الأحد، 12 أبريل 2009

الـــلـٍبــــــه


ازيكم يا اعزائي ا لمطبخيين
انا النهارده عاملاكم حاجه اكيد هاتضربوني عشان يمكن اغلبكم مش هايعرف يوفرها
بس انا الامانه تحتم عليا انى برضه اقولكم يمكن حد فيكم يستفيد
اولا انتم عارفين انا باحب اعمل الحاجه فىموسمها
معلش الموضوع ده كان لازم ينزل من شهر على الاقل
لكن يلا بقى احفظوه يمكن ينفعكم
انتم عارفين لبن السرسوب ؟؟
بتاع البنى ادمين
ايوه
الى هو بينزل للبيبى فى اول 3 ايام بعد الولاده
ده بيبقى فيه طبعا فوايد جمه
حلوه جمه دي
بجد حاجه طبعا سبحان الله فوق الوصف ولو قعدنا نتكلم عن لبن السرسوب ده محتاجين ساعتين
كمان الجاموس والبقر عندهم نفس القصه
لبن السرسوب
سبحان الله على راي واحده فلاحه
تقولي هو ده الى بيصلب العيال
ده العجل بيشربه وبعد ساعه يقوم يقف على حيله
هههههههههههههههههههههههههههه
المهم لبن السرسوب ده بقى اسمه الحركي الفلاحي لــــبه (بتشديد الام وكسرها )
ودي طبعا لازم تيجى من حد بيربي بقر او جاموس او حتى غنم بس انا ما جربتش الغنم
وطبعا لازم تكون الجاموسه والده
ماليش دعوه بقى تجبوها منين اتصرفوا
هههههههههههههههههههههههههههههههههههه
انا قلت لام محمد واول ما الجموسه بتاعتها ولدت جابتلي يا اخويا وانا مااااااالي
وعلى فكره موسم الولاده بتاعهم بيبقى فى اواخر الشتا
ايوه زي اغنية اليسا
ندخل على المطبخ بقى
الطريقه سهله جدا جدا جدا
اللبه الى بنجيبها من الجموسه بتبقى عامله زي اللبن الحليب بالظبط
بس تقيله ولونها اصفر ( زي اللبن المكثف كده فى شكلها بس )
دي ممكن تحفظيها في التلاجه اسبوع مثلا وتفضل سليمه
نعملها ازاااااااي بقى
تاخدي كوبايه من اللبه
ومعاها خمس كوبايات حليب عادي (مغلي طبعا وبارد )
والسكر بقى زي ما تحبي (أنا باحط حوالي 3 معالق كبيره انا باحب الحاجه سكرها قليل )
وتقلبي كله فى بعضه
وفى طاجن فخار مطلي او بيركس او حتى صنيه عاديه
وتحطيها فى الفرن وهو سخن
بسسسسسسسسسسس
هى بتغيب شويه يعنى ممكن تقعد نص ساعه او ساعه الا ربع على ما تحمر كده زي الصوره الى فوق دي
هاتلاقيها بقى ربطت ووشها بدأ يحمر كده بس خدي بالك بتحمر فجأه عشان كده طلعت حته وحته كده
المهم تطلعيها وتسبيها تبرد شويه بقى
وتقطعيها بقى بالظبط بتبقى عامله زي الكريم كراميل
بس احلى بكتيييييييير
حقد عشان احنا عندنا ام محمد وانتم لا مش عاااااااايزين

هناك 8 تعليقات:

صبرني يارب يقول...

ماهو التعليقات شغاله اهو يا ابو زيد ؟؟!!!

حاجات جوايا يقول...

سبحان الله
انا اول مرة اسمع عنها
وعن لبن السرسوب ده
كنت فاكراه لبن عادى يعنى مش سميك للدرجة دى

طبعا انا لا هعرف اعملها ولا هعرف ادوقها حتى
اجيب ام محمد منين انا
المفروض تنزلى الطريقة بام محمد هههههههههههه


تسلم ايدك يا جميل
بالهنا والشفا

mony يقول...

اها يا صبرني انا نفسي اعتر فيه ده و الله

ده دكتور جميل القدسي اللي بيجي علي اقرأبتاع الغذاء الميزان اتكلم كتييييير علي فوايده


بس للأسف ما اعرفش بيجي منين
يعني اقصد أجيبه منين هنا في القاهرة

صبرني يارب يقول...

حاجات جوايا

ماشي كلامك

ابعتلكم ام محمد لحد عندكم
ههههههههههههههههههههههه

والله لو تعرفي حد فى الارياف ممكن توصيه يجيبلك انشاله كوبايه واحده بس

ده مقوي لمناعه ومقوي عام اصلا
سبحان الله

صبرني يارب يقول...

موني

مش عارفه والله فى القاهره يا موني منين

ومش عارفه بتوع المزارع بيعملوا به ايه

وعموما برضه حاولي تتكعبلوا فى حد من الارياف

ياريت احنا كان عندنا والله حد فى الارياف كنت بجد وصيته على كميه وبعتهالك والله

بس انا اساسا اتكعبلت فى ام محمد دي بالصدفه كده

ولو لقيت فرصه هاقولك

فاتيما يقول...

لااااااا
دا الحقد شغال للصبح يا هانم
بتغيظينا بام محمد يعنى و لا إيه
طب و اللى نفسه يعمل الباتعة دى يعملها إزاى بقى ؟؟!!!!
بألف هنا و شفا عليكم
و طبعا دى متنفعشى باللبن العادى و نحط عليه نشا ... صح
سؤال عبيط و جه فى بالى
بس يا صبصب
أنا عاوزاكى تعمليلنا اكلات ريجيم و حاجات تمقت الواحدة مش تتخن كدا ...
ساعدونى فى الخسسان يا ناااااااس
و متقولليش متدخليش هنا
و قاومى و الكلام دا
مش قادرة أقااااااااوم يا صبصب
تسلم إيديى يا ست الستات

صبرني يارب يقول...

فاتيما يا حيااااااتي

على فكره انا بافتح المدونه وانتى جيتى فى بالي

وقلت ما قالتليش طمطم على المدونات المطبخيه التانيه ليه

المهم طبعا ما ينفعش موضوع النشا ده احنا كده هانعمل مهلبيه
هههههههههههههههههه

ولو البهوات بتوع المزارع يتنبهوا لحاجه زي كده كنا ممكن نلاقيها فى موسمها اكيد

لان على فكره هى ما تنفعش تدخل فى الحليب العادي بتخليه يربط
يعنى كده كده بعد الولاده لازم يقعدوا 3 ايام ما ياخدوش منها حليب

وبالنسبه لاكلات الدايت اووووووك هاهريكم بس ما تعيطوش بقى

انا هابدأ دايت من اول وجديد من النهارده ان شاء الله نازله للدكتوره اهو

هاعمل تبويب مخصوص للاكلات الى تنفع فى الدايت
عنيه يا قمرررررررر

فاتيما يقول...

متحرمشى منك يا صبصوبتى