مربى الفراولة

سيداتي انساتي سيداتي   على راي ابو حفيظه

ازيكن والسلام عليكن ووحشتوني  نونه برضه عشان الوزن بس

اوطبعا طبعا الساده الرجال الى يشرفوا طبعا منورين القاعده والله شكلكم جايين تاكلوا بس

انتم عارفين ان انا احب واعز موت اعمل الحاجه فىموسمها

وحاليا فى موسم الفراوله

فكل واحده فيكم تروح تشتري قفص فراوله حلو كده وتيجى

عشان هانعملها مربى

اولا وباديء ذي بديء الصوره الى فوق دي انا لطشها من على النت مش من عندي

بس اوعدكم بارتفاع مستوى الصور بعد كده حيث اننى اشتريت موبايل جديد

بكاميرا 3.2 بكسل وهاشهيصكم صور

خلينا فى الفراوله يا رغايين

اول حاجه هانشتري الفراوله ما تكونش مستويه اوي وما تكونش خضرا برضه

حمرا كده ومصحصحه وفله

انا باحب فى المربى اعمل فراوله صغيره  عشان ما اقطعاش عشان تبقى قطع داخل المربى

لكن طبعا فى ناس بتحب الفراوله مقطعه ومهروسه شويه كمان فى  المربى حسب كل واحد وذوقه طبعا

شوفوا كده الفراوله بتاعتي دي

طبعا انا جبتها ونضفتها وغسلتها وزي ما انتم شايفين حجمها صغير اوي شوف كام واحده فى ايدي

سمعاكي يا كلبه اه انا ايدى كبيره بس مش للدرجه دي

المهم

تعالوا اقولكم الحاجات الى هانحتاجها عشان تجبوها

هانعمل المقدار كيلوا فراوله

ولو ان طبعا لو هاتعملي كتري شويه يعنى 3 كيلو على الاقل عشان تستاهل الدوشه يعنى

المهم

كيلوا فراوله ـ كيلو سكر ـ علبة جيلى فراوله  او معلقتين جيلى باودر خام

طبعا غسلنا الفراوله ووضبناها نجيب بوله بلاستك مثلا

ونحط فيها شويه سكر وبعدين شويه فراوله وبعدين سكر طبقات يعنى لحد ما الكميه تخلص ونغطي وشها من فوق بالسكر ونسيبها اد اربع خمس ساعات اوقات انا اعملها من بليل واسييبها فى التلاجه للصبح

هانصحى الصبح نلاقي شكلها بقى كده

سردت مايه كتير هانقلبها بعد كده فى مصفاه بقى وناخد المايه بتاعتها مش هانرميها طبعااااااااااااااااا

هاتبقى عباره عن مايه نازله من الفراوله ومعاها السكر

ونسيبها تصفى ساعه كده مثلا

فى هنا بقى حاجه لطيفه انا عملتها المره الى فاتت

انا ما باحبش الحاجه الى تبقى سكرها جامد جدا

وبعدين بعد التجارب بقى

واسأل نفسي يا ترى يا هلترى المربى الجاهزه بتبقى متامسكه ولونها فاتح ومش مسكره اوي زي البيتى ؟؟؟

وبعد تجارب بقى وصلت لنتيجه معقوله جدا

اولا السكر مش باحط الكميه كلها سكر

باستعمل عسل البطاطس وهو لزج جدا وسكره قليل

وده موجود عن بتوع لوازم الحلوانيه بالكيلو

بالتالي انا بانقع الفراوله بنص كيلو سكر بس وبعدين باضيف  نص كيلوعسل البطاطس بعدين

وكده هاتبقى المربى مش مسكره جاااااامد اوي وكمان عسل البطاطس لزج جدا لما يبرد هايديها تماسك

بس مافيش مشكله برضه لو ما لقتيش عسل بطاطس

حطي كيلو  الا ربع سكر كفايه ونزود الجيلاتين شويه عشان التماسك

نيجى للخطوه الى بعد كده

انا هاخد المايه الى نزلت من الفراوله

واحطها على النار زي الصوره دي ونسيبها تغلي لحد لما تنعقد زي الشربات بتاع الحلويات كده

واول ما تبدأ تعمل رغاوي اكتر من الصوره دي شويه تبقى كده خلاص استوت

لو كنا بقى عندنا عسل البطاطس وهانستخده هانزوده دلوقتي عشان يبدا يتغلط ويسيح مع شربات الفراوله الى عملناه

وهانروح نجيب الفراوله بقى بتاعتنا وسقطها فى شربات الفراوله المعقود ده

هاتبدأ تغلي الفراوله كده

وتبدأ تسرد مايه كمان زياده وتلاقي المايه فى الحله بدأت  تزيد

تاخدي نص كوبايه تقريبا مايه من على الفراوله وتدوبي فيها كيس الجيلي بالفراوله  او معلقتين الجيلاتين

ندوبها كويس اوي

وبعدين نزودها على الفراوله تاني ونسيب الفراوله تغلي

حوالي ساعه الا ربع لحد لما تبدأ مايتها تنشف ونخلي بالنا اوي

عشان احنا عايزنا تطلع لونها احمر مش بنى غامق

كل ما كانت لونها قريب للطبيعى تكون احسن

 وطبعا نهدي عليها النار ونكشف الحله عشان البخار يطلع وما تفورش على البوتجاز 

وكده هى خلاص استوت

طبها هايكون شكلها سايب لسه وشكلها مش المربى ما تتخضوش احنا حاطين فيها جيلاتين لسه هايجمد من التلاجه

غير ان السكر نفسه وعسل البطاطس لما بيبردوا بيدوا قوام اتقل بكتير

بالتالي احنا هانسيبها تبرد وبعدين لو كنا عاملين كميه هانعمبيها فى برطمنات ازاز بغطاء محكم ونحطها فى التلاجه افضل طبعا

لاننا مش مستخدمين مواد حاظه ولا حاجه

وكمان ناخد بالنا لو كانت كميه كبيره شويه اننا طول ما احنا بنعبيها نهز البرطمان عشان ما يبقاش في فقاقيع هوا جوا وده يخليها تبوط خصوصا لو هاتسبيها بره التلاجه شويه

كمان لو حصل ولقتيها بعد ما بردت وحطناها فى التلاجه لسه قوامها خفيف اوي فى حال انتى قدرتي غلط يعنى

مافيش مشكله رديها على النار تاني

ولو لقيتى الشربات بتاعها كتير اوي  اوقات الفراوله بتسرد مايه بزياده حسب نوعها

انا بقى اعز كده موت موت

لان باخد المايه دي من عليها واحوشها عندي واستخدمها صوص فراوله فى الحلويات والايس كريم يا لهوي بتبقى جميله جدا

والف هنا يا حلوين ويا حلوات

والى يجرب يقولي

والى عنده اضافات يتفضل

نرحب بالافكار الجديده  يا ساده

شوربة العدس

واخيرااااااااااا
اول بوست فى المقر الجديد
ومعلش يا واندا مش السمك  يا اختي على ما طلبية البياض توصل بس


وعارفه ان الناس الى فى مصر هايصوتوا فى وشي ويقلولي الجو بقى حررررررررر


شوربة عدس ايه فى الحر ده


اقولكم  الدنيا هاتبرد تاني يوم الاربع لعلمكم
ههههههههههههههههههههه


والبت واندا يا حبة عين مامتها هاتتجمد هناك يا عينى


فقلت ادفيها بشوية شوربة عدس


المهم يكون فى علمكم ان مريم هى الى عامله يومها شوربة العدس وكانت طالعه جميييييله بس مشطشطه موت


ولما لقتنى باصورها قالتلى يا ماما لما تنزليها على المدونه ابقى قولي ان انا الى عملتها


بنعمل ازاي شوربة العدس بقى


هحاول احط  مقادير
نقول كوباية عدس اصفر  زي الى فى الحله ده
ونغسلها طبعا
ونحط عليها  كوسايه  جزره  بصله  طمطمايه  وفصين توم  وطبعا كل ده متقشر ومتقطع

وبعدين نزوده مايه قولي خمس كوبايات مايه او شوربه

ونرفعها على النار
هتاخد حوالي 20 دقيقه  وطبعا ممكن اكتر وممكن اقل حسب الظروف  المهم تكون المكونات استوت وبقت بالشكل ده

وتختبري الخضار كمان يكون استوى كويس جدا


بعد كده هانسبه بس تهدى شويه ونضربها فى الخلاط كويس لحد ما تبقى شوربه زي كده

وبعدين بنرجعها تاني على النار ونحط عليها بقى الملح زي ما تحبوا ملحه

ولو لقيناه تقيل شويه نزوده مايه او شوربه لحد لما يبقى سمك الشوربه معقول

طبعا بنحط بهار

انا باحط فلفل وكمون وشطه خفيف

لو بتحبوا اي حاجه تانيه معاه اوك

ونسيبه على  النار يادوب يغلي  ما نغطيهوش نخلي بالنا لانه بيفور

وبعدين نسيبه بس خمس دقايق عشان الرغاوي على الوش  تروح

وفى ناس بتعمله كمان طاشة تقليه وتزودها عليها بدع ما يخلص خالص كده

يعنى بتحطي معلقة سمنه كبيره فى طاسه وتحمري بصله صغيره وفص توم  وبعدين تحطيهم على العدس وتقلبي وتهدي النار وتسبيه خمس دقايق بس على النار

بيبقى حلو برضه مش وحش

بس التقليه الحقيقه بتبقى  تقيله جداااااا ونار بقى يا معلم على صدرنا واحنا مش ناقصين

انا الحقيقه باعمله نى فى ني كده وباحبه كده

وبعدين نقلبه كويس قبل ما نغرفه لانه بيرسى لتحت

وعلى  السلطانيه دوغري  ويا سلام لونص لمونه وبالهنا والشفا  زي الصوره الى هناك فوق دي

فى ناس كمان تحب تعمله بالشعريه او بلسان العصفور

بيتحمري الشعريه او لسان العصفور فى معلقة سمن لحد ما تاخد لون اصفر

وبعدين تقلبيها على حلة العدس وطبعا تزوديه مايه لان الشعريه هاتشرب مايه وتخليه تخين

على فكره ماما بتعمل اوقات مع ال عدس فتة عدس بتبقى جميله اوي برضه

نفس طريقة  الفته العاديه

لكن بدل ما نزود العيش شوربه هانزوده عدس

ونسيبها تغلي خمسه بس والرز على وشها

بس مش بنعملها تقليه زي الفته الى بالخل والتوم

والف هنا يا قوم  والى يجرب يقولي

ام علي ...... يا عليييييي

السلااااااااام عليكم

ام علي يا واندااااااااا بتسلم عليكى والله

بصوا انا مصوره ام علي دي من السنه الى فاتت وفضلت اجلها لحد ما الصيف دخل قلت لا بقى دي عايزه البرد يا جدعان

وادي الشتا ده قرب يخلص وانا لسه باجل برضه عالم فاشله اخر حاجه

المهم بقى بناءا على طلب الجماهير

الى هما واندا السواحه

والبت شيما المخطوفه على راي فاتيما

والبت ام مريم نبر تو مش انا دي خليفتى فى الملاعب

فقلنا ننزلكم موضوع جديد

لايق على البرد والتجمد الى انا فيه حاليا فى الرسبشن بتاعي المتلج موت

لا لا مش زي التلج بتاعك يا وندا انتى غير يا ماما خليكى عايشه فى الفريزر حتى بعد الفريزر بشويه

اليكم يا حضرات ام علي

ام علي دي لها باكتس كده بتتباع فى السوق اشتريتها مره لقيتها حاجه تعبانه جدا مالهاش اي لازمه عباره عن شويه حاجات ناشفه كده ولو قديمه يبقى طعمها مش ولا بد ويادوب بالعافيه تعملي اربع اطباق

قوم انا قلت كلا الفته لا يمكن نشتغل فى الكلام الفارغ ده

وحاليا انا باعمل ام علي باي حاجه تقابلنى

اليكم الاتي وده بالترتيب من الاحسن

الفطير الفطير المشلتت العادي طبعا طبعا مش باعمله ما تحلموش انما انا عندي العيال بيحبوه فبنشتريه كتير والى بيبات منه ما بيتاكلش

انا باحوش البواقي دي ممكن فى الفريزر حتى لو الحكايه هاتطول وبعدين اول ما افتح الفرن لاي سبب اقوم مطلعه البواعي دي ومقطعها ومفرفراها كده وبعدين ادخلها الفرن عشر دقايق وبما ان الفطير بيبقى فيه سمن اصلا بتطلع بقى الدنيا محمصه وحمرا وزي الفل

لو مش هاستعملها فى والتو واللحظه باسيبها تبرد واعبيها فى كيس واسيبها فى التلاجه لحد ما احتاجها تبقى جاهزه على طول ما تاخدش عشر دقايق

وممكن كمان نعملها بالجلاش او بالرقاق وانا لما بيفيض اي حاجه من دول او حتى كسر منهم مش بارميه ولكن بالحقه على الفطير اياه برضه

لكن الجلاش والرقاق بقى مش بيبقى عليهم سمن فلازم نحط عليها معلتين ثلاثه سمن حسب الكميه كده ونقلبها عليهم او لو ورق الجلاش كامل احنا ندهن ورقه ورقه بفرشاه كده بالسمن وندخلها الفرن هما ثلاث دقايق وهاتلاقيها احمرت نطلعها على طول

ايا يكن

فان ام علي تعتمد على عجينه بنرقها جدا ونحمصها مع سمن فى الفرن قشطه كده ؟؟؟

يعنى حاجه زي الفته كده وادي شكلها بعد التحميص

بعد كده هانجيب اللبن طبعا هحاول جاهده انى احددلكم كميات عشان انا باعملها بالنظر

لو قلنا عندنا كوبايتين مثلا من الفطير المحمص او الجلاش المحمص فاحنا هنحتاج حوالي لتر حليب

هانسخن اللبن الحليب على النار ونحط عليه سكر مناسب حسب ما بتحبوا وفانيليا ولما يغلي على طول هسقط الفطير او الجلاش المحمص

ونقلب ونسيبه يغلي حوالي عشر دقايق مع التقليب عشان ما يلزقش ونكون مهديين النار عليه زي كده

لحد كده هى ممكن تبقى تمام

لكن انا فى حاجه باعملها لانى ما باحبش ام علي تكون سايبه اوي كده ويبقى فيها لبن لو لقتيها سايبه معاكي اوي تدوبي معلقة نشا فى معلقتين مايه وتزوديهم وهى بتغلي كده فى الاخر هاتلاقيها مسكت شويه وبقت تمام

انا الحقيقه مش باحبها تبقى مكتومه اوي يعنى كلها فطير او جلاش فبحب اسيبها حبه واحطلها معلقة النشا دي بتظبط الدنيا كويس

بعد كده بقى نجيب الطواجن الصغيره او ممكن نستخدم سلاطين بايركس او بورسلين اي حاجه بتستحمل الحراره يعنى ونوزع عليها الخليط الى عملناه فوق ده ونحط على الوش بقى مكسرات او فول سوداني او مش مهم خالص زي ما بتحبوها

ومعلقة قشطه كبيره

او بشر زبده زي الصوره دي كده حسب ما تلاقي عندك بس القشطه الصراحه بتبقى اجمل

اهو صوره دي بالقشطه عشان ما تزعلوش نفسكم

طبعا بما انى مش عامله طبق واحد هانرص كل الاطباق على صنيه واحده وندخلها الفرن بس الشعله الى فوق الشوايه يعنى لمده عشر دقايق فقط

ونحط الصنيه فى الرف الوسطاني حتى بانزله ساعات تحت شويه

فى ناس بتحمرها بالنار كده سريعا من فوق مش فاكره اسم البتاع ده يا اخويا الزهايمر اشتغل مش مهم

لكن انا باحبها اكتر تدخل الفرن شويه بتمسك نفسها وتاخد لون حلو

وبس على كده تطلع بقى حمرا وبتزغرت كده يا اخواتي وتتاكل فووووووووووورا عشان تدفي

وباقدم اعتذاراتي على الصور والله انها مش حلوه لا الموبايل بتاعي بيصور كويس ولا البرنامج الى كنت باشتغل عليه يظبط الصور راضي يشتغل

والف هنا يا جودعان وطبعا بعد ما الواحد يضرب طبق ام علي الي فوق ده هايلاقي وشه ضرب احمر فى زرتقاني وينام بقى للصبح فى التمام

والى يجرب يقولي بلاش ندااااااااله

القلقاس

واخيرااااااااااااااا وبعد طوووووووووول انتظار القلقاااااااااااااااس يا واندا

يا سلام الواحد حاسس ان القلقاس حمض فى اديه

القلقاس ده يا جماعه من الطبخات الى بتتعمل بمليون طريقه وكل بلد لها طريقه شكل بل وكل عيله لها طريقه شكل لكن الحقيقه انا ما باحبش اي طريقه منهم الا الطريقه بتاعتنا والى علمتهالي كانت تيته الله يرحمها كانت استاذه الحقيقه فيها

المهم طبعا احنا المره الى فاتت قلنا ازاي نقشر القلقاس ونقطعه ونخزنه فى الفريزر وهكذا يبقى جاهز للطبخ فورااااااا

وممكن طبعا يبقى فريش عادي زي الى فى الصوره ده

الموضوع بقى المهم فى طبخ القلقاس هو تقلية القلقاس

مكونات التقليه دي يا اعزائي المطبخين الكرام

عباره عن كسبره خضراء وتوم

فى ناس بتحط ورق سلق وفي ناس بتحط بصل

لكن الحقيقه انا باحبها بكسبره خضراء وتوم

بنغسل الكسبره الخضراء ونقطعها صغير وتكون متصفيه كويسه من المايه

والتوم كذلك بنقطعه او نهرسه بالسكينه المهم نعمل اختراق للقشره الخارجيه

ونيجى فى طاسه كبيره ونحط كميه من السمنه مناسبه عشان نحمر فيها الكلام ده ولما السمنه تسخن نحط الكسبره والتوم زي الصوره دي كده بالظبط

وهانفضل بقى نقلب فيها على النار وبالتدريج كده هاتفضل تدبل الكسبره وتسرد مايتها واحنا بنقللللللللب برضه


وبعد كده المايه هاتنشف ونبدأ نحمر بقى الكسبره زي الصوره دي كده ولاحظوا معايا تدرج الالوان كده

لما نوصل بقى ان شاء الله للون البنى ده وساعتها واحنا بنقلب هاتلاقي الكسبره لها صوت خرفشه كده وده معناه انها نشفت وبقت تمام

معلش هى الصوره طبعا مش واضحه اوي لكن المهم اننا بنطلعها لونها بني غامق زي بصلة الكشري كده

وبعد كده بنسيبها تبرد شويه وبعدين بنحطها فى الكبه او المفرمه او وات ايفر ونفرمها فطلع عامله زي المعجون زي الصور دي كده

الحقيقه موال رخم جدا وبيبهدلي المطبخ عشان كده انا باجي فى الشتا وبتكون الكسبره كتيييييييره فى السوق اجيب عشره خماشر ربطه كده

واعمل بقى كميه كبيره من التقليه وبعدين اقسمها فى ورق سلفر كده الحته على اد الطبخه واطبقها واحفظها فى الفريزر بحيث ساعة الاستعمال اخدها كده جاهزه من الفريزر بتبقى حاجه جميله جدا

كده تقليتها جاهزه والحمد لله

ندخل على الطبيخ بقى

القلقاس يستحسن ويفضل انك تخزنيه فى شهر يناير او بالاحرى شهر طوبه لانه بعد كده بيبقى بينشى ورخم وقبل كده بيبقى سواه وحش اوي

طيب لو كان القلقاس من النوع الى بينشى او حتى مش بينشى اوي لكن انتى هاتطبخيه مثلا وهاتتغدوا بعد ساعتين ثلاثه

فى هاذوها الحاله لازم تاخدي القلقاس غلوه الاول فى شوية مايه وبعدين ترمي المايه ويا حبذا لو تحطي فى المايه معلقة طماطم او نقطتين لمون

الاول بنغلي المايه وبعدين نسقط فيها القلقاس ويادوب يغلي اربع خمس دقايق وبعدين نصبه فى مصفاه ونغسله بمايه بارده لحد ما المايه اللازجه دي تروح منه

بعد كده بقى نرجعه الحله تاني ونحط عليه شوربه ونص كوباية عصير طماطم او معلقة صلصه ونسيبه يغلي

ولحد ما يستوى بقى مش هياخد سوى كتير ان شاء الله يادوب ربع ساعه كده هايكون استوى تماما وطبعا نطلع قطعه نجربها مش عايزينه يتهري من فضلكم

بعد كده هناخد معلقه كبيره من التقليه الى احنا عملناها فوق دي ونحطها على القلقاس زي الصوره دي كده

ونقلب ويادوب يغلي ونظبط ملحه ونطفي عليه خلاص

ما نحطش التقليه من بدري عشان تفضل على لونها ما تبهتش

وبعد كده يكون القلقاس بهذا الشكل العظيم المريع وبالف هنا يا قوم

أي خدمه يا وندا مش عارفه من غيرى كنتم هاتكلوا قلقاس ازاي

تخزين الخضار والفاكهه.. بسله وقلقاس وفراوله

السلاااااااااام عليكم

ايه رايكم فى المدونه كده يا قوم

طلعت عينى بصراحه برضه انا باستهبل وقاعده الف واعمل حاجات ماليش فيها يلا مش مهم ادينا بنتعلم فيكم

بس لو حد يعرف ازاي اشيل طابخين ايه النهارده الى فوق يقولي والنبى عشان انا مش عارفه اشيلها طلعت روحي

هى الى فوق دي تبع التمبلت نفسه انما الى تحت من ضمن البانر

ما علينا

واندا حبيبتى طلبت مني قلقاس

طبعا تحت امرك يا جميل بس النهارده هانشرتي ا لقلقاس بس ونجهزه مع باقي الخضار

وهانزلهولك عنيه المره الجايه بقى طبخه

طبعا احنا دلوقتي فى الشتاء وعايزين نخزن خضار الشتا بقى زي ما عملنا فى الصيف وخزنا باميا وملوخيه وبتنجان

النهارده هانخزن بسله وقلقاس وفراوله

اول حاجه البسله

سهله اوي طبعا فى بسله مجمده فى السوق كتير بس بصراحه ما بتبقاش اد كده والبسله الى بتتباع مفرطه جاهزه انا جربتها برضه ما كانتش اوي لانهم بيفرطوا البسله الناشفه الى مش تمام

بس الحقيقه تفريط البسله ده بالنوسبه لي عذاب الحقيقه ما باحبش الشغل المفقعه الى هو نقعد ساعتين قدام الشغلانه وكده

المهم هانجيب البسله وننقيها تكون خضرا ومنعنعه ونفتح منها كده واحده نشوفها مليانه ولا فاضيه وندوقها نشوفها مسكره وطريه ولا ناشفه ومالهاش طعم

بعدين نفرط البسله ونغسلها ونصفيها فى مصفى كده

وبعدين نحطها فى حله على النار مع ربع كوباية مايه لو الكميه قليله زي دي يعنى ومافيش يعنى عشر دقايق كده ونقلبها (ننطقها بالحله كده)

وناخد بالنا احشن المايه تنشف وتتحرق ا لبسله وجوزك يجى يعضك

المهم ربع ساعه بالكتير ونقفل عليها هاتكون استوت نص سوى

ونسيبها تبرد ونعبيها فى اكياس ونحطها فى الفريزر (اعملوا الاكياس زي ما علمتكم فى بوست التلاجه )

نقول تااااااني

نحط كميه على استخدام مره بحيث تكون حوالي نص الكيس يعنى كبري الكيس بقى على حسب ومش نربط الكيس لا نطبه ونتنيه لفوق بس عشان نخلي الكيس مسطح زي الفراوله الى تحت كده

عشان نسيت اصور البسله

وممكن كمان نعمل مع البسله جزر قبل ما نحطها على النار وتبقى جاهزه بقى على الطبيخ على طول من الفريزر على الحله دوغري

فى ناس بتخزن البسله من غير ما تسويها بس الحقيقه انا جربتها لقيت طعمها بيبقى متغير شويه وما عجبتنيش

وبس خلاص

ننتقل الى القلقاس يا واندا

ركزي بقى

ادي صورة القلقاس المصري يا جدعان

احنا هانقشره كده وبعدين قبل ما نقطعه ممكن نغسله بس ننشفه كويس اوي بفوطه ناشفه ونضيفه

بس المشكله انه لما بيتغسل بيزحلق شويه فى التقطيع فى ناس مش بتغسله وبتمسحه بس بفوطه نضيفه بس قلبي ما بيجبنيش
المهم ننشفه كويس عشان ما يتزحلقش مننا واحنا بنقطعه

بعد كده نقطعه مكعبات يعنى سم *سم مثلا على اد بؤكم يعنى ههههههههههههههههههههه
كل ما ماما او حماتي ياكلوا عندي قلقاس لازم يتريقوا على قلقاسي عشان القطع كبيره طبعا باقطع كبير عشان اخللللللص ماليش روح انا
ههههههههههههههههههههه
المهم هانقطعه الاول دواير وبعدي كده بالطول نقطعه وبعدين نقطعه تاني بالعكس فيطلع مربعات ودي اسهل طريقه على لوحة التقطيع
ويبقى شكله ده

معلش الصور اي كلام هارمي الموبايل ده ان شاء ا لله

وبعد كده نعمله اكياس ونحطه فى الفريزر من غير ما نسويه ولا حاجه ونطلعه من الفريزر على الحله على طوووووووول مش نسيبه يفك

فى ناس بتسلقه الاول بس انا مش باحب اعمل كده اطلااااااقا بيبقى ملزق وغامق وبايخ موت


نيجى للفراوله

ياختي عليها حمرا وجميله
دلوقتي فى فراوله كتير فى السوق والفراوله من الفاكهه الحلوه اووووووي
فى الاكل والعصير والمربى وكتير باحتاجها فى غير موسمها او فى وقت ما ينفعش حد ينزل يجيب
لو باعمل سلطة فواكه ولا تورته وعايزه ازوقها كده يعنى
وكمان لو مخزناها للعصير بتنفع جدا فى حال جالي ضيوف فجاه مثلا وما اكثرهم عندي

الفراوله طبعا ناخد بالنا ننقيها مش كبيره اوي عشان الكبيره بتبقى مالهاش طعم
وتكون سليمه ومش حامضه ومش خضرا وبالورده بتاعتها
هانجيبها ونغسلها كويس لو هناكلها فى ساعتها ممكن بالسكينه ونشيل الورده ومنبتها
اما لو هاتحطيها شويه فى التلاجه او هاتخزنيها شيلى الورده بايدك بس عشان ما تسردش مايه او تحمض لو فى التلاجه
تبقى زي كده

لو هانخزنها عشان عصير يبقى عادي نحطها على بعضها فى كيس وزي ما علمتكم بقى انتم عارفين

بس انا عاده وانا باغسل الفراوله انقي كدا شويه الى شكل الفراولايه وحجمها مثالي لا صغيره اوي ولا مبعجره ولا شكلها عجيب

ماهو فى حاجات غريبه كده فى السوق الايام دي الله اعلم احنا بناكل ايه

المهم بانقيهم كده مثاليين واسيب الورده بتاعتهم فيهم عشان الورده بتخليها تحتفظ اكتر بشكلها وباحطها في كيس بحيث الفراوله تبقى جمب بعضها مش لازقين فى بعض ولا فوق بعض زي الصوره دي كده

وده بقى باشيله على جنب فى الفريزر عشان لو احتاجته فى تزيين او فروت سلاد لو تجميد الفريزر بتاعك حلو هاتطلع الفرولايه محتفظه بشكلها نسبيا (ساعات الكيس ده بيفك معايا ازمه )

بس خلاص يا حلوين

المره الجايه بقى وعليكم خير نطبخ القلقاس لواندا

تورتة بالشيكولاته .... كل سنه وانتى طيبه يا ستيته (تحديييييث)

تحدثيييييييييث

اكتشفت ان امبارح كان عيد ميلاد نواره كمان والنبى ما كنت واخده بالي مع ان ستيته قالت بس السن بقى انتم عارفين

وعيد ميلاد مدونة عاشقة الرومانسيه كمان

حتى امبارح اخر الليل اكتشفت انه عيد ميلاد عمي

الله هى الدنيا كلها هاتتلم على التورته ولا ايه يا ستيته

مش معقول كده بقى

ههههههههههههههههههههههههههه

كل سنه وانتم طيبين جميعا ويارب سنه سعيده عليكم

***********************************************************************

كل سنه وانتى طيبه يا ستيته يا حياتي

انا عملتلك تورتايه مخصوص من الى انا باحبها واموووووووت فيها ووالشمع اهو كماااااان

ويارب عقبال ميت سنه وانتى بصحه وعافيه وهنا يارب

طبعا عشان ما حدش يقولي بتخمي ومش قلتي الطريقه

هى سهله جدا جدا

اولا هانحتاج 2 مقدار من الكيكه بالشيكولاته الى عملناها سوا المره الي فاتت

او اي مقدار كيك تحبيه او كيك اسفنجي

بس انا باحب الكيكه بتاعتي دي

هانعمل المقدارين فى صنيتين مدورين متوسطين الحجم او كبار بس يكونوا اد بعض

بعد كده هاعمل كريم شانتيه كتير شويه يعنى يجى اربع كوبايات كده كريمه شوفي بقى دول يبقوا بودره ادي ايه قولي اربع اكياس خمسه كده

ولو بالمعلقه قولي عشر معالق كبار مليانين

وتعملي الكريم شانتيه وتسبيه فى التلاجه

وطبعا الكيكه احنا عملناها وسبناها تبرد وطلعناها من الصنيه بتاعتها ونشق كل صنيه بالعرض عشان نحشيها يبقى كده عندنا اربع طبقات من الكيك

ولو مش عايزين نعمل كده ممكن نخليهم طبقتين بس ولا نقسم ولا حاجه وهاتبقى حلوه برضه بس نزود الكريم شويه فى النص

طبعا بين كل طابق والتاني من الاربع هانحط كريمه بكفايه وما نضغطش اوي عشان الكريمه ما تدخلش فى المسام وتبقى شكلها مش لطيف

بعد كده نكون مظبطين التورته وبعدين نخطيها كلها بالكريمه من كل النواحي ونساوي الجناب كويس ما تنسوش وهاتبقى شكلها كده

اه نسيت اقولكم ان هانغطي الجوانب ببشر الشيكولاته زي الصوره الى فوقيا دي

بش الشيكولاته فى التورتايه دي هانحتاج منها نوعين

نوع نعمله بالمبشره العاديه وبيكون ده شويه ناعم ينفع نغطي به التورتايه كلها عموما وهانبدا الاول بالجوانب نغطيها كويس وده بيدى ثبات اكتر لشكل التورته

بعد كده نرش كمان على وض التورتايه بشر شيكولاته من الى عملنا بالمبشره ده بس مش كتير زي الجوانب عشان لسه هانشتغل عليه

بعد كده هنعمل وردات ونزينها بالكريز المعلب او فراوله طازه حتى تمشي برضه (بس لو فراوله لازم نحطها فى شربات شويه او نلمعها بالجيلى عشان ما تطفاش وتسرد مايه )

ركزوا بقى فى الشيكولاته الى على الوش دي انا عملتها ازاي





دي ما تنفعش بالمبشره العاديه





اولا الشيكولاته لازم تكون مش جامده اوي ما تكونش فى التلاجه وباعمل ده بالمقشره عارفين المقشره بتاعة البطاطس ؟



ايوه بالمقشره دي وباعملها تطلع شكلها زي لحاء الشجر كده





اهو يا ستيته شايفه التشبيهات ؟؟ لحاء شجر عشان تعرفي ان التورته دي تبعك





ونرشها بالراحه عشان ما تتكسرش وتكون شكلها كده وده فى الاخر خالص





وتطلع التورته زي الى فى الصوره دي





بالزمه مش سهله اوي ؟؟





كل سنه وانتى طيبه يا ستيته يا جميله باحبك والله اوي





ودي الهديه بقى يا جميل



جبتلك شويه تنقي منهم الى انتى عايزاه



بس مش تاخديهم كلهم بقى عشان باقي المدونين كل عيد ميلاد واحد ياخد واحده

ولا اقولك خديهم كلهم وبعدين تفرج يا موناستيته يا جميله انتى