الجمعة، 8 مايو 2009

بسبوسه بالقشطه




بسبوسه بسبوسه بت يا نوسه يا نوسه شايله البسبوووووسه




فاكرين يا ولاد البت الصينيه الى كانت بتغني الاغنيه دي بتاعة شاديه وبتقولها بلغه مكسره




كنت وانا صغيره باحب اتفرج عليها اوي


هههههههههههههههههههه




الصينين من يومهم ناوينلنا باين




مخنوقه او بنت الغرب يعنى قالتلى مره انها بتعمل البسبوسه بتعجنها بالقشطه بس وقالتلى على طريقه كده وقلت هابقى اجربها وقد كان يا حلوين




عملتها وصورتها وماليش بركه الا انتم


طلعت تحفه يا بنت الغربه والله


انا ما كنتش باعمل البسبوسه العاديه كتير اساسا عشان بتبقى مسكره اوي وعندي بيبحبوا البسبوسه الى انا عملتها قبل كده معاكم ولما كنت باعملها كنت باعملها بطريقه تانيه




المهم


ندخل على الشغل بقى


الاول خدوا المعلومه دي :


السميد هو نوع من الدقيق او بالاصح هو اعلى درجه من درجاته وهو بيكون جنين القمح ودي اعلى درجه من درجات الدقيق


لان حباية القمح بيطلع منها كذا درجه




وعشان كده السميد ده بيتخش كتير اوي


خدي بالك وانتى بتشتريه عشان بيخلطوه بدقيق عادي وبيخلطوه بعيش مطحون


اه والله


حتى الباكتس المقفوله جبتها مره لقيتها مغشوشه


شوفي حد كويس اشتري منه وبصي كويس فى شكل السميد وهاتعرفي انتى بعد كده الدقيق الكويس من الوحش


وخدي بالك احفظيه فى التلاجه لانه بيبوظ بسرعه جداااااااا




الشغل بقى بطلوا رغي




المقادير




2 كوب سميد( دقيق بسبوسه)


نصف كوب جوز الهند مبشور ناعم
ملعقه كبيره بكنج بودر


1 كوب قشطه (طبعا انا باستعمل الفلاحي ما انتم عارفين شعاري فى العوده للطبيعه )


1 كوب حليب


1 ملعقه كبيره سمن بلدي


2 كوب شربات حلويات (قطر سيرب شيره )




الطريقه:


يعنى اسهل حاجه ممكن تعمليها فى حياتك




اول حاجه نعملها هانحط الشربات على النار (كوبايه مايه وكوبايه ونص سكر ولمونه)


ولما يغلي نوطي عليه خالص ونسيبه حوالي ربع ساعه بالنسبه للبسبوسه




هانحط السميد فى طبق كبير وغويط وبعدين نخلط عليه جوز الهند ونقلبه


وبعد كده بقى نحط بقيت القشطه والسمنه ونص الحليب تقريبا وبعدين نقلب كويس




انا باحب العجاين تبقى طريه زياده




فانا باحط نص اللبن بس والباقي اضيفه بالتدريج حسب حاجة العجين بس هى غالبا تاخد الكوبايه كلها


ونقلب لحد ما تنخلط كويس




وبعدين نجيب صنيه متوسطه ونبطنها


( ندهنا سمنه خفيف ونرش عليها رشة دقيق ونوزع الدقيق بهز الصنيه شمال ويمين عشان المبتدئين الغلابه )




وبعدين نصب فيها عجينة البسبوسه وتبقى شكلها زي الصوره دي بالظبط




وطبعا الى عايز يحط بندق او لوز او اي مكسرات على الوش يحط




لكن انا نظرا لانى ولادي هبل وبيقعدوا ينقوا المكسرات يرموها




ونظرا لان كيلو البندق ب 65 جنيه فقلت طب وعلى ايه عيال فقريه كلوها ساده










وبعد كده ندخلها الفرن حرارته حوالي 170 درجه

وبتقعد حوالي 20 دقيقه او 30 حسب فرنك
وتطلع شكلها كده

هانكون احنا خلصنا الشربات طبعا ولسه سخن ايوه لازم يبقى سخن مع البسبوسه دي

شايفين الصوره دي فى الوان الشربات ودرجاته
بالنسبه للبسبوسه هانختار احنا اول لون من الشمال الى هو افتح حاجه


ولما تطلع البسبوسه من الفرن نصب عليها كوبايتين الشربات الى هما كمان سخنين


ونسيبها على سطح مستوي عشان الشربات يتوزع كويس

ولما تبرد نقطعها وهاتبقى زي الصوره الى فوق دي بالتمام

وناكلها ونتخن بالصلاة على النبي

بالنسبه لبتوع الرجيم مطرودين من هذا البوست ا لا لو كانوا فى الفري داي

ههههههههههههههههههههههههههه

الى يجرب يقولي يا حلوين




هناك 26 تعليقًا:

نكهة مغربية يقول...

و الله الشرح تحفة يا تحفة بس أنا عندي ليك طلب

أنا معنديش الكوب ممكن تنزلي المقادير بالغرام و ليك علية أصورها ليك بعد معملها و كمان القشدة هي ايييييييييييييههه طب ممكن أعودها بحاجة تانية

معلش استحمليني أصل أنا تبع الصينين
هههههههههه

بنت مصر يقول...

اولا انتي وحشتيني جداااا

وبعدين بأه تخيلي البسبوسة مش بحب بتاعة برة اللي بنشتريها علشان بتكون تقيله جدا لكن بحب اللي بتتعمل بالبيت

والطريقة اللي عملتيها بجد سهلة وان شاء الله حعملها

تسلم الايادي يا قمر

ELMASRYA - SHAMLOOLA HANEM يقول...

هههههههه اللي بيعملوا ريجيم مطرودين ؟

أكيد الكلام ده مش ليا خالص أنا تخينة ياختي

بسبوستك دسمة وشكلها لذيذ بس أنا أول مرة أعرف إن الشربات يتحط وهو سخن اللي أعرفه الشربات لازم يبقى بارد مع الصواني السخنه

المهم أجربها واتخن وادعيلك

أحبك في الله

صبرني يارب يقول...

بنت مصر

والله وانتى كمان يا جميل واحشاني

مستنيه النتيجه يا جميل

صبرني يارب يقول...

نكهه مغربيه

يا قمر كل اسألتك مجابه يا قمر


شوفي يا ستى


كوبيتين السميد يعنى حوالي 500 جرام

والقشطه
مش عارفه القشطه ؟؟

ما انتى كاتبه قشده اهو باللغه العربيه الفصحى

القشطه الى هى وش الحليب

ولو مش عايزه تحطي قشطه

ممكن تحطي 250 جرام سمنه بلدي
وكوباية ونص حليب او كوبايتين حسب ما تاخد

اه كوباية الحليب يعنى حوالي 250 جرام


ولما تعملي البسبوسه تجبيلى حته
هههههههههههههههه

استحملك على عنيه يا جميل

صبرني يارب يقول...

شملوله هانم

وانا يعنى الى رفيعه يا اختي
هههههههههههههههه

لا بصي انا كنت باعملها الاول كده بشربات بارد

كانت بتفرك وما تطلعش خرط

بس بنت الغربه الى قالتلى ومن يومها باعملها كده

جربي وقوليلي كده

ابوزيد يقول...

هى بتخن يا ام خالد اصل البنيه رفيعه اوى وبنتى برده رفيعه طالما كده نديهم بسبوسه يا بسبوسه
ويجعله عامر

صبرني يارب يقول...

ابو زيد

ما دام المدام رفعيه يبقى اكلها بسبوسه

بس شوف يا ابنى ما دام اتجوزت وخلفت ولسه رفيعه يبقى هاتفضل رفيعه فى ناس صنفها كده

حتى لو كلت بحرا من البسبوسه بالقشطه والكناقه بالسمنه البلدي
ههههههههههههههه

بس اكلها اكلها يمكن تجيب نتيجه اهو تعمل شوربه حتى

هههههههههههههههه

نورت

عاشقه الرومانسيه يقول...

لالالالالالالالالالالا
انا اشجب واعترض
وعايزه حته
بقولك ايه ياابلتى
لما تيجى اسكندريه
هاتيلى معاكى من كل الاصناف دى
عاااااااااااااااااا

جبتى الصور بتاعه الشربات دى منين؟

ابقى فاكرينى اقولك حاجه لما اكلمك على الميل
(;

اموووووووووووه

mony يقول...

فعلا جميييييييلة يا صبصب


انا بعملها كده بالضبط

بس بتستخدم الأكياس بتاعة البسبوسة اللي بتتباع

و بتطلع خفيفة اوي
لدرجة اني ممكن اكل نصف الصينية من غير ما اخد بالي

و لحسن حظي اني ان سفيفة و مابيبانش علي اكل انا و جوزي و ولادي
رشااااااااااقة
(وش مطلع لسانة)
:)

ابوزيد يقول...

هنعملهاالنهارده والرد بكره وعليكى بخير بس بجد نفسى يتخنوا شويه اصلهم عيصفور خالص ويجعله عامر

صبرني يارب يقول...

عاشقه الرومانسيه

كل الاصناف يا بت نقيلك حاجه واحده بس

ايه الافترا ده

ما صدق الى شبه مسمار عشره ومش بيبان عليكى يا اختي

عارفه الى هاتقوليه يا مايله
هههههههههههههههههههه

صبرني يارب يقول...

موني

الف هنا يا اختي

احقد عليكم بقى ؟؟؟

انا يا اختي امبارح عملت بسبوسه اكلت قطعه اربعه سم فى اربعه سم وحاسه بالذنب من ساعتها
ههههههههههههههههههههه

صبرني يارب يقول...

ابو زيد
طيب ما دام هتاكل من اكلي هاتتخن دونت وري

مستنيه النتيجه

خمسة فضفضة يقول...

السلام عليكم ورحمة الله وبركاته

ماشاء الله فتحتي نفسي علي عمايلها مع انها دايما تفشل معايا مع اني ببقي متبعه نفس الخطوات بالظبط يااما تلزق في الصينيه وناكلها بالمعلقه بس بيبقي طعمها رااااااائع والله
يا اما تطلع خرط بس مكتومه كده وعامله زي الكيكه :))

يمكن العيب في الفرن بقي هههههههههههههه

عموما انا غيرت البوتاجاز اما اجربها في الجديد واشوف النتيجه

اه صحيح في تكه كده ممكن تخليها احلي
انك بعد ما تعجنيها المفروض تسيبيها علي الاقل ساعه علي جمب قبل ما تحطيها في الفرن عشان حبيبات الدقيق تنفش وتتشرب من اللبن والقشطه

هذا والله اعلم ههههههههههه

سلام يا قمر

سبتلك رد في بوست الجبنه ابقي شوفيه

خمسة فضفضة يقول...

اه صحيح يا صبصب هو انتي مش حاطه بكنج بودر ليه

صبرني يارب يقول...

فضفضه

ايه النور ده يا جميل

هو عموما اي عجينه لازم قبل الخبز تستريح ربع ساعه فعلا


وبالنسبه للبكنج

لا ممنوع منعا بتا وده الى بيخليها معاكي تفرط وما تبقاش خرط

خمسة فضفضة يقول...

السلام عليكم ورحمة الله وبركاته

هييييييييييييييييييه هيييييييييييييييه عملتها يا صبصب عملتها هههههههههههه

وطلعت ماشاء الله جميله

شوفي انا غيرت حاجتين اتنين عن كل مره كنت باعملها بيها زمان

اول حاجه طبعا الفرن والبوتاجاز كله:)

تاني حاجه قررت اني افتح طقم البايركس الاجديد اللي ركناه تحت السرير :))واعملها في القارب الكبير بتاعه

طلعت ماشاء الله واعتقد ان العيب كان من الفرن لان الاولاني ياما بوظلي حاجات مع اني كنت ببقي ملتزمه بالخطوات جدا

وكمان قارب البايركس مخلاهاش تلزق خالص وطلعت خرط جميله ومش متفرفته مع ان الدقيق اصلا كان عليه بيكنج بودر
استعملت الخلطه بتاع حلو الشام ( لان بتاع الدقيق الساده مش في سكتي وكان عاوز مشوار مخصوص) وحطيت عليها نص كوباية جوز هند كمان من عندي وزوقت الوش بلوز وبندق مفرومين

المره الجايه ان شاء الله هاشتري دقيق ساده يمكن تطلع احسن عن كده كمان ( طماعه انا )


تسلميلي يا قمر

سلام بقي

صبرني يارب يقول...

فضفضه

جميل الف هنا يا قمر


بس خلي بالك البكنج الى بيبقى مع خلطة البسبوسه بيبقى خفيف

مش زي ما تحطي انتى مثلا كيس يخليها تفرط منك

الف هنا يا قمر

ابوزيد يقول...

طلعت حلوة بس الشربات مكنش متخللها لجوا معرفش ليه يعنى موصلش لجوا اوى بس كانت جميله ويجعله عامر

صبرني يارب يقول...

ابو زيد

ازاي يعنى ما كانش متخللها

لا هو تلاقي الشربات كان قليل فاتشربته كله وبقى قلبها لسه ناشف

عموما الحمد لله اتكلت

الف هنا
ههههههههههه

ســـــاره يقول...

شكلها لذييييييييذة تسلم الأيادي :)

بس كنت حابة اسألك ..
مابتحطيش عليها بكنج بودر ؟

طيب معيار الكوب زي كاسة الجبنة الكبيرة؟

مرسي اوووي ليكي بجد :)

صبرني يارب يقول...

ساره

ساسو يا حياتي ايه النور ده

البكنج لا مش باحط بكنج ده بيخليها تفرط ما تطلعش خرط مصححه

وكاسة الجبنه اوك ماشي الحال

حنـــان يقول...

سلام عليكم

انا اتعرفت على المدونة صدفة.. صدفة سعيدة و حلوة .. و اكيد ستابع من هنا فصاعدا..

وصفة البسبوسة تووووحفة ..
انا جربت وصفات كثييييييييرة و لا مرة طلعت معايا .. دايما تطلع ناشفة كانها كيكة..

انا نحب نسالك كيفاش نعرف المقدار المناسب متاع القطر اللازم للبسبوسة
يعني امتى اعرف انها خلاص بقى القطر بتاعها كافي و موش عايزة خلاص..

شكراليكي ..
حنان من تونس..

صبرني يارب يقول...

حنان يا حبيبتى

معلش ما شوفتش التعليق الا دلوقتي صدفه

بصي يا جميل

المقدار الى انا عاملاه ده بياخد تقريبا كوبايتين شربات يعنى تقريبا نص لتر

نورتي يا جميل

المحبة في الله ندى يقول...

انا بعملها بس بخلط السميد بدقيق عادي معلش عندي سؤال متعرفيش طريقة المحوجة اة القرصة اصل ليها اسامي كتير