الاقل فى نفس اليوم


ثالثا انى باقدر اعملها اصناف بقى صغير وكبير وحركات كتير بقى


خلاص اي واحده من الحريم الشلت بقى تسمع وهى ساكته



العجينه سهله جدا جدا


هاتروحي وتحطي الاول 2 كوب ماء وكوب حليب (وممكن 3 كوبايات ماء بس عاااادي بتمشي ) وتحطي معاهم معلقة خميره فوريه او خميره عاديه وتضربيها فى الخلاط عشات تدوب وبعد كده تحطي 3 كوبايات دقيق وتضربي فى الخلاط


مافيش دقيقتين بتكون اتخلطت وبقت تمام التمام تتاكدي بس ان مافيش دقيق لازق على جدار الخلاط وكده وبعدين تحطيها فى دورق تاني وتبسبيها بقى تخمر لو كانت خميره عاديه ساعه على الاقل لو كان الجو حر


الخميره الفوريه بالكتير نص ساعه تكون بقت تمام التمام وعشان تعرفي انه خمرت وتنفع للشغل تكون فيها فقاقيع زي الصوره دي كده





كده خلصنا العجينه نروح بقى على البوتجاز ونحط صنيه اي صنيه انا فضلت التيفال عشان ما تلزقش وتدهنيها زيت بالفرشه حاجه خفيف اوي اوي

ولما تسخن وتبقى تمام تبدأي تصبي العجينه بالدورق زي كده



ركزوا كده وشوفوا قوام العجينه ازاي وبتصبيها وهي بتفرد وتديكى الحجم الى انتى عايزاه
ومش بتاخد الا دقيقه واحده على لنار وبتشليها اول بس ما تجمد
لاحظي كده الاثنين الى تحت خلاص جمدوا واستوو والاثنين الى فوق لسه عليهم ثواني

وتطلعها وطبعا تفرديها على صنيه كده عشان ما تلزقش فى بعضها وده شكلها من فوق والاحمر ده من تحت طبعا



وبتكون جاهزه على طول على الشغل يعنى ابدأي شغل فيها حتى وهى لسه دافيه بتكون سهله جدا فى التطبيق وهانعمل منها اصناف كتير اوي اوي اوي والكميه الى انا عملتها دي تعمل وليمة قطايف زي الى فى الصوره دي




عايزه حد يجرب ويتكسف ويقول انه جرب بلاش رخامه بقى


وبالنسبه للقطايف الى فى الصوره دي احنا كلناها عشان لو حد حب يحط عينه فيها يعرف انها خلاص اتاكلت من كام يوم

هههههههههههههههههههه


انشاء الله اول ما اقدر هانزلكم طريقة الاصناف الى فوق دي مع بعضها


وعملت امبارح قطايف بالشيكولاته ما لهااااااااااش حل برضه هاقولكم عليها


كل الشلت يقوموا من هنا يشتغلوا يلاااااااا

هناك 10 تعليقات:

عاشقه الرومانسيه يقول...

هو ايه ده؟
هو انا مش بحجز اول تعليق عندك غير فى المطبخ ولا ايه؟
عموما هارجع لك تانى ومعايا مرات اخويا اصلها غاويه مطبخ زيك
انا بقى هاقضيها دليفرى
(وش بيطلع لسانه)
(:

مي يقول...

امممممممم ايه الحلاوة دى يا بت يا صبرنى تسلم ايديكى
بجد طالعة احلى من بتاعة بره ماشاء الله عليكى
تسلم ايديكى
انا هجربها فى بابا طبعا حقل تجاربى ههههههههههههه
بقولك لما العيد يقرب يا اوختششششششششى حطيلى البسكويت والبيتى فور اصل لما بعملهم بيلعبوا اخواتى بيه بينج بونج
تحياتى يا قمر

أحــوال الهـوي يقول...

عملنا العجينه و بعدين نحشيها
ايه طعميه

انا عايز الصورة الرهيبه حتي لو اتكلت

تسلم ايديك و الله الطبق يشبع من صورتة
الف عافيه

تحياتي

صبرني يارب يقول...

عاشقة الرومانسيه

ما تغظنيش يا بت

تقدري تقوليلى ايه الفرق بينك وبين الكرسي الى انتى قاعده عليه

انا اقولك ان الكرسي لا بياكل ولا بيشرب

انما انتى كمان بتاكلي وبتشربي مكلفه يعنى
هههههههههههههههههه

نورتي يا بت

صبرني يارب يقول...

مي

ااااه يا باباها مسكين والله مسكين


يلا بسرع اعملي وقوليلى النهارده ان شاء الله هانزل بقى طرق للقطايف

وبالنسبه للبتي فور انا عملته على فكره قبل كده هاتلاقيه فى باب الحلويات

انا هابقى انزله وصلات قرب العيد

والبسكويت بقى قولي يارب اول لما اعمله هاقولك ان شاء الله

نورتي يا جميل

صبرني يارب يقول...

احوال الهوى

ان شاء الله النهارده تشوف نحشيها ايه

والطبق لحد عندك يا باشا ولا يهمك

نكهة مغربية يقول...

و الله يا عسل انا الصبح و الله كنت بفكر فيهم و كنت بقول بس معنديش مقادير العجين و قلت مع نفسي اني استعمل عجينة البغرير هي فطاير مغربية زي القطايف كده بس من غير قلي يعني فوق طيفال و خلاص نخدها مع الزبدة و العسل و الشاي

انشاء الله أجربها بس بعد متحطي الطريقة كلها علشان الحشوة يا ماما
مرسيييي

صبرني يارب يقول...

نكهه مغربيه

حالا يا جميل هانزل الطريقه

وليكى مني حشوات كتير ان شاء الله تعجبك

شكولاتة يقول...

ااااااااااااااااااااانا جيت ههههههههه

احم احم
انا طبقت المقادير والعجينه وحشيت القطايف قشطه التاج
لان الوقت قرب يأذن وانا لسه ماخلصت لاني بشتغل لوحدي
وكان الطعم
امممممممممممممممممممممممممم

يجنننننننن اخواتي عجبتهم اووووي وقولتهم حأعملها مره تاني بس تساعدوني


مرسي ليكي بجد مدونتك من المدونات اللي بطل عليها من فتره للتانيه :)

غير معرف يقول...

مشكزوووووووووورة .. جربتها قبل ما اقراها بصفحتك دى القطايف المحشوة القطايف المقلية حشب ما قرأت بنستبدل كوب دقيق بكوب سميد وبرده مش عجبانى فى شىء مختلف